Ajilanic 4 - Quiché Bible

Ri qui chac ri aj levitib

¹ Ri Ajawaxel xutzijobej ri Moises rachil ri Aaron, xubij c'u chque:

² “Chabana' jun ajilanic, pa ri qui cholajil tak ri u k'ab achalaxic xukuje' pa ri qui cholajil jujun tak ja winak, chque ri aj levitib ri e rija'lil ri Coat

³ ri e c'o chic chupam ri juwinak lajuj (30) c'ä catakwinak lajuj (50) qui junab, ri xukuje' e utz tak che ri patanijic chupam ri Lic'om Rachoch Dios re rikoj ib.

⁴ Ri qui chac ri e rija'lil ri Coat sibalaj tastalic, are ri catakex u bixic:

⁵ Aretak ri tinimit cäwalij che u takexic ri u be, ri Aaron e rachil ri e u c'ojol caquesaj na ri ch'ukubal ri c'o chuchi' ri oquibal chupam ri k'ijilabal are c'u cuch'ukubej re ri caxa re ri c'ulwächinic.

⁶ Queya' c'u na ri je'licalaj tak tz'um puwi' che u ch'ukic, puwi' c'u wa' calic' na jun quem morato re xa jun u wäch, quicoj c'u na ri quieb balul che u telexic bic.

⁷ Xukuje' cälic' jun quem morato puwi' ri mexa re ri wächbal, puwi' c'u wa' queya' wi tak ri liq'uilak tak lak, ri paq'uebal, ri kumubal tak ri xaru' tak ri quebajwataj chque tak ri sipanic re ri u wa'l uva, xukuje' ri caxlanwa ri quechi'x amak'el.

⁸ Puwi' ronojel wa' cälic' na jun quiäk quem, cach'uk c'u na ruc' jun ch'ukubal que je'lalaj tak tz'um, quebicoj c'u tak ri balul che u telexic bic.

⁹ Quic'am c'u jun quem morato quich'uk c'u na ri tzuc'ulibal ruc' wa', ri quetzij wi ri k'ak' e je tak, ri chapbal e je tak, ri e alaj liq'uilak tak weyebal xukuje' e je tak conojel ri chaconisan ri quebajwataj che ri aseit.

¹⁰ Ronojel wa' quebipis chupam jun ch'ukubal que je'lic tak tz'um quiya' c'u puwi' jun ch'atum che' che u telexic bic.

¹¹ Xukuje' quilic' na jun quem morato puwi' ri porobal re k'an puak, quipis c'u na pa jun ch'ukubal que je'lalaj tak tz'um quebicoj c'u balul che u telexic bic.

¹² Quebimulij c'ut ri chaconisan ri quecoj che ri patanijic chupam ri k'ijilabal quebiya' c'u chupam jun quem morato, quebipis c'u chupam jun ch'ukubal que utzalaj tak tz'um quebic'am c'u na bic puwi' jun ch'atum che'.

¹³ Rajawaxic quijosk'ij ri xepo xukuje' ri chaj ri c'o che ri porobal, quich'uk rij ruc' jun quem re morato.

¹⁴ Puwi' quebiya' wi ronojel ri cacoj pa ri patanijic re ri k'ijilanic puwi' ri porobal: ri queya' wi rachak tak k'ak', ri e ch'ipibal tak ti'j, ri e paq'uebal, ri nimak tak lak; conojel c'u ne ri e u chaconisan ri porobal. Che c'u ronojel wa' qui coj na jun ch'ukubal que je'licalaj tak tz'um xukuje' tak ri balul che u telexic bic.

¹⁵ Aretak ri Aaron e rachil tak ri e u c'ojol qui q'uisom chic qui pisic conojel ri tastalicalaj tak jastak, e suc'umatal chi c'ut che u takexic ri qui be, cuya' quepe ri e rija'lil ri Coat che qui telexic bic tak we jastak ri'. Mäquinak c'u jun tastalicalaj jasach ruc' ri qui k'ab, rech man quecäm taj. Conojel c'ut we jastak ri' ri e rech ri Lic'om Rachoch Dios re rikoj ib e are' tak wa' ri rajawaxic quequitelej bic ri e rija'lil ri Coat.

¹⁶ Ri Eleazar (ri u c'ojol ri cojol tabal tok'ob, ri Aaron) are carilij ri aseit ri cäya' chquipam tak ri catzij wi ri k'ak', ri k'ol ri c'oc'arisam, ri c'äj tak chque tak ri sipanic ri amak'el che chi'x ta chwe, xukuje' ri aseit. Xukuje' cuchajij na ri k'ijilabal xukuje' ronojel ri c'o chupam, junam xukuje' conojel tak ri e tastalicalaj tak u chaconisan.”

¹⁷ Ri Ajawaxel xutzijobej ri Moises rachil ri Aaron, xubij c'u chque:

¹⁸ “Miya' c'olbal chi ri e u k'ab rachalaxic ri Coat cäsach ta qui wäch chquixo'l ri aj levitib.

¹⁹ Rech man cäc'äjisax ta qui wäch ruc' ri cämical rumal ri qui chapic ri tastalicalaj tak jastak, quibana' ba' ri quinbij: Ri Aaron xukuje' ri e u c'ojol e are' quebin na chque chquijujunal ri caquiban na xukuje' ri c'utum chuwäch chi cutelej bic.

²⁰ Jeri' ri e are' man c'o ta jok'otaj queboc ta che qui ca'yexic ri tastalicalaj tak jastak mawi c'u ne quecäm ta na.”

²¹ Ri Ajawaxel xutzijobej ri Moises xubij c'u che:

²² “Chabana' jun ajilanic pa ri qui cholajil tak ri e u k'ab achalaxic xukuje' pa ri qui cholajil ri jujun tak ja winak, chque ri rija'lil ri Jerson

²³ ri e c'o chic juwinak lajuj c'ä catakwinak lajuj qui junab, ri xukuje' e utz tak che ri patanijic chupam ri Lic'om Rachoch Dios re rikoj ib.

²⁴ Ri qui chac ri rija'lil ri Jerson are ri cätakex u bixic:

²⁵ Rajawaxic quequitelej tak bic ri k'atibal re ri k'ijilabal, ri Lic'om Rachoch Dios re rikoj ib, ri ch'ukubal que utzalaj tak tz'um ri queya' puwi', ri k'atibal ri cäcoj che ri u chi' ri oquibal chupam ri Lic'om Rachoch Dios re rikoj ib,

²⁶ ri e k'atibal re ri uwo ja, ri k'atibal re ri oquibal chupam ri uwo ja ri u sutim rij ri k'ijilabal xukuje' ri porobal, ri e u colob tak ri quebajwatajic xukuje' ronojel tak ri chaconisan ri quebajwataj che ri qui patanijic xukuje' che ri qui chac.

²⁷ Ri Aaron e rachil tak ri e u c'ojol e are' quec'amow na qui be ri e u c'ojol ri Jerson pa tak ri chac ri quequiban na xukuje' ri jastak ri quequitelej tak bic. Ix quixjachow pa qui k'ab ri quequibana' na.

²⁸ Are patanijic wa' ri caquiban na ri e rija'lil ri Jerson ri caquiban na chupam ri Lic'om Rachoch Dios re rikoj ib, chuxe' ri u takanic ri Itamar (ri u tat ri Itamar are' ri Aaron, ri cojol tabal tok'ob).

²⁹ Xukuje' chabana' jun ajilanic chque ri e rija'lil ri Merar, pa ri qui cholajil tak ri achalaxic xukuje' pa ri qui cholajil ri jujun tak ja winak.

³⁰ Chebatz'ibaj ri qui bi' conojel ri e c'o chic juwinak lajuj xukuje' c'ä catakwinak lajuj qui junab, ri u bixic, ri e utz che ri patanijic chupam ri Lic'om Rachoch Dios re rikoj ib.

³¹ Ri qui chac che ri Lic'om Rachoch Dios re rikoj ib are' ri qui telexic bic tak ri e u tz'alamil ri k'ijilabal, ri e tak balul, ri e tak akan, ri e tak tac'alibal,

³² ri e akan tak re ri uwo ja ri quesutin rij ri k'ijilabal, e rachil tak ri e u tac'alibal, ch'ic tak xukuje' tak ri tanibal xukuje' ronojel ri cäpatanij che ri chac. At catbin na chque chquijujunal ruc' tz'akatil jachique tak ri jastak ri quequik'axej na.

³³ Are' chac wa', ri cäban pa ri Lic'om Rachoch Dios re rikoj ib, ri cacanaj pa qui k'ab ri e achalaxic ri e ija'lil ri Merar ri cabantaj c'ut chuxe' ri u takanic ri Itamar (ri u tat ri Itamar are' ri cojol tabal tok'ob ri Aaron).”

³⁴ Ri Moises, ri Aaron xukuje' ri e c'amal tak u be ri tinimit xquiban jun ajilanic, pa ri qui cholajil ri achalaxic xukuje' ri jujun tak ja winak ri e elinak chque ri e rija'lil ri Coat

³⁵ ri e c'o chic chupam ri juwinak lajuj c'ä catakwinak lajuj qui junab, ri e utz che ri patanijic chupam ri Lic'om Rachoch Dios re rikoj ib,

³⁶ e are tak c'ut ri achijab ri ajilatajinak e quieb mil ruc' wukub sient cawinak lajuj (2,750) chnimalaj conojel.

³⁷ Are wa' ri cajilabal ri e rija'lil ri Coat ri cuya' quepatanij chupam ri Lic'om Rachoch Dios re rikoj ib, je jas ri u cholajil ri ajilanic ri xuban ri Moises rachil ri Aaron je jas ri takanic ri u yo'm ri Ajawaxel che ri Moises.

³⁸ Ri e rija'lil ri Jerson pa ri u cholajil ri u k'ab tak achalaxic xukuje' pa ri qui cholajil ri jujun tak ja winak,

³⁹ ri e c'o chic chupam juwinak lajuj (30) c'ä catakwinak lajuj (50) qui junab ri e utz che ri patanijic chupam ri Lic'om Rachoch Dios re rikoj ib,

⁴⁰ e quieb mil ruc' wakib sient juwinak lajuj (2,630).

⁴¹ E are wa' ri xebajilaxic ri e elinak chque ri e u c'ojol ri Jerson ri cuya' quepatanij chupam ri Lic'om Rachoch Dios re rikoj ib, jas ri u cholajil ri ajilanic ri xuban ri Moises rachil ri Aaron rumal ri u takanic ri Ajawaxel.

⁴² Ri e rija'lil ri Merar, pa ri qui cholajil ri achalaxic xukuje' pa ri qui cholajil ri jujun tak ja winak,

⁴³ ri e c'o chic chupam ri juwinak lajuj (30) c'ä catakwinak lajuj (50) qui junab ri e utz che ri patanijic chupam ri Lic'om Rachoch Dios re rikoj ib,

⁴⁴ e oxib mil ruc' quieb sient (3,200).

⁴⁵ Are wa' ri cajilabal ri e rija'lil ri Merar ri cuya' quepatanij chupam ri Lic'om Rachoch Dios re rikoj ib, je jas ri ajilanic ri xuban ri Moises rachil ri Aaron je jas ri takanic ri u yo'm ri Ajawaxel che ri Moises.

⁴⁶ Ri cajilabal ri aj levitib chnimalaj conojel ri xebajilax rumal ri Moises, ri Aaron xukuje' ri e c'amal tak qui be ri aj israelib, pa ri qui cholajil tak ri achalaxic xukuje' pa ri qui cholajil tak ri jujun tak ja winak,

⁴⁷ ri e c'o chupam ri juwinak lajuj (30) c'ä catakwinak lajuj (50) qui junab ri e utz c'u che ri patanijic chupam ri Lic'om Rachoch Dios re rikoj ib,

⁴⁸ e wajxakib mil ruc' job sient jumuch' (8,580).

⁴⁹ We ajilanic ri' xbanic jacha' ri takanic ri u yo'm ri Ajawaxel che ri Moises, xbix c'u chque chquijujunal jachique ri caquiban na xukuje' ri quequitelej tak na bic, jacha' ri takanic ri u yo'm ri Ajawaxel che ri Moises.