Ajilanic 34 - Quiché Bible

Ri e u c'ulbatil ri ulew

¹ Ri Ajawaxel xutzijobej ri Moises xubij c'u che:

² “Chaya' quibixic we jastak ri' chque ri aj israelib: Chanim quixoc na pa ri ulew re Canaan. Are c'u ulew wa' ri cux na iwech, e are c'u tak u c'ulbatil wa':

³ Ri c'ulbatil pa ri mox k'ab cäc'ulbatin na ruc' ri chaki'j uwo sak re Zin xukuje' ruc' ri rulew ri Edom. Cätakenic cäbe pa ri elebal k'ij, ri c'ulbat cächaptaj na chu chi' ri u mox ri Cäminak Cho,

⁴ catakenic cäbe pa ri mox k'ab quetakal c'ä pa ri pakapic re Acrabim, coc'ow na pa Zin copan c'u na c'ä pa Cades-barney. Cätekextan c'u pa Hasar-adar quetakal c'ä pa Asmon,

⁵ quel pa Asmon cätaken c'ä ruc' ri alaj nima' ri cac'ulbatin ruc' ri Ejipt, queq'uis u tza'm c'ä chuchi' ri plo ri Mediteran.

⁶ Ri c'ulbat pa ri kajebal k'ij cac'ulbatin ruc' ri u tak'aj ri plo ri Mediteran.

⁷ Che ri c'ulbat pa ri iquiak'ab, chicojo' jun c'ulbat cachaptaj bic ruc' ri plo ri Mediteran quetakal c'ä pa ri juyub Hor,

⁸ cachaptaj chubic ruc' ri juyub Hor quetakal c'ä chuchi' ri oquibal re Hamat, cätakextan c'u c'ä pa Zedad.

⁹ Kas pa Zedad, we c'ulbat ri' re iquiak'ab catakenic copan c'ä pa Zipron queq'uis c'ä pa Hazar-enan.

¹⁰ Che ri c'ulbat pa elebal k'ij, chicojo' jun c'ulbat kas pa Hazar-enan c'ä pa Sepam,

¹¹ quel pa Sepam copan pa Ribla, pa ri elebal k'ij che ri Ain; chila' cächaptaj bic ri c'ulbat cakaj bic pa ri xcutaj che ri elebal k'ij che ri cho Sineret,

¹² cätaken c'u pa ri nima' Jordan quetakal c'ä chupam ri Cäminak Cho. We c'ulbat tak ri' e are' ri u q'uisbalil ri iwulew.”

Ri u jachic ri ulew

¹³ Ri Moises xebuya' tak we takanic ri chque ri aj israelib: “Are ulew wa' ri qui jacha' chiwäch cumal taklebenic; are ri ulew ri u yo'm wi takanic ri Ajawaxel chi cäya' chque ri belejeb amak' ruc' pa niq'uiaj ri c'ä maja' caya' culew,

^14-15 e quieb amak' c'ut ruc' pa niq'uiaj, ri u bixic, ri ramak' ri Ruben xukuje' ri ramak' ri Gad xukuje' ri pa niq'uiaj rech ri Manases, xc'amtaj ri culew ri ya'tal chque ri jujun tak ja winak, pa ri elebal k'ij che ri Jordan, ri c'o chuwäch ri Jerico.”

¹⁶ Ri Ajawaxel xutzijobej ri Moises xubij c'u che:

¹⁷ “Ri quebejachow ri ulew chiwäch are' ri Eleazar ri cojol tabal tok'ob cärachilaj ri Josue (ri u tat ri Josue are' ri Nun).

¹⁸ Chisiq'uij xukuje' jun c'amal be re jujun amak', che u jachic ri ulew.

¹⁹ Ri achijab ri rajawaxic quebisiq'uij e are' tak wa': Che ri rech ri ramak' ri Juda: ri Caleb (ri u tat ri Caleb are' ri Jepon).

²⁰ Che ri rech ri Simeon: ri Semuel (ri u tat ri Semuel are' ri Amihud).

²¹ Che ri rech ri Benjamin: ri Elidad (ri u tat ri Elidad are' ri Quixlon).

²² Che ri rech ri Dan: ri c'amal be Buqui (ri u tat ri Buqui are' ri Jogli).

²³ Chque ri camak' ri e u c'ojol ri Jose: ri c'amal be Haniel (ri u tat ri Haniel are' ri Epod) che ri rech ri Manases;

²⁴ are' c'u ri c'amal be Kemuel (ri u tat ri Kemuel are' ri Siptan) che ri rech ri Eprain.

²⁵ Che ri rech ri ramak' ri Zabulon: ri c'amal be Elizapan (ri u tat ri Elizapan are' ri Parnac).

²⁶ Che ri rech ri Isacar: ri c'amal be Paltiel (ri u tat ri Paltiel are' ri Azan).

²⁷ Che ri rech ri Aser: ri c'amal be Ahiud (ri u tat ri Ahiud are' ri Selom).

²⁸ Che ri rech ri Neptali: ri c'amal be Pedael (ri u tat ri Pedael are' ri Amihud).”

²⁹ E are' tak wa' ri xebutak ri Ajawaxel che u jachic ri ulew Canaan chquiwäch ri aj israelib.