2 Tesalonicenses 3 - Quiché Bible

Chibana' ch'awem ruc' Dios pakawi'

¹ Xuwi chi c'u wa' quinbij, kachalal: Chibana' ch'awem ruc' Dios pakawi', rech ri u tzij ri Ajawaxel cäjabun aninak pa ronojel c'olbal, chyok' u k'ij jas ri xc'ulmataj chixo'l.

² Chibana' ch'awem rech cujto'taj chquiwäch ri itzel tak winak ri e lawalo. Man conojel ta c'ut cäquechbej ri cojonic.

³ Ri Ajawaxel are jic. Ri are' cuya' na i chuk'ab, quixuchajij na chuwäch ri itzel.

⁴ Cu'l ka c'u'x chrij ri Ajawaxel chi ri ix quibano xukuje' quiban na jas ri xixkatak wi.

⁵ Chixuto' ba' ri Ajawaxel che ri lok'ok'enic jacha' ri calok'ok'en ri Dios chc'ol i chuk'ab pa ri Crist aretak cäpe ri rikoj c'ax.

Rajawaxic quixchacunic

⁶ Kachalal, quintakan chiwe pa ri u bi' ri Kajaw Jesucrist, chi quitas iwib chrij apachin jun kachalal ri cubano xa jachique ri craj, man cächacun taj,

⁷ ri ix iweta'm chi rajawaxic quiban iwe jas ri cäkaban uj. Ri uj c'ut, aretak xujc'oji' chixo'l, xkach'obo jas ri cäkabano, xujchacunic.

⁸ Man xkatij ta ri u wa jun ri xak ta xusipaj chke. Xane' xujchacun ruc' c'axalaj chac c'ä aretak xujcosic. Xujchacun chi chak'ab chi pa k'ij, rech man xkaya' ta eka'n chrij jun chiwe.

⁹ Man xkaban ta wa' rumal rech chi ma ta c'o takanic pa ka k'ab. Xane' jewa' xkabano che u c'utic chiwäch jas rajawaxic quiban ix.

¹⁰ Aretak xujc'oji' iwuc', je xujtakan wa' chiwe, chi we c'o jun man cäraj taj cächacunic, mawa'ba'.

¹¹ Ka tom c'ut chi jujun chixo'l man c'o ta u beya'l ri qui c'aslemal, man quechacun taj, xane' cäquinim quib pa ri jastak que ri niq'uiaj chic.

¹² Cujtakan chque ri winak ri je cäquibano, xukuje' quekapixbej pa ri u bi' ri Ajaw Jesucrist chi chechacun ruc' quicotemal, xa' jun chec'ol wi, chquitija' ri kas qui wa.

¹³ Ri ix c'ut, kachalal, mäq'uistaj i c'u'x che u banic ri utzil.

¹⁴ We c'o jun man cunimaj ta ri ka tzij pa we wuj ri', chicojo' retal wa', miwachilaj, rech cäq'uixic.

¹⁵ Miban c'u i c'ulel che, xane' chipixbej je jas ri quiban che jun iwachalal.

Chc'ol ta ri Ajawaxel iwuc'

¹⁶ Are ba' ri Ajawaxel re jamaril chuya' jamaril chixo'l amak'el pa ronojel. Chc'ol ri Ajawaxel iwuc' chi nimalaj iwonojel.

¹⁷ In Pawl quinya' rutzil i wäch ruc' ri nu k'ab. Are wetal wa' pa ronojel wuj ri quintz'ibaj chiwe. Je quintz'ibam wa'.

¹⁸ Are ri Kajaw Jesucrist cuban tok'ob chiwe chi nimalaj iwonojel.