2 Corintios 5 - Quiché Bible

Ri ka cuerp cäsach u wäch

¹ Ri uj uj junam ruc' jun ja aj uwächulew, jacha' jun lic'om cäbal. Keta'm c'ut chi we cäsach u wäch wa', c'o jun kachoch ri junalic ruc' ri Dios pa ri caj, ri man k'abaj ta banowinak.

² Aretak uj c'o pa ri ka cuerp, cujbik'bitic, sibalaj cäkarayij cujk'ax pa ri kachoch chicaj,

³ ri cujuch'uk na jacha' jun atz'iak, rech jeri' man cujch'ani taj.

⁴ Joropa' c'u k'ijol cujjeki' chupam we lic'om ja ri' cujbik'bitic cäkarik c'ax man cakaj ta c'ut chi cujch'anabaxic, xane' chi chcamulix katz'iakixic jeri' chi ri cämel camojcolitaj rumal ri c'ac' c'aslemal.

⁵ Ri xujsuc'uman che wa', are ri Dios. Ri are' u yo'm ri Ruxlabaxel chke, are c'utbal chi c'o cäkechbej na.

⁶ Je c'u ri' ka jiquibam ka c'u'x amak'el. Keta'm c'ut chi aretak c'ä uj c'o pa ri cuerp, man uj c'o taj ruc' ri Ajawaxel.

⁷ Cujbinic rumal ri cojonic, man rumal ta ri cayenic.

⁸ Ka jiquibam ka c'u'x, cäkaj ta c'ut chi ma ta uj c'o chic pa ri cuerp, rech cujec'ol ruc' ri Ajawaxel.

⁹ Rumal ri', cäkacoj ka chuk'ab rech utz cujril ri Ajawaxel, we uj c'o pa ri cuerp o we man uj c'o ta chic.

¹⁰ Rajawaxic c'ut chi konojel cäkatac'aba' na kib chuwäch ri u k'atbal tzij ri Crist, rech chkajujunal cäkac'am na ri tojbal re ri ka banom aretak c'ä uj c'o pa ri ka cuerp, we utz, we man utz taj.

Ri Dios xujrutzirisaj ruc' are' rumal ri Crist

¹¹ Rumal c'u rech chi keta'm ri xe'n ib chuwäch ri Ajawaxel, quekaya' ri winak pa sak, uj c'u k'alajininak chuwäch ri Dios; cu'l nu c'u'x xukuje' chi uj k'alajininak chuwäch ri retamabal i c'u'x.

¹² Man cakak'alajisaj ta chi c'u kib jumul pa kech wi chiwäch chi uj ta utz, xane' cakaya' chiwe ri u nimarisaxic i k'ij chkij, rech c'o qui tzelej na u bixic chi quech ri caquinimarisaj qui k'ij chrij ri wächaj, man chrij ta c'ut ri c'o chupam ri anima'.

¹³ We uj conirinak, che ri Dios ri'. We c'u utz ri ka chomanic, chiwe ix ri'.

¹⁴ Ri lok'ok'ebal u c'u'x ri Crist cucoj u chuk'ab chke. Rumal rech, keta'm chi ri Jun xcäm che qui q'uexwäch conojel, rumal c'u ri' conojel xecäm pa ri are'.

¹⁵ Xcäm c'u ri Crist che qui q'uexwäch conojel, rech ri e c'asc'oj man quec'asi' ta chic chque e are' chbil quib, xane' che ri Jun ri xcämic xukuje' xc'astajisaxic che qui q'uexwäch.

¹⁶ Rumal ri' man cäkachomaj ta chi uj camic, jas ri cäquichomaj ri winak aj uwächulew camic; pune' xkachomaj ri Crist jas ri qui chomanic ri winak aj uwächulew, man je ta chi c'u u chomaxic wa camic cäkabano.

¹⁷ Je c'u ri', we c'o jun c'o pa Crist, c'ac' winakirisam chic: ri ojer tak jastak xeboc'owic; chiwilampe', e c'ac' conojel ri e c'o chic.

¹⁸ Ronojel wa' are u banoj ri Dios, ri rumal ri Crist xujuya' pa jamaril kas ruc' are', xubij c'u chke chi chkabana' tok'ob chekaya' conojel ri winak pa jamaril ruc' ri Dios.

¹⁹ Ri u bixic wa' chi, pa ri Crist, ri Dios cätajin querutzirisaj ri ajmaquib ruc' are', man querajilaj ta c'ut ri e qui mac ri winak; are c'u ri chke uj xutz'onoj tok'ob chi chkaya' retamaxic we etamanic ri'.

²⁰ Je ba' ri' chi uj u q'uexwäch ri Crist, ri je ta ne are' ta ri kas Dios quixbochi'n kumal. Je ba' ri', pa ri u bi' ri Crist quixkabochi'j chi, chirika' ri jamaril ruc' ri Dios.

²¹ Ri Crist man c'o ta jun macaj xubano; xa' c'u u mac kech uj, ri Dios xuban che jacha' ri cuban che ri kas macaj, rech jeri', rumal ri Crist, cujel chupam ri chak'maquil.