1 Tesalonicenses 3 - Quiché Bible

Ri i cojonic xukuje' ri lok'ok'ebal i c'u'x

¹ Man c'u xintakej ta chi na coch'onic, xinya' nu tzij chi quincanaj na can nu tuquiel, pa Atens;

² xintak c'u bic ri Timotey ri kachalal. Are pataninel re ri Dios, are kach ajchac pa ri utzalaj tak tzij re ri Crist. Xkatak bic iwuc' che i pixbexic xukuje' che u ya'ic i chuk'ab pa ri i cojonic,

³ rech c'o jun muban quieb u c'u'x rumal we c'axc'olil ri'. Ix c'ut iweta'm chi che wa' uj yo'm wi.

⁴ Aretak c'ä uj c'o iwuc', ka bim ulok chiwe chi cäkarik na c'axc'olil; jas ri xc'ulmaxic, jas ri iweta'm.

⁵ Rumal ri', xukuje' ri in man xink'i' ta chic ma ta quinwil i wäch. Xintakan c'ut rech quetamax ri i cojonic, we ne xixtakchi'x che mac rumal ri takchinel, man c'o ta c'u u patan ri' ri c'axalaj ka chac.

⁶ Camic c'ut ri Timotey tzelejinak chi ulok iwuc', ulinak kuc'. Xutzijoj ri i cojonic xukuje' ri lok'ok'ebal i c'u'x. Xubij chke chi ri uj cujnataj chiwe ruc' utzil, xukuje' chi sibalaj quiwaj quiwil ka wäch, jas ri uj xukuje' cäkaj cäkil i wäch.

⁷ Rumal ri', kachalal, pune' cäkarik c'ax, pune' uj c'o pa c'axc'olil, xcu'bi ka c'u'x rumal ri i cojonic.

⁸ Aretak xketamaj chi co ix c'o pa ri i cojonic che ri Ajawaxel, xpe na chuk'ab pa ri ka c'aslemal.

⁹ ¿Jas lo cäkabano rech cäkamaltioxij che ri Dios ri nimalaj quicotemal ri c'o pa kanima' chuwäch ri Dios rumal iwech?

¹⁰ Sibalaj cäkata' c'u che ri Dios, chi chak'ab chi pa k'ij, chi cäkil i wäch, rech cäkaya' ri rajawaxic chiwe che u tz'akatisaxic ri i cojonic.

¹¹ Are' ri Dios ka Tat xukuje' ri Kajaw Jesus cuc'am ka be, rech cujopan na iwuc'.

¹² Ri Ajawaxel chunimarisaj ri lok'ok'ebal i c'u'x, rech sibalaj quilok'ok'ela' na iwib, rech sibalaj quebilok'ok'ej na conojel ri winak, jas ri uj quixkalok'ok'ej.

¹³ Jeri' sibalaj c'o u chuk'ab ri iwanima', man c'o ta etzelal cäriktaj chiwij, ix tastalic tak winak chuwäch ri Dios ka Tat, aretak cäpe ri Kajaw Jesus e rachilam conojel ri tastalic tak winak ri e rech.