Zacarías 7 - Biblia Mixe de Quetzaltepec

Ja ayuu'ajtën mëti'ipë Tios ka'ap tsokyën

¹ Ma tyaxk anyën yë mëtaxtujk po'opë, ma ënäty mëmajktaxk jëmëjt yajkutukyën yë Darío, jää ojts yë Wintsën tmëkäjpxy yë Zacarías käjpxynyajxpë.

² Jä'ä xëëw ënäty yë Betel ja'ayëty të tkäxtë yë Sarézer ets Réguem-mélec, mëët yë jyä'äy ets t'amëtowa'antë yë Wintsën yë pyutëjkën

³ ets tyajtëwa'antë yë käjpxynyajxpëtëjkëty ets teetytyëjkëty mëti'ipë ënäty jap tsajptëkoty tuuntëpën, ma ja Wintsën yajpaatyën mëti'ipë maaytyääyëpën winë: ¿Kopkpëky jëtää ëëtsëty je'eyëm n'ayuu'atëty ko myëkoxk po'opätëty jajëmëjt, ijxtëm ëëtsëty xëmë ntuntënë?

⁴ Ënät ja Wintsën mëti'ipë maaytyääyëpën winë ojts xymyëkäjpxyës ets xy'ënëmaayës:

⁵ Ënëmaaytya'a yë ja'ay mëti'ipë yajpatëpën ma naax kajpnën ets teetytyëjkëty: Miitsëty m'ayuu'ajtëp ets mmoontëp mtujktëp xëmë ko myëkoxk po'opety tu'ukpë jëmëjt ets ko wyëxtujk po'opety, tëëyëp jëtu'unpë xyajtso'onta'aktë, tëkë'px majk yë jëmëjt, je'eyëp ko ka'ap yë'ëkyëjxmëty m'ayuu'atë ets mmontë mtuktë koos xymyëjjawëtë,

⁶ miitsëty yë'ëkyëjxm jëtu'unpë xytyuntë jä'ä ko mku'uxëtë mjotkëta'akëtë.

⁷ ¿Këtii näjyëtu'un yë Tios ojts yë y'aaw y'ayuk t'ëk kajpxpë mëët yë kyäjpxynyajxpëtëjkëty tëëyëpë jyuuky'atën, ma ënäty ja Jerusalén kajpn jotkujk yajpaatyën ets ma ënäty ja wiinkëtypë ja naax kajpn jotkujk yajpaatën ets Négueb y'itjot ets tu'kë'ëyë tampë joyjotmën?

Mëët ko kyäjpxykyumëtoownajxtë, paaty ojts tsumy matsy yajmënëjkxtë wiink naax wiink kajpn

⁸ Ënät ja Wintsën ojts ja Zacarías käjpxynyajxpë tmëkäjpxy ets t'ënëmaay:

⁹ Ya'atës yam ni'ënä'ämëp: Ko miitsëty mëtëy winë xynyipaye'eytyëty ets oy mja'ay'atëty, mëët'atëp yë pa'ëyo'owën najts'ëyo'owën nixim niyam.

¹⁰ Këtii o'ktëy xytyunëty yë ku'ookytyo'oxy, yë ku'ooky u'unk, yë jaaypyaat jaaypyo'kxy ets ëyoopëja'ay. Këtii yë'ë xymyëmay xymyëtajtëty wi'ix o'ktëy mnätyunëtëty nixim niyam.

¹¹ E yë naax kajpn kyäjpxyjyä'äykyujkëy, uum nat nyäpyëjktakë ets wiinktsow nyajts'ijxëtyë.

¹² Juun ja y'aaw jyot tpëjktaktë tä juuntsaajën ets ka'ap tmëtoowkujkëtyë wi'ix ja ijxpëjkën jya'ëna'anyën ets wi'ix ja tyiyajtën jyaminyën, mëti'ipë ojts tjakajpxnaxtën ja käjpxynyajxpëtëjkëty mëët ja myëjaaw myëk'ajtën ja Wintsën mëti'ipë maaytyääyëpën winë. Paatykyëjxm ja Wintsën mëk jyoot'anpëjky,

¹³ ets y'ënäny: Jëtu'un ijxtëm yë'ëjëtyën ka'ap xymyëtoow'ijtës koos ojts njamëkajpxtë, näjyëtu'unës ëjts ka'apës nmëtoow'ita'any koos ënäty xyjyamëkajpxtë.

¹⁴ Paatyës nyaj'aye'eywya'kxtaaytyë, tä jeexyë pyojwa'kxtën mëët yë pojxujtyk, xiitsow yaatsow ma ja naax kajpnëtyën mëti'ipë ënäty ka'ap t'ixy'atën ets ja nyaax kyajpnëty aanë'ëk tëëtsë'ëk y'awinpijty, ni pën jam kyatsëënëjany. Janty oy ënäty tääpë kajpn të yajpaaty e yë'ëjëty mon tuk tyaj'awinpijtë.