Zacarías 6 - Biblia Mixe de Quetzaltepec

Ja taxkpë ja pujxnwintëkäämpë

¹ Ojtsës jatëkok nwinkumaakojnëpë: Täxkës nwin'ixy pyëtsëmtë yë pujxnwintëkäämpë mëti'ipë ja'ay myëtsiptuuntëpën, jam ma tu'uk yë mëj kopkën aak tsuxkpujxnëmpë yaj'ixyën.

² Tu'uk ja pujxnwintëkäämpë yë'ë pajëtujtëp yë tsapts kwaay; ja mëmäjtskpë yë'ë pajëtujtëp yë yëk kwaay;

³ ja mëtëkëëkpë yë'ë pajëtujtëp yë poop kwaay; e ja mëmajktaxkpë yë'ë pajëtujtëp yë kwaay mëti'ipë poopkatsën.

⁴ Ënätës nyajtëëy ja tsajpjotmëtë kukäjpxy mëti'ipës mëët nmëtyä'äkyën: Wintsën, ¿tiitën ya'atë jyatijäämpy?

⁵ Ënät ja tsajpjotmëtë kukäjpxy xy'ëtsooyës: Tyaapë yë'ë mëti'ipë taxkpëky tsoonaanpën Wintsën wyintum ets t'aye'eya'antë yë naaxwiinyëtë.

⁶ Yë pujxnwintëkäämpë mëti'ipë yëk kwaay pajëtujtëpën, jamtsow anëkëxmtsow nyijkxy; yë pujxnwintëkäämpë mëti'ipë poop kwaay pajëtujtëpën, jam nyijkxy xëëwkëtä'äkytsyow; e ja pujxnwintëkäämpë mëti'ipë pajëtujtëpën ja kwaay mëti'ipë poopkatsën, jamtsow nyijkxy ëpa'tkë'ëmtsow.

⁷ Ënät tsyo'ontë ja këwaayëty mëti'ipë moxkeetsyëtyën, yë'ë tyukjëtitëjantëp ja naaxwiinyëtë. Tääts ja tsajpjotmëtë kukäjpxy y'ënëmaayëtë: Nëjkx aye'eytya'atë yë naaxwiinyëtë. Jëtu'un tuuntë.

⁸ Ok ja tsajpjotmëtë kukäjpxy ojts xymyëkäjpxyës ets mëk xy'ënëmaayës: Ix ja mëti'ipë të nyëjkxtën ma ja naax kajpnën anëkëjxytsyowpë yajpaatën tëë ja Wintsën ja jyoot'an tyajxä'ämëtë.

⁹ Ojts ja Wintsën ja ayuk xytyuknikexyës ets xy'ënëmaayës:

¹⁰ Mijts yajmuk yë ayajk ako'onën ma ja'ayëtyën mëti'ipë të tsyoontën jam Babilonyë ma ënäty tsumy matsy yajpaatën: Yë'ë yaj'antijtëp yë Heldai, Tobías ets Jedaías. Näy jä'ä xëëw jam mnëjkxëty ma Josías yë tyëjkën, yë Sofonías yë myaank.

¹¹ Myajkojëp tu'uk yë kujän, yë'ë myajtunëp ja pu'ts pujxn ets ja poop pujxn mëti'ipë ënäty të xyajmukyën ets nëjkx xytyukkujeny ja teety Josué, yë Josadac yë myaank.

¹² Ets xy'ënëëmëty: Jëtu'un yë Wintsën y'ënä'äny mëti'ipë maaytyääyëpën winë: Ko ja ja'ay mëti'ipë txëëwajtpën Kepyji'tsk, jam myuxa'any ma tyiktsën ets tkoja'any ja Wintsën ja Tsyajp tëjk.

¹³ Y'akojëjäämpy ja Wintsën ja Tsyajp tëjk ets nëjkx ja kuma'ayën t'ëxajë jëtu'un tä tu'uk yë yajkutujkpë yajkumayën. Ets nëjkx nyaaxweetsy ma kyutujktaknën, e jam pë'am jam nëjkx nyaaxweetsy ja teety ets oy nëjkx nyeyaj'itëtë ets ka'ap tiitsip tmëët'ata'antë.

¹⁴ Ja kujän ijxpäjtën nëjkx wyi'imy jap tsajptëkoty, mëti'ipë nëjkx yajtukja'amyätstën yë Hedai, Tobías, Jedaías ets Josías, yë Sofonías yë y'ëna'k.

¹⁵ Nëjkxëp yë ja'ay muum jëkäm tsyoontë mëti'ipë nëjkx tyuntën ma ënäty ja Wintsën ja tyëjk yajkoj'oyën; jëtu'un xynyijawëtëty ko yë Wintsën mëti'ipë maaytyääyëpën winë yë'ëjës të xykyexy. Ya'atë tunan jatanëp ko ënäty miitsëty xymyëtowtë ets xypyatuntë ja Wintsën ijxtëm të y'ënä'änyën.