Santiago 2 - Biblia Mixe de Quetzaltepec

Ka'ap win'ixy wiinkexy nätsyojkëmëty

¹ Miitsëty, mëku'uktëjkëty, ninaak të xymyëpëktën ja Wintsën Jesukristë, mëti'ipë ni'ik ja mëj'ajtën jaanty'ajtën myëët'ajtypyën, ka'ap wyin'ixy wyinkexyëty ja ja'ay xytsyoktëty.

^2-3 N'ëk'ëna'anmëty ko mäjtsk ja ja'ay myintëty ma miits mye'eymyuktën, tu'uk mëti'ipë pu'ts pujxnkë'ëjiits myëët'ajtypyën ets oy xyoxëty, ko jëtu'un xy'ixtëty jä'ä m'oyjawëtëp ets xy'ënëëmëtëty: Yaa u'unyë, ma yaa oypyë po'kxtaknën, ets nän jää tu'uk ja ëyoopëja'ay myinëty, këëts këëts ja wyit, tääts xynyëëmëtëty: Mijts jämyë tänë, ëkë jää u'unyë naaxkëjxy,

⁴ miitsëty win'ixy wiinkexy ënäty ja ja'ay xytsyoktë ets ëxëëk winma'any ënäty jëtu'un mpatëp.

⁵ Mëku'uktëjkëty, mëtowtë ets ja'akyukëtë ya'atë: Tios tëë twinwitsy ja ja'ay mëti'ipë ëyoowtëpën yaa naaxwiiny ets ni'ik ja mëpëjkën tmëët'atëty ets t'ëxajëtëty ja kuma'ayën mëti'ipë Tios të tukwinwanën ja ja'ay mëti'ipë tsojkëpën;

⁶ miitsëty jëtu'un ja'ay mtimy'ixëtë ka'ap yowë nitii xykyëjxm'atë. ¿Këtii yë'ëjëty kumeenyjyä'äytyëjk je'eyë mëk myajtunëtë ets ka'ap kä'pxy mëjuyëtë, ni'ikyënëm mwitsëtë mjëtutëtë ets mni'ëën mnipëjktsowëtë?

⁷ ¿ets këtii yë'ëjëty ëxëëkjaty nimëtya'aktë ja Wintsën ja xyëëw tsujpë mëti'ipë miits të myajtukmëmëtya'aktënë?

⁸ Oy ënäty xytyuntë ko ja Tios ja kyutujkën xypyatuunëtëty ijxtëm ja y'aaw y'ayuk y'ënä'änyën: Tsok ja mmëku'uk ijxtëm kë'ëm mnätsyokyën.

⁹ Pën win'ixy wiinkexy ja mmëku'uk xytsyoktë, poky ënäty mtuuntëp, ja Tios ja y'ënä'ämën ënäty mmëtëkooytyëp.

¹⁰ Ko ja ja'ay tpatuunta'ay ja ënä'ämën ets tu'uk ja ënä'ämën tkapatuny, pokyjotm wyi'im; jëtu'un ja nyäxy ijxtëm jeexyë nitu'uk ja ënä'ämën tkapatunyën.

¹¹ Jä'ä ko Tios tëë y'ënä'äny: ka'ap xyajtëkoytyëty ja nyiwintsë'kën ja pëjkën ukën, näjyëtu'un të y'ënä'äny: ka'ap myajja'ay'ookëty. Jëtu'unts, ko pën yajja'ay'ookëty, oy tkayajkwintsë'këntyëkoy ja pëjkën ukën, tëë ënäty ja ënä'ämën tmëtëkooytyä'äy.

¹² Jëtu'un mkajpxtëty mmëtya'aktëty ets jëtu'un mja'ay'atëty ijxtëm ja ja'ayën mëti'ipë yajpaye'epyën mëët ja ënä'ämën mëti'ipë yaj'ëwaatsëpëtsëëmpën.

¹³ Pën ja myëku'uk ka'ap tpa'ëyoy, näjyëtu'un ja Tios ka'ap pya'ëyowa'anyë; pën ja myëku'uk pya'ëyoopyën, yë'ë ja oyajtën pyatäämpy ko ënäty ja paye'eyën y'ity.

Nitii kyawa'anëty ja mëpëjkën pën ka'ap tii oy ntu'unëm

¹⁴ Mëku'uktëjkëty, ¿tii nyawa'anëty ja ja'ay ja myëpëjkën pën ka'ap tii oy tuny? ¿Wä'än jëtää ja myëpëjkën yajtso'okëtëtyë?

¹⁵ N'ëkpëjktakëm ko tu'uk ja nmëku'uk'ajtëm ye'etyëjk ëkë to'oxytyëjk kya'ijtxëtëty ja wyit xyox ëkë ja kyä'äyën y'ukën winjëpom;

¹⁶ ets nitu'uk miits je'eyë xynyëëmëtëty: Nëjkxtë akujk jotkujk; mpëjkta'aktëp yë mnimu'ux këtiipë mtëpooktëty ets kaytyë uuktë tii mtimtsyojkpy, ets tyam ënäty miits nitii të xykyamo'otë, ¿jää tii nyawa'anëty ja mëpëjkën?

¹⁷ Jëtu'un jyäty ja mëpëjkën; ko yi'iyë tu'ukyë yajtukjotkujk'aty, ets ka'ap tii oy yajtuny, ooky yë nyäxy.

¹⁸ Wä'än jëtää tu'uk yë ja'ay tyajtëwëty ets y'ëna'anëty: Mijts, mjamëpëjkpy yë Tios je'eyëp ko ka'ap xyajtuny; ëjts ntuumpyës winë oy. Ëktuk'ijxkës ja mmëpëjkën ma ka'ap tii oy xytyunyën; e ëjts tyam mijts ntuk'ixëty maas tii oy ntunyën, oyës nkamëpëky.

¹⁹ Mijts mmëpëjkpy ko ja Tios tu'ukyë yë'ë, oy ko xymyëpëky; je'eyëp ko yë ku'oypyë myëpëjktëp näjyëtu'un ets tsëtyuuytyëp ko tsë'ëkëtë ja Tios.

²⁰ Këtii mtsuu'at xyajtunëty, ja'akyukë yajxon ko ka'ap tsyowpaaty ja mëpëjkën pën ka'ap tii yajtuny oy.

²¹ Ja n'ap'ajtëm Abraham paaty ojts oy wyi'im mëët ja Tios jä'äkyëjxm ko tuuny winë oy, ko ojts yajtuk'ëne'emy ets ja myaank Isaac tpëjkta'akëty ma ja wintsë'këntyaknën ets tukwintsë'ëkëty ja Tios.

²² Ets jyëkyejpy jam xynyi''ijxtu'utëty ma ja Abrahamën, ko yë'ë ojts tyajnikëxë'ëky ja myëpëjkën ko winë oy tuuny, jëtu'unts ja myëpëjkën ojts nyäxy wa'ats.

²³ Ets y'atëëy ijxtëm ja Tios ja y'aaw y'ayuk këxja'ay myinyën: Abraham myëpëjk ja Tios, paaty ojts yajnaxyë wa'ats. Ja Abraham mëku'uk ojts ja Tios tyijyë.

²⁴ Tëë xyjyä'äkyukëtë ko Tios wa'ats yë ja'ay tyajnaxy ko tii oy ttuny, ets ka'ap yi'iyëty ko myëpëky.

²⁵ Näyjyëtu'un tyuunë jyajtë mëët ja ku'into'oxy Rahab; ojts ja Tios wa'ats yajnaxyë ko oy winë tuuny; jä'ä ko ojts tyajja'ajtä'äky ja yajkäjpxye'epyë ets wiink tu'u tukni''ijxëy ma ja myëtsip ka'ap pyaatëtëtyën.

²⁶ Jëtu'un ijxtëm ja jot nini'kxën y'ooky ko ja ja'awën tyukpëtsëmy, näjyëtu'un jyäty ja mëpëjkën pën ka'ap tii oy yajtuny.