Números 8 - Biblia Mixe de Quetzaltepec

Wi'ix tyajtooypyëktëtyën ja kutë'kxn

¹ Ënät ja Wintsën ojts tmëkäjpxy ja Moisés ets t'ënëmaay:

² Ënëëmë yë Aarón, ko t'oytyunëty yë kutë'kxn ets tyajtooypyëkëty, y'ixëp yajxon pën najtsjajëp jamtsow ma mëj jëëntooytyakn nyajts'ixën.

³ Yë Aarón ojts jëtu'un tkuuytyuny tä ënäty ja Moisés ja Tios të tyuk'ëne'emyën. Ojts ja kutë'kxn yajxon tmä'kxta'ay ets tyajmëjëy, jamtsow tyajnajts'ixë wintuuytsyow ma ja mëj jëëntooytyaknën.

⁴ Ja mëj jëëntooytyakn aak pu'ts pujxn mëët y'oytyunyëty. Yë'ë ojts mëët yajtuk'oytyuny yë pujxnkuwojpën, tyimtso'ontä'äky jëtu'un ma jyëjpën. Yë Moisés jëtu'un ojts yë mëj jëëntooytyakn tyaj'oyë tä ënäty ja Tios të tnikäjpxyën.

Ma yajkënu'kxtën ja Leví ja'ayëty

⁵ Ënät ja Tios ojts tmëkäjpxy ja Moisés ets t'ënëmaay:

⁶ Ëpëky pëjkta'ak yë Leví ja'ayëty ma myëku'uktëjkëtyën Israel ja'ayëty ets kënu'kx, wä'än wa'ats twë'ëmtë.

⁷ Ko ënäty ja kënu'kxynyëë yajtukujaaxtë Wintsën wyintum, ya'atë jëtu'un mëpaat xytyuntë. Mijts, yë'ë mtuknixijkxëp ja kënu'kxynyëë mëti'ipë mëët winë yajtukkënu'kxyën. E ko ënäty jëtu'un të xytyuny tääts yë'ëjëty nyäjyäpëtëty ma tëkokyë nyi'kx kyopkëtyën ets ja wyit näjyëtu'un tpujtëty tjä'ätstëty. Jëtu'un'äämpy wa'ats wyë'ëmtëty.

⁸ Ënät näjyëtu'un xyaktëty tu'uk yë tsajpkaa ets wäänë yë nyitsajpmokway mëti'ipë ontë'ëtsën. Yë'ë ya'atë ayajk ako'onën mëti'ipë aaypyajk ujts pajkën. Ëpëky ja wiinkpë ja tsajpkaa mëti'ipë yajyajkpën ets ja nëë poky tkunaxëty.

⁹ Ënät xy'ënëëmëty ja Leví ja'ayëty ets tmëwinkontëty ja wit tëjk ma näpyaatë y'ityën mëët ja Tios. Ets näjyëtu'un tëkokyë tyu'ukmujkta'atëty ja Israel ja'ayëty.

¹⁰ Tääts nëjkx yë Leví ja'ayëty ëjts xywyinkuwa'akëtë ets nitëkokyë yë Israel ja'ayëty nëjkx yë kyë'ë tkëxkoonta'atë ma Leví ja'ayëty yë kyëpajkëtyën.

¹¹ Yë Aarón yë'ë nëjkx tkënu'kxy yë Leví ja'ayëty ëjts nwintuuyës, mëti'ipë kyutänëtëpën yë Israel ja'ayëty. Jëtu'un'äämpy yë Leví ja'ayëty yë'ë wyë'ëmtëty ma ëjtsën etsës xymyëtuntëty.

¹² Ënät ja Leví ja'ayëty näjyëtu'un jam ja kyë'ë tkëxkontëty ma ja nimäjtskpë ja tsajpkaa ja kyëpajkën, tu'uk nëjkx wyintsë'kën'aty ma ja nëë poky tkunaxëtyën ets tu'uk nëjkx yajnino'oky ets ja wa'atsajtën tpaatëty ja Leví ja'ayëty.

¹³ Ënät mijts jam kë'ëm xywyaatswitsëty ma ja Aaronkën ets ma ja myaankëtyën ets nëjkx xykyënu'kxy maas ëjts xymyëtuntëtyën.

¹⁴ Jëtu'un nëjkx ëpëky xypyëjktä'äky yë Leví ja'ayëty etsës njä'ä'atëty.

¹⁵ Yë'ëjëty jam nëjkx tyuntë ma ja wit tëjkën ma näpyaatë y'ityën mëët yë Tios. Jëyëjp xykyënu'kxëty ets xyajtsi'iw xyajpujtëty, etsës xymyo'ojëty, tä tu'uk yë ayajk ako'onënën.

¹⁶ Jä'ä ko ma Israel ja'ayëtyën, yë'ëjës të nwin'ixtë etsës njä'ä'atëty. Ëjts nkupëjkpyës yë'ëjëty ets jëtu'un tpaatëty tä jeexyë miitsëty xymyo'otësën ja mkä'äxkopkëty.

¹⁷ Jä'ä ko ëjtsës yë xypyatp yë kä'äxkopk, ninu'un yajpaatën ma Israel ja'ayëtyën, jëtu'un tä jëyujk tsajpkaajëty mëti'ipë ëka'any mëxu'unk'ajtëpën. Koos ojts nyaj'o'kta'ay yë Egiptë ja'ayëty yë kyä'äxkopktëjkëty, yë Israel ja'ayëty yë kyä'äxkopkëty ëjts ojts nätyuknipëjkë'ëkëtyës.

¹⁸ E yë'ëjëty nimay ënäty oyëty, paatyës yë Leví ja'ayëty yë'ë të nwin'ixy ets yë'ë tkunaxtëty ja kä'äxkopktëjk.

¹⁹ Ëjts yë'ëjës jëtu'un të nwin'ixy yë Leví ja'ayëty etsës të nmo'oy yë Aarón mëët yë y'u'unk y'ëna'k ets jap tkutuntëty tëkokyë yë Israel ja'ayëty ma ja wit tëjkën ma ja näpyaatë y'ityën mëët yë Tios, jëtu'un'äämpy tpaatëty ja pokymyä'kxën ma Tiosën. Jëtu'un'äämpy ka'ap nëkooyë yë Israel ja'ayëty tmëwinkontëty yë Tios yë wyittëjk ets ka'ap wi'ix jyatëty kyëpätëty.

²⁰ Moisés, Aarón ets tëkokyë yë Israel ja'ayëty ojts jëtu'un tpatuntë ja Tios ja y'ënä'ämën, mëti'ipë ënäty të tmo'oyën ja Moisés ma ja Leví ja'ayëty yajnimëtya'aktën.

²¹ Ja Leví ja'ayëty ojts yajxon nyäpyuj nyäjyä'ätsëtë ets ojts ja wyitëty tpujtë. Ënät ja Aarón ojts twoownëjkxy ja Leví ja'ayëty Tios wintum ets tyäjky tä tu'uk yë ayajk ako'onën mëti'ipë Wintsën yajmoopyën. Jëtu'un ojts tkënu'kxy tä tyuny'ätyën ko pën ja näypyuj näjyä'ätsë tpaaty.

²² Ko jëtu'un tyuuntaay jyajtaayë, ënät ja Leví ja'ayëty ojts ja tyuunk tuntë, mëti'ipë jap tuka'ajëtëpën ma ja wit tëjkën ma ja näpyaatë y'ityën mëët ja Tios. Yë Aarón mëët yë myaank'ëna'k, yë'ë ojts kyëwent'atëtë ets wyintunëtë. Tä ënäty yë Tios të tuknipëkyën ja Moisés ja Leví ja'ayëty yajtuknipëktëty.

Jënaak jëmëjt mëpaat tyuntën yë Leví ja'ayëty

²³ Ënät yë Tios ojts tmëkäjpxy yë Moisés ets t'ënëmaay:

²⁴ Yë Leví ja'ayëty jää mëpaat tyuuntsoontë jap ma ja wit tëjkën ma ja näpyaatë y'ityën mëët yë Tios. Ko ënäty të t'apätë i'px mëkoxk.

²⁵ Ets tyuunkpëtsëmtëty ko ënäty ja jyëmëjt të t'apätë wëxtyikxy majk.

²⁶ Ko ënäty të tyajka'pxnëtë ja jyëmëjtëty, jyëkyäjpnëp je'eyë ja myëku'uk tjaakputëkëtëty ma jap tii yajtuna'anyën nayiin nawään ma ja wit tëjkën ma ja näpyaatë y'ityën mëët ja Tios, e ka'ap tyimxëmë'atëty. Jëtu'un mëpaat yajxon xymyä'kxy ja tuunk mëti'ipë yajtu'uye'eytyëpën ja Leví ja'ayëty.