Números 7 - Biblia Mixe de Quetzaltepec

Ja ayajk ako'onën mëti'ipë yajtukkënu'kxpën ja tsajptëjk

¹ Jä'ä xëëw ma ojts ja Moisés tyaj'apatëtyä'äyën ja Tios ja wyittëjk. Ënät ojts tkënu'kxy mëët yë on ets jëtu'un tkënu'kxtaay winë jënu'un ënäty tyuna'anyën ma ja Tios ja wyittëjkën ets mëti'ipë tunaanpën ma wintsë'këntyaknën.

² Ja mëjja'aytyëjkëty mëti'ipë nyikopk'ajtëpën ja Israel ja'ayëty, mëti'ipë ënäty të pyutëkëtën ma ja jaaymyujkën të pyëti'ikyën ojts jam nyëjkxtë.

³ Ets ojts yë Wintsën tmo'otë tëtujk yë kepy wintëkäämpë, aak ujtsëty ets majkmäjtsk yë tsajpkaayä'äy mëti'ipë myëye'eytyëpën ja kepy wintëkäämpë. Jä'ä mpëjktakmëty ja tu'ukpë ja kepy wintëkäämpë nimäjtsk ojts tukmuktë ja mëjja'aytyëjkëty ets këëktu'uk ja tsajpkaayä'äy tyajktë. Tëkokyë ya'atë të yajnikäjpxyën ojts jam tmënëjkxta'atë tëjk'ëkë'ëm ma ja Tios ja wyittëjkën.

⁴ Ënät ja Tios t'ënëmaay ja Moisés:

⁵ Ëxajë yë kepy wintëkäämpë ets tsajpkaajëty ets mo'o yë Leví ja'ayëty, wä'än tyajtuntë jam ma ja tyuunk tyajtu'uye'eytyën ma wit tëjkën, ma ja näpyaatë y'ityën mëët ja Tios, ma nitu'ukjaty ja tyuunk tyajtu'uye'eytyën.

⁶ Yë Moisés ojts t'ëxajë ja kepy wintëkäämpë, ja tsajpkaajëty ets ojts tyajwä'kxy ma ja Leví ja'ayëtyën.

⁷ Mäjtsk ja kepy wintëkäämpë ojts tmo'oy ja Guersón ja y'u'unk y'ëna'k ets taxk yë tsajpkaayä'äy. Jä'ä ko jëtu'un ënäty tyajmëyatë ma ja tyuunk tyajtu'uye'eytyën.

⁸ E ja Merarí ja y'u'unk y'ok jä'ä ojts tmo'oy ja kepy wintëkäämpë taxk ets tuktujk yë tsajpkaa. Jää ko jëtu'un ënäty tyajmëyatë ma ja tyuunkëty tyajtu'uye'eytyën ets yë'ë wyintsën'ajtëp ja Itamar, yë Aarón yë myaank.

⁹ Ja Quehat ja y'u'unk y'ok ka'ap ojts ja kyepy wintëkäämpë yajmo'otë, jä'ä ko ja mëti'ipë ijty yë'ëjëty myënëjkxtëpën muum, kejkkyijxy ijty tyajye'eytyë, mëët ko y'ëmaayjyätyëty.

¹⁰ Ko ojts yajkënu'kxy ja wintsë'këntyakn, ja mëjja'aytyëjkëty, mëti'ipë nyikopk'ajtëpën ja Israel ja'ayëty, ojts ja ayajk ako'onën tmënëjkxta'atë ets jam tpëjktaktë ma ja wintsë'këntyaknën.

¹¹ Ënät ja Tios t'ënëmaay ja Moisés: winjëpom nitu'ukjaty yë mëjja'aytyëjkëty tmënëjkxtëty yë y'ayajk y'ako'onënëty jam ma potsyën ma ja wintsë'kën yajyäkyën ets yë'ë Tios tukwintsë'ëkëtëty ma ja potsy yajkënu'kxyën.

¹² Ma ëka'any ojts tsyo'ontä'äkyën ja mëtu'kxëëwpë, yë'ë ojts tmënëjkxy yë y'ayajk y'ako'onën yë Nahasón, yë myaank yë Aminadab, mëti'ipë jyä'äy'äjtypyën yë Judá.

¹³ Yë'ë ojts tyäky tu'uk yë poop pujxn texy. Jä'ä jye'emtyëty tu'uk mil ja taxk mëko'px ja i'px majk nikonë ets tu'uk yë mëj poop pujxn a'ukën, mëti'ipë je'emtyën wëxtujk mëko'px ja tëkë'px majk nikonë. Jä'ä ja kijpxën yajtuuntë mëti'ipë jap ijtpën ma ja Tios ja wyittëjkën. Ma ja poop pujxntexyën ets ma ja poop pujxn a'ukën ujts ojts tyäky mëët yë tsajpmokway mëti'ipë mëët tyijjëtityëtyën ja on ets yë'ë y'ayajkën'at ako'onën'atëty ma ja aaypyajk ujtspajk yajyäkyën,

¹⁴ ëpëky ojts tyajkpë tu'uk yë mëj jä'pn aak pu'ts pujxn, mëti'ipë je'emtyën mëko'px ja majk nikonë. Ujts tyäjky mëët yë poom,

¹⁵ ëpëky tjaakyäjky tu'uk yë tsajpkaayä'äy ayääkë, tu'uk yë kupixyny yä'äy mëti'ipë tëë yä'kpetyën ets tu'uk yë kupixyny ayääkë tu'kjëmëjt petypë mëti'ipë yajnino'okëpën,

¹⁶ ojts tyäjky wiinkpë tsajppax, mëti'ipë ja poky kyunaxëpën;

¹⁷ ets mäjtsk ja tsajpkaayä'äy mëti'ipë yajyakëpën ma Tiosën ets ja näy'ëëw'oy näykyajpx'oyë y'itëty, mëkoxk ja kupixynytyo'oxy, mëkoxk ja tsajppax ets mëkoxk ja kupixyny mëti'ipë tu'uk ja jyëmëjtëtyën. Ya'atë ojts tyäky ja Nahasón, yë myaank yë Aminadab.

¹⁸ Ma ja mëmäjtsk xëëwpën, yë'ë ojts tmënëjkxy ja y'ayajk y'ako'onën ja Natanael, yë myaank yë Zuar, mëti'ipë nyikopk'ajtypyën ja Isacar ja jyä'äy.

^19-23 Ets näjyëtu'un ojts ja y'ayajk y'ako'onën tyäky, tä ja Nahasón ja jyä'ä tyäjkyën.

²⁴ Kom tëkëëk xëëw yë'ë ojts ja y'ayajk y'ako'onën tyäky yë Eliab, yë myaank yë Helón, mëti'ipë nyikopk'ajtën yë jyä'äy yë Zabulón,

^25-29 ets näjyëtu'un ojts ja y'ayajk y'ako'onën tyäky, tä ja mëjëyëjpë ënäty ja jyä'äjëty të tyaktën.

³⁰ Kom majktaxk xëëw yë'ë ojts ja y'ayajk y'ako'onën tyäky yë Elisur, yë myaank yë Sedeur, mëti'ipë nyikopk'ajtën yë jyä'äy yë Rubén.

^31-35 Ets näjyëtu'un yë y'ayajk y'ako'onën ojts tyäky tä ja mëjëyëjpë ënäty ja jyä'äjëty të tyaktën.

³⁶ E ma ja mëmëkoxkxëëwpën yë'ë ojts yë y'ayajk y'ako'onën tyäky yë Selumiel, yë myaank yë Zurisadai mëti'ipë nyikopk'ajtën yë Simeón yë jyä'äy,

^37-41 ets näjyëtu'un ojts tyäky, tä ënäty ja mëjëyëjpë ja jyä'ä të tyaktën.

⁴² Ma mëtëtujk xëëwpën yë'ë ojts y'ayajk y'ako'onën tmënëjkxy yë Eliasaf, yë Reuel yë myaank, mëti'ipë nyikopk'ajtën yë Gad yë jyä'äy.

^43-47 Ets näjyëtu'un ojts yë y'ayajk y'ako'onën tyäky tä ja mëjëyëjpë ja jyä'äjëty të tyajktën.

⁴⁸ Ma ja mëwëxtujkxëëwpën yë'ë ojts yë y'ayajk y'ako'onën tmënëjkxy yë Elisamá, yë myaank yë Amiud, mëti'ipë nyikopk'ajtën yë Efraín yë jyä'äy,

^49-53 ets näjyëtu'un ojts ja y'ayajk y'ako'onën tyäky, tä ja mëjëyëjpë yë jyä'äjëty tyajktën.

⁵⁴ Kom tëtujk xëëw yë'ë ojts tmënëjkxy yë y'ayajk y'ako'onën yë Gamaliel, yë myaank yë Pedasur, mëti'ipë nyikopk'ajtën yë jyä'äy yë Manasés,

^55-59 ets näjyëtu'un ojts yë y'ayajk y'ako'onën tyäky, tä ja mëjëyëjpë ja jyä'äjëty tyajktën.

⁶⁰ Kom taxtujk xëëw yë'ë ojts ja y'ayajk y'ako'onën tmënëjkxy yë Abidán, yë myaank yë Guidoní, mëti'ipë nyikopk'ajtën yë Benjamín yë jyä'äy,

^61-65 ets näjyëtu'un ojts yë y'ayajk y'ako'onën tyäky, tä ja mëjëyëjpë ja jyä'äjëty tyajktën.

⁶⁶ Kom majk xëëw yë'ë ojts y'ayajk y'ako'onën tmënëjkxy yë Ahiézer, yë myaank yë Amisadai, mëti'ipë nyikopk'ajtën yë Dan yë jyä'äy,

^67-71 ets näjyëtu'un ojts yë y'ayajk y'ako'onën tyäky, tä ja mëjëyëjpë ja jyä'äjëty tyajktën.

⁷² Ma myajktu'uk xëëwpejtyën, yë'ë ojts yë y'ayajk y'ako'onën tmënëjkx yë Paguiel, yë myaank yë Ocran, mëti'ipë nyikopk'ajtën yë jyä'äy yë Aser,

^73-77 ets näjyëtu'un ojts ja y'ayajk y'ako'onën tyäky, tä ja mëjëyëjpë ja jyä'äjëty tyajktën.

⁷⁸ Ko ojts majkmäjtsk xëëw y'apäjnë, yë'ë ojts yë y'ayajk y'ako'onën tmënëjkxy yë Ahirá, yë myaank yë Enán, mëti'ipë nyikopk'ajtën yë Neftalí jyä'äy,

^79-83 ets näjyëtu'un ojts y'ayajk y'ako'onën tyäky, tä ja mëjëyëjpë ja jyä'äjëty tyajktën.

⁸⁴ Paaty ko ojts yë wintsë'këntyakn yajkënu'kxy, yë mëjja'aytyëjkëty mëti'ipë nyikopk'ajtëpën yë Israel ja'ayëty. Jä'ä ojts tyaktë yë poop pujxn texy majkmäjtsk ets näjyëtu'un ja mëj poop pujxn a'ukën ets majkmäjtsk ja pu'ts pujxn jä'pn.

⁸⁵ Tu'ukjaty ja texy mëti'ipë yë poop pujxn mëët y'oytyunyëtyën, jä'ä ënäty jye'emtyëty tu'uk mil ja taxk mëko'px ja i'px majk nikonë ets ja mëj'a'ukën poop pujxnpë mëët y'oytyunyëtyën, jä'ä jye'emtyëty wëxtujk mëko'px ja tëkë'px majk nikonë. Ko ojts yajtëëytya'atë ja texy ets ja poop pujxn a'ukën, jä'ä ojts jye'emty'atë i'px tëtujk mil ja taxk mëko'px nikonë, yë'ë ojts kyijpxën'aty ja kijpxën japë tsajptëkoty y'ityën.

⁸⁶ Jam'ajtp ënäty näjyëtu'un majkmäjtsk ja jä'pn mëjjatyëtypë, mëti'ipë oytyunyëtyën mëët yë pu'ts pujxn, aak ujtsëty ijty xëmë y'itë mëët yë poom. Tääpë jä'ä ijty tu'ukjaty jye'emtyëty tu'kmëko'px ja majk nikonë, jä'ä yajtuuntë ja kijpxën japë y'ijtyën ma ja Tios ja wyittëjkën. Ko tëkokyë ja jä'pn yaj'apëjkmujktaay ets ojts yajkijpxy. Jä'ä jye'emty'äjty tu'uk mil ja tëkëëk mëko'px ja i'px nikonë.

⁸⁷ Ja jëyujkëty mëti'ipë ojts yajno'oktën. Jä'ä ojts nyiwinë'atë majkmäjtsk yë tsajpkaa, majkmäjtsk yë tsajpkaa u'unk, majkmäjtsk yë kupixyny ets jä'ä ja jyëmëjtëty tu'ukjaty ets ja jëyujkëty aakmëët ojts yajyaktë ja nyi'ujts pajkëty mëti'ipë ayajkën'ajtp ako'on'ajtpën ets ëpëky majkmäjtsk ja tsajppax mëti'ipë wyintsë'kën'ajtën ko ja pyoky tukkunaxtë.

⁸⁸ Ja jëyujkëty mëti'ipë ojts wyintsë'kën'atën ets ja näy'ëëw'oy näykyajpx'oyë y'ity, jä'ä ojts nyiwinë'atë: i'px majktaxk yë tsajpkaa, tëkë'px yë tsajpkaa u'unk, tëkë'px majk yë tsajppax ets tëkë'px yë kupixyny mëti'ipë yë jyëmëjtëtyën tu'uk. Ya'atë jëtu'un ojts y'ayajkën'aty y'ako'onën'aty, ko ja wintsë'këntyakn ojts yajkënu'kxy.

⁸⁹ Ko ja Moisés jap tyëjkëy tëkoty ma ja wit tëjkën ma ja näpyaatë y'ityën mëët yë Tios ets myëtya'aka'any mëët yë Tios. Ënät tmëtoowpaty ko ja Wintsën jamtëm y'ëtsoy ma ja kaaxë ja y'ajupën, mëti'ipë myë'ijtypyën ja käjpxytyu'unën. Itkujky tmëtoy kyäjpxy ma ja Wintsën tsajpjotmëtë kukäjpxy tyänëtën pa'apa'a.