Números 6 - Biblia Mixe de Quetzaltepec

Wi'ix mëpaat jyuuky'atën nazareo ja'ayëty

¹ Ënät yë Tios ojts tmëkäjpxy yë Moisés ets t'ënëmaay:

² Jëtu'un xy'ënëëmëty yë Israel ja'ayëty: Pën tu'uk yë to'oxytyëjk ëkë ye'etyëjk tyuunpy yë waantakën ma Wintsënën, ko jä'ä y'ita'any nazareo ja'ay, mëti'ipë jyuukyajtën të twaantä'äkyën ma yë'ëjën.

³ Ka'ap mëpaat yë nëë t'uuky mëti'ipë mëkën, ka'ap yë keetsy t'uukëty mëti'ipë xunën mëti'ipë ta'amën, ka'ap yë tsatym tjë'kxëty mëti'ipë tsuxkën, ëkë mëti'ipë të'ëtsën.

⁴ Mapaat ja wyaantakën ënäty y'ëtukyën, jëtu'un ka'ap tjë'kxëty ja tsatym ets tëkokyë jë'kxy pëky mëti'ipë tsatym mëët y'oytyunyëtyën.

⁵ Ka'ap yë wyääy mëpaat tkeepy, yajyonëp mapaat kyä'pxyën ja wyaantakën mëti'ipë ënäty të tunyën. Jä'ä ko wa'ats ets kënu'kxy mëpaat nyäyaj'ityë ma Wintsënën.

⁶ Ets ka'ap mëpaat yë o'kpë tmëwinkony jää ma ënäty wa'ats ets kënu'kxy nyäyaj'ityën ma Wintsënën.

⁷ Oy ënäty yë tyeety tyaak jya'o'kpë ets myëkä'äx näjyëtu'un. Ka'ap mëpaat tmëwinkony, këtiipë yë'ë mëët nyäyaj'ëxëëkëtëty. Jä'ä ko yë'ë wa'ats mëpaat nyäyaj'ityë ma Tiosën.

⁸ Wa'ats ets kënu'kxy nyäyaj'itëtëty ma ja Wintsënën mapaat ja wyaantakën y'ëtuky.

⁹ Pën o'kp yë ja'ay wyintuuy ets jëtu'un ëxëëk wyë'ëmëty ja kyuwaay, mëti'ipë ënäty wa'ats myëët'ajtypyën ma Tiosën. Kom wëxtujk xëëw tnëkä'pta'ajëty ja wyääy, jää ma ja näypyuj näjyä'ätsë tunyën.

¹⁰ E kom tuktujk xëëw mäjtsk tmënëjkxëty yë muuxy ma teetyën, jam ma yajnitëkën yë wit tëjk ma ja näpyaatë y'ityën mëët yë Tios.

¹¹ Tu'uk yë teety nëjkx tyäky yë muuxy, mëti'ipë yë poky kyunaxëpën ets tu'uk mëti'ipë yajnino'okëpën. Mëët ko ënäty të y'ëxëëktëkë mëët ja o'kpë. Jä'ä xëëw nëjkx jatëkok ja kyuwaay wa'ats wyi'imy.

¹² Jëtu'un tyajtso'onta'akëty ja xyëëw jyëmëjt, ma ja Tios tmëtunëtyën. Ja mëjëyëjpë ka'ap kyëwentëtëkëty jä'ä ko ja kyuwaay tëë ënäty y'ëxëëkë. Myënëjkxëp tu'uk yë kupixyny mëti'ipë jyëmëjtën tu'uk ets Tios tukwintsë'ëkëty, mëët ko ënäty të pyokytyëkë.

¹³ Ko ënäty kyä'pxy ja xëëw jëmëjt ma ja wyaantakën y'ëtukyën, ja nazareo ja'ay kënu'kxypyë jam mëpaat nyijkxy ma yajnitëkën ja wit tëjk ma ja näpyaatë y'ityën mëët yë Tios.

¹⁴ Ets Tios tukwintsë'ëkëty tu'uk yë kupixyny yä'äy mëti'ipë yë jyëmëjtën tu'uk ets yë'ë ja oypyë mëkpë, mëti'ipë ja nëë poky kyunaxëpën. Tu'uk yë kupixynytyo'oxy mëti'ipë jyëmëjtën tu'uk, oypyë mëkpë mëti'ipë wintsë'kën'atëpën ma ja näy'ëëw'oy näykyajpx'oyë y'ityën.

¹⁵ Nëjkxëp näjyëtu'un tyäky tu'katsy u'unk yë tsajpkääky ka'apë tsyooymyëëtëtyën, mëti'ipë oytyunyën mëët yë tsajpmok ets on. Näyjyëtu'un nëjkx tyäky yë tsajpkääktyë'ëts, mëti'ipë wäänjaty yë on të yajtuknixijkxyën, mëët ja ayajk ako'onën mëti'ipë aaypyajk ujts pajkën ets ja tsatym nyëë.

¹⁶ Yë teety yë'ë nëjkx Wintsën wintum tkë'ëyäky ja wintsë'kën, mëti'ipë ja nëë poky kyunajxypyën ets mëti'ipë yajnino'kpën,

¹⁷ ets tyakëty ma Tiosën ja kupixyny yä'äy, mëti'ipë mëët yajtunyën ja näy'ëëw'oy näykyajpx'oyë, mëët tu'kkatsy ja tsajpkääky mëti'ipë ka'ap tsyooymyëëtëtyën. Ets näjyëtu'un tyakëty ja ujtspajk ets ja tsatym nyëë mëti'ipë ayajkën'ajtp ako'onën'ajtpën.

¹⁸ Ënät ja nazareo ja'ay nëjkx ja wyääy tnëkä'pta'ay jam ma yajnitëkën ja wit tëjk ma ja näpyaatë y'ityën mëët yë Tios ets tjëënkupëkëty ja wyääy jëtu'un mëët ja ja'axy tyooyjyëtitëty. Ma ja wintsë'kën yajno'okyën, ko ja näy'ëëw'oy näykyajpx'oyë y'ity.

¹⁹ Ënät ja teety tpëjkë'ëkëty ja tsajppax jëxk, tëëpë ënäty kyi'iyën ets tjuutëty jap ma katy'u'unkën tu'uk yë tsajpkääky ka'apë tsyooymyëëtëtyën ets tsajpkääktyë'ëts ka'apë tsyooymyëëtëtyën ets tmo'ojëty ja nazareo ja'ay ko ënäty të nyäkyukeepyë.

²⁰ Ënät ja teety jëtu'un tyajnaxëty ja wintsë'kën jam Tios wintum. Yë jëyujk mëti'ipë yajyajkpën ko ja Wintsën yajmo'oy yajkexy ja wyintsë'kën ets pyuuy mëti'ipë yajmoopyën ma ja ja'ay nyäkyuyäkyën, mëk'ëmaay nyäxy ets yë'ë teety jyä'ä'ajtyp. Ko ënäty jëtu'un të kyixy të nyäxy ja xëëw jëmëjt mapaat ja wyaantakën tyaj'ëtukyën ja nazareo, jyëkyäjpnëp t'uukëty yë tsatym nyëë.

²¹ Ya'atë ënä'ämën yë ja'ay pyatunëp, mëti'ipë ënäty të nyäwyaantä'äkyën ets yë'ë tmëtuna'any yë Tios. Ets ya'atë wintsë'kën yakëp, tä tu'uk ayajk ako'onën. Ëpëky mëti'ipë ënäty kë'ëmwinma'any yäjkpyën. Kopkpëky jëtu'un ko tyakëty, jëtu'un tä ënäty ja wyaantakën të tpëjktä'äkyën ijxtëm yë ënä'ämën myinyën.

Wi'ix mëpaat ja teetyëjk kyënu'kxtën

²² Ënät yë Tios ojts yë Moisés tmëkäjpxy ets t'ënëmaay:

²³ Ënëëmë yë Aarón ets myaank'ëna'k, ko pën tkënu'kxtëty mëti'ipë Israel ja'ayën, tyaa mëpaat y'ëna'antë:

²⁴ Wintsën mkënu'kxëtëp ets mkëwent'atëtëp.

²⁵ Yë Wintsën yë'ë mni''ijxkëta'akëtëp ets oy myaj'itëtëty.

²⁶ Wä'än ja Wintsën ja tsyojkën jya'awën tmëët'aty ma mijtsën ets jotkujk myaj'itëtëty.

²⁷ Jëtu'un'äämpy yë'ëjëty tkajpxpaatëty yë nxëëwës ma Israel ja'ayëtyën, etsës nkënu'kxtëty.