Números 5 - Biblia Mixe de Quetzaltepec

Ma yajni'ënä'ämën ets tyajpëtsëëmta'atëty ja ëxëëkpë ma naax kajpnën

¹ Ënät ja Tios ojts tmëkäjpxy ja Moisés ets t'ënëmaay:

² Ënëëmë yë Israel ja'ayëty ets tyajpëtsëmtëty yë ja'ayëty mëti'ipë ëxëëk yajpatëpën ma ja nyaax kyajpnëtyën. Tä ja'ayëtyën mëti'ipë pu'uts pa'am pëjkëtëpën, mëti'ipë myëjaaw tukjënajkëtëpën ma ye'etyëjk'ajtënëtyën, mëti'ipë të tontën muum yë o'kpë ets jëtu'un ëxëëk wyë'ëmtë.

³ Yajpëtsëmtë tääpë ja'ayëty ma miits m'itën mtsëënëtën, ye'etyëjk to'oxytyëjk. Jëtu'un ka'ap jyam'atëty ëxëëkpë ma miitsëtyën, maas näjyëtu'un nyajpaatyën.

⁴ Ja Israel ja'ayëty ojts tjantytyuntë tä ënäty ja Tios të tuk'ëne'emyën yë Moisés ets tyajpëtsëëmtaaytyë jëtu'unpë ja ja'ayëty.

Ti mëpaat yajtunyën, ko pën yë myëku'uk tyajjoot'anpëkëty

⁵ Ënät yë Tios ojts tmëkäjpxy yë Moisés ets t'ënëmaay:

⁶ Tyaa xy'ënëëmëty yë Israel ja'ayëty, ko tu'uk yë ye'etyëjk ëkë to'oxytyëjk tyajjotma'atëty yë Tios. Mëët ko ja jyiiky myëku'uk ka'ap twinkutsë'ëkë, ëkë ko ja jyiiky myëku'uk tyajjoot'anpëky. Poky jëtu'un tyuunpy.

⁷ Ets kwanë ko tkupëkëty. E ja ja'ay mëti'ipë ënäty të yajmëtëkoyën, pën tëë tii mya'txëty, nëjkxëp yajkujuy ets ëpëky jyaak yajnikujuuypyätëty wäänkakujkwä'kxy.

⁸ Pën ja ja'ay mëti'ipë ënäty të yajmëtëkoyën tëë y'o'knë. Ets ka'ap ma pën yajmo'ojëpën ja mëti'ipë ënäty yajkujuuypyën. Yë'ë ja Wintsën jyä'ä'ajtyp, paatykyëjxm ja teety nëjkx yajmo'oy. Ëpëky näjyëtu'un ja kupixyny yä'äy mëti'ipë tëë yä'kpetyën mëti'ipë ja teety tyukwintsë'ëkëpën ja Tios ets tääpë ja'ay tpaatëty ja pokymyä'kxën.

⁹ Tëkokyë yë ayajk ako'onën mëti'ipë yë Israel ja'ayëty tyuknipëjkë'këtëpën yë Tios, ets tukninëjkxtëty yë'ë ja teety mëti'ipë jyä'ä'atëpën.

¹⁰ Tëkokyë mëti'ipë ënäty yë Tios të yajtuknipëjktaakën ets yajtukninëjkxëty yë teety, mëti'ipë nëjkx tjä'ä'atyën.

Ma ja tëyajtën myinyën tii mëpaat yë ja'ay tuny mëti'ipë joot'anpëjkpën.

¹¹ Ënät ja Tios ojts tmëkäjpxy ja Moisés ets t'ënëmaay:

¹² Jëtu'un xy'ënëëmëty yë Israel ja'ayëty: Pën tu'uk yë to'oxytyëjk ka'ap tmëjpëjktä'äky yë nyiye'etyëjk,

¹³ ets tmëëtko'knë wiink ye'etyëjk ma ka'ap tnijawëtyën ja mëti'ipë nyiye'etyëjk'ajtypyën. Pën tëë jëtu'un jyänty y'ëti'itsy ets ka'ap pën të y'ixyë ets ka'ap tjëkyepy wi'ix yajnikajpxëty,

¹⁴ yë ye'etyëjk tsojk nëjkx tni'äkë'aty yë tyo'oxytyëjk. Ëkë näjyëtu'un yë ye'etyëjk tsojk ajotkumonë t'ëkni'äkë'ajtnëty yë tyo'oxytyëjk oy ënäty jëtu'un të kya'ëtë'ëtsy.

¹⁵ Pën jëtu'un y'ixë'aty, yë ye'etyëjk mëpaat tmënëjkxy yë tyo'oxytyëjk ma ja teetyën. Ets tkuyakëty yë tyo'oxytyëjk. Yë'ë yakëp yë tsajpmok mäjtsk tsim. Ka'ap tjëkyäpëty tuknitämëty yë on ja tsajpmokway mëti'ipë yäjkpyën. Jä'ä ko yë'ëkyëjxm ja tyäky ko të jyoot'anpëky. Ets yë'ëkyëjxm ja yajyäky, mëët ko tu'uk ja poky yajnijawëja'any.

¹⁶ Ënät ja teety tmëjwowëty ja to'oxytyëjk ets jam twoownëjkxëty ma Tiosën.

¹⁷ Tääts wäänë yë kënu'kxynyëë tjä'pëtsëmëty jap tu'tsjoty ets jap tkuwookëty yë naaxway mëti'ipë ënäty të two'okë'ëkyën naaxkëjxy japë yajpaatyën ma Tios yë wyittëjkën.

¹⁸ Ets ja to'oxytyëjk jam wya'ak'oyëty Tios wintum ets t'ënëëmëty ko ja wyääy tnajtsmatsëty ets tmo'ojëty näjyëtu'un ja ayajk ako'onën mëti'ipë ënäty ja nyiye'etyëjk të tyäkyën, mëët ko të jyoot'anpëky. Jä'ä jëtu'un ets yajnijawëty pën janty tëë pyokytyuny. E ja teety yë'ë nëjkx tpëjkë'ëky ja nëë, mëti'ipë ta'amën, mëti'ipë myëët'ajtypyën ja poky.

¹⁹ Ënät tuknikajpxëty ja to'oxytyëjk ets t'ënëëmëty: Pën janty ka'ap pën ye'etyëjk të xymyëët'aty ets ka'ap pën të mnätyukwin'ëënyë ets jëtu'un ja mniye'etyëjk ka'ap të xyajtëkooyë ja myëj'ajt wyintsë'kën. Ko ya'atë nëë xy'uukëty, ka'ap tii mjatëtëty.

²⁰ E pën ka'ap ja mniye'etyëjk të xymyëj'ixy të xymyëjpëjktä'äky ets të xymyëët'ity ja wiink ye'etyëjk ets jëtu'un të mnäyaj'ëxëëkëty.

²¹ Yë Tios patëp ets mijts ijxpäjtën mwë'ëmëty. Ko ënät ëxëëk mjatëty mkëpätëty ma ja naax kajpnën. Ko ja mox nëkooyë tyuktukëty ets ja m'u'unk y'ookëty.

²² Jëtu'un ëxëëk mjatëty ko ya'atë nëë xy'uukëty mëti'ipë myëët'ajtypyën ja pojkën. Ets ja to'oxytyëjk y'ëtsowëty: Wä'än jëtu'un tjaty tkëpety.

²³ Ënät ja teety tkëxja'ajëty ya'atë pojkën ets nëjkx tnëëkupëky ma ja nëëjën mëti'ipë ta'amën ets jap wyinmujëty.

²⁴ Tä ja to'oxytyëjk tuk'uukëty ja ta'amnëë ets jap jyootjoty ta'amën kyëta'akëty.

²⁵ Ja teety yë'ë nëjkx t'ëxajë ja ayajk ako'onën, mëti'ipë ënäty ja to'oxytyëjk myëët'ajtypyën ma ja kyë'ëjën ets tmo'ojëty ja Tios, jam tpëjkta'akëty ma ja wintsë'këntyaknën.

²⁶ Ets wäänë tja'axë'ëkëty ja ujtspajk, mëti'ipë ayajkën'ajtp ako'onën'ajtpën. Ets nëjkx tnino'oky ma ja wintsë'këntyaknën, yë'ë nëjkx yajtukja'amyetsy. Ko ënäty ja teety ja to'oxytyëjk të tuk'ukta'ay ja nëë mëti'ipë ta'amën.

²⁷ Pën janty ka'ap ënäty të tmëj'ixy ja nyiye'etyëjk. Ko ya'atë nëë t'uukëty, nëjkx jap kyëtä'äky myoxjoty ets nëjkxëp ja myox kyiixë'ëky nëkooyë mëj këjää, jëtu'un ënäty ijxpäjtën wyi'imy ma ja naax kajpnën.

²⁸ E pën ja to'oxytyëjk kajts ënäty tii të tuuntëkoy, ka'ap nëjkx wi'ix jyäty kyëpety. Je'eyëm nëjkx oy tsuj y'u'unk'ixy.

²⁹ Yaa tnikäjpxy wi'ix mëpaat yajnijawën, ko yë to'oxytyëjk ka'ap tmëj'ix tmëjpëjkta'akëty yë nyiye'etyëjk ets yë'ë nyi'akë'atëtëty.

³⁰ Ëkë ko yë ye'etyëjk nëkoo je'eyë nyi'äkë'atëtëty oy ënäty tii yë tyo'oxytyëjk të tkatuuntëkoy, yë ye'etyëjk jam twoownëjkxëty yë tyo'oxytyëjk Tios wintum ets teety yë'ë nyija'ap tii mëpaat tunyën, jëtu'un tä ja ënä'ämën tëyajtën myinyën këxja'ay.

³¹ Ja ye'etyëjk ka'ap nëjkx tii poky tsëëmë'ëky, jä'ä tëy ja tyo'oxytyëjk, pën yajpatp pokymyëët kopkpëky ko nëjkx ja pyoky tkumëtoy.