Números 36 - Biblia Mixe de Quetzaltepec

Mëti'ipë ja to'oxytyëjkëty kyuma'ayën'ajtëpën

¹ Ja ja'ayëty mëti'ipë ënäty nyikopk'ajtëpën ja Galaad ja'ayëty. Ja y'u'unk y'ok ja Maquir, Manasés ets José. Ënät ojts tninëjkxtë ja Moisés ets ja mëjja'aytyëjkëty, mëti'ipë mëj'äämpy ijtëpën ma ja Israel ja'ayëtyën ets t'ënëmaaytyë:

² Yë Wintsën jëtu'un ojts m'ëne'emyë, ko mijts Moisés xyajwa'kxëty aak ijxpëtsëmy ja it naaxwiinyëtë mëti'ipë jyä'ä'atëpën ja Israel ja'ayëty ets ojts näjyëtu'un m'ëne'emyë ko ja it naaxwiinyëtë, mëti'ipë ja Selofhad ojts nyikääkëtyën, mëti'ipës nmëku'uk'ajtëpën yë'ë nëjkx xymyo'oy ja nyëëxëty.

³ E yë'ëts ëëts nmëmaay nmëët'ajtëp, ko nëjkx yë'ëjëty pyëjknëtë mëët ja ye'etyëjkëty, mëti'ipë wiink ja'ayëtyën, ka'apë y'Israel ja'ayëtyën, ja naax kam mëti'ipë ja to'oxy'ëna'k të t'ëxajëtën yë'ë nëjkx ja wiink ja'ay tmëwë'ëmnëtë mëti'ipë ënäty mëët të pyëktën. Jëtu'un'äämpy nëjkx ëëts ja nnaaxëty nyajpëjkënëtë wäänjaty mëti'ipë ënäty të xytyukka'atënës ma të yaj'ijxpëtsëmyën.

⁴ Ko tpaatëty ja xëëw jëmëjt ma ënäty jatëkok winë yajjä'äpëkyën ets y'ëwaatspëtsëmyën ma Israel kajpnën. Tääpë naax yë'ë nëjkx tyuka'ajënëtë etsës jëtu'unyë naaxtuk nwë'ëmnëtëty.

⁵ Ënät ja Moisés ojts tnikäjpxy, jëtu'un tä ënäty ja Wintsën të y'ëne'emyën: Yë José yë jyä'äy tëyajtën tä y'ëna'antën.

⁶ Yë Wintsën tyaa të y'ënä'äny, ko tääpë to'oxy'ëna'këty jyëkyejpy tpëktëty oypyënëty, nëkoo ko winkon tjëëky'at tmëku'uk'atë. Ets nëkoo ko jam ma ja jyä'äyëtyën mëti'ipë ja tyeety jyiiky'äjtyp myëku'uk'ajtypyën.

⁷ Ja naax mëti'ipëjaty ja Israel ja'ay të tyuka'ayën, ka'ap tjëkyepy ok yë wiink ja'ay tjä'ä'atëty. Oy tyimpënëty ja nyaax jam jëtu'un xëmë yajpaatëty ma ja jyä'äyën.

⁸ Pën tu'uk yë to'oxytyëjk jyä'ä'ajtyp yë naax, yë'ë mëët pyëkëty tu'uk yë ye'etyëjk mëti'ipë winkon jyä'äy'äjtypyën. Jëtu'un ja Israel ja'ay ka'ap tyajtëkoytyëty ja nyaaxëty, mëti'ipë ënäty ja tyeety të tyukumayën.

⁹ Yë naax mëti'ipë ënäty të nyäkyumayë'atyën ka'ap mëpaat wiink ja'ay tjä'ä'aty. Nitu'ukjaty ja Israel ja'ayëty kyë'ëm naax myëët'atëp mëti'ipë ënäty të tyuka'ayën.

^10-11 Ja Maalá, Tirsá, Hoglá, Milcá ets ja Noá ojts tpatuntë tä ënäty ja Moisés, ja Wintsën të tyuk'ëne'emyën. Yë'ë ojts mëët pyëktë ja yä'äy ëna'ktëjkëty mëti'ipë ja jyämtyëjk y'u'unk'ajt y'ëna'k'ajtëpën, ja tyeety ja jyiiky myëku'uk,

¹² yë'ë y'u'unk y'ok yë José yë myaank. Jëtu'un'äämpy ojts ja kyuma'ayënëty wyi'imy ma ja jyä'äyën mëti'ipë ja tyeety myëku'uk'ajtypyën.

¹³ Ya'atë ënä'ämën tëyajtën ojts yë Wintsën tmo'oy yë Israel ja'ayëty ma Moisesën, jam ma ja joyjyotën, mëti'ipë yë Moab ja'ay nyitënaaytyëpën winkon ma ja Jordán mëjnëëjën, ma Jericó mëët nyäwyinku'ixëtyën.