Números 35 - Biblia Mixe de Quetzaltepec

Mëti'ipë kyuma'ayën'ajtëpën ja Leví ja'ayëty

¹ Ënät yë Wintsën ojts tmëkäjpxy yë Moisés, jam joyjyotm ma tnitänën yë Moab, winkon ma ja Jordán mëjnëëjën, yë'ë mëët nyäwyinku'ixëty yë Jericó kajpn ets t'ënëmaay:

² Ënëëmë yë Israel ja'ayëty ets tmo'otëty näjyëtu'un yë Leví ja'ayëty yë nyaax kyajpnëty ma tsyëënëtëtyën ets näjyëtu'un yë nyaax kyamëty ma jyëyujk tsyajpkaa tyajtänëtyën. Yë'ë nëjkx xymyo'otë yë itjot jampë y'ëwtityën kajpnpë'am.

³ Yë Leví ja'ayëty jam nëjkx tsyëënëtë ma tääpë naax kajpnëtyën ets nëjkxëp yë jyëyujk tsyajpkaa tmëët'atë.

⁴ Ja nyaax kyamëty ma jyëyujk tsyajpkaa tyajtänëtyën, yë'ë jyä'ä'atëp ja naax mëti'ipë jam kajpnpë'am yajpatpën, jä'ä myëjwiin'atëty tëkëëk mëko'px ja wëxtyikxy myajkxajpk.

⁵ Tëkokyë ja itjot jä'ä nëjkx myëjwiin'aty ja pya'a taxkpëky, tëtujk mëko'px xajpk. A'oytsyow näjyëtu'un nëjkx myëjwiin'aty, tä ja anajnytsyowpën; e ja ëpa'tkë'ëytsyowpë, näjyëtu'un nëjkx myëjwiin'aty tä ja anëkëjxytsyowpën. Ja naax kajpn itkujky nëjkx wyi'imy, e ja jëyujk tënaaytyakn tsajpkaatënaaytyakn jam pë'am nëjkx wyë'ëmtë.

⁶ Ja naax kajpn mëti'ipë ja Leví ja'ay jyä'ä'atëpën, tëtujk nëjkx wyä'äny tsoktakn, ko ënäty pën ja myëku'uk të tyaj'ooky. Ya'atë tëtujk kajpnëpë, ëpëky yë'ë. Ëpëky nëjkx ja Leví ja'ayëty xymyooytyëpë wëxtyikxy mäjtsk ja kyajpnëty.

⁷ Ja Leví ja'ay ja kyajpnëty jä'ä nëjkx wyinë'aty wëxtyikxy tyuktujk, mëët ja nyaax kyamëty ma mëpaat ja jyëyujk tsyajpkaa tyajtänëtën.

⁸ Ko ja Israel ja'ayëty nëjkx tmo'otë ja nyaaxëty ja Leví ja'ayëty, mëti'ipë nëjkx tkajpn'atën, tu'ukjaty ja ja'ay nëjkx ja nyaax tpuyaktë, tä ënäty të tyuka'ayën. Pën ja nyaax mëjën, kanaak nëjkx ja kajpn tyäky. Pën ja nyaax wäänën, wäänë nëjkx ja nyaax tyäky.

Ja kajpn mëti'ipë tsoktaknën

⁹ Ënät ja Wintsën ojts tmëkäjpxy ja Moisés ets t'ënëmaay:

¹⁰ Jëtu'un xy'ënëëmëty yë Israel ja'ayëty: ko ënäty miitsëty të xytyuknajxnëtë ja Jordán mëjnëë ets jam mja'ajtnëtëty ma ja it naaxwiinyëtë yajtijyën Canaán.

¹¹ Nëjkxëp ëpëky xykyojtë yë naax kajpn mëti'ipë tsoktaknën, ma tpaatëtyën yë käktsokn mëti'ipë ënäty yë myëku'uk ajotkumonë të tyaj'ookyën ets ka'ap tsyokyëty të tuny.

¹² Jamts nëjkx kyäktso'oky ja ja'ay ma ënäty yaj'ookanyën ja ja'ay ja myëku'uk mëti'ipë ënäty të y'ookyën. Koonëm nëjkx wya'këxë'ëky ma kutuunktëjkëtyën ets jä'ä nyipaye'eyëtëty.

¹³ Ja naax kajpn mëti'ipë ënäty yajktëpën, tëtujk nëjkx wyä'äny tsoktakn.

¹⁴ Tëkëëk jamtsow awinmtsow ets tëkëëk jam Canaán.

¹⁵ Ya'atë tëtujkpë kajpn, jä'ä nëjkx wyä'äny tsoktakn. Jam nëjkx kyäktso'oktë yë Israel ja'ayëty ets oy yë'ëjëty yë jaaypyo'kxyjyä'äyëty. Jam kyäktso'oktëty yë ja'ayëty mëti'ipë ënäty yë myëku'uk ka'ap tsyokyëty të tyaj'ookyën.

¹⁶ Jëtu'un, ko pën yë myëku'uk tyajtsëtyut tyajwintëkoyëty mëët tu'uk yë pujxn ets ok ja myëku'uk y'ookëty. Tääpë ja'ay, jä'ä nëjkx yajtijy yaja'ay'o'kpë ets nëjkxëp yajni'ënä'ämënë ets y'ookëty näjyëtu'un.

¹⁷ Pën yë myëku'uk tyuka'tsyp yë tsaa amëjaaw ets ja ja'ay tsyëtyutëty wyintëkoyëty ets y'ookëty. Tääpë ja'ay jä'ä nëjkx yajtijy yaja'ay'o'kpë. E ja mëti'ipë ënäty ja myëku'uk të tyaj'ooky, nëjkxëp näjyëtu'un y'ooky.

¹⁸ Pën yë myëku'uk tyukwojpy yë kepy ets tyajtsëtyutëty ets ja tsëtyutja'ay y'o'knëty tyëkooynyëty. Tääpë ja'ay yaja'ay'o'kpë nëjkx yajtijy ets nëjkxëp näjyëtu'un y'ooky.

¹⁹ Ko ja ja'ay ja myëku'uk mëti'ipë ënäty të y'ookyën, yë'ë patëp tyaj'o'kwinpitëty ja myëtsip, ëkë ja mëti'ipë ënäty ja myëku'uk të yaj'o'kxëtyën ko muum tpaatëty.

²⁰ Pën yë myëku'uk nyajtstijëp mëët ko t'ëxëëk'ixy ëkë tyukjëpijpy oy nyatiijëty mëët jä'ä ko ënäty tyaj'ëyo'onpaata'any,

²¹ ëkë pën kyojxyp tsyi'kpy ja myëku'uk mëët ko ënäty ka'ap oy mëët nyäjyëkyepyë ets ja myëku'uk tkukoxëty. Ja ja'ay mëti'ipë ënäty ja myëku'uk të tkukoxyën, jä'ä nëjkx pokymyëët wyi'imy. Jä'ä ko yaja'ay'o'kpë ënäty nyajxkojnë. Ja ja'ay ja myëku'uk mëti'ipë ënäty të y'ookyën, jä'ä nëjkx tyaj'o'okwinpity ja yaja'ay'o'kpë, ko muum tpaatëty.

²² E pën ajotkumonë yë myëku'uk nyajtstijëp, ka'ap tsyokyëty tuny ets ka'ap yë'ëkyëjxmëty ko tmëtsip'aty, ëkë pën tyukjëpijpy yë myëku'uk oy tii mëët ets ka'ap tsyokyëty tuny,

²³ ëkë ka'ap t'ixy, ko ja tsaa të tka'atsë'ëky ets tamtëm ja myëku'uk tyänë ets ja myëku'uk tyajtsëtyutëty, ëkë nyinajkpätëtëty ets y'ookëty ets ka'ap maa nyämyëtsip'atëtë ets ka'ap jëtu'un tmay tajy ja myëku'uk tyajtsëtyuta'any.

²⁴ Ja kajpn yë'ë nëjkx tpaye'ey ya'atë jotmay, ma ja mëti'ipë ënäty ja myëku'uk të tyaj'ookyën ets mëti'ipë ja myëku'uk yaj'o'okwinpitäämpyën, mëët ko ja jyiiky myëku'uk ënäty të y'ooky, jëtu'un tä ja nyitëyajtën myinyën.

²⁵ Ja kajpn yë'ë ka'ap t'ëwa'atsëty ets ja ja'ay mëti'ipë ënäty ja myëku'uk të y'ookyën tyaj'o'kwinpitëty ja yaja'ay'o'kpë. Nëjkxëp tmo'otë ja ëwaatsëtuuy'ajtën ets jam nyëjkxëty ma ja naax kajpnën mëti'ipë tsoktaknën. Ja yaja'ay'o'kpë jam jëtu'un jyuuky'atëty koonëm y'ookëty ja teety kyopk, mëti'ipë ënäty ja Tios myëtuumpyën jä'ä xëëw jä'ä jëmëjt.

²⁶ E pën tso'omp jam ma ja tsoktakn kajpn ja y'itjotmën.

²⁷ Ja ja'ay ja myëku'uk mëti'ipë tëë y'ookyën, kajts ja poky tunëty, pën yaj'o'kpy muum ja mëti'ipë ënäty ja myëku'uk të yaj'o'kxëtyën.

²⁸ Ja mëti'ipë ënäty ja myëku'uk të tyaj'ookyën, jam nëjkx wyi'imy ma ja naax kajpnën, mëti'ipë tsoktaknën, koonëm ja teety wyintsën y'ookëty mëti'ipë juukyajtpën jä'ä xëëw jä'ä jëmëjt. Täänëm wyimpitëty ma ja nyaax kyajpnën.

²⁹ Ya'atë ënä'ämën jä'ä jëtu'un xypyatuntëty u'unk ok, oy maa mtimyyajpaatëty.

Ja ënä'ämën wi'ix jyatëtyën ëkë y'ëwaatsëpëtsëmëty ja pokyjyä'äy

³⁰ Ënät tjëkyäpëty tu'uk yë ja'ay y'ookëty mëti'ipë ënäty të yaja'ay'ookyën pën pëtsëëmp mäjtsk tëkëëk mëti'ipë nikajpxëpën. Pën tu'uk je'eyë yë ja'ay nyikäjpxyë ka'ap tjëkyepy wi'ix yajtunëty yë ja'ay.

³¹ Pën jyuuypyëtsëmäämpy tu'uk yë yaja'ay'o'kpë ma ënäty të nyitukën ets y'ookëty. Këtii xykyupëktëty. Jä'ä ko tääpë ja'ay kopkpëky ko y'ookëty.

³² Ka'ap tjëkyepy tu'uk yë ja'ay nyäjyuuypyëtsëmëtëty, mëti'ipë të yaja'ay'ookyën ets tsyoona'anëty ma ja naax kajpnën mëti'ipë tsoktaknën ets wyimpita'anëty ma ja nyaax kyajpnën.

³³ Këtii yë it naaxwiinyëtë xyaj'ëxëëktëkëtëty mëët yë yaja'ay'o'kpë. Jä'ä ko yë yaja'ay'o'kpë yajnipäxëtëjkëtyëp yë naax kajpn. Yë yaja'ay'o'kpë ka'ap tjëkyepy yajuuypyëtsëmëty, koonëm y'ookëty pën të tyuuntëkoyën.

³⁴ Këtii nëkoo xyaj'ëxëëkëtëty yë naax kajpn ma mjuuky'ata'antën ets maas ëjts näjyëtu'un njuuky'ata'anyën. Jä'ä ko ëjts Wintsën, jamës njuuky'äty ma Israel ja'ayëtyën.