Números 34 - Biblia Mixe de Quetzaltepec

Ja nyitsëpa'an ja Canaán naaxjotm

¹ Ënät yë Wintsën ojts tmëkäjpxy ja Moisés ets t'ënëmaay:

² Tukmëmëtya'ak ya'atë aaw ayuk yë Israel ja'ayëty: Jä'ä ko wäänë tääts jam mja'ajnëtëty Canaán naaxjotm. Tääpë it naaxwiinyëtë yë'ë miits mjä'ä'atantëp ets nëjkx ja mtsëpa'an xypyëjkta'aktë.

³ Ja tsëpa'an mëti'ipë jam ëpa'tkë'ëmtsow yajpatpën, yë'ë mëët nyäpyaatëtëty yë të'ëts'itjotm, mëti'ipë yajtijpën Zin ets ja Edom ja nyaaxjotm. E jamts wiinkpë tsyoonëty a'oytsyow, ëpa'tkë'ëy'äämpy ma ja mëjmejyën, mëti'ipë xyëëwajtypyën Ooky mëjnëëmejy.

⁴ Jëtu'un jamtsow y'ëwtitëty, nyaxëty Acrabim, nyaxëty Zin ets jya'tëty jam Cades-barnea. Ja tsëpa'an jampaat nëjkx nyäxy Hasar-adar ets jya'tëty jam Asmón.

⁵ Jam tsyoonëty Asmón ets jya'tëty ma ja mëjwokën ma mëët ja Egiptë ja tsëpa'an tmëët'atyën ets jyëjpkëxëty ma Naax'akujkpë mejy mejyën.

⁶ E ja tsëpa'an mëti'ipë naxëpën anajnytsyow, jam nëjkx nyäxy ma ja mëjnëëpa'ajën mëti'ipë xyëëwajtypyën Naax'akujkpë mejy.

⁷ E ja tsëpa'an mëti'ipë najxpën anëkëjxytsyow, tëyë jam nyaxëty, tsyo'onta'akëty ma ja Naax akujkpë mejyën ets jya'tëty jam ma ja Hor kopkën,

⁸ jam tsyoonëty ma ja Hor kopkën ets jya'tëty ma yajnitëkën ja Hamat, jam Hamat tsyoonëty ets jya'tëty jam Sedad,

⁹ jam Sedad tsyoonëty ets jya'tëty Zifrón, jam Zifrón tsyoonëty ets jya'tëty Hasar-enán.

¹⁰ E ja tsëpa'an mëti'ipë jam najxpën xëëwpëtsëmtsyow, tëyë nëjkx jam nyäxy, tsyoonëty jam Hasar-enán ets jya'tëty Sefam,

¹¹ e jam Sefam tsyoonëty ets jya'tëty Riplá mëti'ipë jam xëëwpëtsëmtsyow yajpatpën ma txëëwatyën Aín; jam tsyoonëty ets kyujënajkä'äkëty xëëwpëtsëmtsyow ma ja Cineret mëjmejyën.

¹² Jamts tsyoonëty ets jya'tëty ma ja Jordán mëjnëëjën ets jyëjpkëxëty ma ja Ooky myëj mejyën. Ya'atë tsëpa'an nëjkx xyajtuntë ma ja it naaxwiinyëtën mëti'ipë miits mjä'ä'atantëpën.

Wi'ix tyajwa'kxtëtyën ja naax kam.

¹³ Ënät ja Moisés ojts ja aaw ayuk tyajwë'ëmy ma ja Israel ja'ayëtyën ets y'ënäny: Ya'atë ja naax kam mëti'ipë nëjkx miits xyajwa'kxtën ijxpëtsëmy. Ya'atë ja naax kam mëti'ipë yë Wintsën të tni'ënä'ämën ets yajmo'otëty ja nitaxtujk ja kujkmëpë ja aptëjk ja y'u'unk y'okëty mëti'ipë ka'ap ja nyaax kyam tpaatënëmën.

^14-15 Jä'ä ko ja nimäjtsk ja kujkmëpë ja aptëjk ja y'u'unk y'okëty, yë'ë yaj'antijtëp ja jyä'äyëty ja Rubén ets Gad ets kujkwä'kxy ja Manasés ja jyä'äy, tëë yë nyaax yajmo'otë tä tyu'kjëëky'at tyu'kmëku'uk'atën, jamtsow ma Jordán mëjnëëjën, winkonpë wyi'imyën ma Jericó kajpnën.

¹⁶ Ënät ja Tios ojts tmëkäjpxy yë Moisés ets t'ënëmaay:

¹⁷ Mëti'ipë nëjkx ya'atë naax kam tyajwa'ktën ma miitsëtyën, yë'ë yë teety Eleazar ets Josué, yë myaank yë Nun.

¹⁸ E nëjkxëp tu'ukjaty yë mëjja'aytyëjk xywyowtë ma tu'ukjatypë ja Israel ja'ayëtyën ets jëtu'un ja naax xyajwa'kxtëty.

¹⁹ Ya'atë ja'ayëty nëjkx xyaxtsowtë: Ma Judá yë jyä'äyën yë'ë nëjkx xywyoowtsowtë yë Caleb, Jefuné yë myaank.

²⁰ Ma Simeón yë jyä'äyën yë'ë nëjkx xywyoowtsowtë yë Samuel, Amiud yë myaank.

²¹ Ma Benjamín yë jyä'äyën yë'ë nëjkx xywyoowtsowtë yë Elidad, yë Quislón yë myaank.

²² Ma Dan yë jyä'äyën, yë'ë nëjkx xywyoowtsowtë yë Buquí, yë Joglí yë myaank.

²³ Ma José y'u'unk y'ëna'kën, yë'ë nëjkx xywyoowtsowtë yë Haniel, yë Efod yë myaank, ma Manasés yë jyä'äyën.

²⁴ E ma Efraín yë jyä'äyën yë'ë nëjkx xywoowtsowtë yë Quemuel, yë Siftán yë myaank.

²⁵ Ma Zabulón yë jyä'äyën, yë'ë nëjkx xywyoowtsowtë yë Elisafan, yë Parnac yë myaank.

²⁶ Ma Isacar yë jyä'äyën, yë'ë nëjkx xywyoowtsowtë yë Paltiel, yë myaank yë Azán.

²⁷ Ma Aser yë jyä'äyën, yë'ë nëjkx xywyoowtsowtë yë Ahiud, yë myaank yë Selomit.

²⁸ Ma Neftalí yë jyä'äyën, yë'ë nëjkx xywyoowtsowtë yë Pedael, yë myaank yë Amiud.

²⁹ Ya'atë jëtu'un ojts yë Wintsën tuk'ëne'emy ets ja naax kam tyajwa'kxtëty jam Canaán ma ja Israel ja'ayëtyën.