Números 33 - Biblia Mixe de Quetzaltepec

Ja në'ë tu'u mëti'ipë pyanëjkxtën ja Israel ja'ayëty

¹ Yaa yajnimëtyä'äky maajaty ojts nyaxtën yë Israel ja'ayëty ko jap tsyo'ontë Egiptë waatswitsy tä yë tsiptuunpëtëjkëtyën, Moisés ojts wyinye'eyëtë mëët yë Aarón.

² Moisés wa'ats ënäty të tkëxjaaytyä'äy ja xyëëw ja it naaxwiinyëtë maajaty nyajxtën, jëtu'un tä ja Wintsën y'ënä'ämëtën. Ya myiny këxja'ay maajaty ojts tsyënaaytyaknpëktën ma tsyo'ontën ets jyaajtën.

³ Yë Israel ja'ayëty jam ojts tsyoontë Ramsés ma myajkmokx'anyën ja mëtu'ukpë ja po'o, mëtu'uk jëmëjtpë, komjëpom ma ënäty ëmaayxyëëw të nyäxyën. Ko tsyo'ontë jap Egiptë mëët yë mëk'ajtën, may y'ijxëtë yë Egiptë ja'ayëty

⁴ ma ënäty jam ja kyä'äxkopktëjkëty tyajnaaxtëkëtë mëti'ipë nimay të y'ooktën ko ja Wintsën yaj'o'këtë, mëët ko ënäty ja tios Egiptëpë të tpanëjkxtëkëtë.

⁵ Yë Israel ja'ayëty jam tsyo'ontë Ramsés ets jyajtë Sucot.

⁶ Jam tsyo'ontë Sucot ets jyajtë Etam, ma jyëjpkëxyën ja it naaxwiinyëtë mëti'ipë aanë'ëk tëëtsë'ëkën.

⁷ Ko jam tsyo'ontë Etam jamtsow ojts y'ëwtitë Pi-hahirot, mëti'ipë ëpa'tkë'ëmtsow yajpatpën ma ja it naaxwiinyëtë txëëwatyën Baal-zefón ets jam tsyënaaytyaknpëjktë ma mëët nyäwyinku'ixën yë Migdol.

⁸ Jam tsyo'ontë Pi-hahirot ets tuknajxtë ja mejy ets jyajtë ma ja it naaxwiinyëtë aanë'ëk tëëtsë'ëkpë. Tëkëëk xëëw ojts tyu'uye'eytyë jam Etam ma y'aanë'ëk tyëëtsë'ëkëtyën ets jyajtë jam Mará.

⁹ Ko jam tsyo'ontë Mará jam jyajtë Elim ma ënäty jam majkmäjtsk yajpaatyën yë nëëwooky ets tëkë'px majk yë kum kepy, jamts ojts tsyënaaytyaknpëktë.

¹⁰ Jam tsyo'ontë Elim ets jyajtë winkon ma ja mejy txëëwatyë Tsapts nëëmejy.

¹¹ Ko jam tsyo'ontë Tsapts nëëmejy, jam jyajtë Sin ma y'anë'ëk tyëëtsë'ëkëtyën.

¹² Ko jam tsyo'ontë Sin të'ëts'itjotm jam jyajtë Dofcá.

¹³ Ko jam tsyo'ontë Dofcá jam jyajtë Alus.

¹⁴ Ko tsyo'ontë Alus jam jyajtë Refidim ma y'ënantën ko ka'ap nëë jam, tii y'uuktëpën.

¹⁵ Ko jam tsyo'ontë Refidim jam jyajtë ma ja Sinaí kopk.

¹⁶ Ko jam tsyo'ontë të'ëts'itjotmën ma ja Sinaí kopkën, jam jyajtë Kibrot-hataavá.

¹⁷ Ko jam tsyo'ontë Kibrot-hataavá, jam jyajtë Haserot.

¹⁸ Ko jam tsyo'ontë Haserot, jam jyajtë Ritmá.

¹⁹ Ko jam tsyo'ontë Ritmá, jam jyajtë Rimón-peres.

²⁰ Ko jam tsyo'ontë Rimón-peres, jam jyajtë Libná.

²¹ Ko jam tsyo'ontë Libná, jam jyajtë Rissa.

²² Ko jam tsyo'ontë Risá, jam jyajtë Quehelata.

²³ Ko jam tsyo'ontë Quehelata, jam jyajtë Séfer.

²⁴ Ko jam tsyo'ontë ma ja tun txëëwatyën Séfer, jam jyajtë Haradá.

²⁵ Ko jam tsyo'ontë Haradá, jam jyajtë Maquelot.

²⁶ Ko jam tsyo'ontë Maquelot, jam jyajtë Tahat.

²⁷ Ko jam tsyo'ontë Tahat, jam jyajtë Tara.

²⁸ Ko jam tsyo'ontë Tara, jam jyajtë Mitcá.

²⁹ Ko jam tsyo'ontë Mitcá, jam jyajtë Hasmoná.

³⁰ Ko jam tsyo'ontë Hasmoná, jam jyajtë Moserot.

³¹ Ko jam tsyo'ontë Moserot, jam jyajtë Bene-jaacan.

³² Ko jam tsyo'ontë Bene-jaacan, jam jyajtë Hor, mëti'ipë nyitënääpyën yë Guidgad.

³³ Ko jam tsyo'ontë Hor, mëti'ipë yë Guidgad nyitënääpyën, jam jyajtë Jotbata.

³⁴ Ko jam tsyo'ontë Jotbata, jam jyajtë Abroná.

³⁵ Ko jam tsyo'ontë Abroná, jam jyajtë Esión-guéber.

³⁶ Ko jam tyo'ontë Esión-guéber, jam jyajtë ma ja të'ëts'itjot txëëwatyën Zin, jampë Cadés.

³⁷ Ko jam tsyo'ontë Cadés, jam jyajtë ma ja Hor kopkën ma ja Edom ja tsyëpa'an nyäxyën.

³⁸ Mëëtkyëjxm ko ënäty ja Wintsën jëtu'un të tni'ënä'ämë. Ënät ja Aarón jam pyejty ma ja Hor kopkën ets jam ojts y'o'knë, ma tyu'uk anyën ja mëkoxk po'opë wëxtyikxy jëmëjt ënäty ëka'any nyëjkxnë ma tsyo'ontën jap Egiptë yë Israel ja'ayëty.

³⁹ Ko yë Aarón jam y'o'ky ma Hor kopkën, jä'ä ënäty ja jyëmëjt mëko'px ja i'px tëkëëk.

⁴⁰ Ja yajkutujkpë mëti'ipë Canaán ja'ayën mëti'ipë xyëëwajtypyën Arad, jampë tsyëënën Négueb, Canaán nyaaxjotm, ojts tnijawë ko ënäty ja Israel ja'ayëty jam të jya'të.

⁴¹ Ko jam tsyo'ontë ma ja Or kopkën, jam jyajtë Zalmoná.

⁴² Ko jam tsyo'ontë Zalmoná, jam jyajtë Punón.

⁴³ Ko jam tsyo'ontë Punón, jam jyajtë Obot.

⁴⁴ Ko jam tsyo'ontë Obot, jam jyajtë Iié-abarim ma ja Moab mëët nyämëtsëpa'an'atyën.

⁴⁵ Ko jam tsyo'ontë Iié-abarim, jam jyajtë Dibón-gad.

⁴⁶ Ko jam tsyo'ontë Dibón-gad, jam jyajtë Almón-diblataim.

⁴⁷ Ko jam tsyo'ontë Almón-diblataim, jam jyajtë ma txëëwatyën Abarim. Ëpa'tkë'ëmtsow yajpaaty ma ja it naaxwiinyëtë txëëwatyën Nebo.

⁴⁸ Ko jam tsyo'ontë Abarim, jam jyajtë Moab joyjyotm. Winkon wyi'imy ma ja Jordán mëjnëëjën mëët yë Jericó kajpn.

⁴⁹ Ja tsënaaytyakn ma jyajtaktën, winkon ma ja Jordán mëjnëëjën, jampaat ënäty y'ëwtity Bet-jesimot ets tyimja'ajty jam Abel-sitim, jam joyjyotm mëti'ipë nyitënääpyën yë Moab.

Wi'ix mëpaat tyajwa'kxtën ja it naaxwiinyëtë mëti'ipën jamën Canaán

⁵⁰ Jam joyjyotm ma ja Moab tnitänën, winkon ma ja Jordán mëjnëëjën, jam ojts yë Wintsën tmëkäjpxy yë Moisés ets t'ënëmaay:

⁵¹ Jëtu'un xy'ënëëmëty yë Israel ja'ayëty: Ko ënäty miitsëty të xytyuknajxnëtë yë Jordán mëjnëë ets mja'ajnëtëty jam Canaán.

⁵² Nëjkxëp xy'ëxwojpta'atë yë ja'ayëty jampë tsyëënëtën, tukwojpëtyääyëtë yë nyaaxpotsyëty tsyaapotsyëty. Wa'ats xyajkutëkooytya'atëty ja y'it nyaaxwiinyëtë ma yë'ë wiink tios t'ëwtatën.

⁵³ Nitsiptuntë tääpë naax kajpn ets jam mtsënaaytyaknpëktëty, yë'ë yam miits nmooytyëp ets xyjyä'ä'atëty.

⁵⁴ E jä'ä nëjkx xyajwa'kxtë ijxpëtsëmy. Jëtu'un xynyijawëtëty jënu'unjaty tyuka'ajëtën ja ja'ayëty tu'kunaax tu'kukajpnëpë ma ja tu'kja'ayjyätypyën. Pën nimay ja ja'ayëty tyu'kunaax'at tyu'kukajpn'atë, mëj yë nyaax xymyo'otëty. E pën niwäänëty, wäänë yë nyaax xymyo'otëty. Tu'kkajpnjaty ja nyaax pyaatëtëty, jëtu'un tä ënäty tyuka'ajëtën.

⁵⁵ E pën ka'ap xy'ëxwojpta'atë ja ja'ayëty jampë tsyëënëtën, mëti'ipë ënäty jam wë'ëmtëpën, xëmë nëjkx ka'ap myajjotkujk'atëtëty, tä yë pu'uxm wiinjoty yajjawën, ëkë tä yë ä'pny muum nini'kxjoty yajpaatyën ko ënäty miits jam mtsënaaytyaknpëktë.

⁵⁶ E miits nëjkx ëxëëk ntuntë, tä jeexyë yë'ëjëty ëxëëk ntuntënës.