Números 32 - Biblia Mixe de Quetzaltepec

Rubén ets Gad tsyënaaytyaknpëktë jam winkon ma Jordán mëjnëëjën

¹ Yë Rubén ets Gad yë jyä'äyëty kutsajpkaa ijtyëty. Ko t'ijxtë ja it naaxwiinyëtë, mëti'ipë jam yajpatpën Jazer nyaaxjotm ets Galaad nyaaxjotm janty'oy kyëxë'ëky ets ja jëyujk tsajpkaa jam tyänëty.

² Ënät ojts tninëjkxtë ja Moisés, ja teety Eleazar ets ja mëjja'aytyëjkëty ets t'ënëmaaytyë:

³ Yë'ëjës yam njanikajpxantëp, ko yë it naaxwiinyëtë mëti'ipë jam yajpatëpën Atarot, Dibón, Jazer, Nimra, Hesbón, Elalé, Sebam, Nebo ets Beón,

⁴ mëti'ipë yë Tios të tnitsiptunyën ets Israel kajpn tmo'oja'any. Jëtu'un yaj'ixy janty'oy yowë jam wya'anëty jëyujk tënaaytyakn tsajpkaatënaaytyakn, e ëëtsëty nmëët'ajtëpës yë jëyujk tsajpkaa.

⁵ Pën mijts m'a'ijxëp, yë'ëjës nja'amëtowantëp tääpë it naaxwiinyëtë ets jeexyë xymyo'otës ets jämyë nwë'ëmtëtyës. Ka'ap ninaxtëtyës yë Jordán mëjnëë.

⁶ Ënät ja Moisés y'ëtsoowëtë: ¿Tiitën miitsëty mmaaytyëp mtajtëp? ¿Wi'ix jä'ä m'ëna'antë: nëjkx yë mëku'uktëjkëty tsyiptuntë ets miitsëty yaa mwë'ëmantëpë?

⁷ ¿Wi'ix ko jëtu'un mmaytyë mtajtë ets ja naax kajpn je'eyë xyajjotmaytyëkëja'antë. Këtiipë jya'tëty ma naax kajpnën mëti'ipë ja wintsën të myo'ojëtën?

⁸ Näyjyëtu'un y'ëtëtstë ja mteety m'apëty jam Cades-barnea, koos nkäjxtë ets nëjkx ja it naaxwiinyëtë t'ixtë tuntë.

⁹ Ojts jampaat jya'të ma tu'uk mëj joyën jam Escol ets t'ijxtë tuuntë ja it naaxwiinyëtë. E ko ojts wyimpijnëtë wiinkjaty ja Israel ja'ayëty tmëmëtyaktë ets tyajjoot'amutskëtyë këtiipë jya'tëty ma ja it naaxwiinyëtën mëti'ipë ënäty ja Tios të myo'ojëtën.

¹⁰ Paaty ojts ja Wintsën mëjwiin këjää jyoot'anpëky ets y'ënäny,

¹¹ ko ja ja'ayëty japë të tsyoontën Egiptë, mëti'ipë ja jyëmëjtëtyën i'px ets këjxypyaat. Ka'ap nëjkx t'ixtë ja naaxwiinyëtë, mëti'ipë ënäty ja Tios të tukwinwanën ja Abraham, Isaac ets Jacob. Jä'ä ko ka'ap ojts myëmëtowëtë.

¹² Ni'ikyë yë Caleb, yë Jefuné yë myaank mëti'ipë Quenehe ja'ayëty ets Josué, yë Nun yë myaank, yi'iyë ojts winë oy tnikajpxtë, tä yë Wintsën tukjotkëtä'äkyën.

¹³ Yë Wintsën mëj këjää ojts tukjoot'anpëky yë Israel ja'ayëty. Paaty ojts jam tyajjëtity të'ëts'itum wëxtyikxy jëmëjt, koonëm y'o'ktaay tyëkooytyääytë, ja mëti'ipë ënäty të yajjoot'anpëkyën mëët ja y'ëxëëkjëtu'un y'ëxëëkkajpxënëty.

¹⁴ E miits yë mteety mtaak ojts pyokytyuntë, näjyëtu'un tyam winë xytyuna'antë tä yë'ëjëty y'ëtëtstën ets ja Wintsën jatëkok xyajjoot'anpëka'antë ets tukjoot'anpëkëty ja Israel kajpn.

¹⁵ Pën miitsëty ka'ap yë Wintsën xymyëj'ixa'antë, jeky nëjkx tjaakyajwë'ëmy yë Israel kajpn të'ëts itjotm. E miits nëjkx pokymyëët mwë'ëmtë, ko ënäty yë'ë y'o'kta'atë.

¹⁶ Ënät ojts wyinkontë ma ja Moisésën ets t'ënëmaaytyë: Mëti'ipë ëëts n'amëtoowtëpën ets xy'a'ixëty, yi'iyë etsës yë njëyujk ntsajpkaa yaa nku''ëkämtëty ets näjyëtu'un n'oytyuna'antës tu'uk ja naax kajpn, ma mëpaat jotkujk tsyëënëtën yë n'u'unk n'okëtyës.

¹⁷ E ko jëtu'un n'ëkyaj'oyëtya'atëtyës, kë'ëmës nëjkx ntso'onkojtë, ko muum tiitsip kyëxë'ëkëty, ëëts nëjkx jëjp'am naxtë ma ja tsiptuunpëtëjkëtyën, koonëm jya'tëty ma ja y'it nyaaxwiinyëtyën. E ëëts ja n'u'unk nto'oxytyëjkëty tam ja akujk jotkujk y'ijtëpë ma mëpaat ka'ap wi'ix jyatën kyëpätën ma tampë ja ja'ayëty näjyëtu'un tsyëënëtën.

¹⁸ Ëëtsëty ka'ap nëjkx ntsojkwinpitës koonëm tpata'atëty yë Israel ja'ay yë nyaax kyamëty.

¹⁹ E jä'ä koos ja naaxëty yaatsow wyi'imy nëë awinmtsow, ma Jordán mëjnëëjën. Ëëts ka'apës nikajpxa'antë ets ni nka''amëtowa'antës ëpëky ja naax mëti'ipë ënäty nëë awinaxy wë'ëmpën.

²⁰ Ënät ojts ja Moisés y'ëtsowëtë: Oy'atëp, pën mjanty pyatuuntëp ja m'aaw m'ayukëty ets pën mjantynyitsiptuuntëp ja mëti'ipë ja Wintsën nyi'ënä'ämëpën.

²¹ Pën miitsëty mnëjkxtëp tsiptuunpë jam nëë'awinaxy ets mtuuntëp ijxtëm ja Wintsën tni'ënä'ämën ets jam myajpaatë mëët ja mmëku'ukëty koonëm ja Wintsën t'ëxwojpta'ajëty ja myëtsiptëjk,

²² ets koonëm ënäty të tmëmëtä'äky ja naax kajpn, jää tëy, oy jää mwinpijtnëtëty jam Wintsën wintum ets näjyëtu'un ma ja Israel ja'ayëtyën. Tääpë naax miits nëjkx xyjyä'ä'atë ets Wintsën nëjkxëp t'a'ixë.

²³ E ko jëtu'un xykyatuntëty, nijawëtë yajxon ko yë Wintsën ënäty mëtëkooytyëp ets ya'atë poky mëti'ipë të xytyuntën, nëjkxëp jëna'a xykyumëtowtë.

²⁴ Oy xy'oytyuntëty yë mkemyëty ma mtsajpkaa xyajtänëtyën ets mnaax mkajpn ma mëpaat ja m'u'unk m'ëna'k jotkujk y'itën. Tii tëy, mkuuytyuntëp jëtu'un ja m'aaw m'ayukëty.

²⁵ Ënät ja y'u'unk y'ok ja Gad ets ja Rubén y'ëtsoowtë: Tyam ëëts n'ëna'antë ko ntunantëpës mëti'ipë yam mni'ënä'ämëpën.

²⁶ Yë n'u'unk n'okëtyës ets njëyujk ntsajpkaajëtyës. Yë'ë yaa wë'ëmtëp ma ya'atë nyaax kyamën yë Galaad.

²⁷ E ëëtsëty tääts nëjkxtëtyës tsiptuunpë ma ja Wintsën jä'ä yajmëmëtowa'anyën, jëtu'un tä ëëts mijts të xy'ënëëmëtën.

²⁸ Ënät ja Moisés ojts tukmëmëtyä'äky ja Eleazar, ja Josué ets ja mëjja'aytyëjkëty, mëti'ipë ja jyiiky myëku'uk nyikopk'ajtëpën Israel ja'ayëty:

²⁹ Pën tëkokyë yë Gad yë jyä'äyëty ets Rubén yë jyä'äjëty tyuknajxtëp yë Jordán nëë mëët miitsëty ets tmënëjkxtëty yë tyi'pxnëty kyu'umënëty mëti'ipë myëtsiptuuntëpën ets tsyiptuntëty ijxtëm ja Wintsën të tni'ënä'ämën, koonëm ja naax kajpn xymyëmëta'aktëty, ënät nëjkx xymyo'otë yë Galaad yë y'it nyaaxwiinyëtë mëti'ipë jyä'ä'atëpën.

³⁰ E pën kajts nyaxtë mëët miitsëty mëët ja tyi'pxnëty kyu'umënëty, yë'ë nëjkx xytyuknikääkëtë ja it naaxwiinyëtë mëti'ipë yajpatpën jam Canaán ma miitsëty mtsëënëja'antën.

³¹ Ënät ja Gad ets ja Rubén ja y'u'unk y'ok y'ëtsoowtë: Tëë yam yajwinmëtoy mëti'ipë mnikäjpxypën, ntunantëp ëëtsëty mëti'ipë yë Wintsën të tni'ënä'ämën.

³² Ëëts nëjkxantëpës tsiptuunpë jam Canaán ets nmëmëtowantëpës yë Wintsën. Yi'iyës tëy ntsojktëp etsës xymyo'otëty tääpë naax, mëti'ipë yaatsow yajpatpën ma Jordán mëjnëë nyäxyën.

³³ Jëtu'un'äämpy ja Rubén, ja Gad ets kujkwä'kxy ja Manasés ja y'u'unk y'ok ojts ja Moisés myo'ojëtë ja it naaxwiinyëtë jampë yajpaatyën ma y'ëne'emyën yë Sihón, Amor ja'ay mëti'ipë jyä'ä'ajtypyën yë Og, jampë yajkutukyën Basán, mëët tëkokyë ja naax kajpn mëti'ipë ënäty jyä'ä'ajtëpën.

³⁴ Ja Gad ja y'u'unk y'ok ojts jatëkok tkoj'oyëtë ja kajpn mëti'ipë xyëëwajtypyën Dibón, Atarot, Aroer,

³⁵ Atarot-sofan, Jazer Jogbehá,

³⁶ Bet-nimrá ets ja Bet-aran. Ojts yajxon ja naax kajpn tnapotstë ta'tspëky ets ja jyëyujkëty ojts tku''ëkämtë.

³⁷ E ja Rubén ja y'u'unk y'ëna'k ojts näjyëtu'un tkoj'oyëtë ja naax kajpn mëti'ipë yajtijtëpën Hesbón, Elalé, Quiriataim.

³⁸ Nebo, Baal-meón ets ja Sibmá, ojts kanaak ja kajpn xëëw tyajtëkatstë ets tpëjktaktë ja kyë'ëm xëëwëty, mëti'ipë ënäty të tkoj'oyëtën ja naax kajpn.

³⁹ Ja y'u'unk y'ok Maquir, yë myaank yë Manasés, yë'ë ojts jam kyajpntëkëtë ma ja Galaad ënäty tnitänën ets yë'ë tjä'äniwantë ojts t'ëxwojpta'atë ja Amor ja'ayëty mëti'ipë ënäty jam yajpatëpën.

⁴⁰ Paatykyëjxm ojts yë Moisés tmo'oy yë Maquir yë y'u'unk y'ok tääpë it naaxwiinyëtë, jampë yajpaatyën ets ojts jam tsyënaaytyaknpëktë.

⁴¹ Tu'uk ja ja'ay mëti'ipë xyëëwajtypyën Jair, yë'ë y'u'unk y'ok yë Manasés, ojts kanaak yë tsënaaytyakn nitsiptuny, ma ënäty ja Amor ja'ayëty yë wyittëjk tmëët'atën ets ojts txëëwmo'oy ja it naaxwiinyëtë Havot-jair.

⁴² Ja ja'ayëty mëti'ipë ënäty ja Nóbah wyintënääpyën ojts kyajpntëkëtë Quenat ets ojts tjä'äniwa'antë ja naax kajpn mëti'ipë ënäty jam näkyumajtsëtëpën ets txëëwmooy Nóbah, kyë'ëm xëëw ojts tpëjktä'äky.