Números 3 - Biblia Mixe de Quetzaltepec

Tii mëpaat tuntën yë Leví ja'ayëty

¹ Jä'ä xëëw ma ja Wintsën ojts tmëkäjpxyën ja Moisés jam ma ja Sinaí kopkën, yë Aarón ets Moisés yë'ë ojts t'u'unk'at t'ok'atë.

² Ja myaank ja Aarón ya'atë ojts y'itë mëti'ipë txëëwajtën: Nadab mëti'ipë kä'äxkopkën, tääts yë Abihú, Eleazar ets Itamar.

³ Nimajktaxkëty, yë'ë ojts yajtuknipëktë ja teety'ajtk.

⁴ Yë Nadab ets Abihú ojts y'o'knëtë tyëkooynyëtë jam ma ja Wintsën ënäty yajpaatyën. Jä'äkyëjxm ko ojts jam wintë'ës'itum ja Wintsën tukwintoytyë ja jëën tëkatsypë, mëti'ipë ënäty ka'ap të tyuk'ënä'ämëtën. E yë'ëjëty ka'ap ojts y'itë yë y'u'unk y'ëna'këty. Paatykyëjxm yë Eleazar ets Itamar ojts yë'ë tpa'atwa'akëtë ja teety'ajtk. Jä'ä tëy ja tyeetyëty Aarón jä'ä ojts kë'ëm kyëwent'ajtënëtë.

⁵ Ënät ja Wintsën ojts tmëkäjpxy ja Moisés ets t'ënëmaay:

⁶ Mëkajpxta'a ja y'u'unk y'ok ja Leví ets tjëjpwa'akëtëty ja tuunk ma mëët tyuunmuktëtyën yë Aarón ma yajputëkëja'anyën.

⁷ Yë'ë nëjkx tputëkëtë ja Aarón ets naax kajpn ma ja wit tëjkën ma ja näpyaatë y'ityën mëët yë Tios. Ets yë'ë nëjkx t'ixtë tuntë tiijaty jap yajtunaanpën ma ja tsajptëjkën.

⁸ Yë'ë näjyëtu'un kyëwent'attëp ja apëjk atu'unën mëti'ipë jap tuunpën ma ja wit tëjkën ma ja näpyaatë y'ityën mëët yë Tios. Ets xëmë yajpaatëty jap oy jëna'a xëëw yë Israel ja'ayëty myëkajpxa'anëtëty, ko tyaka'antëty yë wintsë'kën.

⁹ Ëpëky xypyëjkta'akëty yë Leví ja'ayëty ma myëku'uktëjkëtyën yë Israel ja'ayëty. Ets yi'iyë atu'uk timtyuunk'atëty ma ja Aarón yajputëkëja'anyën ets näjyëtu'un ja y'u'unk y'ok.

¹⁰ Yë'ë mtuknipëkëp yë Aarón ets y'u'unk y'ok, ma winë yajtuna'anyën mëti'ipë mëpaat ja teetytyëjk tuntën. Ko pën kë'ëmwinma'any tii tunaanpëty mëti'ipë ja teetyëjk tyuunk'ajtëpën nëjkxëp y'ooky.

Yë Leví ja'ayëty yë'ë Tios jä'ä'ajtëtëp

¹¹ Ënät yë Tios ojts tmëkäjpxy yë Moisés ets t'ënëmaay:

¹² Ma Israel ja'ayëtyën yë Leví ja'ayëty yë'ëjës të nwin'ixtë ets tkunaxtëty tëkokyë ja yä'äy'ëna'këty mëti'ipë kä'äxkopkëtyën ma tu'uktu'uk yë jëën tëjkën. Yë'ëjëty ëjtsës njä'äniwäämpy.

¹³ Jä'ä ko tëkokyë yë yä'äy'ëna'k mëti'ipë kä'äxkopkën ëjts yë xypyatp. Koos ojts nyaj'o'kta'ay ja kä'äxkopk jap Egiptë mëti'ipë yä'äy'ëna'këtyën, ja myaankëty ja Israel ja'ayëty mëti'ipë kä'äxkopkëtyën. Ets näjyëtu'un ja jyëyujk tsyajpkaajëty mëti'ipë ëka'any naaxwiiny miinpën, ëjtsës ojts nätyuknipëjkë'ëkëty. Paaty yë'ëjëty ëjts njä'ä'ajtyp. Ëjts mëti'ipë Wintsën'ajtpën.

Ma ojts ëpëky yajjaaymyuktën ja Leví ja'ayëty

¹⁴ Tä yë Wintsën ojts tmëkäjpxy yë Moisés ets t'ënëmaay:

¹⁵ Yajpëtë'ëk tu'uk yë jaaymyujkën ma xykyëxjaaytya'ajëtyën tëkokyë yë xyëëwëty yë Leví ja'ayëty. Jëtu'un xykyëxja'ajëty ja xyëëwëty tä tyu'kunaax'at tyu'kukajpn'atën ets tä tyu'kjëëky'at tyu'kmëku'uk'atën. Ets xyjyääypyëtsëmtëty ninu'un yë ye'etyëjktëjk nyimay'atën, pi'k'ëna'k mëti'ipë ëka'any tu'kpo'o jyuuky'ätynyëmën ets mëjja'aytyëjk.

¹⁶ Yë Moisés ojts ja jaaymyujkën tjantyyajpëtë'ëky, jëtu'un tä ënäty ja Tios të y'ënë'ëmxëtyën.

¹⁷ Ya'atë ojts yë Leví tmaank'aty mëti'ipë txëëwajtën: Guersón, Quehat ets Merarí.

¹⁸ Yë Guersón yë y'u'unk y'ok ets tëkokyë yë jyä'äyëty jä'ä xyëëwajtë Libní ets Simí.

¹⁹ Yë y'u'unk y'ok yë Quehat ets jëtu'un tä ënäty tyu'kja'ay'atën, jä'ä xyëëwajtë Amram, Ishar, Hebrón ets Uziel.

²⁰ Yë y'u'unk y'ëna'k yë Merarí ets jëtu'un tä tyu'kja'ay'ajtën, jä'ä xyëëwajtë Mahli ets Musi. Tëkokyë ya'atë ja'ayëty, yë ojts tja'ay'äty yë Leví. Ets jä'ä ojts jap ma jaaymyujkën yajkëxjaaytya'atë aakmëët yë y'u'unk tyo'oxytyëjkëty ets y'u'unk y'ëna'këty.

²¹ Yë Libní ets Simí yë'ë ojts yë Guersón tja'ay'äty.

²² Ja ye'etyëjk mëti'ipë ënäty tu'kpo'o myëët'ajtëpën ma të myëxu'unk'atën ets mëjja'aytyëjk, jä'ä nyiwinë'ajtë wëxtujk mil ja mëkoxk mëko'px.

²³ Ya'atë ja'ayëty jam ojts tsyënaaytyaknpëktë xëëw këtä'äkytsyow, tsajptëjk jëxkë'p.

²⁴ Mëti'ipë ojts tnikopk'atyën yë Guersón yë jyä'äy jä'ä xyëëwajtyp Eliasaf, yë myaank yë Lael.

²⁵ Ma ja wit tëjkën ma näpyaatë y'ityën mëët yë Tios, yë'ë ijty kyëwent'ajtëp ja Tios ja wyittëjk, ja wit mëti'ipë ja tëjk yajtukniyä'pën, ja po'o mëti'ipë nyipëk'ajtypyën, ja wit'atëëytyuk mëti'ipë yajtuk'atëëytyujkpën ja wit tëjk,

²⁶ ja wit'atëëytyuk mëti'ipë nyatëy'äjtypyën ja tsajptëjkpa'a ets ma ja wintsë'këntyakn y'ityën, ja nyitejpxy mëti'ipë mëët yajkëxtsumtën.

²⁷ Ja Quehat ja jyä'äy jä'ä xyëëwajtë Amram, Ishar, Hebrón ets Uziel,

²⁸ e ja yä'äy'ëna'këty mëti'ipë je'eyë tu'uk ja pyo'ojëtyën ma të myintën naaxwiinyëtë ets ja mëjja'aytyëjkëty, jä'ä nyimay'ajtë tuktujk mil ja tëkëëk mëko'px. Ya'atë ja'ayëty jënu'un tyu'kkunaax'at tyu'kukajpn'atën, yë'ë ojts yajtuknipëktë ets yë'ë tkëwent'atëty ja Tios yë wyittëjk.

²⁹ Ets ma ja Tios yë wyittëjk yajpaatyën, ëpa'tkë'ëytsyow ojts tsyënaaytyaknpëktë.

³⁰ Mëti'ipë ojts tnikopk'atyën, ya'atë ja'ayëty jä'ä xyëëwajtyp Elisafan, yë myaank yë Uziel.

³¹ Ya'atë ja'ayëty jënu'un tyu'kukajpn'atën, yë'ë ojts yajtuknipëktë ets tkëwent'atëty ja kaaxë mëti'ipë myë'ijtypyën ja käjpxytyu'unën ets ja kaaypyäjn ets ja mëj jëëntooytyakn, ja wintsë'këntyakn, ja apëjk atu'unënëty mëti'ipë tuunpën ko ja Tios ja wyintsë'kën yajmo'oy, ja wit'atëëytyuk ets tëkokyë winë mëti'ipë yajtuuntëpën ja teetytyëjkëty.

³² Mëti'ipë ojts wyintsënkopk'atyën ma ja Leví ja'ayëtyën, yë'ë Eleazar, yë myaank yë teety Aarón. Ets yë'ë ojts t'ixy tuny ja ja'ayëty, mëti'ipë ënäty kyëwent'ajtëpën ja Tios yë wyittëjk.

³³ Mëti'ipë jyä'äyajtën yë Merarí ya'atë ojts y'itë mëti'ipë ojts txëëwatën; Mahli ets Musi.

³⁴ Jä'ä ojts nyiwinë'atë tëtujk mil ja mäjtsk mëko'px, ja ye'etyëjktëjk, mëti'ipë të pyo'opätën ma të myëxu'unk'atën ets ja mëjja'aytyëjkëty.

³⁵ Yë'ë ojts nyikopk'atëtë Zuriel, yë Abihail yë myaank, anëkëjxytsyow ojts tsyëënëtë, ma ja Tios yë wyittëjkën.

³⁶ Yë Merarí yë y'u'unk y'ok ojts yajtuknipëktë tkëwent'atëty ja kepyjyiity mëti'ipë jap tuunpën ma ja Tios ja wyittëjkën, mëët ja nyikepy ma yajkëxwëëtyën ets ja nyixeny ets ja nyi'ëjx ma tu'ukjaty ja kepyjyiity yajtënaaytyä'äkyën ets tëkokyë winë jënu'un mëët tyunyën.

³⁷ Näyjyëtu'un ja nyixenyëty mëti'ipë kupë ijtëpën ma ja tëja'aw nakemyën, mëët yë nyi'ëjx, nyi'akujpë'ëk ets ja nyitejpxy.

³⁸ E jam xëëwpëtsëmtsyow, ma nyajts'ixën ja Tios ja wyittëjk ets wintuuytsyow ma nyajts'ixën ja wit tëjk ma ja näpyaatë y'ityën mëët yë Tios. Yë'ë ojts jam tsyënaaytyaknpëktë yë Moisés ets Aarón mëët yë myaankëty, mëti'ipë ojts tkëwent'atën ya'atë tsajptëjk ets jëtu'un'äämpy may tkutënaaytyë yë Israel ja'ayëty. Ko ijty pën nanëkoo t'atsoky ja teety tyuunk, o'kp ijty.

³⁹ Ko yë Moisés ets Aarón ojts ya'atë jaaymyujkën tyajpëtë'ëktë ma Leví ja'ayëtyën, tä ënäty yë Tios të tyuk'ënä'ämëtën. Ënät ojts tjaaypyëtsëmtë ja ye'etyëjktëjk mëti'ipë të pyo'opätën je'eyë ets mëjja'aytyëjkëty, jä'ä nyiwinë'atë i'px mäjtsk mil.

Wi'ix ja kä'äxkopktëjk yajjuuypyëtsëmtëtyën

⁴⁰ Ënät yë Tios ojts tmëkäjpxy yë Moisés ets t'ënëmaay: Yajpëtë'ëk tu'uk yë jaaymyujkën ma xykyëxjaaytya'ajëty tëkokyë yë xyëëwëty yë kä'äxkopk mëti'ipë ye'etyëjkëtyën, mëti'ipë pyo'ojën tu'uk ets mëjja'aytyëjkëty.

⁴¹ E yë Leví ja'ayëty ëjts nëjkx xytyuknikääkë ets yë'ë tkunaxtëty yë Israel ja'ayëty yë myaankëty mëti'ipë kä'äxkopkëtyën. Ëjts Wintsën. Näyjyëtu'un ënät ja Israel ja'ay ja tsyajpkaajëty mëti'ipë ëka'any të myëxu'unk'atën, yë Leví ja'ayëty yë tsyajpkaajëty yë'ë nëjkx xytyuknipëjkë'ëkës ets yë'ë kyunaxëtëty.

⁴² Moisés ojts tjanty jyääymyujkta'ay ja ëna'ktëjkëty mëti'ipë kä'äxkopkëtyën, jam ma ja Israel kajpnën. Jëtu'un tä ënäty ja Tios të tyuk'ëne'emyën.

⁴³ Ja ëna'ktëjkëty ja mëjjatyëtypë, ëkë ja mëti'ipë të pyo'opetyën, jä'ä nyiwinë'ajtë i'px mäjtsk mil ja mäjtsk mëko'px ja tëkë'px majktëkëëk.

⁴⁴ Ënät ojts ja Tios tmëkäjpxy ja Moisés ets t'ënëmaay:

⁴⁵ Yë Leví ja'ayëty yë'ë mtuknikënu'kxëp ets tkunaxtëty yë Israel ja'ay yë myaankëty kä'äxkopkpë. Ets näjyëtu'un yë Leví ja'ay yë tsyajpkaajëty yë'ë nëjkx xytyuknikënu'kxë ets tkunaxtëty ja Israel ja'ay ja tsyajpkaajëty, mëti'ipë ëka'any të myëxu'unk'atën. Jä'ä ko yë Leví ja'ayëty ëjts yë xypyatëp. Ëjts jëtu'un Wintsën.

⁴⁶ E ijxtëm xy'ixtën xytyuntën yë Israel ja'ayëty nimay ni'ik yë y'u'unk y'ëna'këty mëti'ipë kä'äxkopkëtyën, këtiinëm jyëtu'un'atë yë Leví ja'ayëty ja kyä'äxkopkëty. E tiits mtuntëp, tyaa xy'ënëëmëtëty ko jyëkyäpëp nyäjyuuypyëtsëmëtëty ets jëtu'un'äämpy tsyo'oktëty ja ëna'ktëjkëty, mëti'ipë kä'äxkopkëtyën mëti'ipë nimay'ajtëpën mäjtsk mëko'px ja tëkë'px majktëkëëk.

⁴⁷ Jä'ä tyaktëty ja meeny mëkoxk mëti'ipë aak poop pujxnën ets jëtu'un nyäkyuyakëtëty nitu'ukjaty ja ja'ay, ja meeny jëtu'un nëjkx jye'emty'äty tä ja ja'ayëty jap tyaktën ma ja Tios ja wyittëjkën, majktu'uk nikonë jye'emty'atëty.

⁴⁸ Ets xykyë'ëmo'ojëty yë meeny yë Aarón ets myaankëty, mëti'ipë ënäty nätyukjuuypyëtsëëmëtëpën ja kä'äxkopktëjkëty.

⁴⁹ Moisés ojts tyajmuky ja meeny, mëti'ipë ja ye'etyëjktëjk nätyukjuuypyëtsëëmëtën mëti'ipë kä'äxkopkëtyën jam ma ja Israel kajpnën.

⁵⁰ Jä'ä ojts tyajmuky ja meeny, tu'uk mil ja tëkëëk mëko'px ja tëkë'px mëkoxk aakyë'ë poop pujxn meeny mëti'ipë ja ja'ay nätyukuyajkëtën nitu'ukjaty. Yë'ë ja kijpxën yajtuuntë japë y'ityën ma ja Tios ja wyittëjkën.

⁵¹ Tä ojts ja meeny jä'ä tkë'ëmo'oy ja Aarón mëët ja myaankëty, jëtu'un tä ënäty ja Tios të tyuk'ëne'emyën.