Números 27 - Biblia Mixe de Quetzaltepec

Ja kyuma'ayënëty ja to'oxytyëjkëty

¹ Ma ja Manasés yë jyä'äyën, jam ijty yë to'oxy'ëna'këty aak tu'kä'äxëty nimëkoxk, jä'ä xyëëwajtë Maalá, Noá, Hoglá, Milcá ets Tirsá. Yë'ë Zelofehad yë nyëëx, yë'ë y'u'unk y'ok yë Héfer, Galaad, Maquir, Manasés ets José.

² Ya'atë nimëkoxkpë to'oxy'ëna'këty, ojts tninëjkxtë yë Moisés, yë teety Eleazar ets mëjja'aytyëjkëty jam ma ja wit tëjkën ma ja näpyaatë y'ityën mëët yë Tios ets t'ënëmaaytyë:

³ Ëëts yë nteetyëty jam y'o'ky të'ëts'itjotm. E yë'ë ka'ap tmëjwa'kpejty yë Coré, mëti'ipë ojts tmëtsiptsoonyën yë Wintsën. Yë'ë kyë'ëmpoky ojts tku'ookë ets ka'ap nitu'uk yë y'u'unk y'ijty mëti'ipë ye'etyëjkën.

⁴ E ka'ap yowë y'oy'atëty koos yë nteety yë xyëëw jëtu'unyë atëkoy y'itëty. Mëët yë'ë ko ka'ap y'ijty nitu'uk yë y'u'unk ye'etyëjkpë. Mooytyëk wäänë ëëts yë naaxëty maas yë nteety yë jyiiky myëku'uk tmëët'atën yë nyaax kyam.

⁵ Ya'atë jotmay ojts yë Moisés tuk'ëwaanë yë Wintsën,

⁶ ets Wintsën y'ëtsoowë:

⁷ tääpë to'oxy'ëna'këty, yë Selofhad yë nyëëx oy yë aaw ayuk tmëmintë. Mo'otë yë nyaax mëti'ipë kyë'ë'am'ajtëpën yë tyeety yë jyiiky myëku'ukëty ets yë'ë tjä'ä'atëty mëti'ipë tyeety ijty jyä'ä'ajtypyën.

⁸ Ets xytyuk'ëwaanëty tëkokyë yë Israel ja'ayëty, jëtu'un xy'ënëëmëtëty: Ko pën y'ookëty ets ënäty ka'ap nitu'uk yë y'u'unk ye'etyëjkën. E pën jam yë nyëëx, jyëkyäpëp yë'ë tmëwë'ëmëty winë tä yë naax kamën mëti'ipë yë'ë kyuma'ayën'atëpën.

⁹ E pën kajts yë nyëëx, jyiiky myëku'uk nëjkx winë tmëwë'ëmtë.

¹⁰ E pën kajts pën yë myëkä'äx, jyëkyejpy yë'ë winë tukmëwë'ëmëty yë tyeety yë myëkä'äxtëjk.

¹¹ E pën tyeety ka'ap pën yë myëkä'äx, jyëkyejpy tukmëwë'ëmëty winë mëti'ipë najëkäm jyiiky'äjtyp myëku'uk'ajtypyën. Ya'atë ënä'ämën yë'ë myajtuntëp xëmë oy tyimjëna'ajëty, jëtu'un tä të ntuk'ëne'emyën.

Ma Josué tkutëjkënën yë Moisés

¹² Ënät yë Wintsën t'ënëmaay yë Moisés: Pät jam ma mëj kopkën mëti'ipë xyëëwajtypyën Abarim ets jam xykyu'ijxnaxëty yë it naaxwiinyëtë, mëti'ipës nmooytyëpën yë Israel ja'ayëty.

¹³ Ko xy'ijxta'ajëty ya'atë it naaxwiinyëtë, tääts ënät m'o'knëty ets nëjkx mëët mtu'ukmuky ja m'ap m'ok, jëtu'un tä yë m'ajtyën Aarón.

¹⁴ Ya'atë jä'äkyëjxm jëtu'un jyäty kyëpety koos ojts miits ja n'aaw n'ayuk ka'ap xymyëjpëjktakëtë, jam ma ja të'ëts'it të'ëtsjot txëëwatyën Zin. Ko ja nëë ojts t'amëtowtë ja Israel ja'ayëty miitsëty ka'ap ja näywyinkutsë'kën xyaj'ijxëtë maas ëjtsën. Jam jëtu'un jyäjty kyëpejty ma txëëwatyën ja nëëjut Meribá, jam Cadés mëti'ipë Zin nyitënääpyën.

¹⁵ Ënät ja Moisés t'ënëmaay ja Wintsën:

^16-17 Mijts Tios, mëti'ipë Wintsën'ajtpën, mëti'ipë juukyajtën mooytyääpyën tëkokyë yë naaxwiinyëtë ja'ay. Mijts win'ix tu'uk yë ja'ay mëti'ipë yë mnaax mkajpn tyu'uwinye'eyëpën, oy maa nyëjkxëty. Këtiipë jëtu'un tyimwë'ëmtëty tä yë tsajppax kupixynyën mëti'ipë ka'ap yë kyëwent'ajtpën.

¹⁸ Ënät ojts ja Wintsën t'ëtsoy ja Moisés: Yë Josué, yë Nun yë myaank, jä'ä jyä'äy'äty wijy ets tëtä'äky, tyukjajtyp wi'ix oy tyunëtyën. E yë'ëjës ntsojkpy ets xykyënu'kxëty ets xykyë'ënixajëty.

¹⁹ Ets xytyukninëjkxëty yë teety Eleazar, yë'ëts mëët tu'knax xywoownëjkxëty ma ja naax kajpnën, jam xytyuknipëkëty ja tuunk.

²⁰ Xymyo'ojëty ja kutujkën mëti'ipë mijts të xymyëët'atyën ets tëkokyë ja ja'ayëty mëj'äämpy jyawëtëty ets myëmëtowëtëty.

²¹ Yë Josué nëjkxëp kë'ëm nyäwya'këxë'ëkyë ma teety Eleazarën. E yë Eleazar yë'ë kyajpxkëxë'ëkëp maas ëjtsën mëët yë Urim. Josué yë'ë nëjkx tni'ënä'ämë tii mëpaat tuntën yë Israel ja'ayëty.

²² Moisés ojts jëtu'un tuunta'ay tëkokyë, mëti'ipë ojts ja Wintsën tyuk'ëne'emyën. Ojts twoownëjkxy ja Josué jam ma ja teety Eleazarën ets ma ja naax kajpnën.

²³ Ënät ja Eleazar jam ja kyë'ë tkëxkoony ma Josué kyëpajkën ets ojts tkënu'kxy, jëtu'un'äämpy tmooy ja kutujkën tä ënäty ja Wintsën të tyuk'ëne'emyën mëët ja Moisés.