Números 26 - Biblia Mixe de Quetzaltepec

¹ ko nyäjxy ja ëyo'on jotmay ma ja ja'ay y'o'ktën, ënät yë Wintsën t'ënëmaay yë Moisés ets Eleazar, teety Aarón yë myaank:

² Yajpëtë'ëktë tu'uk yë jaaymyujkën ma Israel kajpnën. Yajxon xykyëxjaaytya'ajëty yë xyëëwëty yë yä'äy ëna'ktëjkëty, mëti'ipë jyëmëjtëtyën i'px ets naxy, mëti'ipë jyëkyäjpnëpën nyëjkxtëty tsiptuunpë.

³ Ënät yë Moisés ets Eleazar ojts t'ënëëmëtë yë Israel ja'ayëty ets jam nyëjkxtëty ma ja mëj joyën mëti'ipë yë Moab ijty nyitënääpyën. Ma nyäxyën ja Jordán mëjnëë, winkonpë wyi'imyën ma Jericó kajpnën.

⁴ Ets nyäkyajpxkëxë'ëkëtëty tëkokyë ja ye'etyëjkëty mëti'ipë ja jyëmëjtëtyën i'px ets jaakpetyëty ma ja jaaymyujkën pyëti'kyën. Jëtu'un tä ënäty ja Wintsën të tuk'ëne'emyën ja Moisés. E ya'atë ojts y'itë mëti'ipë tso'ontën jap Egiptë.

⁵ Yë ja'ayëty mëti'ipë yë Rubén jyä'äy'äjtypyën, yë Israel yë kyä'äxkopk, yë'ë ojts ëka'any yajjaaypyätë yë y'u'unk y'okëty yë Henoc, Falú,

⁶ Hesrón ets Carmí.

⁷ Ma ja jaaymyujkën jä'ä ojts yajkëxja'atë ja Rubén ja jyä'äy wëxtyikxy tëkëëk mil ja wëxtujk mëko'px ja i'px majk, aak ye'etyëjktëjk.

⁸ Ma Falújën jam myëxu'unk'ajty yë Eliab.

⁹ Ma yë Eliab yë y'u'unk y'ëna'kën jam ojts myëxu'unk'atë yë Nemuel, Datán ets Abiram. Yë Datán ets Abiram yë'ë ojts mëët tu'ukyë nyämyätsyë yë Coré, ma ënäty y'itën najtskajpxëpë; ko tkäjpxykyumëtoownajxtë ja Tios ets näjyëtu'un ja Moisés mëët yë Aarón.

¹⁰ E ko ja naax y'ëwatsy ma ënäty yajpaatën, jap kyënajxtaaytyë nimäjtsk mëët ja Coré. Ets tëkokyë jënu'un ënäty të myëjwa'kpätëtën, ojts y'o'kta'atë mëët ja mëj jëën, jä'ä y'ijtë nimäjtsk mëko'px ja wëxtyikxy majk aak ye'etyëjktëjk. Ya'atë paaty jëtu'un tyuunë jyajtë ets ja Israel ja'ayëty ijxpäjtën twa'antëty.

¹¹ E ja Coré ja y'u'unk y'ëna'këty ka'ap y'o'ktë.

¹² Ma ja jyä'äyën ja Simeón yë'ë ojts yajkëxja'atë ma jaaymyujkën y'ityën ja Nemuel, Jamín, Jaquín,

¹³ Ma ja jyä'äyën ja Zérah ets Saúl.

¹⁴ Ets ma ja jaaymyujkën jä'ä jap yajjaaypyäjtë ja Simeón ja jyä'äy, i'px mäjtsk mil ja mäjtsk mëko'px aak ye'etyëjktëjk.

¹⁵ Ma ja jyä'äyën ja Gad, yë'ë jap yajkëxjaaytyë ma jaaymyujkën y'ijtyën, yë Sefón, Haguí, Suni,

¹⁶ Ozni, Eri,

¹⁷ Arod ets Arelí,

¹⁸ ets jä'ä nyiwinë'ajtë aak ye'etyëjktëjk, wëxtyikxy mil ja mëkoxk mëko'px.

¹⁹ Ma yë Judá yë jyä'äyën ojts y'ooktë yë Er ets Onán jam Canaán naaxjotm.

²⁰ Paatykyëjxm ma Judá jyä'äyën yë'ë ojts yajkëxja'atë ma jaaymyujkën y'ijtyën yë Selá, Fares ets Zara y'u'unk y'okëty.

²¹ Ma jyä'äyën yë Fares yë'ë ojts yajkëxja'atë yë Hesrón ets Hamul yë y'u'unk y'ok.

²² Ma jaaymyujkën y'ijtyën jä'ä yajjaaypyäjtë niwinëty yë Judá ja'ay tëkë'px majkmokx tu'uk mil ja mëkoxk mëko'px, aakyë'ë ye'etyëjkëty.

²³ Yë Isacar yë jyä'äy yë'ë ojts yajjaaypyätë ma jaaymyujkën y'ijtyën yë Tolá, Puvá,

²⁴ Jasub ets Simrón yë y'u'unk y'ok.

²⁵ Ma ja jaaymyujkën y'ijtyën jä'ä ojts nyiwinë'atë yë Isacar yë jyä'äy tëkë'px majktaxk mil ja tëkëëk mëko'px aak ye'etyëjktëjk.

²⁶ Ma Zabulón yë jyä'äyën, yë'ë ojts yajkëxja'atë yë Sered ets Jahleel yë y'u'unk y'ok,

²⁷ e ma ja jaaymyujkën y'ijtyën jä'ä ojts yakëxja'atë yë Zabulón yë jyä'ä tëkë'px mil ja mëkoxk mëko'px, aakyë'ë ye'etyëjktëjk.

²⁸ Ma y'u'unk y'okën yë José mëti'ipë jyä'äyajtën yë Manasés ets Efraín.

²⁹ Ma Manasés yë jyä'äyën yë Maquir yë jyä'äy, e ma Maquir yë y'u'unk y'ëna'kën yë Galaad yë jyä'äy.

³⁰ E ma Galaad yë y'u'unk y'ëna'kën yë jyä'äy yë Jézer ets jyä'äy Helec,

³¹ Yë jyä'äy yë Asriel, yë jyä'äy yë Siquem,

³² yë jyä'äy yë Sekida ets Héfer.

³³ Zelofehad mëti'ipë y'u'unk'ajtën yë Héfer, ka'ap tmëët'ajty yë y'u'unk ye'etyëjkpë, aakyë'ë to'oxy'ëna'k y'u'unk'ajt, mëti'ipë xyëëwajtën Noá, Hoglá, Milcá ets Tirsá.

³⁴ Ma ja jaaymyujkën y'ijtyën jä'ä ojts jap nyokypyätë tëkokyë ja Manasés ja jyä'äy, wëxtyikxy majkmäjtsk mil ja wëxtujk mëko'px, aak ye'etyëjktëjk.

³⁵ E ja ja'ayëty mëti'ipë yë Efraín y'u'unk'ajt y'ok'ajtën yë'ë ojts yajkëxja'atë ma jaaymyujkën y'ijtyën, yë Sutelá, Béquer ets Tahan.

³⁶ Mëti'ipë yë Sutelá y'u'unk'ajt y'ok'ajtën yë'ë Efraín y'u'unk y'ok.

³⁷ Ma jaaymyujkën y'ijtyën jä'ä nyiwinë'ajtë yë Efraín yë jyä'äy i'px majkmäjtsk mil ja mëkoxk mëko'px, aakyë'ë ye'etyëjktëjk. Ya'atë y'u'unk'ajt y'ok'ajt yë José, jëtu'un ja xyëëw nyokytyëjkëtyë tu'kmënaax tu'kmëkajpn.

³⁸ Yë ja'ayëty mëti'ipë y'u'unk'ajt y'ok'ajtë yë Benjamín yë'ë jyä'äy yë Belá, Asbel, Ahiram,

³⁹ Sefufam ets Hufam.

⁴⁰ Yë ja'ayëty mëti'ipë y'u'unk'ajt y'ok'ajtën yë Belá, yë jyä'äy yë Ard ets Naamán, yë Belá myaank.

⁴¹ Ets ma jaaymyujkën y'ijtyën jä'ä yajkëxjaaytyë yë Benjamín yë y'u'unk y'ok wëxtyikxy mëkoxk mil ja tëtujk mëko'px aak ye'etyëjktëjk.

⁴² Mëti'ipë yë Dan y'u'unk'ajt y'ok'ajtën, yë'ë Suham jyä'äy.

⁴³ Ma ja jaaymyujkën y'ijtyën jä'ä ojts nyiwinë'atë yë Suham yë jyä'äy tëkë'px majktaxk mil ja taxk mëko'px, aak ye'etyëjktëjk.

⁴⁴ Ja Aser ja y'u'unk y'ok jënu'un tyu'kunaax'ajt tyu'kukajpn'ajtën, yë'ë ojts ja xyëëwëty nyokytyëkëtë ja y'u'unk y'ok ja Imná, Isví ets Beriá.

⁴⁵ Mëti'ipë y'u'unk'ajt y'ok'ajtën yë Beriá, yë y'u'unk y'ok yë Éber ets Malquiel.

⁴⁶ Aser tam ijty yë nyëëx jä'ä xyëëwajtyp Sérah.

⁴⁷ Ma ja jaaymyujkën, jä'ä yajkëxjaaytyë ni'ëmukë ja Aser ja jyä'äy wëxtyikxy majktëkëëk mil ja taxk mëko'px, aak ye'etyëjktëjk.

⁴⁸ Yë ja'ayëty mëti'ipë y'u'unk'ajt y'ok'ajtën yë Neftalí, yë'ë ojts y'itë Jahseel, Guní,

⁴⁹ Jézer ets Silem yë y'u'unk y'ëna'k.

⁵⁰ Ma ja jaaymyujkën, jä'ä nyiwinë'ajtë ja Neftalí ja y'u'unk y'ëna'k wëxtyikxy mëkoxk mil ja taxk mëko'px, aak ye'etyëjktëjk.

⁵¹ Ja Israel ja'ayëty jënu'un nyokpyäjtaaytyën jap ma jaaymyujkën, jä'ä nyiwinë'ajtë tëtujk mëko'px ja tu'uk mil ja wëxtujk mëko'px ja i'px majk ja ye'etyëjktëjk.

Ma yajnikäjpxyën wi'ix mëpaat ja naax kam tyajwa'kxtën.

⁵² Ënät ja Tios ojts tmëkäjpxy yë Moisés ets t'ënëmaay:

⁵³ Ma ya'atë ja'ayëtyën nëjkxëp yë naax kam wyä'kxy. Nëjkxëp tyuka'ajëtë ja naax kam, jëtu'un tä jap të yajkëxja'atën ma ja jaaymyujkën të y'ityën.

⁵⁴ Ja ja'ayëty mëti'ipë nimayëtyën mëj nëjkx ja nyaax nyikääkëtë, e ja ja'ayëty mëti'ipë niwäänëtyën mutsk nëjkx ja naax nyikääkëtë. Tu'këëyi'ikyëty ja ja'ay nëjkxëp yë nyaax yajmo'otë jëtu'un tä jap myintën ja xyëëwëty ma ja jaaymyujkën të y'ityën.

⁵⁵ Yë naax jëtu'un nëjkx wyä'kxy wi'ixëty ja xyëëw pyo'o tyuka'ajëtën. Tu'ukjaty ja ja'ayëty nëjkxëp ja nyaax tpaaty, jëtu'un tä ënäty ja jyä'äy të nyikääkëtyën ma ja tyeety ja y'ap y'okën

⁵⁶ aak ijxpëtsëmy nëjkx ja naax wyä'kxy, oy jyamëty ma nimay yajpaatën ets oy jyamëty ma niwäänë yajpaatën.

Ma ja Leví ja'ay ojts yajjaaymyuktën

⁵⁷ Ja ja'ayëty mëti'ipë tu'kunaax tu'kukajpnëtyën, ma ja Leví ja jyä'äyën, yë'ë ojts ja xyëëwëty nyokytyëkëtë ja y'u'unk y'ëna'këty ja Guersón, Quehat ets Merarí.

⁵⁸ Ja ja'ayëty mëti'ipë yajtijtëpën Libná ja'ay, Ebrón ja'ay, Mahli ja'ay, Musi ja'ay ets Coré ja'ay, yë'ë Leví ojts tja'ay'äty. Yë Quehat yë'ë Amram tyeety'ajt.

⁵⁹ Yë Amram yë'ë ojts mëët pyiky yë Leví nyëëx mëti'ipë xyëëwajtypyën Jocabed, yë Jocabed jap myëxu'unk'ajty Egiptë, jap ënäty yë Leví jyuuky'ätynyëm. Yë Amram ets Jocabed, yë'ë ojts yë Aarón, Moisés ets Maria teety'at taakatë.

⁶⁰ Yë Aarón yë'ë y'u'unk'ajt y'ëna'k'ajt yë Nadab, Abihú, Eleazar ets Itamar.

⁶¹ Nadab ets Abihú ojts y'o'knëtë, mëët ko ojts kë'ëmwinma'any tyaktë ja wintsë'kën jam Wintsën wyintum.

⁶² Yë ye'etyëjktëjk mëti'ipë Leví y'u'unk'ajt y'ok'ajtën, mëti'ipë ënäty tu'kpo'o ëka'any jyuuky'ätynyëmën ets mëjja'aypyaat, jä'ä nyiwinë'ajtë i'px tëkëëk mil. Yë'ëjëty ka'ap ojts jap ja xyëëwëty yajjaaypyätë ma ja Israel ja'ayëty yajjaaypyäjtën, jä'ä ko ka'ap ojts ja nyaax kyam yajmo'otë tä ja myëku'uktëjkëtyën.

⁶³ Ya'atë jaaymyujkën ojts tyajpëtë'ëktë yë Moisés mëët yë teety Eleazar, jam ma ja mëj joyën mëti'ipë yë Moab nyaaxjot'ajtypyën, ma Jordán mëjnëë nyäxyën; yë'ë mëët nyäwyinku'ixëty yë Jericó kajpn.

⁶⁴ Ma tääpë jaaymyujkën pyëti'kyën nitu'uk ojts yë xyëëw kyayajpëjkta'aktë jap, mëti'ipë ojts nyokytyëkëtën ma ja Moisés mëët yë Aarón jyääymyujkyën.

⁶⁵ Jä'ä ko yë Tios tëë ënäty y'ënë'ëmxëtë ko jam nëjkx y'o'kta'atë të'ëts'itjotm. Yi'iyë yë Caleb, yë myaank yë Jefuné ets Josué, yë myaank yë Nun, yi'iyë ojts wyë'ëmtë juukyajtën mëët.