Números 24 - Biblia Mixe de Quetzaltepec

¹ E yë Balaam tëë ënäty tja'akyukë ko yë Tios y'oyjya'ap ets ja Balaam tkënu'kxëty ja Israel ja'ayëty; ka'ap ojts y'ëkjëtu'un'ajnë tä ja mëtu'k'okpën ets mëmäjtsk okpën ma pyatooy pyanajxyën, paaty jam je'eyë jyaak najts'ijxëy ma ja të'ëts itjotmën.

² Ko yë Balaam t'ijxy, ko yë Israel ja'ayëty jä'ä ënäty të tsyënaaytyaknpëktë tu'kja'ayjyätyëty, jëtu'un tä tyu'kmëku'uk'atën. Ënät ja Tios ja myëk'ajtën y'oyajtën tyuktëjkëyë.

³ Ënät ja Balaam ojts ya'atë ja aaw ayuk tkäjpxy: Ya'atë ojts tkäjpxy tmëtyä'äky yë Balaam, yë Beor yë myaank, ja ja'ay mëti'ipë wa'ats ijxp koopën.

⁴ Ko tu'ukyë yë jyot wyinma'any jam tpëjktä'äky ma Tiosën, wa'ats winë tnijawë, myëtoopy ja aaw ayuk, ets yajxon timy y'ixy wi'ix winë tyuna'any jyata'anyë. Yë'ë mëti'ipë yë Tios yaj'ijxëpën, mëti'ipë winë maaytyääyëpën.

⁵ Mijts Jacob, Israel ja'ayëty, janty'oy kyëxë'ëktë yë wit tëjk mëti'ipë mtuktsëna'ayëtëpën. Tsuj jyänty yaj'ixy ja it naaxwiinyëtë ma të mtsënaaytyaknpëjktën miitsëty Israel ja'ay yë y'u'unk y'ëna'k.

⁶ Yë tsyënaaytyaknëty janty'oy waatswitsy kyëxë'ëktë, jëtu'un janty tsuj yaj'ixtë tä tëëxykyepyën waatswitsypë të yajpääntëwtën nëëpë'aay; tä yë áloe mëti'ipë Wintsën të tkojyën; tä yë ajë kepyën nëëpë'aaypyë tyänëtën.

⁷ Yë Israel ja'ayëty nëjkxëp xëmë yë nyëë tmëët'atë, mëti'ipë y'uukëpën ets mëti'ipë y'ääy y'ujts tyukyajxookëpën, Mëti'ipë yë'ë yajkutujkpë'ajtypyën jampaat nëjkx y'ëne'emy Agag. Yë y'ënä'ämën kyutujkën mëj'äämpy nëjkx y'ity.

⁸ Ja Tios mëti'ipë ojts yajpëtsëmëtën jap Egiptë, yë'ëjëty jëtu'un tmëët'atë tääpë Tios tä tu'uk yë patsajpkaa inpë tjawën yë wyaj. Yë Israel ja'ayëty nëjkxëp tyajkutëkooytya'atë ja naax kajpn mëti'ipë tyam mëtsip'ajtëpën. Nëjkxëp tuktëjëtya'a tukwäjxëtya'atë ja wyääy pyajk, ets mëët ja tyi'pxnëty nëjkx tkuti'pxta'atë.

⁹ Ko muum tsyënaaytyaknpëktë, jëtu'un yaj'ixtë tä tu'uk yë kaa nyäkyo'okyën, pën ëkmëmayëtëp. Kënu'kxy yë ja'ay yajpaatëty mëti'ipë ënäty mkënu'kxëtëpën, e mëti'ipë mpojkëtëpën, nëjkxëp näjyëtu'un yajpoky.

Mëti'ipë ja Balaam y'akajpxën

¹⁰ Ko ja Balac jëtu'un tmëtooy ja aaw ayuk, ënät tukjoot'anpëjky ja Balaam ets ja kyë'ë t'akojxmujky ets t'ënëmaay: Mijtspaat të nmëkäjpxy etsës yë nmëtsip xypyokëty. E tyam mëtëkëëk'ok ëka'any xykyënu'kxnë.

¹¹ Nik timwinpit jatëkok ma mnaax mkajpnën, ëjts tëëjës ënäty ntuknipëjktaakë ko mijts mëj këjää winë nmo'oja'any nkäxa'any, yë'ë Tios jëtu'un kya''a'ijxëp.

¹² Ets ja Balaam y'ëtsooy: Tëës jëtu'un n'ënëëmëtë yë mkäjpxynyajxpëty,

¹³ oy jeexyë xyjyatimmyooytyääpyës yë pu'ts pujxn ets poop pujxn mëti'ipë jap ma mkutujktaknën. Ëjts ka'apës njëkyepy yë Wintsën nkäjpxykyutëjëty ets nitii tkajëkyepy ntunëtyës, oy ka'oy kë'ëmwinma'any. Yi'iyës nikäjpxyp mëti'ipës Tios xytyuk'ënä'ämpën.

¹⁴ E tyam, oyës nwinpitëty maajës yë nnaax nkajpnën. Jëyëjp yam aaw ayuk nyaka'anyës ma mijtsën ets xynyijawëty tii ya'atë naax kajpn tyunäämpyën.

¹⁵ Ënät ja Balaam ojts ya'atë ja aaw ayuk tnikäjpxy: Ja aaw ayuk mëti'ipë kyajpxën yë Balaam, yë Beor yë myaank, ja ja'ay mëti'ipë wa'ats ijxp koopën,

¹⁶ mëti'ipë tu'ukyë yë jyot wyinma'any pyëjktäkpyën ma Tiosën, mëti'ipë wa'ats winë nyija'apën tä yë Tiosën Ni'ik Këjxmëpë, mëti'ipë y'ëxajëpën ja aaw ayuk ets yajxon timy'ixy wi'ix winë tyuna'any jyata'anyën, mëti'ipë Tios tuk'ijxëpën mëti'ipë maaytyääyëpën winë.

¹⁷ Wa'atsës n'ixy tii miimp wiinkoonpën, n'ijxypyës wa'ats tii miimp këtakpën. Tu'uk yë ja'ay pyëtsëma'any ma Jacob yë y'u'unk y'okën mëti'ipë nëjkx mëj'äämpy y'ityën. Yë'ë nëjkx y'ëne'emy ma Israel ja'ayëtyën. Nëjkxëp tjä'ä'ajta'ay jënu'un ja Moab tnitänën ja it naaxwiinyëtë, nëjkxëp tyajkutëkooytyä'äy ja ja'ayëty jampë tsyëënëtën ma Set ja y'u'unk y'okën.

¹⁸ Nëjkxëp tmëmëtä'äky yë Edom ets tjä'ä'atëty yë Seir kajpn mëti'ipë mëtsip'ajtëpën. Yë Israel ja'ayëty nëjkxëp winë mëj këjää tuntë tkajpxtë.

¹⁹ Tu'uk yë ja'ay jam tsyoona'any ma Jacob yë kyajpnën mëti'ipë myëmëtakta'ajäämpyën tu'kë'ëyë yë naax kajpn ets ja ja'ayëty mëti'ipë ënäty jam jaakjuuky'ajtëpën nëjkxëp tyaj'o'kta'ay.

²⁰ Ënät yë Balaam näjyëtu'un tninajts'ijxëy yë Amalec yë y'itjot ets tkajpxpëtsëëmy ya'atë aaw ayuk: Yë Amalec yë nyaax kyajpn mëj'äämpy oypyënëty jyëkyepyë, e ko xëëw jëmëjt tpaatëty tëkokyë nëjkx y'atëkooytyä'äy.

^21-22 Ënät näjyëtu'un tninajts'ijxëy yë quenitëja'ayëty ets tkajpxpëtsëmy ya'atë aaw ayuk: Miitsëty Caín yë y'u'unk y'ok. Oy yë mnaax mkajpnëty ta'tspëky xyjyayaj'itë ets jëtu'un jap mjayajpaatë tä yë joon yë pyä'än tpëjktä'äkyën tsaa'akujky. Tääpë mjëën mtëjkëty nëjkxëp yajnino'kta'ay ko ënäty yë Asiria ja'ay mtukja'tëtë ets tsumy xotsy mënëjkxëtëty.

²³ Ënät ojts näjyëtu'un ya'atë aaw ayuk tkäjpxy: Yë'ëjës nmëmoompy nmëtujkpy. ¿Wi'ix nëjkx yë ja'ay jyatë kyëpätë ko yë Tios jëtu'un tyajtun tyajjatëtëty?

²⁴ Jam Chipre nëjkxëp jam tsyoony mëjjatyëtypë kepy nëëwinye'epyë ets min tyaj'atëkoytyë yë Asiria kajpn ets Éber kajpn, jä'ä ko yë Éber kutëkoyaanp näjyëtu'un.

²⁵ Ko jëtu'un myëtyaktaay yë Balaam, ënät ojts jam tsyo'onë ets nyëjkxnë ma tyëjkën. Yë Balac ojts jam tsyo'onë näjyëtu'un.