Números 2 - Biblia Mixe de Quetzaltepec

Wi'ix mëpaat ja tsyënaaytyakn t'oytyuntën

¹ Ënät ja Tios ojts tmëkäjpxy ja Moisés ets ja Aarón tä t'ënëmaay:

² Tu'uktu'uk yë Israel ja'ayëty aakjam tsyënaaytyaknpëktëty winkon ma ja wit tëjkën ma näpyaatë y'ityën mëët yë Tios. Aakmëët ja wyitwintëyëty ets ja nyi''ijxwë'ëmën mëti'ipë yajtuk'ixtëpën jënu'un tyu'kjëëky'at tyu'kmëku'uk'atën.

³ Matsow yë xëëw pyëtsimyën yë'ë jam tsënaaytyaknpëktëp, yë tsiptuunpëtëjkëty mëti'ipë näwya'pëtëpën mëët ja Judá ja myëjwit wintëy. Ma yë'ë tsyiptuunpë wintsën'atyën yë Nahasón, yë myaank yë Aminadab,

⁴ ets jaaymyujkën jä'ä tnikäjpxy nyimay'atë tëkë'px majkmajkts mil ja tëtujk mëko'px.

⁵ E winkon ma yë'ëjëtyën yë'ë jam tsënaaytyaknpëktëp ja tsiptuunpëtëjkëty mëti'ipë yë Isacar jyä'äy'äjtypyën, ma tsyiptuunpë wyintsën'atyën yë Natanael, yë myaank yë Zuar.

⁶ Ets jaaymyujkën jä'ä tnikäjpxy nyimay'atë wëxtyikxy majkmajkts mil ja taxk mëko'px aak ye'etyëjktëjk.

⁷ Näy jam nëjkx tsyënaaytyaknpëktë yë tsiptuunpëtëjkëty mëti'ipë jyä'äy'äjtypyën yë Zabulón ets yë'ë tsiptuunpë wintsën'ajtp yë Eliab, yë myaank yë Helón.

⁸ Yë jaaymyujkën jä'ä tnikäjpxy nyimay'atë wëxtyikxy majkmokx mäjtsk mil ja taxk mëko'px aak ye'etyëjktëjk.

⁹ Jëtu'un'äämpy nyäwya'kxëtëty tëkëëkpëky ja tsiptuunpëtëjkëty ma ja Judá ja jyä'äyëty tsyënaaytyaknpëka'antën, jä'ä nyiwinë'atëty mëko'px ja majkta'px tëtujk mil ja taxk mëko'px, aak ye'etyëjktëjk mëti'ipë jëjp'am ye'eytyëpën.

¹⁰ E ëpa'tkë'ëytsyow yë'ë tsënaaytyaknpëktëp ja tsiptuunpëtëjkëty mëti'ipë wa'kta'akantëpën mëët ja Rubén yë myëjwit wintëy. Ma Rubén yë jyä'äyën yë'ë jam tsiptuunpë wintsën'ajtp yë Elisur, yë myaank yë Sedeur,

¹¹ yë jaaymyujkën jä'ä tnikäjpxy nyimay'atë wëxtyikxy tëtujk mil ja mëkoxk mëko'px ye'etyëjk ja'ay.

¹² Yë'ë mëët tu'ukyë tsyënaaytyaknpëktëty yë tsiptuunpëtëjkëty mëti'ipë Simeón jyä'äy'äjtypyën. Yë'ë jam tsiptuunpë wintsën'ajtp yë Selumiel, yë myaank yë Zurisadai.

¹³ Ets jaaymyujkën jä'ä tnikäjpxy nyimay'atë wëxtyikxy majkmokx ja majktaxk mil ja tëkëëk mëko'px aak ye'etyëjk ja'ay.

¹⁴ Jam näjyëtu'un nëjkx tsyënaaytyaknpëktë yë tsiptuunpëtëjkëty mëti'ipë jyä'äy'äjtypyën yë Gad ets yë'ë jam tsiptuunpë wintsën'ajtp yë Eliasaf, yë myaank yë Reuel.

¹⁵ Ets jaaymyujkën jä'ä tnikäjpxy nyimay'atë wëxtyikxy mëkoxk mil ja tëtujk mëko'px ja wëxtyikxy majk aak ye'etyëjk.

¹⁶ Jëtu'un'äämpy jam tëkëëkpëky nyäwya'kxëtëty ja tsiptuunpëtëjkëty ma Rubén yë tsyënaaytyaknën, jä'ä nyiwinë'atëty mëko'px ja wëxtyikxy majk tu'uk mil ja taxk mëko'px ja wëxtyikxy majk, aak ye'etyëjk. Yë'ë nëjkx ye'eytyë ma ja mëmäjtsk këëyi'ikpyën.

¹⁷ E ja Leví ja'ayëty yë'ë ye'eytyëp ma ja mëtëkëëk këëyi'ikpyën. Jä'ä t'antijy ko itkujky ye'eytyëty, ma mëët ja mëmajktaxk këëyi'ikpyën ja tsiptuunpëtëjkëty nyäpyaatëtën. Yë'ë myënëjkxtëp tëkokyë jënu'un mëët yajtukkojyën ja wit tëjk ma ja näpyaatë y'ityën mëët yë Tios. Ma ja mëmajktaxk këëyi'ikpyë ja tsiptuunpëtëjkëty mäjtsk këëyi'iky nëjkx ye'eytyë jëjp'am. Tu'knax ye'eytyëty jëtu'un tä ënäty muum tsyënaaytyaknpëktën ets aakyë'ë pyaye'eytyëp mëti'ipë myëjwit wintëy'ajtëpën.

¹⁸ E matsow yë xëëw kyëtä'äkyën yë'ë jam tsënaaytyaknpëktëp yë tsiptuunpëtëjkëty, mëti'ipë pyaye'eyantëpën yë Efraín yë myëjwit wintëy. Yë tsiptuunpëtëjkëty mëti'ipë jyä'äy'äjtypyën yë Efraín, yë'ë jam tsiptuunpë wintsën'ajtp yë Elisamá yë myaank yë Amiud.

¹⁹ Ets jaaymyujkën jä'ä tnikäjpxy nyimay'atë wëxtyikxy mil ja mëkoxk mëko'px aak ye'etyëjktëjk.

²⁰ Jam ma yë'ëjëtyën jam näjyëtu'un tsyënaaytyaknpëktëty yë tsiptuunpëtëjkëty mëti'ipë jyä'äy'äjtypyën yë Manasés, yë'ë jam tsiptuunpë wintsën'ajtp yë Gamaliel, yë myaank yë Pedasur.

²¹ Ets jaaymyujkën jä'ä tnikäjpxy nyimay'atë i'px majkmäjtsk mil ja mäjtsk mëko'px aak ye'etyëjktëjk.

²² Jam näjyëtu'un mëët yë'ëjëty nëjkx tsyënaaytyaknpëktë yë tsiptuunpëtëjkëty mëti'ipë Benjamín jyä'äy'äjtypyën. Ets yë'ë jam tsiptuunpë wintsën'ajtp yë Abidán yë myaank yë Guidoní.

²³ Ets jaaymyujkën jä'ä tnikäjpxy nyimay'atë i'px majkmokx mil ja taxk mëko'px aak ye'etyëjktëjk.

²⁴ Jëtu'un'äämpy jam tsyënaaytyaknpëktëty yë tsiptuunpëtëjkëty tëkëëkpëky ma Efraín yë tsyënaaytyaknën. Jä'ä nyiwinë'atëty mëko'px ja tuktujk mil ja mëko'px, aak ye'etyëjktëjk, mëti'ipë nëjkx ye'eytyën ma ja mëtëkëëk këëyi'ikpyën.

²⁵ E anëkëjxytsyow yë'ë jam tsënaaytyaknpëktëp yë tsiptuunpëtëjkëty mëti'ipë pyaye'eytyëpën ja Dan ja myëjwit wintëy. Ma ja tsiptuunpëtëjkëtyën mëti'ipë yë Dan jyä'äy'äjtypyën, yë'ë jam tsiptuunpë wintsën'ajtp yë Ahiézer, yë myaank yë Amisadai.

²⁶ Ets jaaymyujkën jä'ä tnikäjpxy nyimay'atë, tëkë'px mäjtsk mil ja wëxtujk mëko'px aak ye'etyëjktëjk.

²⁷ Ma yë'ëjëtyën jam nëjkx tsyënaaytyaknpëktë yë tsiptuunpëtëjkëty mëti'ipë yë Aser jyä'äy'äjtypyën, yë'ë jam tsiptuunpë wintsën'ajtp yë Paguiel, yë myaank yë Ocran.

²⁸ Ets jaaymyujkën jä'ä tnikäjpxy nyimay'atë wëxtyikxy tyu'uk mil ja mëkoxk mëko'px, aak ye'etyëjktëjk.

²⁹ Jam näjyëtu'un nëjkx tsyënaaytyaknpëktë yë tsiptuunpëtëjkëty mëti'ipë pyaye'eytyëpën ja Neftalí ja myëjwit wintëy. Ma ja tsiptuunpëtëjkëtyën mëti'ipë ja Neftalí jyä'äy'äjtypyën, yë'ë jam tsiptuunpë wintsën'ajtp yë Ahirá, yë myaank yë Enán.

³⁰ Ets jaaymyujkën jä'ä tnikäjpxy nyimay'atë wëxtyikxy majktëkëëk mil ja taxk mëko'px, aak ye'etyëjktëjk.

³¹ Jëtu'un nëjkx ja Dan ja tsyënaaytyakn wyi'imy tëkëëkpëky, jam y'itëty ja tsiptuunpëtëjk ets jä'ä nëjkx nyiwinë'atë mëko'px ja wëxtyikxy majkmokx mäjtsk mil ja tëtujk mëko'px. Aakyë'ë ye'etyëjkëty mëti'ipë nëjkx tukjëjpkëxtën ja wääpy'ajtën mëët ja myëjwit wintëy.

³² Ko ojts ja jaaymyujkën pyëti'iky ma ja Israel ja'ayëtyën, jä'ä ojts ja ja'ayëty ni'ëmukë yajkëxjaaytya'atë, mëti'ipë ënäty tsiptuunpë'atantëpën tëtujk mëko'pxtëkëëk mil ja mëkoxk mëko'px ja wëxtyikxy majk, aak ye'etyëjktëjk.

³³ E jä'ä ko Tios ënäty kë'ëm të t'ënëëmë ja Moisés ets këtii tyajnokytyëkëtëty ja Leví ja'ayëty, paatykyëjxm ojts ka'ap jap yajkëxja'atë ja xyëëwëty ma ja jaaymyujkën.

³⁴ Yë Israel ja'ayëty ojts jëtu'un tjantytyuntë, tä ënäty ja Wintsën të tuk'ëne'emyën ja Moisés. Tu'ukëëyi'ikyjyäty ja tsiptuunpëty aakmëët ja wyitwintëyëty aakmëët ja jyä'äyëty ets aakmëët ja y'u'unk tyo'oxytyëjkëty.