Números 17 - Biblia Mixe de Quetzaltepec

Ma ja Aarón ojts ja tyajk yoonpëkyën

¹ Ënät ja Tios ojts tmëkäjpxy yë Moisés ets t'ënëmaay:

² Ënëëmë yë Israel ja'ayëty ets nitu'ukjaty tmëmintëty yë tyajk ninu'un tkutänëtën yë y'ap y'okëty ja nimajkmäjtskpë, e ja tajk majkmäjtsk tmëmintëty. Mijts nëjkx xykyëxjaayë ja xyëëwëty ma ja tyajkëtyën.

³ E ja tajk mëti'ipë ja Leví ja'ay jyä'ä'ajtëpën, jam nëjkx ja Aarón ja xyëëw xykyëxpëjkë, tu'ukjaty mëpaat ja'ay ja tajk tpëjkta'aktë.

⁴ Jap xypyëjktakta'ajëty ma ja wit tëjkën ma ja näpyaatë y'ityën mëët yë Tios, winkon ma ja kaaxën mëti'ipë myë'ijtypyën ja käjpxytyu'unën, jä'ä ko jamës nyajpaaty ets jam näy'ijx näpyatëmëty.

⁵ Ëjts nyajyoonpëkäämpyës yë tyajk, mëti'ipës të nwin'ixyën, këtiipë yë Israel ja'ayëty nëkoo je'eyë y'ëk'ëëw y'ëkajpxnëtëty ëjts nwintuuyës.

⁶ Ënät ojts ja Moisés t'ëwaanë ja Israel ja'ayëty ets nitu'ukjaty ja mëjja'aytyëjkëty ojts tjantymyëmintë ja tyajkëty këëktu'uk, majkmäjtsk ojts kyä'pxy. Ja Aarón tam ja tyajk näjyëtu'un yajpaaty.

⁷ Ënät ja Moisés ojts ja tajk tkajptakta'ay jam Tios wintum, ma ja wit tëjkën mëti'ipë myë'ijtypyën ja käjpxytyu'unën.

⁸ E komjëpom ko ojts nyijkx jatëkok ma ja wit tëjkën, ënät t'ijxy, ko ja tajk mëti'ipë ja Aarón jyä'ä'ajtypyën tam ja ujts'aay tsuxk, ets tam näjyëtu'un yë pyijy ets tyëëm.

⁹ Ënät ja Moisés ojts jatëkok tjëkajpta'ay ja tajk jam Tios wintum ets tuk'ijx ja Israel ja'ayëty. E ko t'ijxtaaytyë, tä ja tyajkëty t'ëxajëtyääytyë.

¹⁰ Ënät ja Tios jatëkok t'ënëmaay yë Moisés: Pëjkta'ak jatëkok ja Aarón ja tyajk kaaxë wintuuy mëti'ipë myë'ijtypyën yë käjpxytyu'unën, jëtu'un jap pëjkë'ëky wyë'ëmëty mëti'ipë tyuk'ixtëpën yë Israel ja'ayëty mëti'ipë käjpxy kyumëtoownajxtëpën. Ko ka'ap nëkoo wiinkjaty y'ëwtëty kyajpxtëty ëjts nwintuuyës, këtiipë y'ooktëty.

¹¹ Moisés ojts jëtu'un tuny, tä ojts yë Tios tyuk'ëne'emyën.

¹² E yë Israel ja'ayëty ënät yë Moisés t'ënëmaaytyë: Ëëtsëty mëj këjää të ntuntëkoytyës, e paaty tyam kwanë ko ënät ëëts tu'kë'ëyë n'o'kta'a ntëkooytya'atëtyës.

¹³ Tëkokyë mëti'ipë nëkoo kë'ëmwinma'any myëwinkoonpyën yë Tios yë wyittëjk, ookëp yë'ë. ¿Tii wä'än ënät ëëts n'o'kta'atëtyë?