Números 15 - Biblia Mixe de Quetzaltepec

Nyi'ënä'ämën wi'ix mëpaat ja wintsë'kën yajyäkyën

¹ Ënät ja Tios ojts tmëkäjpxy ja Moisés ets t'ënëmaay:

² Jëtu'un xy'ënëëmëty yë Israel ja'ayëty: ko ënäty jam të jya'ajnëtë ma ja naax kamën mëti'ipës nmo'ojantëpën ets jam tsyëënëtëty jyuuky'atëty.

³ Koos xymyo'oja'antëty tu'uk yë tsajpkaa ëkë tsajppax etsës xytyukwintsë'ëkëja'antëty nino'oky ets oy xyuukëty jyokëty nwintuuyës. Mëët ko ënäty ja wyaantakën tyaj'ëtuka'antë, ëkë ko jëtu'un ja tsyojkën tpëjkta'aktë.

⁴ Pën yajmiimpy ja y'ayajk y'ako'onën, ëpëky tjaakyajkëty mäjtsk tsim yë tsajpmokjëtsy, mëti'ipë mëët yajxëpinyën yë on.

⁵ Ëpëky näjyëtu'un xyajktëpëty ja wintsë'kën mëti'ipë të yajnikäjpxyën mëët ja nyi'ayajk nyi'ako'onën, tä ja tsatym nyëëjën mëti'ipë myajktëpën, tu'ktsimjaty ma tu'ukpë ja kupixnyyä'äyën, mëti'ipë tu'uk yë jyëmëjtnëmën je'eyë.

⁶ Pën yajktëp tu'uk yë kupixyny yä'äy mëti'ipë tëë yä'kpetyën, taxk tsim ëpëky yë tsajpmokjëtsy tukmëyakëtëty mëti'ipë mëët on të yajtijëtityën tu'ktsim.

⁷ Ets ëpëky ja tu'ktsim wäänë xyjyaakyajni'ikëtëty, yë'ëts ayajkën'at ako'onën'atëp, mëti'ipë pa'akxuuk pa'akjokëpën; ko ënäty yajno'oky ets oy xyuukëty jyokëty ëjts nwintuuyës.

⁸ Pën yë'ë myakantëp nino'oky tu'uk yë tsajpkaa u'unk, ëkë mwaantakën myaj'ëtukantëp mëët yë Wintsën.

⁹ Nëjkxëp tëtujk tsim yë tsajpmokjëtsy ëpëky xyjyaakyajni'ikëtë, mëti'ipë ënäty mëët të xytyijëtitën mäjtsk tsim ja on

¹⁰ ets mäjtsk tsim yë tsatym nyëë mëti'ipë tëë nyimaanaxyën. Yë'ëtsës jëtu'un njawëp tä tu'uk yë ayajk ako'onën mëti'ipës nwintuuy ja'ajtpën ets janty'oy xyuuky jyoky.

¹¹ Ya'atë mëpaat tuntë ko tyaktëty tu'uk yë tsajpkaayä'äy, tu'uk yë kupixyny yä'äy mëti'ipë të yä'kpetyën, tu'uk yë kupixyny ayääkë, ëkë tu'uk yë tsajppax ayääkë.

¹² Tu'ukjaty ja jëyujk mëti'ipë yajyajkpën, ëpëky jëtu'un tyaktëty ja nyi'ayajk nyi'ako'onën tä pyaat'atyën.

¹³ Tëkokyë yë Israel ja'ayëty tyuntëp ya'atë ënä'ämën. Ko tu'uk yë ayajk ako'onën xytyukwintsë'ëkëtyës mëti'ipë nino'okyën, oypyë xyuuky jyokyën.

¹⁴ Pën yë'ë jaaypyo'kxyjyä'äy mëti'ipë jam tsënääpyën ma miitsëtyën, yakäämpy tu'uk yë wintsë'kën nino'okpyë mëti'ipë oy xu'kp jojkpën, kopkpëky ko näjyëtu'un ja ënä'ämën tkuuytyunëty tä miitsëtyën.

¹⁵ Ya'atë ënä'ämën tsoowpatp ma miitsëtyën ets ma jaaypyaat jaaypyo'kxëtyën; yë'ë jëtu'un xëmë ënä'ämën'atëp ma miitsëtyën ets ma m'u'unk m'okëtyën.

¹⁶ Tu'ukyë mëpaat je'eyë ënä'ämën y'ity ets tu'kjëjpyë mëti'ipë yajpatunëpën ma miitsëtyën ets ma jaaypyaat jaaypyo'kxëtyën.

¹⁷ Ënät yë Tios ojts tmëkäjpxy ja Moisés ets t'ënëmaay:

¹⁸ Ënëëmë yë Israel ja'ayëty, ko ënäty jam të tyëjkënëtë ma ja itjotmën maas nwoownëjkxtën.

¹⁹ Ets ëka'any tkaytyëty t'uuktëty ja tsajpmok, tu'kpëky mëpaat ëpëky tpëjkta'aktë etsës xymyo'otëty.

²⁰ Jëtu'un ijxtëm xyaktën tu'kpëky ja tsajpmokpajk, näjyëtu'un nëjkx xyajktëpë ja tsajpmookjëtsy wäänë ets tsajpkääky xyajkojtëty etsës xytyukwintsë'ëkëtëty.

²¹ Ya'atë ayajk ako'onën xëmë xyaktëty.

²² Ko ajotkumonë xyjyä'äytyëkoytyëty ets ka'ap xy'ëkyajknëtëty ya'atë ayajk ako'onën, mëti'ipës yë Moisés ntuk'ënä'ämën ets miits xyaktëty.

²³ Ya'atë mëpaat xytyuntë. Tsyo'onta'akëty jä'ä xëëw ma ënäty xytyuknipëjktaakëtën ets jëtu'un tyu'uye'eyëty.

²⁴ Pën ajotkumonë të xyjyä'äytyëkoytyë ets tëkokyë ja naax kajpn nän tëë tja'atyëkoy. Nikajpn tu'uk ja tsajpkaa u'unk xytyukwintsë'ëkëtëtyës, mëti'ipë mnino'oktëpën ets oy ja xu'kën jojkën jya'tëty ma ëjtsën, mëët ja nyi'aaypyajk nyi'ujts pajk mëti'ipë mëët yajtukmëyakën ets näjyëtu'un ja tsatym nyëë, mëti'ipë yë Tios të tni'ënä'ämën. Nëjkxëp ëpëky näjyëtu'un xytyukwintsë'ëkëtës tu'uk yë tsajppax mëti'ipë ja nëë poky kyunaxëpën.

²⁵ Ënät ja teety tyakëty ja wintsë'kën ets ja pokymyä'kxën tpaatëty ja Israel ja'ayëty; jä'ä ko ka'ap tsyokyëty të pyokytyuntë ets tëë xymyo'otës ja y'ayajk y'ako'onënëty ets ja wyintsë'kënëty mëti'ipë ja pyokyëty të tukunaxtën.

²⁶ Ëjts nmä'kxäämpyës ja nyëë pyokyëty ja Israel ja'ayëty ets ja jaaypyaat jaaypyo'kxyëty mëti'ipë tsënaaytyëpën ma miitsëtyën, pën ka'ap kë'ëmwinma'any jëtu'un të pyokytyuntë.

²⁷ Pën tëë tu'uk yë ja'ay ajotkumonë pyokytyuny ets ka'ap jëtu'un t'aawëty tjotëty, yë'ë yakëp tu'uk yë tsajppax mëti'ipë jyëmëjtën tu'uk ets yë'ë ja nyëë pyoky tyukunaxëp.

²⁸ Yë teety yë'ë kyë'ëyakëp ja wintsë'kën, mëët ko tääpë ja'ay të pyokytyuny ets ja pokymyä'kxën tpaatëty.

²⁹ Ya'atë ënä'ämën tunëp ma Israel ja'ayëty ets ma ja jaaypyaat jaaypyo'kxyën mëti'ipë tsënaaytyëpën ma miitsëtyën, pën ka'ap tsyokyëty të pyokytyuny.

³⁰ E pën tu'uk yë ja'ay tsoky tyimpokytyuunpë, ëjts jëtu'un xyajjotma'tp, wä'än yë'ëjëty yë Israel ja'ay ëkë wä'än yë'ëjëty yë jaaypyaat jaaypyo'kxy. Tääpë ja'ay nëjkxëp tyimyajjo'otsy ma nyaax kyajpnën.

³¹ Jä'ä ko n'aaw n'ayukës ets n'ënä'ämënës ënäty të tkumëtoownaxy. Paaty yë'ë nëjkxëp yë yajjo'otsy yë xyëëw ma nyaax kyajpnën ets ja nyëë pyoky kë'ëm tjä'ä'atëty.

Wi'ix yajtëytyunyën ja ja'ay ko tkamëjjawë ja po'kxënxëëw

³² Ko ënäty yë Israel ja'ayëty yajpaatë jam të'ëts'itjotm, ënät tpatë tu'uk yë ja'ay jam kamjotm po'kxënxëëwëtë, yë'ë ja'axy yajmujkpy.

³³ Ënät ojts twoownëjkxtë ma ja Aaronkën, Moisésën ets ma ja Israel ja'ayëtyën.

³⁴ Tääts ojts tpëjkë'ëktë ets këwent'aty tyaj'itë, jä'ä ko ka'ap ënäty tnijawëtë tii mëpaat tuntë mëët tääpë ja'ay.

³⁵ Ënät ja Tios t'ënëmaay ja Moisés: myaj'ooktëp tääpë ja'ay, tëkokyë yë Israel ja'ayëty nëjkx tkuka'atstë tääpë ja'ay jam kajpnpë'am.

³⁶ Ja Israel ja'ayëty ojts tmënëjkxtë ja ja'ay jam kajpnpë'am ets tkuka'atstë koonëm y'o'ky. Jëtu'un tä ënäty ja Tios të tuk'ëne'emyën ja Moisés.

Ja piity jyo'oky mëti'ipë yajkëxuyëpën ma ja witën

³⁷ Ënät yë Tios ojts tmëkäjpxy yë Moisés ets t'ënëmaay:

³⁸ Jëtu'un xy'ënëëmëty yë Israel ja'ayëty: Miitsëty ets m'u'unk m'okëty yë'ë myajtuntëp yë nijän mëti'ipë myëët'ajtypyën yë piity jyo'oky na'ëwtityëty ma pya'ajën, yë piity jyo'oky mëti'ipë jam këxuy itëpën, yë'ë mëti'ipë ukyën.

³⁹ Jëtu'un'äämpy ko xy'ixtëty ya'atë piity jyo'oky ma mwitëtyën. Ënät nëjkx xyjyä'ämyätstë ja n'ënä'ämën ntëyajtënës, mëti'ipë të nmo'otën ets xypyatuntëty. Ka'ap nëjkx mkë'ëmwinma'anyëty xyajtuntë ets jëtu'un ka'ap winë xy'ëktuunëtëty mëti'ipë xëmë myajtëkooyëtëpën ets ëxëëk myaj'ëtë'ëts myaj'ëna'anëtë.

⁴⁰ Jëtu'un'äämpy xyjyä'ämyätstëty ets xypyatuntëty tëkokyë yë n'ënä'ämënës ntëyajtënës. Kënu'kxy nëjkx mwë'ëmtë ets njä'ä'atëty. Ëjts Tios'ajtp ma miitsëtyën.

⁴¹ Ëjts jëtu'un Wintsën, mëti'ipë miits mTiosajtëpën, mëti'ipë myajpëtsëëmëtën jap Egiptë ets yë'ë Tyios'ata'any ma miitsëtyën. Ëjts jëtu'un Wintsën, mëti'ipë miits mTiosajtëpën.