Números 13 - Biblia Mixe de Quetzaltepec

Moisés tkexy yë jyä'äy ets nëjkx y'ixtë tyuntë jam Canaán

¹ Ënät yë Tios ojts tmëkäjpxy yë Moisés ets t'ënëmaay:

² Käx yë ja'ay jam Canaán, ma ja it naaxwiinyëtën mëti'ipës yë Israel ja'ay nmo'ojantëpën, nimajkmäjtsk xykyäxëty tu'ukjaty ja jyä'äy tkutänëtëty.

³ Jëtu'un tä ënäty ja Tios të y'ënä'änyën, Moisés ojts tjanty kyexy ja ja'ayëty, jam tsyo'ontë Parán. Tëkokyë mëti'ipë ojts nyëjkxtën aak mëj'äämpy ets kutujkënmëët ënäty y'itë ma ja jyä'äyëtyën.

⁴ Tyaa ja xyëëw yajnikajpxtë, mëti'ipë ojts nyëjkxtën: Samua, yë myaank yë Zacur, mëti'ipë jyä'äy'äjtypyën yë Rubén.

⁵ Safat, yë myaank yë Hari, mëti'ipë jyä'äy'äjtypyën yë Simeón.

⁶ Caleb, yë myaank yë Jefuné, mëti'ipë jyä'äy'äjtypyën yë Judá.

⁷ Igal yë myaank yë José, mëti'ipë jyä'äy'äjtypyën yë Isacar.

⁸ Oseas, yë myaank yë Nun, mëti'ipë jyä'äy'äjtypyën yë Efraín

⁹ Paltí, yë myaank yë Rafu, mëti'ipë jyä'äy'äjtypyën yë Benjamín.

¹⁰ Gadiel, yë myaank yë Sodí, mëti'ipë jyä'äy'äjtypyën yë Zabulón.

¹¹ Gadí, yë myaank yë Susí, mëti'ipë jyä'äy'äjtypyën yë José.

¹² Amiel, yë myaank yë Guemalí, mëti'ipë jyä'äy'äjtypyën yë Dan.

¹³ Setur, yë myaank yë Micael, mëti'ipë jyä'äy'äjtypyën yë Aser.

¹⁴ Nahbí, yë myaank yë Vapsí, mëti'ipë jyä'äy'äjtypyën yë Neftalí.

¹⁵ Gueuel, yë myaank yë Maquí, mëti'ipë jyä'äy'äjtypyën yë Gad.

¹⁶ Ya'atë ja'ay të yajnikajpxtën, yë'ë ojts yë Moisés tkexy jam ma Canaán ja nyaaxjotmën ets t'ixtëty tuntëty. Ja mëti'ipë xyëëwajtypyën Oseas ojts ja xyëëw twinkuwijtsëyë ets jä'ä ojts tijy Josué.

¹⁷ Ënät ojts yë Moisés tkexy ya'atë ja'ayëty jam ma ja it naaxwiinyëtë txëëwatyën Canaán ets t'ixtëty tuntëty, ënät t'ënëmaay: Jäätsow mnëjkxtëty ma txëëwatyën Négueb ets mpäjtë'ëktëty ma ja kopkjotmën.

¹⁸ Yë'ë m'ixtëp mtuntëp wi'ix yajpaatyën yë naax kajpn ets ja ja'ayëty mëti'ipë jam tsënaaytyëpën, pën oy mëkëty, ëkë pën xyëëpëty; pën niwäänëty ëkë pën nimayëty.

¹⁹ Ixtë tuntë näjyëtu'un wi'ix ja nyaax kyajpn yajpaatën; ja jyëën tyëjkëty wi'ix kyojy'atën. Pën wit tëjk tyuktsëna'ayëtëp, ëkë pën ta'tspëky kyojy'atë. Ixtë näjyëtu'un ja nyaax kyamëty, pën oynyaax ëkë pën ka'ap.

²⁰ Pën ijtp wintëëp winë, ëkë pën ka'ap; pën oyëty ja aay kepy mëti'ipë jam yajpatëpën, ëkë pën ka'ap. Këtii ninu'un mtimtsyë'ëkëtëty. Mëmintëp ja aaytsya'am ujts tsa'am, mëti'ipë jam ijtp wintëëpën. Ko ojts jam nyëjkxtë, yë'ë ënäty tsatym pyiiwk tso'ontakp.

²¹ Ënät ja ye'etyëjktëjk ojts tsyoontë ets jyajtë ma tu'uk yë it naaxwiinyëtën aanë'ëk tëëtsë'ëkpë, jä'ä txëëwaty Sin ets ëpa'tkë'ëytsyow yajpaaty. Ojts jam t'ixtë tuntë tääpë it naaxwiinyëtë. Ojts tukjëtijtëtya'atë ya'atë it, tyajtso'ontaktë jam Sin ets jyajtë ma Rehob kajpnën, anëkëjxytsyow yajpaaty. Winkon mëët wyi'imy ma yajnitëkën yë Hamat kajpn.

²² Ënät ojts nyëjkxtë näjyëtu'un jam Négueb, nyajxtë ets jyajtë Hebrón. Jam ijty tsyëënëtë ja'ayëty, mëti'ipë yajtijtëpën Ahiman, Sesai ets Talmai, yë'ë yë Anac ja y'u'unk y'ok. Yë Hebrón wëxtujk jëmëjt jyëwiinëty ma ojts yajkojyën jam ja kajpn ets ok yë mëj kajpn mëti'ipë xyëëwajtypyën Zoan, mëti'ipë Egiptë nyitënääpyën.

²³ Jampaat jyajtë ma ja nëë wok jyënäkyën, mëti'ipë yajtijpën Escol. Jam tpatë may tsatsymtsya'am ets ojts tu'kxe'enty tnëwäxtë, janty may ënäty ja tu'kxe'entypë ja tyëëm. Ënät tu'uk yë kepy t'ixtaaytyë ets yë'ë mëët tkëëyë'ktë, nimäjtsk tukmuktë. Ojts näjyëtu'un may tyajmuktë ja ujtstëëm mëti'ipë yajtijpën kranatë ets yë xe'enky.

²⁴ Tääpë nëë wok jä'ä ojts tijtë Escol, jä'ä ko yë Israel ja'ayëty jam ojts tëjtë tu'kxe'enty yë tsatymtsya'am.

²⁵ Wëxytyikxy xyëëw ojts jam y'itë ma ja it naaxwiinyëtë ets t'ijxtë tuuntë wi'ix yajpaatyën. Tä ojts wyimpijnëtë

²⁶ jam Cadés ma ja të'ëts'it të'ëtsjotmën ma ja Moisés ënäty yajpaatyën, ja Aarón ets tëkokyë ja Israel ja'ayëty. Jam tukmëmëtyaktaaytyë, wi'ix ënäty ojts të t'ixtën. Ets tuk'ijxtë ja aaytsya'am ujts tsa'am, mëti'ipë jam myëtso'ontën ma ënäty ojts të jyëtitën.

²⁷ Ënät ja Moisés t'ënëmaaytyë: Tëës jam n'otstë maas ojts xykyäxtën. Jam janty ka'ap yë jë'kxy pëky y'ëmaaytyä'äky, yë jë'kxy pëky jëtu'un jam n'ijxmëty ka'ap y'ëmaaytyä'äky tä yë nëë pyëyi'ikyën. Ets tyaajës wäänë të nmëmintë, mëti'ipës jam të npaatën.

²⁸ E ja ja'ayëty mëti'ipë jam tsënaaytyëpën janty amaj kë'ëmajëty yaj'ixtë. Yë kajpn mëjjëty oy ets aak napotsyëty. Ets ka'ap yi'iyëty, tëëjës jam n'ixtë yë Anac yë y'u'unk y'ok, mëti'ipë pajkyenyëtyën.

²⁹ Maa ja it naaxwiinyëtë txëëwatyën Négueb, yë'ë jam tsënaaytyëp yë Amalec ja'ayëty. E ma ja it naaxwiinyëtën mëti'ipë kopkjotmën, yë'ë jam tsënaaytyëp yë Hit ja'ayëty, Jebús ja'ayëty, Amor ja'ayëty, e ma mëjmejyën ets Jordán mëjnëëjën, yë'ë jam tsënaaytyëp yë Canaán ja'ayëty.

³⁰ Ënät ja Caleb ojts wya'akë'ëky ets tyaj'ëmoontaay tëkokyë ja naax kajpn, mëti'ipë ënäty jam yajpatëpën ma ja Moisésën ets y'ënäny: Tsojk tääpë yë naax kajpn nitsiptu'unëmë ets njä'ä'ajtmëty. Ëëts'ajtëm xymyä'ämyëp yë'ë ets nmëmëtakmëty.

³¹ E ja mëti'ipë ënäty të pya'otsëtën ënät ojts y'ëtsowtë: Ka'ap tääpë ja'ay tjëkyepy nipëtë'kmëty. Yë'ëjëty mëk ni'ikëty, këtiinëm ëëts'ajtëmë.

³² Ënät t'ënëmaaytyë ja myëku'uktëjk Israel ja'ayëty. E komë tääpë ja'ayëty mëti'ipë ënäty ojts të t'ixtën, ka'ap ënäty oy ja jot winma'any tmëët'atë, paaty y'ënantë: Ma ja it naaxwiinyëtën mëti'ipës ojts të n'ijxtën, jam pojën jam yë ja'ay y'ooktë. Näyjyëtu'unës të n'ixtë ja ja'ayëty mëti'ipë jam tsënaaytyëpën, këjxmëty kyëxë'ëktë.

³³ Tëës jam n'ixtë yë ja'aypyajkyenyëty, yë Anac y'u'unk y'ok. Koos të n'awa'kmuktë mëët, ëëts janty pixkën të ntimnyäyjyawëtës ma yë'ëjëtyën ets yë'ëjëty janty pixkën të xytyim'ixtës.