Números 11 - Biblia Mixe de Quetzaltepec

Tios t'ëwaanë tsu'utsy ma Israel ja'ayëtyën

¹ Ënät ja Israel ja'ayëty ojts jatëkok wiinkjaty tyëkëtë kajpxpë ma ja Tiosën. Mëët ko mëk tjawëtë ja ëyo'on, mëti'ipë myënajx yajnajxtëpën. Ko Tios jëtu'un tmëtooy, ojts jyoot'anpëky. Ënät tkejxy ja mëj jëën jam pë'am ma mayjyä'äy tsyëënëtën.

² Ets ja ja'ayëty mëktä'äky t'amëtoowtë ja putëjkën ma ja Moisésën ets ja Moisés ojts ja Tios tmëkäjpxy, mëët yë'ëjëty täänëm ja jëën ojts pyi'itsy.

³ Paaty tääpë it naaxwiinyëtë jä'ä ojts yajtijy Taberá. Jä'ä ko jam ojts ja jëën myëjë mëti'ipë ja Tios kyäjxën.

⁴ Ma Israel ja'ayëtyën tam ënäty yajpaatë jaaypyaat jaaypyo'kxyëty, mëti'ipë yi'iyë myëmaay myëët'ajtëpën yë ka'ayën ukën. E ja Israel ja'ayëty näjyëtu'un ja tpa'ëtëtstë. Ojts tyëkëtë kuma'ay kutajëpë ets jëëpyë yaxpë y'ëna'antë: Tsu'utsyës yajxon njajantsyu'utsäämpy.

⁵ Yajxon yaja'amyäjtsnë wi'ix ijty jap ntsu'tsëmën yë nëë jëyujk Egiptë. Ets näjyëtu'un wi'ix ijty jap një'kxëmën yë ujtstëëm, këtsi'ixyëty, cepollëty ets ëxuxëty.

⁶ E tyam mëpaatëp nyuu'o'kënë, yi'iyë xëmë maná yajjë'kxnëp.

⁷ Yë maná jëtu'un ënäty y'ixëty tä yë axykyulantrë pajkën. Pu'ts yë y'ujkën tä yë kepy'u'pkyën.

⁸ Jëtu'un jyawë, tä tsajpmok kääkyën mëti'ipë ontë'ëtsën. Ja ja'ayëty jopyëp ijty tyajmujkojtë ets tmä'ätë ëkë twaytyë tyajkë'ëwtë jëtu'un tä tsajpkääkyën.

⁹ Koots ma ja maanik kyä'äyën, jää ijty näjyëtu'un ja maná kyä'äy.

¹⁰ Ënät ja Moisés ojts tmëtoowpaaty ko ja Israel ja'ayëty jyë'ëtë ya'axtë jam ma tyëjk'aawëtyën mëti'ipë witnikojyën. Ja Tios wiink ojts tjawë, Moisés ojts näjyëtu'un jyoot'anpëky.

¹¹ Ënät yë Moisés t'ënëmaay yë Tios: Wintsën. ¿Wi'ix ko ëxëëk xytyimtunyës pën mijts nmëtuumpy? ¿Tiijës xytyuk'ëxëëk'ijxp, ko ya'atë naax kajpn të xytyuknipëkyës etsës ntu'uwinwowëty?

¹² ¿Ëkë tyeety tyaak, ëkë pënës ëjts, koos xy'amëtoy etsës yë'ëjëty janty tseeny kony nmëët'atëty tä yë mëxu'unktëjk yajtsään yajkontën. Etsës ntimyajja'tëty jëtu'un ma ja it naaxwiinyëtën, mëti'ipë ojts xytyukwinwanën ja y'ap y'okëtyës?

¹³ Maas yë tsu'utsy npëkëty ets ya'atë mayjyä'äy kyäytyëty tsyu'utstëty. Yaxp jojkp xynyimintës ets y'ëna'antë: Tsu'utsyës ntsojkëp.

¹⁴ Ëjts atu'uk ka'apës nmëta'akëty ets ya'atë naax kajpn ntu'uwinye'eyëtyës. Mëkës njawë ya'atë tuunk.

¹⁵ Pën jëtu'un xyajtuna'anyës, ni'ikë tim yaj'o'kës pën xy'oyjya'apës. Jëtu'un ka'ap ëyo'on jotmay nyajnaxëtyës.

¹⁶ Ënät ja Tios y'ëtsoowë: Yajtu'ukmuk nitëkë'px majk yë mëjja'aytyëjk Israel ja'ayëty, mëti'ipë m'a'ijxëpën ko mëj'äämpy y'itë ma ja kajpnën. Ets xywyoowminëty ma wit tëjkën ma näpyaatë y'ityën mëët yë Tios. Jam y'ëwxitëty mëët mijts.

¹⁷ Ëjts këta'akaanpës ma mijtsën ets nmëtyakmëty. Npupëkäämpyës wäänë mmëkajtën m'oyajtën mëti'ipë mëët'ajtypyën ets yë'ë tjä'ä'atëty. Yë'ë nëjkx mputëkëtë ma ya'atë naax kajpn yajtu'uwinye'eyä'äynyën. Jëtu'un ka'ap tii atu'uk mtimtyukëtakpätëtëty.

¹⁸ Ets xy'ënëëmëty yë Israel ja'ayëty wä'än nänyi''ixëtë ets jopy jëjp'ixy yajpaatëty, wä'än yë jyot wyinma'any tyaj'oyëtë. Jä'ä ko jopy itaanp yë tsu'utsy may ets tsyu'utstëty. Tëës nmëtoy ko y'ëjtë tyu'uktë ets y'ëna'antë: jääpëk yë tsu'utsy jeexyë n'ëkpatëmë. Jap Egiptë nikë jotkujk ijty jap nyajpatëmë. E kajts wyi'ixëty, oy, tyam tsyu'utstëty jyë'kxtëty.

¹⁹ Ets ka'ap je'eyë tyu'kxëëwëty myäjtskxëëwëty ëkë y'i'px xëëwëty.

²⁰ Jeky tsyu'utstëty wyëtstëty, jää oy tu'kpo'ojën, koonëm kyu'uxëtëty ets tsyipëtëty. Jä'ä ko ëjts xykyamëj'ijx xykyamëjpëjktaktëp mëti'ipë Wintsën'ajtpën. Ëjts jayajpatpës ma yë'ëjëtyën. E yë'ëjëty ni'ikyë jyänty jyë'ë jyänty myu'utë ets y'ëna'antë: ¿Wi'ix ko ojts n'ëktso'onëmpë jap Egiptë?

²¹ Ënät ja Moisés y'ëtsooy: Yë ja'ayëty mëti'ipës nwoow'ijtypyën, jä'ä nyiwinë'atë tëtujk mëko'px mil. ¿Ets m'ënaanpë ko tu'kpo'o tsyu'utstëtyë?

²² ¿Maa xypyëka'any nëkooyë jëyujk tsajpkaa mëti'ipë ookëpën ets ya'atë ja'ay tsyu'utstëty? Oyxyëp jeexyë xyjyamooypyë tëkokyë yë nëë jëyujk jënu'un mejyjoty yajpaatën ka'ap myëta'akëty.

²³ Ënät ja Tios y'ëtsoowë: ¿Tii janty yi'inëm xy'ixy ëjts yë nmëk'ajtënë? M'ixëp ko jëtu'un tyunëtëty jyatëtëty, mëti'ipës të nikäjpxyën.

Nitëkë'px majkpë mëjja'aytyëjk, kyajpxtë jëtu'un tä yë käjpxynyajxpëtëjkëtyën.

²⁴ Ënät ja Moisés ojts jam tsyoony ma ënäty ja Tios mëët të myëtyä'äkyën ets ojts tukmëmëtyakta'ay ja naax kajpn tä ënäty të y'ënë'ëmxëtyën. Ojts tyajye'eymyujkta'ay nitëkë'px majk ja mëjja'aytyëjk ets jam tpëjktaktaay ma ja wit tëjkën.

²⁵ Ënät ja Tios ojts jatëkok jap kyëtä'äky yootsjoty ets mëët ja Moisés myëtyäky. Ojts tpëky wäänë ja mëk'ajtën oyajtën ma ja Moisésën ets tmooy jä'ä ja mëjja'aytyëjkëty ja nitëkë'px majkpë. Ko ojts ja mëk'ajtën oyajtën tyukja'tëtë ja mëjja'aytyëjkëty, ënät tyëjkëtyë mëtyakpë tä jeexyë kyäjpxynyajxpë'atën. Je'eyë jëtu'un ets ka'ap ojts ok y'ëkkajpxnëtë.

²⁶ Nimäjtsk ja ja'ayëty mëti'ipë xyëëwajtëpën Eldad ets Medad, mëti'ipë ënäty näjyëtu'un të yajwin'ixtën ma ja mëjja'aytyëjkëty ja nitëkë'px majkpë. Yë'ëjëty ka'ap ojts nyëjkxtë ma ja wit tëjkën ma ja Tios jam kyëtä'äkyën, jam ojts wyë'ëmtë ma ja kyë'mtëjkëtyën. Ojts ja mëk'ajtën oyajtën tyukja'tëtë ets tyëjkëtyë mëtyakpë tä jeexyë kyäjpxynyajxpë'atën jam ma ja tsyënaaytyaknëtyën.

²⁷ Ënät ojts tu'uk ja yujkyeeky'ëna'k nyijkxy pëyi'ikyë ma ja Moisésën ets t'ënëmaay: Yë Eldad ets Medad jëtu'un jam kyajpxnëtë ma tsyënaaytyaknëtyën tä yë käjpxynyajxpëtëjkëtyën.

²⁸ Ënät yë Josué y'ënäny, yë myaank yë Nun, mëti'ipë ënäty mutsknëm të tyuuntsoonyën mëët yë Moisés: Wintsën Moisés tun yë mëyajtën ets këtii jëtu'un kyajpxtëty.

²⁹ E yë Moisés tyaa y'ëtsooy: ¿Tii xynyi'äjkëpësë? Ëjts ni'ikyës ntsoky ets jeexyë yë Tios tmooytyä'äy yë myëk'ajtën yë nyaax kyajpn ets tëkokyë y'awinpijta'atë käjpxynyajxpë.

³⁰ Ënät yë Moisés ets ja mëjja'aytyëjkëty ojts jam tsyoontë ets nyëjkxtë ma ja mayjyä'äy jam yajpaatën.

Tios tkexy yë maymyuuxy

³¹ Maatsow ja mëjmejyën, jäätsow ojts ja Wintsën tyajmëjpojy ja maymyuuxy ets jam nyaaxkëtaktë ma ja Israel ja'ayëty ënäty tsyëënëtën. Yajxon tyajwintujktaaytyë ja it naaxwiinyëtë, jä'ä tyajwintujktë tu'kxëëwye'eyën ets nyipäjtë tu'kxajpk kyëjxmëty.

³² Tu'kxëëw tu'ktsu'um ets ëpëky ja komjëpom ojts ja Israel ja'ayëty tpëjkmuktë ja maymyuuxy. Mëti'ipë wäänë ja jyä'ä pyëjkmujkën majk nikëpupyën ojts tyajmuky, yajxon tsujktë t'ä'ktë ets ojts tyajxëëwtë'ëtstë.

³³ Ja Israel ja'ayëty yajxon ënäty tsyu'utsanëtë, ënät ja muuxy may tjanty yajkëëwtë ets tsyu'tstë. Tam ënäty ka'ap tku''uknajxta'atënëm ko ja Wintsën tyukjoot'anpëjkëtë ets may y'o'ktë.

³⁴ Ja it naaxwiinyëtë jä'ä txëëwmooytyë Quibrot-hataavá. Jä'ä ko jam ojts nyaaxtëkëtë ja ja'ayëty, mëti'ipë ënäty yi'iyë myëmaay myëët'ajtëpën ja ka'ayën ukën.

³⁵ Ënät ojts jam tsyoontë Quibrot-hataavá ets jyajtë Haserot, ma tsyënaaytyaknpëjktën.