Mateo 19 - Biblia Mixe de Quetzaltepec

Ko ja'ay nye'ëxmatsëtë pëkpyë uukpyë

¹ Ko jëtu'un y'ënaantaay tääts ja Jesús ojts nyijkxy Galilea ets jyä'äjty ma Judea y'itjotmën, xëëwpëtsëmtsyowpë yajpaatyën ma Jordán nëëjën.

² May ja Jesús ja ja'ay pyatso'onë. Ojts ja pa'amja'ay may tyajtso'oky.

³ Tam ja Farisejë ja'ayëty näjyëtu'un yajpaatë, yë'ë ja Jesús wyinma'any'ixantëp je'eyë ets tyajtëëwtë: ¿Kutujkp ets ja ye'etyëjk t'ëxmatsëty ja tyo'oxytyëjk ko tii tuk'ijxma'atëtyë yiinpë wäänpë?

⁴ Tääts ja Jesús y'ëtsooy: ¿Këtii xykyajpxtënëm ja mëti'ipë kuja'ay miinpën ko Tios ojts tyajkojy yë naaxwiinyëtë ja'ay, ye'etyëjk ets to'oxytyëjk ojts tyajkojyë?

⁵ Ets ja Jesús y'ënäny: Paaty ja ye'etyëjk ja tyaak tyeety t'ëxmatsëty ets ja tyo'oxytyëjk mëët tsyëënëty jyuuky'atëty, jëtu'un nimäjtsk tu'ukyë yajpaatëty.

⁶ Jëtu'unts ka'ap y'ëknimäjtsk'ajnëtë, tu'ukyë yajpatnëtë. Paaty ka'ap tjëkyepy ja ja'ay tyajkwa'kxëty mëti'ipë ja Tios të tyajnämyukyën.

⁷ Tääts tyajtëëwtë: ¿Tii ko ja Moisés ojts tyajkutuky ko ja to'oxytyëjk jyëkyejpy yaj'ëxmatsëty, ko jëwyiin ja nyoky yajmo'ojëty ma y'ënä'änyën ko ka'ap ja nyiye'etyëjk t'ëkmëëtsëënëjanë?

⁸ Tääts ja Jesús y'ënëmaayëtë: Jä'ä ko mkujuun miitsëty, paaty ja Moisés ojts tyajkutuky ets xy'ëxmatstëty ja mto'oxytyëjkëty; je'eyëp ko ka'ap ijty tëëyëp jyëtu'unëty.

⁹ Ëjts ënaanp ko tu'uk ja ye'etyëjk t'ëxmatsëty yë tyo'oxytyëjk ets ja tyo'oxytyëjk ka'ap wiink ye'etyëjk tmëëtëty ets ja ye'etyëjk wiink to'oxytyëjk tpëkëty, kyamëj'ijxyp ënäty ja tyo'oxytyëjk ets pokymyëët wyë'ëmëty.

¹⁰ Tääts ja y'ijxpëjkpëtëjk y'ënëmaayëtë: Pën jëtu'un jyäty ja ye'etyëjk mëët ja tyo'oxytyëjk, nikë oy ko ka'ap pën tyimpëkëty.

¹¹ Tääts ja Jesús y'ëtsoowëtë: Ka'ap ja'ay ni'ëmukë twinmëtoowta'atë, yi'iyë wyinmëtoowtëp mëti'ipë ja Tios jëtu'un të pyëjkta'akëtën.

¹² Kanaaknax ja winma'any mëti'ipë ëtujkpën ets ka'ap ja'ay pyëkëty; tää mëti'ipë jëtu'un mëxu'unk'ajtpën ka'ap tjëkyepy wi'ix pyëkëtyën, tä mëti'ipë ja'ay kë'ëm y'ëtujkpyën këtiipë ja myëku'uk pyëkëty ets tää mëti'ipë ja'ay kë'ëm ënaanpën ko ka'ap pyëka'any mëët ko yë'ë ja tsajpjotmëpë kutujkën tukjuuky'ata'any. Pën jyä'äkyujkëp ya'atë winma'any, wä'än tja'akyukë.

Ko ja Jesús tkënu'kxy ja pi'k ëna'këty

¹³ Tääts ja Jesús yajtuknimiiny ja pi'k ëna'k ets tkënu'kxëty ets ja Tios tuknija'amyäjtsëy. E ja y'ijxpëjkpëtëjk ojts t'ojtë ja ja'ay mëti'ipë ja pi'k ëna'k wyoowmiintëpën.

¹⁴ Ënät ja Jesús y'ënëmaayëtë: Ixmatstë yë pi'k ëna'k, wä'änës xynyimintë, këtii xy'ëtuktëty, jä'ä ko yë'ë jëtu'unpë tä pi'k ëna'kën ja tsajpjotmëpë kutujkën jyä'ä'atantëp.

¹⁵ Tääts ja pi'k ëna'k ojts tkënu'kxy ets ojts jam tsyoony.

Ko tu'uk ja kumeeny u'unk tmëëtmëtyä'äky ja Jesús

¹⁶ Ojts tu'uk yë yä'äy ëna'k tninëjkxy yë Jesús ets tyajtëëy: Wintsën, ¿mëti'ipës mëpaat oy ntuny etsës npaatëty ja juukyajtën xëmëkyëjxmëpë?

¹⁷ Tääts ja Jesús y'ëtsoowë: ¿Tiijës ko xyajtëy ja oypyë? Yë Tios yë'ë tu'ukyë oy'ajtp, pën mpaatäämpy ja juukyajtën xëmëkyëjxmëpë, patun ja Tios ja y'ënä'ämën. Tääts ja yä'äy ëna'k tyajtëëy:

¹⁸ ¿Mëti'ipë? Ets ja Jesús y'ëtsooy: Ka'ap myajja'ay'ookëty, ka'ap ja pëjkën ukën ja nyiwintsë'kën xyajtëkooyëty, ka'ap mmäätsëty, këtii pën xynyi'antaakëty,

¹⁹ wintsë'ëkë ja mtaak mteety ets tsok yë mmëku'uk ijxtëm kë'ëm mnätsyokyën.

²⁰ Ënät ja yä'äy ëna'k y'ëtsooy: Tëës tu'kë'ëyë npatuunta'ay. ¿Tiijës njaaktunëp?

²¹ Ets ja Jesús y'ëtsooy: Pën oy mjuuky'ata'any ijxtëm yë Tios tsokyën, nëjkx to'kta'a tu'kë'ëyë tiijaty mmëët'ajtypyën ets xymyo'ojëty yë ëyoopëja'aytyëjk. Jëtu'un ja kuma'ayën xypyaatëty tsajpjotm. Tääts ënät mminëty, etsës xypyatsoonëty.

²² Ko ja yä'äy ëna'k jëtu'un tmëtooy, ojts jyotmaytyëkë, jä'ä ko kumeeny u'unk ënäty.

²³ Ënät ja Jesús ja y'ijxpëjkpëtëjk t'ënëmaay: Tëy miits n'ënëëmëtë ko tsip tu'uk ja kumeenyjyä'äy tyëkëty ma ja tsajpjotmëpë kutujkënën.

²⁴ Jëtu'un jatëkok n'ënëëmëtë, nikë tsojk tu'uk ja jëyujk jëku'ux nyaxëty xu'uny jutjoty këtiinëm ko tu'uk ja kumeenyjyä'äy tyëkëty ma Tios kyutujktaknën.

²⁵ Ko ja y'ijxpëjkpëtëjk jëtu'un tmëtoowtë, janty mëk ojts tjawëtë ets nyäyajtëëwëtë: ¿Pën jëtää mëpaat ëknitso'oky?

²⁶ Tääts ja Jesús wyintë'kxëtë ets y'ënëmaayëtë: Yë ja'ay wä'än jëtää ka'ap myäyëtëty, yë Tios tii kamaayëp.

²⁷ Ënät ja Pedro y'ënäny: Tëës tu'kë'ëyë n'ëxmajtsta'ay mëti'ipëjaty ijty nmëët'ajtëpës ets mijts të myajpatsoony. ¿Tii ënät ëëts nkuma'ayën'atëp?

²⁸ Tääts ja Jesús y'ëtsoowëtë: Tëy miits n'ënëëmëtë, ko ënäty winë y'ajemyëtyä'äy, ma ja naaxwiinyëtë ja'ay ja y'U'unk ja kyutujkën tpëkyën ets nyaaxwäätsëty ma ja oypyë tsujpë ja y'ënyääypyäjnën; ets miitsëty mëti'ipëjaty të xymyëpëktënës mnaaxwä'tsta'atëty ma ja majkmäjtskpë ja ënyääypyäjnën ets xypyaye'eytyëty ja nyëë pyokyëty ja Israel ja'ayëty nimajkmäjtsk teetypë.

²⁹ Ets ni'ëmukë pënjaty të t'ëxmatstën ja jyëën tyëjk, myëkä'äx, tyaak tyeety, y'u'unk y'ëna'k ets ja nyaax kyajpn; wäänëni'ik nëjkx yajmo'otë winë, mëko'px nipätën; näjyëtu'un yajmo'oja'antë ja juukyajtën xëmëkyëjxmëpë.

³⁰ Je'eyëp ko nimay ja ja'ayëty, mëti'ipë tyam jëwyiin'ajtëpën, ix'ok wyë'ëma'antë; ets nimay, mëti'ipë tyam ix'okëtyën, jëwyiin nëjkx nyaxtë.