Levitico 9 - Biblia Mixe de QuetzaltepecAarón tyajtso'ontä'äky ja tyuunk ma ja teety'ajtkën 1 Kom tëtujk xëëw ojts yë Moisés tmëkäjpxy yë Aarón mëët yë y'u'unk y'ëna'k ets näjyëtu'un ja mëjja'aytyëjkëty mëti'ipë jam yajpatëpën ma ja Israel kajpnën. 2 Ets t'ënëmaay ja Aarón: Yaj'ook tu'uk yë tsajpkaayä'äy ayääkë ets xytyukwintsë'ëkëty yë Wintsën mëti'ipë ja nëë poky kyunaxëpën ets tu'uk yë kupixyny yä'äy mëti'ipë yajnino'okëpën ets jam xymyënëjkxëty ma ja Tiosën. 3 Tääts ja Israel ja'ayëty xy'ënëëmëty ets t'ëxta'atëty tu'uk yë tsajppax yä'äy mëti'ipë tyukwintsë'ëkëtëpën ja Tios mëëtkyëjxm ja poky ets tu'uk yë tsajpkaa ayääkë ets tu'uk yë kupixyny ayääkë mëti'ipë yë jyëmëjtëtyën tu'uk ets oyjyäty mëkjatyëty, yë'ëts yë Tios yajtukwino'ok yajtukwinxamëp. 4 Näyjyëtu'un t'ëxta'atëty tu'uk yë tsajpkaayä'äy ets tu'uk yë kupixyny yä'äy mëti'ipë yë Wintsën yajmo'ojëpën, mëëtkyëjxm ko ënäty ja näy'ëëw'oyë näykyajpx'oyë y'ity mëët yë'ë. Myëmintëp yë y'ääypyajk y'ujts pajk me'eypyë mëët yë on xyëpiny'atëty, jä'ä ko tyam nänyikëxë'ëkanëp yë Tios ma miitsëtyën. 5 Yë Israel ja'ayëty ojts jëtu'un tmënëjkxta'atë jam ma yajnitëkën ja tsajptëjk ma ja näpyaatë y'ityën, tëkokyë mëti'ipë ënäty ja Moisés të tyuk'ënä'ämëtën ets ojts ja mayjyä'äy wyinkontë ets jam wya'ak'o'oyëtyääytyë, ma ja Tios ënäty jam nyänyikëxëka'anyën. 6 Ënät ja Moisés y'ënäny: ya'atë jëtu'un yë Tios të tni'ënä'ämë, tuntë jëtu'un ets Tios nyänyikëxë'ëkëtëty ma miitsëtyën mëët tu'uk yë mëj'ajtën. 7 Tä yë Moisés t'ënëmaay yë Aarón: Winkon jam ma wintsë'këntyaknën ets yak jam yë wintsë'kën mëët yë pokykyëjxm ets ja jëyujk mëti'ipë mnino'okäämpyën ets pokymyä'kxën xypyaatëty ma ja mpokyëtyën ets näjyëtu'un mëëtkyëjxm ja Israel ja'ayëty ja nyëë pyokyëty ets ja pokymyä'kxën tpaatëty, jëtu'un tä ja Wintsën të tni'ënä'ämën. 8 Ënät ja Aarón ojts tmëwinkony ja wintsë'këntyakn ets ojts tyo'kumy ja tsajpkaa mëti'ipë ënäty ja pyoky tyukunaxäämpyën. 9 Tä ojts ja y'ëna'k näjyëtu'un tmëmintë ja ne'pny, tääts ja Aarón tpaxajjë'ky ets ojts tukuutsy ja wintsë'këntyakn ja wyaj, e ja mëti'ipë ojts nyatëkën jam ojts txijkxjëtity ma ja wintsë'këntyakn ja pya'tkën. 10 E ja jëyujk ojts tnino'oky jam ma ja wintsë'këntyaknën, mëët ja tyiinty ets ja on mëti'ipë nyiwits'ajtypyën ja myääts. Jä'ä jëtu'un ja jëyujk mëti'ipë ënäty wintsë'kën'ataanpën mëët pokykyëjxm, jëtu'un tä ënäty ja Tios të tni'ënä'ämën. 11 E ja nyipo'o ets ja nyitsu'utsy jam ojts kajpnpë'am tyajnitooytyä'äy. 12 Aarón ojts näjyëtu'un tyo'kumy ja jëyujk mëti'ipë ënäty yajnino'okaanpën, tä ja y'u'unk y'ëna'k tmëmiintë ja ne'pny ets ja Aarón ojts txijkxjëtity jam ma ja wintsë'këntyakn ja pya'ajën. 13 Ënät ojts tmënëjkxtë ja kyëpajk ets ja nyitsu'uty, ja jëyujk mëti'ipë ënäty të yajtsujktä'äkyën ets ja Aarón ojts jam tnino'kta'ay ma ja wintsë'këntyaknën. 14 Tä ojts tpujë ja myox ets ja pyuuy ets jam ja Aarón tnino'ky ma ja wintsë'këntyaknën, jëtu'un tä ënäty të yajtunyën ja jëyujk ooky ëmuumpë. 15 Aarón ojts ja Israel ja'ayëty ja y'ayajk y'ako'onën tyajkë, ojts tyaj'ooky ja tsajppax mëti'ipë kyunajxypyën ja nyëë pyokyëty ja naax kajpn ets ojts tmo'oy ja Tios, jëtu'un tä ënäty tu'uk ja ayajk ako'onën ja jëyëjpë të tyäkyën. 16 Ja jëyujk mëti'ipë ojts tnino'okyën, jëtu'un ojts tuny tä ja Tios ënäty të tni'ënä'ämën. 17 Tä ojts tyäk näjyëtu'un ja aaypyajk ujtspajk, tu'kmatsy ojts yajxon tpëjkë'ëky ets ojts ja Tios tukwintsë'ëkë, jam tno'ky ma ja wintsë'këntyaknën, ëpëky ja mëti'ipë ënäty të t'ëkno'kpën jopyëp. 18 Aarón ojts ja tsajpkaayä'äy tyo'kumy, näjyëtu'un ja kupixyny yä'äy mëti'ipë ja Israel ja'ayëty yajktëpën ets ja nay'ëëw'oy näykyajpx'oyë tuntë. Tä ja ne'pny ojts ja y'u'unk y'ëna'k tmëmintë ets ja Aarón ojts txijkxjëtity ma ja wintsë'këntyakn ja pya'ajën. 19 Ojts näjyëtu'un myo'ojëtë ja tsajpkaa on ja tsajppax'on ets ja pyi'ixy ets ja on mëti'ipë yajpatpën ma ja tsajpkaa moxën, ma ja myëjtiintyën ets ma ja myäätsën. 20 Tu'ukyë tpëjktaktë ja on mëët ja kyäty, jëtu'un'äämpy ja Aarón ojts tyajnitoy ja on ma ja wintsë'këntyaknën. 21 E ja kyäty ets ja jyëxkpa'a a'oytsyowpë, yë'ë ojts jam tu'kja'axë'ëky tmënëjkxy ma ja Tiosën ets ojts tmëwinpijtkojnë, jä'ä ko jëtu'un ënäty ja Tios të tni'ënä'ämë mëët ja Moisés. 22 Ja Aarón ojts tkë'ënikony ja Israel kajpn ets ojts tkënu'kxy, ko ojts jëtu'un tkë'ëyajkta'ay ja wintsë'kën tä ojts jam jyënäky ma ja wintsë'këntyaknën. 23 Ënät ja Moisés mëët ja Aarón jap tyëjkëy ma ja wit tëjkën ma ja näpyaatë y'ityën. E ko ojts pyëtsëmtë, tääts ojts tkënu'kxtë ja Israel ja'ayëty, täänëm ja Tios nyänyikëxë'kë mëët yë mëj'ajtën ma ja naax kajpnën. 24 Jëtu'un kyëtäky, tä tu'uk yë mëj jëënyä'änkën ets ojts tukëtä'äky ja jëyujk'ooky ets tyajtooykyëtaktaay tu'kë'ëyë jënu'un ënäty jamën ma ja wintsë'këntyaknën. Ko jëtu'un yaj'ijxy ënät yë Israel ja'ayëty tyëjkëtyë yaxjpë jojkpë mëët ja xoontakën ets tëkokyë nyäjyijtaktaayëtë naaxkëjxy ets ojts ja Tios t'ëwtatë, mëët tu'uk ja näwyintsë'ëkë. |
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
Bible Society of Mexico