Levitico 7 - Biblia Mixe de Quetzaltepec

Ja nyiwintsë'kën ko pën tii poky tmëët'aty

¹ Ja wintsë'kën mëti'ipë yajtukuyajkpën ja nëë poky, yë'ë tu'uk yë wintsë'kën janty wa'atspë. Yaa yajnikäjpxy wi'ix mëpaat yajtunyën.

² Ja jëyujk mëti'ipë ja nëë poky yajtukniyajkëpën, jam y'ookëty ma jam y'ooktën yë tsajpkaa mëti'ipë nitooytyëpën ets ja nyine'pny jam yajxijkxjëtitëty ma wintsë'këntyakn yë pya'ajën ets ma nyini'kxën.

³ Tëkokyë ja y'on mëti'ipë jam yajnëtsujkpën ma pyi'ixyën, ma tyiintyën,

⁴ ma ja mäjtskpë ja myëjtiintyën ets ja y'on mëti'ipë nyijuux'ajtypyën ja y'on ets ja y'on mëti'ipë yajpatpën ma jyot myäätsën, mëti'ipë mëët tu'ukyë jyënäkyën ja mëjjatyëtypë ja tyiinty.

⁵ Ënät ja teety tnino'okëty ma ja wintsë'këntyaknën ets ja Tios jä'ä yajtukwintsë'ëkëty. Ya'atë ayajk ako'onën yë'ë yajtukniyajkëp ko ënäty pën tii poky tmëëtëty.

⁶ Tëkokyë yë teetytyëjkëty jyëkyäpëp tsu'utstëty tääpë tsu'utsy, jam mëpaat tsu'utstë ma tu'uk ja itjotmën wa'atspë, jä'ä ko tääpë wa'ats yë'ë.

⁷ Ja nyiwintsë'kën ko pën tyuuntëkoy, näjyëtu'un tä ja nyiwintsë'kënën ko pën pyokytyuny ets ja nyitëyajtën tu'knax. Ja jëyujk mëti'ipë ënäty të wyintsë'kën'atyën, yë'ë ja teety jyä'ä'atëp mëti'ipë ënäty të tyunyën ma ja wintsë'kën yajyäkyën ko ja pokymyä'kxën yaj'amëtoy.

⁸ Näyjyëtu'un ko ja teety tyakëty tu'uk ja jëyujk mëti'ipë ja ja'ay të tukniyakën ets yajnino'okëty, jyëkyäpëp tmëwë'ëmëty ja nyi'ak.

⁹ Näyjyëtu'un yë aaypyajk ujtspajk mëti'ipë tsijtkjoty këëpën ets yë'ë y'ayajkën'aty y'ako'onën'aty. Näyjyëtu'un mëti'ipë yaj'oytyuunpën ma tuka'any'apëjkën ets ma tojkx tu'ts, yë'ë yë teety jyä'ä'ajta'ajëp, mëti'ipë ënäty kyë'ëyäjkpyën ets wyintsë'kën'atëty.

¹⁰ Yë aaypyajk ujtspajk mëti'ipë yajyajkpën ets yë'ë y'ayajkën'aty y'ako'on'aty, mëti'ipë yajmääpën mëët yë on, yë'ë nëjkx tjä'ä'atë yë Aarón yë y'u'unk y'ok tu'knax.

Ma wintsë'kën yajnimëtyä'äkyën ko pën yë näy'ëëw'oyë näykyajpx'oyë tuny

¹¹ Yaa yajnikäjpxy wi'ix mëpaat yajyäkyën ja wintsë'kën ko pën ja nay'ëëw'oy näykyajpx'oyë tuna'anëty mëët yë Tios.

¹² Pën ja wintsë'kën yë'ëkyëjxm yajyaka'any ko ënäty winë yajkukajpxëja'any, nëjkxëp yajyäky yë tsajpkääky mëti'ipë ka'ap tsyooymyëëtyën, yë'ë mëët xyëpiny'atëty yë on, yë tsajpkääky tsyë'ëts pejypyë ets mutskjatyëty ka'apë tsyooymyëëtëtyën ets yë'ë mëët xyëpiny'atëty yë on ets näjyëtu'un yë tsajpkääky tsajpmokwaymyëëtpë yajxonpë të yaj'oytyunyën mëët yë on.

¹³ Tu'ukyë mëët ja wintsë'kën, ko ja ja'awëkyëtakën yajtuny ets mëët yë nyiwintsë'kën ko ja nay'ëëw'oy näykyajpx'oyë yajtuny. Nëjkxëp näjyëtu'un yajyäky yë tsajpkääky ka'apë tsyooymyëëtëtyën.

¹⁴ Oy tyimmëti'ipë ayajk ako'onënëty, kopkpëky ko wäänë yajpupëkëty mëti'ipë yë Tios yajmo'ojëpën ets yë'ë nyäkyuyakë'atëty mëti'ipë ënäty wäänë yajyajkpën; yë'ë jyä'ä'atëp ja teety mëti'ipë ënäty ja ne'pny jam xyijkxjëtijtypyën ma ja wintsë'kën yajyäkyën, ko ja nay'ëëw'oy näykyajpx'oyë y'ity.

¹⁵ Ja nyitsu'uty ja jëyujk mëti'ipë të yajyäkyën ko ja kukajpxën ja'awëkyëtakën yajtuny ets ko ja näy'ëëw'oyë näykyajpx'oyë y'ity, jä'ä xëëw mëpaat yajtsu'uty ma ënäty të yajkë'ëyäkyën. Ka'ap mëpaat nitu'kjënu'un wyi'imy ets komjëpom xytsu'utsantëty.

¹⁶ E pën ja jëyujk jä'äts yajtukëpäjtp ma ënäty winë ja Tios të yajtukwinwanën, ëkë atsoky pën tyäky, jä'ä xëëw xytsyu'utstëty ja nyitsu'uty, e ja mëti'ipë natëjkëpën jyëkyejpy komjëpom tjaaktsu'utstëty.

¹⁷ E jää ko tëkëëk xëëw y'apäjtnëty, kwanë ko ja nyitsu'uty xynyino'kënëtëty, ja jëyujk mëti'ipë ënäty të wyintsë'kën'atyën.

¹⁸ E pën jää tsyu'tsyp ja tsu'utsy ma tyëkëëkxëëwpetyën, ja nyitsu'uty ja jëyujk'ooky mëti'ipë të wyintsë'kën'atyën, ko ja nay'ëëw'oy näykyajpx'oyë y'ity. Ja wintsë'kën ka'ap nëjkx y'ëkyajkupëjknë ets ka'ap nëjkx tyuny, jä'ä ko ja nyitsu'uty nëjkxëp jää yaj'ëxtijnë. Pën ënäty ja jëtu'unpë tsyu'utyp, jä'ä jëtu'un ja poky tukëtakpäjta'ajëtëp.

¹⁹ Pën yë tsu'utsy patëp tii winë mëti'ipë ëxëëkën, ka'ap mëpaat yajtsu'utsy, je'eyë yajnino'okëty. Tëkokyë mëti'ipë wa'ats yajpatpën jyëkyäptëp tsu'utsëty yë tsu'utsy.

²⁰ Pën tu'uk yë ja'ay mëti'ipë ëxëëkën tsyu'tsyp ja tsu'utsy mëti'ipë ënäty ja Tios të yajtukwintsë'ëkën mëët ko ja näy'ëëw'oyë näykyajpx'oyë y'ity, kopkpëky ko y'ookëty tyëkoyëty ma ja nyaax kyajpnën.

²¹ Pën tu'uk yë ja'ay tyoompy mëti'ipë ëxëëkën, wä'än yë'ëjëty mëti'ipë yë ja'ay nyajtsye'ey nyasnajxëpën, ëkë wä'än yë'ëjëty mëti'ipë yë jëyujk nyajtsye'ey nyasnajxëpën, ëkë oytyiijëty mëti'ipë ëxëëkën ets ënät näjyëtu'un tsu'tspëty ja tsu'utsy, mëti'ipë të wyintsë'kën'atyën ma ja näy'ëëw'oyë näykyajpx'oyë y'ityën ets ja Tios jä'ä të yajmo'oy, jëtu'umpë ja ja'ay nëjkxëp ja yajjo'otsy ma ja nyaax kyajpnën.

Wi'ix mëpaat ja on ets ja ne'pny yajtunyën

²² Ënät ja Tios ojts tmëkäjpxy ja Moisés ets t'ënëmaay:

²³ Jëtu'un xy'ënëëmëty yë Israel ja'ayëty: Ka'ap mëpaat xyjyë'kxtë yë tsajpkaayä'äy yë y'on, ni yë'ë yë kupixyny y'on ets ni yë'ë yë tsajppax y'on.

²⁴ Yë nyi'on yë jëyujk mëti'ipë muum o'kpën, ëkë mëti'ipë muum yë kaa jëyujk majtsëtëpën, jyëkyäpëp oy tii xyajwa'antëty, je'eyëp ko këtii xytsyu'utstëty.

²⁵ E pën jëtu'un jyi'kxyp ja nyi'on ja jëyujk mëti'ipë ja Tios yajtukwintsë'këpën ets yajmo'oy tä tu'uk yë ayajk ako'onën mëti'ipë yajnino'kpën, kopkpëky ko nëjkx yajjo'otsy ma ja myëkunaax myëkukajpnën.

²⁶ Oy tyimmaatsowëty ma ënäty mijts myajpaatën, këtii yë nye'pny xyjyë'kxëtëty yë joon ets jëyujk.

²⁷ Pën jyi'kxyp oy tii ne'pny, kwanë ko nëjkx yajjo'otsy ma nyaax kyajpnën.

Mëti'ipë ja teety patëpën

²⁸ Ënät ja Tios ojts tmëkäjpxy ja Moisés ets t'ënëmaay:

²⁹ Ënëëmë yë Israel ja'ayëty, ko pën tmo'oja'anëty yë Wintsën tu'uk yë wintsë'kën ets jëtu'un tuna'anëty ja nay'ëëw'oy näykyajpx'oyë mëët yë'ë, yë wintsë'kën jam mëpaat tmënëjkxy ma Tios jam y'ityën.

³⁰ Kë'ëm mëpaat tmënëjkxy yë ayajk ako'onën mëti'ipë të tno'okyën jam ma Tiosën, tä ja jëyujk'onën mëti'ipë kyätykyijxy të tyajjënajkën ets jëtu'un yajmo'ojëty ja Tios tä tyu'unën'atyën.

³¹ Yë teety yë'ë nyo'okëp yë on jam ma wintsë'këntyaknën ets ja kyäty yë'ë jyä'ä'atëp yë Aarón ets y'u'unk y'ok.

³² Ja jëyujk puuy ja a'oypyë mëti'ipë ënäty të wyintsë'kën'atyën, ko ja nay'ëëw'oy näykyajpx'oyë y'ity, yë'ë mëpaat yë teety yajmo'oy tä tu'uk yë näykyuyakën.

³³ Tääpë yë jëyujk ooky yë y'a'oytsyowpë pyuuyxyixy, yë'ë teety patëp tjä'ä'atëty mëti'ipë kyë'ëyäjkpyën ja jëyujk'on ets ja jëyujk ne'pny, mëët ko ja nay'ëëw'oy näykyajpx'oyë y'ity.

³⁴ Jä'ä ko ja wintsë'kën mëti'ipë yajktëpën ja Israel ja'ayëty ets tuntë ja nay'ëëw'oy näykyajpx'oyë, ëjts yi'iyës ntsojkëp yë kyätsy, tä tu'uk yë ayajk ako'onën ets pyuuy yë'ë ja ja'ay natyukuyakëtëp. E yë Aarón mëët yë y'u'unk y'ok tëëjës yë jyä'ä nmo'otë mëti'ipë patëtëpën ma ja ayajk ako'onën tyaktën yë Israel ja'ayëty.

³⁵ E ja ayajk ako'onën mëti'ipë yë Tios yajtukwinno'kpën, ya'atë mëpaat yë Aarón yajmo'oy mëët yë y'u'unk y'ok. Tyimtso'ontäky ma ojts ja Tios tkënu'kxyën ja teetytyëjkëty ets yë'ë myëtunëtëty.

³⁶ Ojts ja Tios tni'ënä'ämë mëti'ipë mëpaat yë Israel ja'ayëty tmo'otën ja Aarón ma ojts yajkënu'kxyën ets yë'ë tyeety'atëty. Ya'atë ojts tni'ënä'ämë yë Tios ets kopkpëky jëtu'un ko tuntëty ja Israel ja'ayëty ets jëtu'un xëmë y'itëty u'unk ok.

³⁷ E yaa jëtu'un yajnimëtyä'äky, wi'ix mëpaat yajyäkyën ja wintsë'kën mëti'ipë yajnino'okëpën, ja aaypyajk ujtspajk mëti'ipë ayajkën'at ako'onën'atëpën, ja nyiwintsë'kën ko pën tii poky tunëty ets ko pën tyuuntëkoyëty, ja nyi'ayajk nyi'ako'onën ko pën nyäpyuja'an nyäjyä'ätsa'anëtëty ets ja nyiwintsë'kën ko pën ja nay'ëëw'oy näykyajpx'oyë tuna'anëty.

³⁸ Yë Tios jam ojts tmo'oy ya'atë tëyajtën yë Moisés, ma Sinaí kopkën, ko ojts tni'ënä'ämë ets ja Israel ja'ayëty tmëmintëty ja y'ayajk y'ako'onënëty.