Levitico 27 - Biblia Mixe de Quetzaltepec

Mëti'ipë ja Tios yajmo'ojëpën

¹ Ënät yë Tios ojts tmëkäjpxy yë Moisés ets t'ënëmaay:

² Jëtu'un xy'ënëëmëty yë Israel ja'ayëty, ko pën nyäkyukëpäta'anëtëty ma Tiosën ets jëtu'un ja wyaantakën tyaj'ëtuka'anëty.

³ Yë naaxwiinyëtë ja'ay pën jä'ä yë jyëmëjt i'px ets tëkë'pxpaat, jä'ä xytyuknipëkëty ets nyäkyuyakëtëty wëxtyikxy majk ja meeny aak poop pujxn ets yë'ë kijpxën'atëp ja kijpxën mëti'ipë jap ijtpën tsajptëkoty.

⁴ E pën yë'ëts yë to'oxytyëjk, jä'ä xytyuknipëkëty ets nyäkyuyakëtëty i'px majk ja meeny aak poop pujxn.

⁵ E ja ja'ayëty mëti'ipë ja jyëmëjtëtyën mëkoxk ets i'px paat, jä'ä nëjkx xytyuknipëky ets nyäkyuyakëtëty i'px ja meeny aakyë'ë poop pujxn, pën naaxwiinyëtë ja'ay, e pën to'oxytyëjkts, ja'ayë majk ja meeny tyakëty ets aakyë'ë poop pujxn.

⁶ Yë pi'k'ëna'k mëti'ipë tu'kpo'o je'eyë myëët'ajtypnyëmën ets mëkoxk jëmëjtpaat, jä'ä nëjkx yajkuyaktë mëkoxk ja poop pujxn meeny, pën yë'ë yä'äy'ëna'k, e pën to'oxy'ëna'k tëkëëk ja poop pujxn meeny nëjkx yajtukuyäky.

⁷ E ja mëjja'aytyëjkëty mëti'ipë ja jyëmëjtëtyën tëkë'px, majkmokx ja meeny tyakëty aak poop pujxn, pën ye'etyëjk. E pën to'oxytyëjk jä'ä ja meeny tyakëty majk nän yë'ë aak poop pujxn

⁸ E pën ja ja'ay ëyoop ets ka'ap tjëkyepy jëtu'un nyäkyuyakëtëty, tä jyapaatë'atyën, yë'ë nëjkx tyajtëy ja teety, e yë'ëts nyikajpxëp pën jënu'un mëpaat ja ja'ay nyäkyuyäkyë ets jënu'un mëpaat naje'eyë tpaaty ets ja wyaantakën tyaj'ëtukëty.

⁹ E yë'ëts ënät ja jëyujk, mëti'ipë ja Tios yajmo'ojëpën, tëkokyë mëti'ipë të yajtuknipëjktaakën ets Tios yë'ë yajmo'oja'any, wa'ats jëtu'un nyajxnë.

¹⁰ Ets ka'ap tjëkyepy y'ëkyajwinkuwijtsnëty mëët ja ni'kxpë ëkë ja xyëëpëpë. E pën kopkpëky ënäty ets yajwinkuwitsëty ja tsajpkaa. Jëtu'un nimäjtsk wyë'ëmtëty wa'ats, jëtu'un ja mëti'ipë wintsë'kën'ajtpën ets jëtu'un ja mëti'ipë wë'ëmpën, mëti'ipë ënäty mëët të yajwinkuwitsyën.

¹¹ Pën yë'ë tu'uk yë jëyujk tsajpkaa mëti'ipë ëxëëk yajtijpën ets ka'ap tjëkyepy yë Tios yajmo'ojëty, jam xymyënëjkxtëty ma teetyën,

¹² ets yë'ë tnikajpxëty jënu'un mëpaat yajkuyäkyën ets yë'ë y'a'ixëp, pën wi'ix ja jëyujk y'ixë'aty. Ja nyikukëpät, jënu'un ënäty ja teety tnikäjpxyën jëtu'un yajkukëpätëty.

¹³ E pën mjuuypyëtsëmäämpts jatëkok ja mjëyujk, ni'ik nëjkx xykyëjuuynyë, jä'ä nëjkx jyaak ni'ikë ja mëkoxk nipätën, ëpëky ja nyikukëpät.

¹⁴ Pën tu'uk yë tëjk wyaantäkpy ma ja Tiosën. Yë teety yë'ë nëjkx tpëjktakëyë yë tsyow. Jënu'un tä ënäty ja teety tnikäjpxyën, jëtu'un yajkupëkëty.

¹⁵ E pën ja ja'ay jyuuypyëtsëmäämpts jatëkok ja tyëjk, nëjkxëp ëpëky mëkoxkpëky yajpupëky ja tëjk ja nyitsow ets ëpëky ja kyukëpät ets jëtu'un jatëkok ja tyëjk tjä'ä'atëty.

¹⁶ Pën wyaantäkpyën yë nyaax ma Tiosën, yë'ë nëjkx yajnimaaytyu'uty, wi'ix ënäty ja pëjktä'äky y'ity wyintëyën, pën jä'ä wyinmuky mäjtsk mëko'px ja i'px tsim yë tsajpmok, jä'ä tsyoowpaatëty wëxtyikxy majk ja meeny aak poop pujxnpë.

¹⁷ Pën jä'ä twaantä'äky ja naax kam ma tii winëjaty ëwaatsëtum wyi'imyën, jëtu'un tsyoowtëkëty, tä ënäty pyaat'atyën.

¹⁸ E ko jää xywyaanta'akëty ma ja xëëw jëmëjt të nyajxnën, ma winëjaty ëwaatsëtuuy wyi'imyën. Ja teety jä'ä nyikajpxëp jënu'un mëpaat ja nyimeeny yajyäky aak poop pujxnpë ets yajpuwitsëty ja tsyow, mëti'ipë ënäty të yajnimaaytyu'utyën ma ja xëëw jëmëjt tyu'uye'eyä'änyën, koonëm jatëkok tpaatëty ja xëëw jëmëjt jëna'a ëwaatsëtuuy wyi'imyën winë.

¹⁹ E pën ja ja'ay jyuuypyëtsëmäämpy jatëkok ja nyaax, nëjkxëp ëpëky tjaaknikujuupyety, nän ja mëkoxkjëtu'un ets jatëkok tjä'ä'atëty ja nyaax.

²⁰ E pën kajts ënäty tjuuypyëtsimy ets ja wiink ja'ay nëjkx yajtukmëto'knë. Jä'ä tëy ka'ap nëjkx t'ëkjëkyäjpnë tjuuypyëtsëmëty.

²¹ Ko ënäty ja naax wyi'imy ëwaatsëtuuy ma tnixëëw tnijëmëjtëtyën ets ëwaatsëtuuy winë wyi'imy, jam ja nyajxnëty ma Tios winë yë'ë tjä'ä'atyën ets ja teety yë nëjkx t'ëxajënë.

²² Pën yë Tios tyukmëyojxyp tu'uk yë naax kam, mëti'ipë juy pyätypyën ets ka'ap yë'ëjëty mëti'ipë ënäty të tkuma'ayën'atyën.

²³ Ënät ja teety tnimaaytyu'utëty yë naax, jënu'un ënäty tsyoowpaatyën, mëët ja nyija'ay mëti'ipë ënäty wyaantäkpyën ja naax, koonëm tpaatëty ja xëëw jëmëjt jëna'a winë ëwaatsëtuuy wyi'imyën. Ja ja'ay jëtu'un nëjkx tkujuy, tä ënäty të tsyoowpaatyën ets jä'ä ja Tios tmo'ojëty

²⁴ E ko ënäty ja xëëw jëmëjt tpaaty ma ja it naaxwiinyëtë ëwaatsëtuuy wyi'imyën, ja naax yë'ë nëjkx tjä'ä'ajnë ja ja'ay mëti'ipë ënäty mëjëyëjp të nyaaxtookyën, jä'ä jëtu'un ja naaxwintsën.

²⁵ Tëkokyë jënu'un winë yajtsowmo'oyën, jëtu'un mëpaat y'ixë'aty tä jap tsajptëkoty myinyën. Yë'ë myajtunëp yë siclë meeny mëti'ipë tsoowpatpën i'px geras.

²⁶ Ja kä'äxkopk mëti'ipë ëka'any mëxu'unk'ajtpën, ka'ap mëpaat yajwaantä'äky. Wä'än yë'ëjëty yë tsajpkaa u'unk ëkë kupixyny'u'unk, yë'ë Wintsën jyä'ä'ajtyp.

²⁷ Pën yë'ë tu'uk jëyujk mëti'ipë ëxëëk yajtijpën, jyëkyäpëp yajuuypyëtsëmëty, tä ënäty yajtsowmo'oyën ets ëpëky jyaak yajnikujuuypyätëty ja mëkoxkpëky. E pën kajts yajjuuypyëtsimy jyëkyäpëp yajtookëty tä ja tsyowën.

²⁸ Pën tu'uk yë ja'ay tyukmëyoxäämpy yë Tios oytyiijëty, mëti'ipë myëët'ajtypyën, wä'än yë'ëjëty: yë ja'ay, jëyujk tsajpkaa, ëkë naax kam mëti'ipë näkyumayë'ajtpën, yë'ë ka'ap yë tjëkyepy yajtookëty, ëkë yajjuupyëtsëmëty. Tëkokyë mëti'ipë ënäty yë Tios të yajtukmëyoxyën, wa'ats yë nëjkx wyë'ëmtaaynyë.

²⁹ Näyjyëtu'un ja ja'ay mëti'ipë ënäty jä'ä të yajwaantä'äkyën ma Tiosën, ka'ap nëjkx t'ëkjëkyäjpnë yajuuypyëtsëmëty, kwanë jëtu'un ko nëjkx y'ooky.

³⁰ Ja tu'kpëkpyë ma ja majkjatypë winë pyëtsimyën kamwinm tu'uwinm, Tios yë jyä'ä'ajtyp ets yë'ë mëpaat yajmo'oy.

³¹ Pën yë ja'ay jyä'ä'atäämpy yë tu'kpëkpyë ma majkjatypën, jyëkyejpy ja'ayë tkujuyëty jënu'un ënäty ja tsyowën ets ëpëky tjaaknikëjuuypyätëty ja kujkwä'kxy ma ja tu'ukpën.

³² Ma ja majkpë ja jëyujk tsajpkaajën tu'uk mëpaat ja Tios yajmo'oy.

³³ Ets ka'ap mëpaat yajwin'ixy mëti'ipë ni'kxën ëkë mëti'ipë xyëëpën, ni kyayajwinkuwitsëty. E pën yajwinkuwijtsp nimäjtsk, aak wa'ats nëjkx wyë'ëmta'atë, jëtu'un ja mëti'ipë ënäty të yajwinkuwitsyën ets jëtu'un ja mëti'ipë mëët yajwinkuwitsyën, paaty ka'ap yë ninu'un tjëkyepy ets yajjuupyëtsëmëty.

³⁴ Ya'atë jëtu'un ënä'ämën'ajtp tëy'ajtën'ajtp, mëti'ipë yë Tios ojts tmo'oyën yë Moisés jam kopkkëjxm ma txëëwatyën Sinaí.