Levitico 25 - Biblia Mixe de Quetzaltepec

Ja nyijëmëjt jëna'a jyä'ä'atyën ja po'kxën ets ko ja ja'ayëty ëwaatsëtuuy wyë'ëmtë

¹ Ënät yë Tios ojts tmëkäjpxy yë Moisés, jam ma ja kopkën mëti'ipë xyëëwajtypyën Sinaí ets t'ënëmaay:

² Tyaa xy'ënëëmëty yë Israel ja'ayëty: ko ënäty miitsëty jam të mjajnëtë ma ja naax kamën mëti'ipë nmo'ojantëpën, yë naax kam nëjkxëp näjyëtu'un xyajpo'kxtë, mëët ko ja Tios yë'ë yajmëjjawë.

³ Jyëkyäpëp mni'iptëty mkojtëty tëtujk jëmëjt ets jyëkyäpëp näjyëtu'un xywyimpux xywyinka'atstëty yë mtsatymkyamëty ets xyjyë'kxtëty xypyëktëty ja tyëëm, nyaaxëty jëtu'un tëtujk jëmëjt.

⁴ E jää ko nëjkx wëxtujk jëmëjt t'apäjnë, kopkpëky ko nëjkx jä'ä xyajpo'kxtë yë naax kam ets ja Tios jëtu'un mëj'äämpy yë'ë xypyëjkta'aktëty. Këtii jä'ä nitii xynyi'iptëty ets këtii xywyimpux xywyimka'atstëty yë mtsatymkyamëty.

⁵ Ets ni yë'ë xykyatëjtëty ja tsajpmokway, mëti'ipë kë'ëm mujxpën, ko ënäty tëë ja mpëjktä'äky xyajpëtë'kta'atë ets ni yë'ë xykyatuktëty ja tsatsymkyam, mëti'ipë kë'ëm tëëmpäjtpën ets ka'ap jëyëjp xywyimpux xywyinka'atstëty. Yë naaxwiinyëtë nitii mëpaat xykyayajwa'antë, po'kxëpë jëtu'un yajxon.

⁶ Mëti'ipë jam naaxwinm kamwinm kë'ëm pëtsëëmpën, ma ënäty pyo'kxyën ja kam tu'u, yë'ë mni''itëp. Jëtu'un'äämpy jotkujk kyäytyëty y'uuktëty ja mtuunpë ye'etyëjkpë to'oxytyëjkpë ets ja jaaypyaat jaaypyo'kxy mëti'ipë ijtpën ma ja mnaax mkajpnën.

⁷ E ja mjëyujk mtsajpkaajëty, näjyëtu'un ja jëyujkëty mëti'ipë tsënaaytyëpën aayjoty ujtsjoty. Tëkokyë mëti'ipë ënäty kë'ëm pëtsëëmpën kamwinm tu'uwinm yë'ë nëjkx xyjyë'kxtë.

⁸ Wëxtujk sëmaan xymyëtsyoowëty jajëmëjt, kanaak jëmëjtpë, jä'ä ntijmëty, wëxtujk jëmëjt kyajpxëty ja tu'k sëmaanpë, e ja wëxtujk sëmaanpë jä'ä ënäty wyinë'aty, wëxtyikxy taxtujk jëmëjt.

⁹ E ma nëjkx myajk'anyën ja mëwëxtujkpë ja po'o ma yajnixëëwtunyën ja pokymyä'kxën. Ënät nëjkx xytyukxu'uxtë ja tsajpkaawaj ma ja naax kajpnën.

¹⁰ Ma ënäty jajëmëjt kyä'pxyën wëxtyikxy majk, tääpë jëmëjt wa'ats nëjkx xytyijtë ets jä'ä jëtu'un nëjkx may ja ja'ay wyë'ëmtë ëwaatsëtuuy. Ja ja'ayëty mëti'ipë ënäty nitooky të y'itën, nëjkxëp jatëkok tpaatë ja jyëën tyëjkëty ets ja y'u'unk tyo'oxytyëjkëty ets ja nyaax kyamëty.

¹¹ Ma wëxtyikxy majk y'apetyën ja xëëw jëmëjt, jä'ä jëtu'un miitsëty mëpaat mnäyaj'ëwaatsë pëtsëmëtë. Ma tääpë jëmëjtën ni pën mëpaat jä'ä kyani'ipy kyakojy ets tkapuxy tkaka'atsy ja tsajpmok mëti'ipë kë'ëm yoonpën ets ka'ap yajwimtsuk yajwinjoowëty ja tsatym kyepy ëkë yajpiiwmukëty ja tsatymtyëëm.

¹² Jä'ä ko tääpë jëmëjt wa'ats mëpaat nyäxy ets jä'ä mëpaat ja ja'ay may y'ëwaatsëpëtsëmtë. Yë'ë nëjkx xyjyë'kxtë mëti'ipë kë'ëm yoonpën ji'tspën kamwinm tu'uwinm.

¹³ Ma ya'atë jëmëjtën ma ja'ay may ëwaatsëtuuy wyë'ëmtën, jä'ä jëtu'un nëjkx jatëkok ja mnaax mkam xypyaatë.

¹⁴ Pën jää pën nyaaxtooka'any, ëkë nyaaxjuyä'äny ma tääpë jëmëjtën, këtii janty mëpaat tpëka'anëty ja naax kam pën ënäty naaxjuupyën, ëkë janty tsow tooka'anëty;

¹⁵ Mëti'ipë juupyën, jääpaat mëpaat tkujuy ja naax kam mëpaat jajëmëjt pyo'oxyën, ma ja ja'ayëty may wyë'ëmtën ëwaatsëtuuy. Näyjyëtu'un ënät ja mëti'ipë to'kpën, jëtu'un mëpaat ja myëku'uk tukkujuuy winë jëtu'un tä ënäty ja pëjktä'äky jyaak pëtë'ëka'anyën.

¹⁶ Pën këjää jëmëjt jyaak tëkoy'ätynyëm, nän këjää nëjkx yajkujuy ja naax kam, e pën wäänës jyaak tëkoy'äty, nän wäänë nëjkx jyaak yajkujuy. Jä'ä ko jëtu'un ënäty tsyoowtëkë ja kam, tä ja pëjktä'äky pyëti'ikyën.

¹⁷ Nipën mëpaat yë myëku'uk tkawin'ëëny, yajnikëxë'ëktë yë näywyinkutsë'kën ma mTiosëtyën, jä'ä koos jëtu'un Wintsën, mëti'ipë miits mTiosajtëpën.

¹⁸ Patuntë yë n'ënä'ämënës ntëyajtënës ets kuuyjyuuky'atë yë n'ënä'ämënës ntëyajtënës. Jëtu'un tuntë ets akujk jotkujk mjuuky'atëty ma ja mnaax mkajpnëtyën.

¹⁹ Jam naaxwinm kamwinm pëtsëmëp jam ja jë'kxy pëky, mëti'ipë mjë'kxtëp mpëktëpën ets mnijuuky'atëpën, koonëm m'akëta'ak mjotkëta'aktëty.

²⁰ Wä'än jëtää miitsëty mnäyajtëëwëtëpëty ets m'ënantëpëty: ¿E tiitsës jëtu'un ëëts nijuuky'atëp ma ja mëwëxtujkjëmëjtpën, pën ka'apës tii ni'iptë nkojtë?

²¹ Wäänë oy ko jëtu'un m'ëna'antë. Ëjts tyaajës ntuna'any, nyajkëta'akäämpyës mëj këjää yë nkënu'kxënës jam mkamwinm mtu'uwinmëty ma ja mëtëtujkjëmëjtpë kyä'pxyën. Ets mëj këjää ja mpëjktä'äky xyajpëtë'ëktëty mëti'ipë nëjkx myëtä'äkyën tëkëëk jëmëjt.

²² Yë'ës nëjkx jotkujk xynyi''itë, mëti'ipë ënäty të xypyëjkë'ëktën, koonëm jatëkok nëjkx mni'iptë mkojtë, ma ënäty tuktujk jëmëjt kyä'pxyën ets jääpaat ma ënäty taxtujk jëmëjt y'apäjnë nëjkx xyjyë'kx'ëtë'ëtstë ja mëti'ipë ënäty të xypyëjkë'ëktën. Xyajpëtë'ëktëty jëtu'un ja wiinkpë ja mpëjktä'äkyëty.

²³ Yë naax kamtëjk ka'ap mëpaat xëmëkyëjxm yajtooky. Jä'ä koos yë njä'ä ets miitsëty tu'ktsojkyë yaa naaxwiiny ja'ayë mjuuky'ajtkojtë.

²⁴ E paaty pën tëë miitsëty yë mnaax mkam xyjyuytyë ets ja mëti'ipë ojts mtukmëtookëtën, y'amëtoopy jatëkok ets tjuyä'äny, mo'otë.

²⁵ Pën tu'uk yë mëkunaax mëkukajpn yaj'ëmaaytyäkpy yë wyit myeeny ets mtukmëtookyë yë nyaax kyam. Pën jam yë jyiiky myëku'uk ets myëkä'äx, jyëkyejpy yë'ë nëjkx tjuuypyëtsimy ja naax, mëti'ipë ënäty të tookyën ja myëku'uk.

²⁶ E pën kajts ja jyiiky myëku'uk mëti'ipë juuypyëtsë'ëmxëtëpën ja nyaax ets pën yajkä'pxyp ja wyit myeeny ets kë'ëm tjuuypyëtsëmëty.

²⁷ Yë'ë nëjkx tmëtsyoowpëtsëmy ja xëëw jëmëjt jëna'a ënäty të tookyën ets nëjkx jëtu'un tkujuy ja nyaax ma ja ja'ayën mëti'ipë ënäty të tukmëtookyën ets jëtu'un'äämpy nëjkx ja nyaax jatëkok tjä'ä'aty.

²⁸ E pën kajts naje'eyë tpaaty ja wyit myeeny kä'pxy ets jeexyë tjuuypyëtsimy ja nyaax kyam. Jä'ä jëtu'un myëwë'ëmëp ja ja'ay mëti'ipë ënäty të nyaaxjuyën, koonëm jatëkok tpaatëty ja xëëw jëmëjt jëna'a ma wyinë y'ëwaatsëpëtsëmyën ets tpaye'eyëy ja nyaax täänëm jatëkok nëjkx tjä'ä'aty.

²⁹ Pën tyo'kpy tu'uk yë tsyënaaytyakn mëti'ipë napotsyën ets nakemyën. Jyëkyejpy jatëkok tjuuypyëtsëmëty kom jëmëjt.

³⁰ E pën kajts yajjuuypyëtsimy kom jëmëjt, jä'ä nëjkx ja ja'ay tmëwë'ëmy mëti'ipë ënäty të tjuyën ets ja y'u'unk y'ok. Oy tjapaatëty ja xëëw jëmëjt ma ënäty winë ëwaatsëtuuy wyë'ëmtën. Tääpë tsënaaytyakn ka'ap nëjkx t'ëkjëkyäjpnë yajuuypyëtsëmëty.

³¹ E ja tsënaaytyakn mëti'ipë ka'ap nyapotsyëtyën nyakemyëtyën, näjyëtu'un nëjkx nyäxy, tä ja kam tu'ujën. Jyëkyäpëp yajuuypyëtsëmëty ets jyëkyäpëp ëwaatsëtuuy wyë'ëmëty, ma ënäty ja xëëw jëmëjt tpaatyën ma winë ëwaatsëtuuy wyi'imyën.

³² Yë'ë tëy yë Leví ja'ayëty jyëkyäptëp tjuuypyëtsëmtëty yë jyëën tyëjkëty, mëti'ipë yajpatpën ma nyaax kyajpnëtyën.

³³ Pën yë'ë yë Leví ja'ay jyuuypyëtsiimpy yë jyëën tyëjk, y'ëxmatsëp jëtu'un ja jëën tëjk ma ënäty tsyëënën ets nëjkx tpaaty ja jyëën tyëjk jam ma ja nyaax kyajpnën. Jä'ä ko yë'ëjëty jämyë jëtu'un ja jyëën tyëjk tmëët'atë ma ja nyaax kyajpnëtyën ets ka'ap oymyaajëty ma ja Israel ja'ayëtyën.

³⁴ Ja it naaxwiinyëtën ma tyajtänëtën yë Leví ja'ayëty yë tsyajppaxëty kyupixynyëty, ka'ap tjëkyepy yajtookëty. Jä'ä ko jyä'ä yë'ëjëty ets ka'ap ni pën wiink ja'ay pyäätyë.

³⁵ Pën yë mëkunaax mëkukajpn o'ktëy yajpaaty ets mniminëtëty ma mjëën mtëjkën, mputëkëp, jëtu'un tä jeexyë tu'uk yë jaaypyaat jaaypyo'kxy mkuja'tëtyën ets mjëënmo'o mtëjkmo'ojëp ma ja mjëën mtëjkën.

³⁶ Këtii nitii xypyëjkëty ets ni xykya''amëtowëty yë meeny'u'unk, pën mtuk'ënu'kxyp yë wit meeny. Mtsë'ëkëp yë Tios ets mo'o yë mëku'uk yë it naaxwiinyëtën ma mjëën mtëjkën.

³⁷ Këtii yë meeny'u'unk xy'amëtowëty, pën tëë yë wit meeny xytyuk'ënu'kxy ets ni xykyatukmëtookëty nëkooyë tsowpaaty ja ka'ayën ukën.

³⁸ Ëjts jëtu'un Wintsën, miits yë mTiosëty mëti'ipë ojts mjuutëtën jap Egiptë ets mo'oja'anëtë ya'atë naax kam yaapë yajpaatyën Canaán etsës xyTios'atëty.

³⁹ Pën m'ijxyp, ko o'ktëy yë mëku'uk jyäty kyëpety, mëti'ipë ijtpën ma mjëën mtëjkën ets nyäkyutookëtëty ma mijtsën, këtii janty nëkooyë mëk xyajtunëty, ko mëtunëtëty mputëkëtëty.

⁴⁰ Jëtu'un xyjyawëty, tä tu'uk yë ja'ayën mëti'ipë mputëjkëyëpën ets mku'ijtëyëpën. Jä'äpaat mëpaat mëtunyë ma tpaatyën ja xëëw jëmëjt ets winë y'ëwaatsëpëtsëm ets may ja ja'ay jä'ä y'ëëwaatsë'ajtën tpaatë.

⁴¹ Jëtu'un'äämpy nëjkx tsyo'onë ma ja mjëën mtëjkën mëët ja y'u'unk y'ëna'k ets nyëjkxëty ma ja jyä'ä yajpaatën ets tuktëk tukwa'akëtëty jatëkok ja jyiiky myëku'ukëty.

⁴² Jä'ä ko yë'ëjëty ëjts yë xymyëtuuntëp, ëjts ojts njuutë jap Egiptë. E paaty ka'ap tjëkyepy ets jëtu'un yajtooktëty, tä yë mëtuunpë ëyoopëtyën.

⁴³ Këtii ëxëëk xytyunëty xy'ënëëmëty. Tsë'ëkë Tios ets oy yë mëku'uk mëët'at.

⁴⁴ Pën mjuyäämpyën yë mëtuunpë m'ëyoowpë juy. Je'eyëp wiink naax wiink kajpn xyajtsoonëty.

⁴⁵ Näy jyëkyäpëp xyjyuyëty yë jaaypyaat jaaypyo'kxy, mëti'ipë tsënaaytyëpën ma mnaax mkajpnëtyën yë y'u'unk y'ëna'këty, pën jam tsyëënëtë ma miitsëtyën. Mëët yë'ëjëty jyëkyäpëp xyäntyjyuytyëty ets xywya'antëty tuunpë.

⁴⁶ Ets jyëkyäpëp xytyukmëwë'ëmtëty ja m'u'unk y'ëna'këty. Ko ënäty miitsëty m'o'knëtë mtëkooynyëtë, jëtu'un tä jeexyë tkuma'ayën'atën ets myëtunëtëty xëmëkyëjxm. E yë'ë tëy yë mëkunaax mëkukajpnëty ka'ap mëpaat o'ktëy xytyuntë.

⁴⁷ Pën kumeenytyakp tu'uk yë jaaypyo'kxyjyä'äy ma mnaax mkajpnën ets tu'uk yë mëkunaax mëkukajpn nëjkx nyätyookë ma tääpë ja'ayën, mëët ko ënäty y'ëyoy jyotëkoy.

⁴⁸ Jyëkyäpëp jatëkok nyäjyuuypyëtsëmëtëty, oy ënäty të y'ëknätsyookyë. Näy jyëkyäpëp jyuuypyëtsëmëtëty yë myëkä'äx,

⁴⁹ ëkë jyämy, ëkë tsyojkmaank, ëkë oypyënëty, mëti'ipë najëkäm myëku'uk'ajtypyën. Näy jyëkyäpëp kë'ëm nyäjyuuypyëtsëmëtëty, pën pyätyp ja wyit myeeny.

⁵⁰ Jëtu'un nëjkx nyäjyuuypyëtsimyë, jëtu'un tä ënäty tmëtyoowpëtsëmtën ja xëëw jëmëjt ma ënäty të nyätyookën tyimja'tëty, mapaat tpaatëty ja xëëw jëmëjt jëna'a ja ja'ay ëwaatsëtuuy may wyë'ëmtën ets oy myëti'ipëty. Jëtu'un mëpaat tsyoowtëkë, jëtu'un tä ënäty ja xëëw jëmëjt tyu'uye'eyä'änyën ets pën tëë tyuny näjyëtu'un nëjkx yajpamëtyoy ja myëju'uny, tä ënäty tu'uk ja tuunpë yajmëjuyën.

⁵¹ Pën jëkämnëm oy wyi'imy ja xëëw jëmëjt jëna'a jeexyë ëwaatsëtuuy wyi'imyën, jyëkyäpëp yë'ë wäänë nyätyukjuuypyëtsëmëtëty ja meeny, mëti'ipë ënäty të t'ëxajën ma të nyätyookën.

⁵² Pën wäänës jyaak tëkoy'äty ma ja xëëw jëmëjt tpaatëtyën ets ëwaatsëtuuy wyë'ëmëty, yi'iyë myëtyoow pëtsëmtëp ja xëëw jëmëjt jënu'un ënäty jyaak tëkoy'ätyën ets jëtu'un nyäjyuuypyëtsëmëtëty.

⁵³ Jëtu'un nëjkx nyäxy tä tu'uk yë ja'ay je'eyë tu'kjëmëjt yaj'ënu'kxyën tuunpë, këtii xy'ëwa'atsëty ets pën nëkoo wi'ix nyatunëtëty.

⁵⁴ Pën kajts yajjuuypyëtsimy ma të tjëkyepyën, jä'änëm jëtu'un nëjkx ëwaatsëtum wyi'imy mëët ja y'u'unk y'ëna'k, ma ënäty tpaatyën ja xëëw jëmëjt ets ja ja'ay ja ëwaatsëtuuy'ajtën tpaatëty mëët ja y'u'unk y'ëna'këty.

⁵⁵ Jä'ä ko yë Israel ja'ayëty ëjts yë ntuunpë'ajtëp ets ntimjyä'äjës yë'ëjëty. Ëjts ojts jam nyajpëtsëmtë Egiptë. Ëjts mëti'ipë Wintsën'ajtpën, mëti'ipë yë'ëjëty Tyios'ajtëpën.