Levitico 24 - Biblia Mixe de Quetzaltepec

Ja kutë'kxën ja nyi'on

¹ Ënät ja Tios ojts tmëkäjpxy ja Moisés ets t'ënëmaay:

² Tuk'ënä'äm yë Israel ja'ayëty ets tmëmintëty yë wa'atspë olivë on ets kutë'kxy jëtu'un xëmë tyë'kxëty jap tsajptëkoty.

³ Yë Aarón tëë tnijawë wi'ix t'oytyunyën yë kutë'kxn ets jap kyutë'kxëty tu'ktsu'um Wintsën wintum, ma ja wit tëjkën ma näpyaatë y'ityën, jää ma y'atëëytyukëtyën ja kaaxë mëti'ipë myë'ijtypyën ja käjpxytyu'unën. Ya'atë ënä'ämën xëmëkyëjxm jëtu'un y'itëty ets u'unk ok nyëjkxëty.

⁴ Ja kutë'kxy jam jëtu'un tyë'kxëty ma ja mëj jëëntooytyakn aak pu'ts pujxnpë ets jëtu'un kyutë'kxëty jam Wintsën wintum.

Ja tsajpkääky mëti'ipë jap itëpën Wintsën wintum

⁵ Oytyun majkmäjtsk yë tsajpkääky ets xyajkë'ëwëty. Yë'ë mtuk'oytyunëp ja tsajpmokway, mëti'ipë oyjyätyëtyën, tu'ukjaty ja tsajpkääky jä'ä tyajnëjkxëty ja tsajpmokway taxk tsimjaty,

⁶ ets xykyëxma'kxëty jam kaaypyäjnkëjxm, mëti'ipë mëët kyoyëtyën yë wa'ats pu'ts pujxn. Mäjtsk waats xypyëjkta'akëty Wintsën wintum, tëtujkjaty ja tsajpkääky y'itëty tu'kwaatsjaty.

⁷ Ets näjyëtu'un xypyëjkta'akëty yë poom pa'apa'a, ma wyaatsën ja tsajpkääky ets yë'ë jokëp tä jeexyë yë Tios yajmo'oyën tu'uk yë ayajk ako'onën, mëti'ipë nino'okyën. Ets tja'amyätsëty ja nyaax kyajpn.

⁸ Ya'atë xëmë mëpaat jëtu'un xypyëjkta'aktë, ko yë po'kxënxëëw y'itëty ets y'ijxpäjtën'atëty, ko yë käjpxytyu'unën të tuny yë Israel kajpn mëët yë Tios.

⁹ Ya'atë yë'ë yë Aarón mëët yë y'u'unk y'ok nëjkx tjä'ä'aty ets jëtu'un xëmë y'itëty. Ets ya'atë tsajpkääky jam mëpaat yajkay, ma tu'uk yë it naaxwiinyëtën wa'atspë. Jä'ä ko yë ayajk ako'onën mëti'ipë yë Tios yajtukwinno'kpën, wa'ats yë oy nyäxy.

Wi'ix mëpaat yajtëytyunyën yë ja'ay mëti'ipë yë Tios yajjotma'typyën

^10-11 Jam ma Israel kajpnën, jam ijty tu'uk yë ja'ay tsyëënë, yë'ë tyaak'ajtyp yë Israel ja'ay ets tyeety'äjtyp Egiptë ja'ay. Ja tyaak jä'ä xyëëwajtyp Selomit, yë nyëëx yë Dibrí, Dan yë jyä'ä. Ya'atë ja'ay yë'ë ënäty mëët nyäy'ojyë tu'uk yë Israel ja'ay. Ënät ojts t'ëxëëktijy yë Tios. Ënät tmajtstë ets ojts tmënëjkxtë ma ja Moisésën.

¹² Kwent'aty tyaj'ijtë koonëm ojts tnijawëtë jam ma Tiosën, tii jëtu'un mëpaat tuntë.

¹³ Ënät ja Tios ojts tmëkäjpxy ja Moisés ets t'ënëmaay:

¹⁴ Juut tääpë ja'ay naaxjoty kajpnjoty mëti'ipës të xy'ëxëëktijyën ets tkëxkontëty jam yë kyë'ë ma kyëpajkën, tëkokyë yë ja'ay mëti'ipë të tmëtowtën ets ja naax kajpn yë'ë kuka'atsëtëp.

^15-16 E yë Israel ja'ayëty tyaa xy'ënëëmëtëty: Pën y'ëxëëktijpyën yë mWintsën Tiosëty. Kë'ëm jëtu'un tpoky'atëty ets nëjkxëp yajkuka'atsy. Yë naax kajpn yë'ë nëjkx kyuka'atsyë. Wä'än yë'ëjëty kunaax kukajpn ets wä'än yë'ëjëty yë jaaypyaat jaaypyo'kxy. Pën tëë yë Tios t'ëxëëktijy, kopkpëky ko nëjkx y'ooky.

¹⁷ Pën ënäty yë myëku'uk të tyaj'ooky, nän nëjkxëp näjyëtu'un y'ooky.

¹⁸ Pën muum yë myëku'uk yë tsyajpkaa yaj'o'këpën, nän tsajpkaa nëjkx ja myëku'uk tmooytyëkatsy.

¹⁹ Pën yë myëku'uk ëxëëk tyuunpy, näjyëtu'un nëjkx ëxëëk yajtuny.

²⁰ Kyukëpätëp ja waay pajk, wiin, tëts, xixy ets jot nini'kx.

²¹ Pën tu'uk ja jëyujk yaj'o'kpyën, kwanë ko nëjkx yë wiinkpë tyajtëkatsy. Pën yë myëku'uk yaj'o'kpyën, nëjkxëp näjyëtu'un y'ooky.

²² Ya'atë ënä'ämën tëyajtën nëjkxëp tyuunkpaaty ma ja kunaax kukajpnën ets oy jyamëty ma ja jaaypyaat jaaypyo'kxyën. Ëjts jëtu'un Wintsën, mëti'ipë miits mTiosajtëpën.

²³ Moisés ojtsën jëtu'un ja naax kajpn t'ëwaanë ets ojts ja ja'ay jap tju'tnëtë naaxjoty kajpnjoty, mëti'ipë ënäty ja Wintsën të t'ëxëëktijyën, tä ojts tkuka'tsnëtë. Jëtu'un ojts tuntë ja Israel ja'ayëty, tä ënäty ja Tios ja Moisés të tyuk'ënä'ämën.