Levitico 23 - Biblia Mixe de Quetzaltepec

Wi'ix ijty ja Israel ja'ayëty xyëëwtuntën

¹ Ënät ja Tios ojts ja Moisés tmëkäjpxy ets t'ënëmaay:

² Jëtu'un xy'ënëëmëty yë Israel ja'ayëty: ko ya'atë xëëw ya'atë jëmëjt jëtu'un mëpaat tnixëëwtuntë ja Tios ets ya'atë xëëw jä'ä xyajnaxëty wa'ats ets oy.

³ Tëtujkxëëw mtunëty, kom wëxtujk xëëw nitii mëpaat xykyatuny, jä'ä ko po'kxënxëëw jä'ä. Ets jää mëpaat yë nyänyiye'eypyätë y'ity ma ja Tios yi'iyë yaj'ëwtatëtyën. Oyëtën ënäty ma mtimyajpaatë tääpë xëëw mpo'kxtëp jëtu'un ets jëtu'un'äämpy ja Tios xymyëjjawëtëty.

⁴ E tyaa jëtu'un myiny kuja'ay jëna'a jëtu'un mëpaat mniye'eypyätën ets mxëëwtuntën, ma ja Tios xymyëjjawëtyën.

⁵ Ko myajkmajkts'anëty ja mëtu'ukpë ja po'o jënäkxyëëw, jä'ä xynyixëëwtuntëty ja ëmaayxyëëw ma ja Tios xymyëjawëtëtyën.

⁶ E ma myajkmajkts'anyën ja po'o, nän yë'ë ja mëtu'kpo'opë, yë'ë jä'ä mnixëëwtuntëp ja tsajpkääky, mëti'ipë jëtu'unyë yajkääpyëm ka'ap tsyooymyëëtëty, jä'ä nän Tios jëtu'un jä'ä yajmëjjawëp. Wëxtujk xëëw ja tsajpkääky jëtu'un xykyäytyëty, mëti'ipë ka'ap tsyooymyëëtëtyën.

⁷ Ma ëka'any tsyo'ontä'äkyën ja mëtu'kxëëwpë jää mye'eymyuktëty ets wa'ats mëpaat nyäxy tääpë nyänyiye'eypyätë. Nitiituunk mëpaat jä'ä pën tkatuny mëti'ipë mëkën.

⁸ Ets winjëpom jëtu'un mëpaat yë ayajk ako'onën xyaktë ja nino'okpyë jam Tios wintum, e ko wyëxtujkxëëwpätëty jä'ä jatëkok mye'eymyuktëty ets wa'ats mëpaat tääpë nyänyiye'eypyätë y'ity. Ni pën mëpaat jä'ä tiituunk tkatuny.

Wi'ix yajnixëëwtunëtyën ko ja pëjktä'äky më''ëka'any pyëtë'ëkëty

⁹ Ënät ja Tios ojts tmëkäjpxy ja Moisés ets t'ënëmaay:

¹⁰ Jëtu'un xy'ënëëmëty yë Israel ja'ayëty: ko ënäty miitsëty jam të mjajnëtë ma ja itjotmën, mëti'ipë nmo'ojantëpën ets xynyiyu'ujëtëty ja tsajpmok ets y'itëty wyintëwëty, ko nëjkx xyajpëtë'knëtë ja pëjktä'äky, ja më''ëka'anypë xyajpëtë'ëktën, tu'k'atsumy nëjkx ja teety jëyëjp xymyo'otë.

¹¹ Ets komjëpom ma ja po'kxënxëëw ënäty të nyäxyën, jä'ä xëëw tyakëty ma Wintsënën, jëtu'un tä tu'uk yë ayajk ako'onën, täänëm nëjkx yajkupëky.

¹² Näy jä'ä xëëw ma ënäty ja tsajpmok yajkë'ëyäkyën tu'k'atsumy, jä'ä nëjkx yajyäky tu'uk ja kupixyny, näjyëtu'un mëti'ipë tu'ukën yë jyëmëjt oypyë mëkpë, mëti'ipë yajnino'okëpën ets ja Tios jä'ä yajtukwintsë'ëkëty.

¹³ Nëjkxëp näjyëtu'un tyajmintë yë tsajpmokway me'eypyë mëti'ipë onmëëtën, taxk tsim ja kujkm. Ets yë'ë yë Tios yajtukwinno'okëty ets jya'tëty jam ma yë'ëjën, tä tu'uk yë xu'kën jojkënën oypyë tsujpë.

¹⁴ Ma ënäty ja ayajk ako'onën xymyënëjkxa'antën Tios wintum, ka'ap mëpaat xykyäytyë yë tsajpkääky ets tsajpmokwaytyë'ëts, ëkë jëtu'unyë tsuxk. Ya'atë jëtu'unpë ënä'ämën jä'ä jëtu'un wyi'imy xëmëkyëjxm ets jëtu'un y'itëty u'unk ok, oy ënäty matsow mtimjyuuky'atë.

¹⁵ Jä'ä xëëw ma ënäty xymyënëjkxtën ja mtsajpmok'atsumyëty Tios wintum, tä yë ayajk ako'onën. Jä'ä ntijmëty komjëpom ma ënäty ja po'kxënxëëw të nyäxyën, jä'ä jëtu'un xymyëtsyoowtsoontë ja xëëw sëmaan kya'pxëty jëtu'un wëxtujk sëmaan.

¹⁶ Ets kom tuktujk xëëw kyä'pxyëty wëxtyikxy majk xëëw, komjëpom ma ënäty ja po'kxënxëëw të nyäxyën. Ets jä'ä nëjkx xykyë'ëyaktë ja m'ayajk ako'onënëty, mëti'ipë jemy tsajpmokën jam ma Tiosën.

¹⁷ Ets mäjtsk yë tsajpkääky xymyëtsoontëty jam ma mtëjkëtyën tsajpmokwaytsyooymyëëtpë, mëti'ipë mëët y'oytyunyëtyën yë tsajpmokway ja wäänë'oypyë, tu'ukpë ja tsajpkääky jä'ä ja tsajpmokway tyajnëjkxëty taxk tsimën ets ja Tios yë'ë yajmo'ojëty, mëët ko ja jë'kxy pëky jam tyäky kamwinm tu'uwinm.

¹⁸ Mëët yë tsajpkääky wëxtujk xymyënëjkxtëty yë kupixyny, mëti'ipë tu'ukjatyëty yë jyëmëjtëtyën, tu'uk yë tsajpkaa u'unk ets mäjtsk yë tsajppax mëti'ipë yajnino'okëpën. Ets Wintsën yë'ë yajtukwintsë'ëkëty, mëti'ipë oy xuukëpën jokëpën, ëpëky ja ujtspajk näjyëtu'un ets ja tsatym nyëë mëti'ipë näjyëtu'un ayajkën'at ako'onën'atëpën.

¹⁹ Nëjkxëp näjyëtu'un ja tsajppax tu'uk xyaktë ets ja Tios xytyukwintsë'ëkëtëty ets ja poky jä'ä tkunaxtëty ets mäjtsk yë kupixyny mëët ko ja nay'ëëw'oy näykyajpx'oyë tyunyë mëët ja Tios.

²⁰ Yë teety yë'ë nëjkx tyäky ya'atë wintsë'kën jam ma Tiosën, mëët ja tsajpkääkyëty, mëët ko tkënu'kxy ja pëjktä'äky ets mäjtsk ja kupixyny. Ya'atë yë'ë nëjkx ja Tios jëyëjp yajtukninëjkxy ets ja teety jä'ä nyiwë'ëmëtëty.

²¹ Jä'ä xëëw mye'eymyuktëty ets wa'ats nëjkx xytyijtë ya'atë nyänyiye'eypyätë, ni pën mëpaat tiituunk pën tkatuny. Ya'atë ënä'ämën jä'ä jëtu'un wyë'ëmëty kë'ëyxyëëw kë'ëyjyëmëjt ets u'unk ok jëtu'un xypyatuntëty.

²² Ko yë mpëjktä'äky xyajpëtë'ëkëty, këtii janty wa'ats xy'ijxmujkta'ajëty winë, mëti'ipë muum ka'apën. Yajwë'ëmtë wäänë ets yë'ë ëyoopëja'aytyëjk pyëjkmuktëp, ëkë jaaypyaat jaaypyo'kxy. Ëjts jëtu'un Wintsën, mëti'ipë miits mTiosajtëpën.

Ja nyixëëw ja pujxnxuxn

²³ Ënät ja Tios ojts yë Moisés tmëkäjpxy ets t'ënëmaay:

²⁴ Jëtu'un xy'ënëëmëty yë Israel ja'ayëty: Ma tyu'uk'anyën ja mëwëxtujkpo'opë, jä'ä tu'uk ja po'kxënxëëw xymyëjjawëtëty ets xyëëwtunëty ja pujxnxuxn ko yajtukxu'uxy.

²⁵ Jä'ä xynyo'oktëty ja wintsë'kën mëti'ipë ja Tios mo'otëpën ets nitituunk mëpaat jä'ä xykyatuntë.

Ja nyixëëw ma ja pokymyä'kxën yajtunyën y'ityën

²⁶ Ënät ja Tios ojts tmëkäjpxy ja Moisés ets t'ënëmaay:

²⁷ Ma myajkxëëpetyën ja mëwëxtujkpo'opë, jä'ä mëpaat ja pokymyä'kxën y'ity. Jä'ä mye'eymyuktëty ets wa'ats xyajnaxtëty ya'atë nyänyiye'eypyätë, m'ayuu'atëp jä'ä ets ja Tios xymyo'otëty ja wintsë'kën, ma jëtu'un'äämpyë xymyëjjawëtëtyën.

²⁸ Ni pën mëpaat jää kyatuny, jä'ä ko jää jëtu'un ja näpyokymyä'kxë y'ita'any ma ja mWintsën Tios tma'kxa'anyën ja mpokyëty, mëti'ipë të xytyuuntëkoy të xykyajpxtëkoytyën.

²⁹ Pën jëtu'un jä'ä xëëw ka'ap y'ayuu'aty, oy tyimpënëty Kopkpëky ko nëjkx yajjo'otsy ma myëkunaax myëkukajpnën.

³⁰ Ets pën jää tuunp ye'epy jä'ä xëëw ma ja pokymyä'kxën y'ityën, kopkpëky koos nëjkx njo'otsy ma ja nyaax kyajpnën, oy tyimpënëty pën ënäty jëtu'un të y'ëti'ityën.

³¹ Nitiituunk mëpaat jä'ä xykyatuntë. Ya'atë ënä'ämën xëmëkyëjxm jëtu'un y'itëty ets u'unk ëna'k jëtu'un nyëjkxëty oy maa mtimyajpaatëty ets oy ënäty ma mtimtsyëënë mtimjyuuky'atë.

³² Ya'atë xëëw jä'ä jëtu'un nyaaxëty ma miitsëtyën tu'uk po'kxënxëëw ets tu'uk yë xëëw ma miitsëty m'ayuu'atëtyën ets jä'ä myëtsyoowë'ëkëty jënäkyxyëëw ma tyaxtujk'anyën ja po'o ets jyëjpkëxëty komjëpom jënäkyxyëëw.

Ma yajnixëëwtunyën ja tëjk nixo'ompyë

³³ Ënät ja Tios ojts tmëkäjpxy ja Moisés ets t'ënëmaay:

³⁴ Jëtu'un xy'ënëëmëty yë Israel ja'ayëty: ko myajkmokx'anëty ja mëwëxtujkpo'opë wëxtujk xëëw nëjkx mxëëwtuntë. Yë'ë mnixëëwtuntëp ja tëjk mëti'ipë jëtu'unyë xo'omyën ets ja Tios jä'ä nëjkx jä'ä xymyëjjaw xyänty jawëtë.

³⁵ Ko ëka'any mëtu'kxëëw tsyo'onta'akëty, jä'ä nëjkx mye'eymyuktë ets ya'atë nyänyiye'eypyätë wa'ats nëjkx xyajnaxtë. Nitituunk jä'ä xykyatuntëty.

³⁶ Wëxtujk xëëw jëtu'un mxëëwtuntëty ets winjëpom nëjkx yë wintsë'kën xyaktë, mëti'ipë yë Tios mtukmëjjawëtëpën. Kom tëtujk xëëw jä'ä nëjkx jatëkok mye'eymyuktë, nëjkxëp näjyëtu'un jä'ä xyaktë ja m'ayajk ako'onënëty nino'okpyë ma Tiosën. Ma tääpë xëëwën ni pën mëpaat jä'ä kyatuny jä'ä ko mëj xëëw yë'ë.

³⁷ Ya'atë jëtu'un xëëw'ajtp jëmëjt'ajtp mëti'ipë mëpaat ja Tios jä'ä yajtukmëjjawën, ja näpyaat näy'ixë ets ja nämyuk näxyu'umë, mëti'ipë mëpaat wa'ats xyajnaxtën ets ma mëpaat xyaktën ja m'ayajk m'ako'onënëty mëti'ipë no'okyën, mëti'ipë ja Tios mo'otëpën, näjyëtu'un ja jëyujk mëti'ipë nino'oky myaktëpën, ja m'ujts tëëm m'ujts pajkëty, ja tsatsym nyëëjëty ets jëtu'un wi'ixëty ja nyixëëw tpaatyën tu'uk tu'ukëty.

³⁸ Ëpëky ja po'kxënxëëwpë näjyëtu'un ma ja Tios yajmëjjawën ets ëpëky ja jëtu'unyëpë ja Tios näyajmoopyën ets ja ayajk ako'onën mëti'ipë kë'ëmtsojkën yajyajkpën.

³⁹ Ko myajkmokx'anëty ja mëwëxtujkpë ja po'o ets ënäty të xyajpëtë'ëktë ja mpëjktä'äkyëty jam kamwinm tu'uwinm, nëjkxëp tu'uk ja mëj xëëw xyaj'apaatëtë. Wëxtujk xëëw y'itëty ma nëjkx ja Tios jä'ä xymyëjjawëtën ets ma tsyo'ontä'äkyën mpo'kxtëp jä'ä ets näjyëtu'un ma tyuktujkxëëwpetyën.

⁴⁰ Ma mëtu'kxëëw ëka'any tsyo'ontä'äkyën, yë'ë nëjkx xyaktë ja oyëtypë ja aaytyëëm ujtstëëm mëët näjyëtu'un yë palmë'aay ets kepy'ääy mëti'ipë mëj këjää ninikëpën, tä yë kepyën mëti'ipë xyëëwajtypyën álamo, nëë ëkë'pë tyänëtën. E wëxtujk xëëwtsën jëtu'un y'itëty ma xi'iky xony myajpaatëtyën jam mWintsën Tios wintum.

⁴¹ Xëmë jëtu'un winjëmëjt ma ja mëwëxtujkpë ja po'o y'änyën, xëmë jëtu'un jä'ä mxëëwtuntëty ets jä'ä jyäkëty ja xëëw wëxtujk xëëw ma ja Tios jä'ä yajmëjjawëtyën. Ya'atë ënä'ämën kë'ëyxyëëw kë'ëyjyëmëjt jëtu'un y'itëty ets jëtu'un nyaaxëty u'unk ok.

⁴² Miitsëty ninu'un m'Israel ja'ay'atën, ja wëxtujk xëëwpë yajpëjktä'äkyën mxëëwtuntëty, yë'ë nëjkx xytyuk'itëtë ja tëjk mëti'ipë ja'ayë nikemy nixo'omyën.

⁴³ Ets jëtu'un nijawëtëty ja m'u'unk m'okëty, ko ojts miitsëty jap nyajpëtsëmtë Egiptë, jam ojts nyaj'it nyajtsëënëtë, ma ja jëën tëjkën nikemy nixo'ompyë. Ëjts jëtu'un Wintsën mëti'ipë miits mTiosajtëpën.

⁴⁴ Jëtu'un'äämpy jëtu'un ojts ja Moisés tnikäjpxy jëna'a, jëtu'un mëpaat ja Israel ja'ayëty xyëëwtuntën ets ja Tios jä'ä tmëjjawëtëty.