Levitico 22 - Biblia Mixe de Quetzaltepec

Pën mëpaat yë ayajk ako'onën tyekyën ets pën ka'ap

¹ Ënät yë Tios ojts tmëkäjpxy yë Moisés ets t'ënëmaay:

² Ënëëmë yë Aarón ets y'u'unk y'ok, ko mëk jëtu'un yajxon timkyëwent'atëty, mëti'ipë yë Israel ja'ayëty yajktëpën, mëti'ipës yajmoopyën. Jä'ä ko wa'atsëty yë'ë, këtiipës yë nxëëw ëxëëk wyë'ëmëty. Ëjts jëtu'un Wintsën.

³ Jëtu'un xy'ënëëmëty, ko pën ëxëëk yajpaatëty ma yë'ëjëtyën ets xytyukwintsë'këtyës ja ayajk ako'onën kënu'kxypyë, mëti'ipë ja Israel ja'ayëty myooytyëpën ja Wintsën, nëjkxëp yajjëëkexy ma ja tuunk tyajtu'uye'eyën Wintsën wintuuy.

⁴ Nitu'uk yë Aarón yë y'u'unk y'ëna'k mëpaat tkajë'kxy, mëti'ipë yë Tios të yajtukwintsë'ëkën, pën pëjkëp yë pu'uts pa'am, ëkë pën tukjënajkëp yë jyot myëjaaw ma ye'etyëjk'ajtënën. Koonëm tëy ënäty të nyäpyujy të nyäjye'etsyë ets wa'ats yajpaaty. Mëti'ipë yë o'kpë të tonyën, ëkë mëti'ipë të tonyën yë ja'ay mëti'ipë tukjënajkëpën yë jyot myëjaaw ma ye'etyëjk'ajtënën,

⁵ ëkë mëti'ipë të tonyën yë ëxëëkjëyujk, ëkë ja'ay mëti'ipë ënäty ëxëëk yajpatpën, ets ja myëku'uk näjyëtu'un të tyaj'ëxëëkë.

⁶ Ëxëëk nëjkx yajtijy tyimtsu'ujëty jëtu'un ets ka'ap tjëkyäpëty tjë'kxëty, mëti'ipë wa'atsën, pën ka'ap jëyëjp nyäpyujy nyäjye'etsyë.

⁷ Jäänëm wa'ats wyë'ëmëty ma ënäty ja xëëw të kyëtaknën, täänëm tjëkyäpëty tjë'kxëty, ja mëti'ipë wa'atsën mëti'ipë patëpën tjë'kxëty.

⁸ Ka'ap mëpaat tsu'utsy yë jëyujk tsajpkaa yë nyitsu'uty, mëti'ipë jëtu'unyë muum të y'ookyën, ëkë mëti'ipë yë jëyujk të yaj'ookyën. Këtiipë yë'ë mëët nyäyaj'ëxëëkëtëty. Ëjts jëtu'un Wintsën.

⁹ Ënëëmëtë ets tpatuntëty ja n'aaw n'ayukës. Këtiipë tii poky tsëëmë'ëktëty, mëët ko tkumëtoownaxtë. Këtiipë y'ooktëty. Jä'ä ko ëjts Wintsën, mëti'ipë yë'ëjëty të yajwa'atsëtën.

¹⁰ Ka'ap mëpaat oypyënëty, mëti'ipë ka'ap tyeetyëtyën tjë'kxy mëti'ipë wa'atsën. Ni yë'ë mëti'ipë ja'ajtakpën ma ja teety ja tyëjkën, ëkë mëti'ipë jap mëtuunpën, ka'ap mëpaat tjë'kxtë ja mëti'ipë wa'atsën.

¹¹ Pën yë teety juy yë tyuunpë të tpaaty, ja tuunpë jyëkyäpëp tjë'kxtëty mëti'ipë wa'atsën. Näyjyëtu'un mëti'ipë ënäty jap të myintën naaxwiinyëtë ma ja teety ja tyëjkën, nän jyëkyäptëp tkaytyëty tjë'kxtëty, mëti'ipë ja teety jyi'kxypyën.

¹² Pën yë teety yë nyëëx yë'ë mëët të pyiky, tu'uk yë ja'ay mëti'ipë ka'ap tyeetyëtyën, ka'ap tjëkyäpëty tjë'kxëty ja ayajk ako'onën, mëti'ipë yë teetyëjk yajmooytyëpën.

¹³ E pën ku'ookyts, ëkë tëë nye'ëxmajtsënëtë mëët ja nyiye'etyëjk ets ka'ap yë y'u'unk y'ëna'k tiijëty ets wyimpitëty jatëkok ma ja tyeety ja tyëjkën, jëtu'un tä jeexyë nyätyu'uk'atyën. Jyëkyäpëp tjë'kxëty, mëti'ipë ja tyeety jyi'kxy pyijkpyën. E wiink ja'ay mëti'ipë ka'ap tyeetyëtyën, ka'ap tjëkyepy tjë'kxëty ja jë'kxy pëky mëti'ipë kënu'kxyën.

¹⁴ Pën nëkoo jyi'kxyp ya'atë ka'ayën ukën, mëti'ipë wa'atsën, kopkpëky ko tmooytyëkatsëty ja teety, mëti'ipë ënäty të tjë'kxyën ets ëpëky tjaakyakëty jatu'kpëky ma ja mëkoxkpëkpyën.

¹⁵ Yë teetytyëjkëty ninu'un mëpaat tkanajts'ixëtë ets Israel ja'ayëty nëkoo tjaamtään tnaaxtääntëty yë mëti'ipë wa'atsën mëti'ipë yajmoopyën yë Tios.

¹⁶ Ets pyokytyuuntëpëty jëtu'un, mëët ko ënäty tjë'kxtë ja mëti'ipë wa'atsën ets kënu'kxyën. Ëjts jëtu'un Wintsën, mëti'ipë yë'ëjëty të kyënu'kxëtën.

Tii mëpaat yajtunyën ko yë Tios yë jëyujk tsajpkaa yajtukwintsë'ëkëty

¹⁷ Ënät ja Tios ojts tmëkäjpxy yë Moisés ets t'ënëmaay:

¹⁸ Ënëëmë yë Aarón mëët yë y'u'unk y'ëna'k ets Israel ja'ayëty: Pën tu'uk yë Israel ja'ay ëkë jaaypyo'kxyjyä'äy yakäämpy tu'uk yë tsajpkaa ëkë tsajppax ets Tios yë'ë tukwintsë'ëkëja'any mëët ko tyaj'ëtuka'any ja wyaantakën ëkë ko tyakaanpë jëtu'un tä tu'uk yë ayajk ako'onën.

¹⁹ Yë'ë mëpaat tyäky yë yä'äypyë, ënät ja Tios kyupëjkxëtëty, wä'än yë'ëjëty yë pu'ts pujxn ëkë kupixyny ëkë tsajppax

²⁰ Ets ka'ap mëpaat tyäky ja jëyujk mëti'ipë ka'ap y'oyëty myëkëtyën, jä'ä ko ka'ap ja yajkupëkëty.

²¹ Oy jëtu'un tyimpënëty ko ënäty pën ja wintsë'kën tyaka'any, mëët ko ja näy'ëëw'oyë näykyajpx'oyë tuna'any mëët ja Tios, ko ojts jëtu'un ja wyaantakën tpëjktä'äky ëkë jä'ä ko jëtu'un timtsyojkën'ajtpë. Yë'ë mëpaat tyä'äky yë tsajpkaayä'äy ëkë tsajppax mëti'ipë oyën mëkën ets kä'pxyën, ënät yajkupëkëty.

²² Ka'ap mëpaat yë'ë Tios xytyimmooynyëtë yë jëyujk mëti'ipë wiintsën, mëti'ipë tsëtyutën, mëti'ipë kë'ëma'at tekymya'atën, mëti'ipë winxoots axootsën, mëti'ipë mokëpën, ëkë mëti'ipë pa'ayëpën. Ka'ap mëpaat yë jëtu'unpë xyaktë ets nyitoyëty ets ni xykyapëjkta'aktëty jam ma wintsë'këntyaknën ets yë'ë y'ayajkën'at y'ako'on'atëty ma Tiosën.

²³ Pën mo'ojäämpy yë Tios yë wintsë'kën tsojkënkyëjxm, jyëkyejpy yë'ë tyaktëty tsajpkaa ëkë tsajppax mëti'ipë tyekyën winpukon. E pën yë'ë myaj'ëtukäämpy yë mwaantakën yë'ë jëtu'unpë ka'ap nëjkx yë Tios m'ëxajxëty.

²⁴ Näyjyëtu'un yë jëyujk mëti'ipë tsëtyutën, wopyën, tsukyën, ëkë puxyën yë y'ëxtsyaa, këtii yë Tios jëtu'unpë xymyo'otëty. Këtii ja jëtu'unpë xytyuntëty ma ja mnaax mkajpnëtyën.

²⁵ Näy ka'ap xykyupëktëty jëtu'unpë jëyujk, mëti'ipë yë jaaypyaat jaaypyo'kxy yäjkpyën ets yë'ë Tios yajmooypyëty, Tios ka'ap jëtu'unpë tkupëky. Jä'ä ko tääpë jëyujk ka'ap yë kya'pxëty ets ka'ap y'oyëty myëkëty.

Wi'ix mëpaat yë jëyujk y'ookyën mëti'ipë yë Tios yajmoopyën

²⁶ Ënät yë Tios ojts tmëkäjpxy yë Moisés ets t'ënëmaay:

²⁷ Ko myëxu'unk'atëty tu'uk yë tsajpkaa u'unk, ëkë kupixyny u'unk, ëkë tsajppax u'unk, wëxtujk xëëw mëpaat tmëwë'ëmy yë tyaak. Ko tuktujk xëëw t'apäjtnëty, jyëkyäjpnëp yë Wintsën yajtukwintsë'ëkëty ets nyitoyëty jam ma ja wintsë'këntyaknën.

²⁸ Këtii yë tsajpkaa ëkë tsajppax xyaj'a'o'kmukëty tu'ukyë mëët yë y'u'unk tu'ukyë xëëw.

²⁹ Ko xyakëty ma Tiosën tu'uk yë wintsë'kën, jëtu'un mëpaat xytyuny tä yë Tios yajxon tkupëkëtyën.

³⁰ Ets jä'ä xëëw mëpaat xytsyu'utsy, këtii nitu'kpoty xyajwë'ëmëty ets komjëpom xytsyu'utsaanpëty. Ëjts jëtu'un ënaanp, mëti'ipë Wintsën'ajtpën.

³¹ Pëjkë'ëktë yë n'ënä'ämënës ntëyajtënës ma mjot mwinma'anyëtyën ets patuntë jëtu'un. Ëjts jëtu'un ënaanp mëti'ipë Wintsën'ajtpën.

³² Këtii xyjyaamtään xynyaaxtääntëty ëjts yë nxëëwës, jëtu'un'äämpyës mëj nyajpëjkta'akëty ma Israel kajpnën. Ëjts jëtu'un Wintsën, mëti'ipë miits të mkënu'kxëtën ets të myajwa'atsëtën.

³³ Ets të nyajpëtsëmtë, jap ma Egiptë kajpnën, ëjts näjyëtu'un miits xyTios'ajtëp. Ëjts jëtu'un Wintsën.