Levitico 20 - Biblia Mixe de Quetzaltepec

Wi'ix yajtëytyunyën ja käjpxy kumëtoownajxpë

¹ Ënät ja Tios ojts tmëkäjpxy ja Moisés ets t'ënëmaay:

² Jëtu'un xy'ënëëmëty yë Israel ja'ayëty: Pën yë'ë Israel ja'ay, ëkë jaaypyaat jaaypyo'kxy mëti'ipë tsënääpyën ma Israel kajpnën ets tkë'ëyäky ja y'u'unk ets tukwintsë'ëkë ja wiink tios mëti'ipë xyëëwajtypyën Moloc. Tääpë ja'ay kuka'atsy nyitëkëty y'ookëty ma myëkukajpnën.

³ Ëjts ntëytyunäämpyës ets nyaj'ookäämpyës tääpë ja'ay, mëët ko ënäty të t'ëxëëktuny ja n'ijtaknës ets ko ënäty ja nxëëwës ja wa'atspë të tjaamteeny të tnaaxteeny. Ko ja y'u'unk të tkë'ëyajkpë ma ja wiink tiosën mëti'ipë xyëëwajtypyën Moloc.

⁴ Pën ja ja'ayëty mëti'ipë kukajpnajtëpën ka'ap tuntë këwentë ja jëtu'unpë ja poky ets ka'ap tyaj'ooktë ja ja'ay,

⁵ kwanë koos kë'ëm nëjkx ntëytyuny tääpë ja'ay mëët ja y'u'unk tyo'oxytyëjk. Nëjkxëpës nyaj'ooky kë'ëm, mëët tu'kë'ëyë jënu'un ënäty mëët të yajpaatyën ets të t'ëwtatën ja wiink tios mëti'ipë xyëëwajtypyën Moloc.

⁶ Pën myëkäjpxypën yë poj ënääw, ëkë nyinëjkxypyën yë najtsja'apë ets ja jyot wyinma'any tyajma'aty ko yë'ë tninëjkxy. Ëjts nän ntëytyunëpës tääpë ja'ay ets nëjkxëpës nyaj'ooky ma ja nyaax kyajpnën.

⁷ Ni'ikyë miitsëty mnäyajwa'atsëtëty ets jëtu'un itë wa'ats. Jä'ä ko ëjts Wintsën, mëti'ipë miits mTiosajtëpën.

⁸ Patuntë yë n'ënä'ämënës ntëyajtënës ets yë'ë kuuytyuntë. Ëjts jëtu'un Wintsën, mëti'ipë yam miitsëty mkënu'kxëtëpën.

⁹ Pën pyojkpyën yë tyeety tyaak, kopkpëky ko y'ookëty. Jä'ä ko tëë ja tyaak tyeety tpoky, kë'ëm ënäty nyätyunyë ko y'ookëty tyëkoyëty.

¹⁰ Ko pën tyajwintsë'këntëkoyëty yë pëjkën ukën ma ja myëku'uk ja tyo'oxytyëjkën, amäjtsk nëjkx y'ooktë, jëtu'un ja ye'etyëjk ets jëtu'un ja to'oxytyëjk.

¹¹ Pën myëëtko'knaayëp ja tyeety ja tyo'oxytyëjk, wintsë'kën yajtëkoopy ma ja tyeetyën. Paaty tääpë ja'ay nëjkxëp y'ooky, mëët ja to'oxytyëjk näjyëtu'un ets kë'ëm ënäty nyätyunëtë.

¹² Pën myëëtko'knääpy yë xyäkxy, nimäjtsk tyim'ooktëty ets kë'ëm ënäty nyätyunëtë, jä'ä ko ka'ap jëtu'un y'oyëty mëti'ipë ënäty të tuuntëkoytyën.

¹³ Pën tu'uk yë ye'etyëjk myëëtko'knääpy yë myëye'etyëjk ijxtëm jeexyë tyo'oxytyëjkëtyën, nimäjtsk nëjkx y'ooktë ets kë'ëm ënäty nyätyunëtë, jä'ä ko mëti'ipë ënäty tyuuntëpën, nijënu'un kya'oyëty.

¹⁴ Pën tu'uk ja to'oxytyëjk myëëtko'knääpy ja to'oxytyëjk ja tyaak. Poky jëtu'un ënäty tyuunpy, ja naaxwiinyëtë ja'ay mëët ja to'oxytyëjkëty ets nino'oky nëjkx y'ooktë. Këtii mëpaat ni pën jëtu'unpë nëë poky tuny ma miitsëtyën.

¹⁵ Pën tu'uk yë naaxwiinyëtë ja'ay myëët'ajtyp yë jëyujk, tä jeexyë yë tyo'oxytyëjk tmëët'atyën, kopkpëky yë'ë ko y'ookëty. Näyjyëtu'un ja jëyujk tsajpkaa nän nëjkxëp näjyëtu'un y'ooky.

¹⁶ Pën tu'uk yë to'oxytyëjk myëët'ajtyp yë jëyujk tsajpkaa, jëtu'un tä jeexyë yë naaxwiinyëtë ja'ay tmëët'atyën. Kopkpëky ko nëjkx y'ooky ja to'oxytyëjk ets ja jëyujk mëti'ipë ënäty mëët jëtu'un të y'ëti'ityën ets kë'ëm jëtu'un ënäty nyätyunyë.

¹⁷ Pën tu'uk yë naaxwiinyëtë ja'ay myëëtko'knääpy yë tsyë'ë, ëkë y'uty to'oxytyëjkpë, mëti'ipë yë tyeety nyëëx'ajtypyën, ëkë tyaak nyëëx'ajtypyën ets tmëëtko'knëty. Nimäjtskëty kopkpëky ko nëjkx yajjuutë ma myëkunaax myëkukajpnëtyën, mayjyä'äy wyintuuy. Jä'ä ko tu'uk yë ja'ay yë myëkä'äx tmëëtsënaaynyëty, mëj tsëtyu'un yë'ënë. Ets mëti'ipë ënäty jëtu'un të y'ëti'ityën, kyë'ëmpokyën ënäty jëtu'un nätyuktuunëp.

¹⁸ Pën tu'uk yë naaxwiinyëtë ja'ay myëëtko'knääpy yë to'oxytyëjk, mëti'ipë tukjënajkëpën yë myëjaaw ma u'unk maay tyajmëxu'unk'atyën ets mëët y'ijtmuky. Yë'ë jëtu'un ënäty kyamëjpëjktäkpy ma ja to'oxytyëjk jëtu'un ja amay jotmay tmëëtëtyën ets näjyëtu'un ja to'oxytyëjk kë'ëm jëtu'un ënäty kyanämyëjpëjktä'äkyë. Paaty yë'ëjëty kopkpëky ko nëjkx yajjo'otstë ma ja myëkunaax myëkukajpnëtyën.

¹⁹ Këtii xymyëëtko'knëty ja mtaak ja myëkä'äx to'oxytyëjkpë ets ja mteety ja myëkä'äx ja to'oxytyëjkpë näjyëtu'un. Jä'ä ko jëtu'un ja tpaaty, tä jeexyë yë mëkä'äx xymyëëtko'knën. E ja jëtu'unpë kupojkp näjyëtu'un ets kopkpëky ko nimäjtsk jëtu'un nëjkx ja pyoky tkumëtowtë.

²⁰ Pën myëëtko'knääpy ja jyämy ja tyo'oxytyëjk, ja jyämyëtën ënäty kyawintsë'këp, niimäjtskëty kopkpëky ko nëjkx ja pyoky tkumëtowtë: Ka'ap nëjkx ja y'u'unk y'ëna'k tmëët'atë, tyim'ooktëty jëtu'un.

²¹ Pën tu'uk yë naaxwiinyëtë ja'ay myëëtko'knaayëp yë y'äjty, yë myëkä'äx to'oxytyëjkpë, y'äjty jëtu'un ënäty myëtëkoopy. Ya'atë jëtu'un të tunyën, ëxëëktu'un yë'ë. Paaty nimäjtsk jëtu'un tyim'ooktëty ets ni y'u'unk ni y'ok nëjkx tkayajwë'ëmtë.

²² Yë'ë jëtu'un mpatuntëp yë n'aaw n'ayukës ets n'ënä'ämënës ntëyajtënës. Patuunta'atë jëtu'un tëkokyë. Këtiipë ëxëëk mjatëty mkëpätëty ma ja naax kajpnën ma nwoownëjkxtën ets jam mjuuky'atëty.

²³ Këtii jëtu'un winë xytyuuntëpëty, tä ja ja'ayëty winë tuntën, mëti'ipës yam n'ëxwopäänpyën ma ja nyaax kyajpnëtyën mijts mwintuuyëty. Jä'ä ko yë'ëjëty aakyë'ë jëtu'un tyuuntëp, mëti'ipës n'ëtujkpyën, paatykyëjxm ka'ap n'ëkupëjknëtës.

²⁴ Tyam jëtu'un ntukwinwanëtë, ko miits nëjkx xynyiwintsën'atë ja naax kajpn, mëti'ipë yë'ëjëty kyajpn'ajtëpën, ëjts jëtu'un miitsëty kë'ëm ntimmyo'ojantëp tääpë yë naax kajpn, ma ja jë'kxy pëky ka'ap y'ëmaaytyä'äkyën. Ëjts jëtu'un Wintsën mëti'ipë miits mTiosajtëpën ets mëj'äämpy miitsëty mpëjkta'aktë ma ja naax kajpnën ja wiinkëtypë.

²⁵ Paaty miitsëty kopkpëky ko xynyijawëtëty, mëti'ipë jëtu'un yë jëyujkëty wa'atsëtyën ets mëti'ipë ka'ap wya'atsëtyën ets näjyëtu'un yë joon jëyujkëty mëti'ipë wa'atsëtyën ets mëti'ipë ka'ap wya'atsëtyë. Ka'ap mëpaat yë'ë mnätyukyaj'ëxëëkëtë ja jëyujk, joon jëyujk ets ja mëti'ipë naaxwin'a'tstëpën, mëti'ipës të nikäjpxyën ko y'ëxëëk'atë.

²⁶ Miitsëty wa'ats mëpaat mnäyaj'itëtë ma ëjtsën, jä'ä koos mëti'ipë Wintsën'ajtpën wa'atsës ets miitsëty ëpëky të mpëjkta'aktë ma ja wiinkëtypë ja naax kajpnën ets jëtu'un'äämpyts mijts njä'ä'atëty.

²⁷ Yë ye'etyëjk ëkë to'oxytyëjk mëti'ipë pojmëkajpxtëpën, ëkë jä'ä tyuunk'ajtyp wi'ix winë tnajtsjawëtyën, kuka'atsy pyaatëtë xyaj'ooktëty ets kë'ëm jëtu'un ënäty nyätyunëtë.