Levitico 19 - Biblia Mixe de Quetzaltepec

Ma yajni'ënä'ämën ja wa'atsajtën ets ja tëyajtën

¹ Ënät ja Tios ojts tmëkäjpxy ja Moisés ets t'ënëmaay:

² Jëtu'un xy'ënëëmëty yë naax kajpn: Wa'ats mëpaat myajpaatë, jä'ä ko ëjts Wintsën mëti'ipë mijts mTiosajtëpën, wa'atsës yë'ë.

³ Nitu'ukjaty yë ja'ay mëpaat twinkutsë'ëkë yë tyeety tyaak. Mwinkutsë'ëkëtëp näjyëtu'un yë po'kxënxëëw. Ëjts jëtu'un Wintsën, mëti'ipë miits mTiosajtëpën.

⁴ Këtii xy'ëwtatëty yë awinax, ni xykya'oytyuntëty kë'ëm yë mtiosëty mëti'ipë pujxnën. Ëjts jëtu'un Wintsën, mëti'ipë miits mTiosajtëpën.

⁵ Ko miits yë wintsë'kën xyaktëty ma Tiosën ets näy'ëëw'oyë näykyajpx'oyë xytyuna'antëty, oy yajxon winë xytyuntëty, tä mëpaat yë Tios naje'eyë tkupëkyën.

⁶ Ja jëyujk mëti'ipë myajktëpën tä tu'uk ayajk ako'onën, jä'ä xëëw mëpaat xytsyu'utstë, jyëkyäpëp komjëpom xyjyaaktsu'utstëty, jä'ä tëy mëti'ipë natëjkëpën, ma ja kom tëkëëkxëëpën mnino'oktëp jä'änë.

⁷ Pën mtsu'tstëp kom tëkëëk xëëw, ja mëti'ipë ënäty të xyaktën tä tu'uk yë ayajk ako'onënën, ëxëëk nëjkx ja Tios tyajnajxnë ets ka'ap nëjkx t'ëkkupëjknë.

⁸ Pën tsyu'typ ja tsu'utsy, tuuntëkoopy ënäty, kopkpëky ko nëjkx yajjo'otsy ma ja myëkunaax myëkukajpnën, mëët ko ënäty të tyaj'ëxëëktëkë ja wa'atspë mëti'ipë ja Tios jä'ä të yajmo'oyën.

⁹ Ko yë mpëjktä'äky y'itëty wyintëwëty, këtii tëkokyë winë xytyimyajpëtë'kta'ajëty ets ni xykya'ixtaaytya'ajëty, ja mëti'ipë ënäty muum të kyä'äyën.

¹⁰ Këtii janty wa'ats xy'ijxtaaytya'ajëty ja m'aaytyëëm m'ujts tëëm, mëti'ipë ënäty muum të kyä'äyën. Ixmats wä'än yë'ë yë ëyoopëja'aytyëjk tyajmuktë ets jaaypyaat jaaypyo'kxyëty. Ëjts jëtu'un Wintsën mëti'ipë miits mTiosajtëpën.

¹¹ Këtii määtstëty. Këtii mnäwyin'ëënëtëty jaxim jayam.

¹² Këtii nëkoo tii xytyukwinwanëty mëët yë nxëëwkyëjxmës, jä'ä ko m'ëxëëktijpy jëtu'un ënäty yë Tios yë xyëëw mëti'ipë m'ëwtajtypyën. Ëjts jëtu'un mëj Wintsën.

¹³ Këtii yë mmëku'uk ëxëëk xytyunëty xy'ënëëmëty ets ni xykyapëjkëty mëti'ipë yë'ë jyä'ä'ajtypyën. Këtii xytyuk'ëwxitëty yë mtuunpë myëju'uny tu'kxëëwpaaty.

¹⁴ Këtii xypyokëty yë ja'ay mëti'ipë natën. Këtii yë nyë'ë tyu'u xyaj'ëtujkëty yë ja'ay mëti'ipë wiintsën. Yaj'ixëty yë näywyinkutsë'kën ma Tiosën. Ëjts jëtu'un Wintsën.

¹⁵ Këtii wiinkjaty winë xytyunëty, ko tii poky xynyipaye'eyëty: ni yë'ë xykya''apupätëty yë ëyoopëja'ay ets kumeenyjyä'äy xykyatsë'ëkëty. Yë tëyajtën yë'ë jëtu'un mëpaat xyajtuny, ko tii poky xypyaye'eyëty.

¹⁶ Këtii je'eyë yë pi'tskä'pxy xymyëjëtitëty ma mjëëky mëku'ukën. Këtii xymyëjwa'kpätëty yë ja'ay mëti'ipë yajja'ay'o'kpën. Ëjts jëtu'un Wintsën.

¹⁷ Këtii je'eyë tu'kmox xymyëët'atëty yë näy'ëxëëk'ixë näkya'oy'ixë ma mjëëky mëku'ukën. Mtuk'ënëëmëp ja mëku'uk ma pyäätyën ko tii tuuntëkoy tkajpxtëkoyëty.

¹⁸ Këtii tii ënätyë xytyuunwinpitëty ets ni tsip ni'äkë xykyamëët'atëty ma ja mjëëky mmëku'ukën. Jëtu'un xytsyokëty ja mjëëky mmëku'uk, tä kë'ëm mnätsyokyën. Ëjts jëtu'un Wintsën.

¹⁹ Yë'ë jëtu'un patun ëjts yë n'ënä'ämën ntëyajtënës. Këtii yë mtsajpkaa xyajnäymyukëtëty mëët yë wiink jëyujk. Këtii kanaakpëky winë xynyi'ipëty ma mkam mtu'ujën. Këtii näjyëtu'un yë mwit xypyëjkta'akëty mëti'ipë kanaakwit mëët xyuyëtyën.

²⁰ Pën tu'uk yë ye'etyëjk myëëtko'knääpy yë to'oxytyëjk mëti'ipë jam yë jyämyëët'ajtpën. Je'eyëp ko ja to'oxytyëjk wiink ja'ay myëtuumpy ets ka'ap yajjuuypyëtsimnyën ets jeexyë ëwaatsëtum yajpaaty. Ja naaxwiinyëtë ja'ay kwanë ko tkukëpätëty e kajts tyim'ookëty. Jä'ä ko ja to'oxytyëjk ka'ap ënäty ëwaatsëtum yajpaaty.

²¹ Ja naaxwiinyëtë ja'ay yë'ë nëjkx tukwintsë'ëkë ja Wintsën tu'uk yë kupixyny yä'äy, mëti'ipë ja tyuuntëko'oyën tyukukëpätëpën jam timmyënëjkxëty ma jam yajnitëkën ja wit tëjk ma näpyaatë y'ityën mëët yë Tios.

²² Mëët ya'atë kupixyny yä'äy mëti'ipë ja ja'ay yäjkpyën, mëti'ipë tyukunajxpën ma ja Tiosën. Ja teety yë'ë mëët t'amëtowëty ja pokymyä'kxën ja Tios, jëtu'un'äämpy tääpë ja'ay yajpokymyä'kxëty.

²³ Ko ënäty miitsëty të mja'ajnëtë jam ma ja naax kajpnën ets xykyojtëty xypyäntëty ja aay kepy, mëti'ipë tëëmpäjtpën, këtii xytyuktëty yë tyëëm ets këtii xyjyë'kxtëty tëkëëk jëmëjt.

²⁴ Kom majktaxk jëmëjtnëm ma ënäty tnixëëw'atyën, jä'ä nëjkx yë Tios tëkokyë yë aaytyëëm ujtstëëm yajtukwintsë'këtyä'äy.

²⁵ E kommëkoxk jëmëjt jyëkyejpy xyjyë'kxnëtëty ja m'aaytyëëm m'ujts tëëmëty. Jëtu'un'äämpy ja mjë'kxykyepyëty mëj këjää tyëëmpätëty. Ëjts jëtu'un Wintsën, mëti'ipë miits mTiosajtëpën.

²⁶ Këtii nitii xytsyu'utsëty mëti'ipë ne'pnymyëëtën. Këtii xytyuunk'atëty yë nasja'awën, ëkë ma ja'ay tii t'akäjpxyën tii tunan jatanëp.

²⁷ Këtii pik yë mwaay xykyääptëty ets këtii xyjyëjpkääptëty yë m'awaayëty.

²⁸ Këtii yë mnini'kx nëkoo xyajtsëtyutëty ko pën y'ookëty. Ets këtii nëkoo tii ijxën xykyëxja'atëty ma mnini'kxëtyën. Ëjts jëtu'un Wintsën.

²⁹ Këtii yë wintsë'kën xyajtëkoyëty ma mnëëxën, ets jyot nyini'kx tookëty. Këtii yë naax kajpn xyaj'ëxëëktëkëty mëët yë ëxëëktu'un ëxëëkajpxën.

³⁰ Wintsë'ëkëtë yë nxëëwës ma po'kxënxëëw y'ityën. Wintsë'ëkëtë yë njëën ntëjkës. Ëjts jëtu'un Wintsën.

³¹ Këtii xynyinëjkxëty oy natiipoj natii ënääw ets mëti'ipë nasja'apën. Këtii xy'ëxëëktuntëty yë mjuukyajtënëty, ko yë'ë tii xyajtëëwpëtëty. Ëjts jëtu'un Wintsën mëti'ipë miits mTiosajtëpën.

³² Ko yë mëjja'aytyëjk xy'ixëty, mwa'akë'ëkëp ënätyë ets xykyajpxpo'kxëty. Myaj'ixëtëp yë näwyinkutsë'ëkë, mëët ko jyääjëty yë Tios. Ëjts jëtu'un Wintsën.

³³ Këtii nëkoo xyaj'ëyowtëty yë jaaypyo'kxyjyä'äy, mëti'ipë tsënääpyën ma miitsëtyën.

³⁴ Jëtu'un xyjyawëtëty, tä aak miitsëty mnäjyawëtën. Tsoktë jawëtë jä'ä ko jëtu'un yë'ë jyä'äyëty tä miitsëtyën. Yë'ë ëkmëmay ëkmëtajtë ko miitsëty jaaypyaat jaaypyo'kxy ojts jap m'itë Egiptë. Ëjts jëtu'un Wintsën, mëti'ipë miits mTiosajtëpën.

³⁵ Ko tii xykyijpxtëty, këtii xyajni'ikëtëty, ëkë xyajwäänëtëty. Wä'än yë'ëjëty ma ayeny'äämpyë winë yajkijpxyën, ëkë wä'än yë'ëjëty ma yajkijpxyën winë wi'ix jye'emtyëtyën.

³⁶ Ka'pxy mëpaat winë xykyijpxtë ets kä'pxy mëpaat winë xytyiytyë. Ëjts jëtu'un Wintsën, mëti'ipë miits mTiosajtëpën, mëti'ipë myajpëtsëëmëtën jap Egiptë.

³⁷ Paaty tuntë jëtu'un, tääjës yë n'aaw n'ayuk të nkäjpxyën ets tääjës yë n'ënä'ämën ntëyajtën y'ënä'änyën. Patuntë, ëjts ënaanp. Ëjts jëtu'un Wintsën.