Levitico 18 - Biblia Mixe de Quetzaltepec

Ja to'oxytyëjk mëti'ipë yë ye'etyëjk mëpaat ka'ap tpëkyën

¹ Ënät ja Tios ojts tmëkäjpxy ja Moisés ets t'ënëmaay:

² Jëtu'un xy'ënëëmëty yë Israel ja'ayëty: Jëtu'un y'ënä'äny ja Wintsën: Ëjts jëtu'un Wintsën, mëti'ipë miits mTiosajtëpën.

³ Këtii jëtu'un winë xytyuntëty tä yë Egiptë ja'ayëtyën, ja kajpn ma ojts miitsëty mjuuky'atën. Këtii näjyëtu'un winë xytyuntëty tä yë ja'ayëtyën mëti'ipë jam tsënaaytyëpën Canaán, ma ja naax kajpnën ma miits nwoownëjkxa'antën; ni yë'ë xykyapatuunëtëty mëti'ipë yë'ëjëty y'ënä'ämën'ajtëpën.

⁴ Yë'ë kuuytyuntë mëti'ipës të nikäjpxyën, patuntë yë n'ënä'ämën ntëyajtënës ets jëtu'un mjuuky'atëty oy tsuj, tä ja ënä'ämën tnikäjpxyën, jä'ä ko ëjts Wintsën, mëti'ipë miits mTiosajtëpën.

⁵ Yë'ë patuntë ëjts yë n'aaw n'ayukës ets n'ënä'ämënës ntëyajtënës, pën jëtu'un tyuunpy, nëjkxëp oy tsuj jyuuky'äty. Ëjts jëtu'un Wintsën.

⁶ Nitu'uk mëpaat yë ye'etyëjk tkamëëtsëënë yë to'oxytyëjk mëti'ipë jyiiky'äjtyp myëku'uk'ajtypyën. Ëjts jëtu'un Wintsën.

⁷ Këtii yë wintsë'kën mëj këjää xyajtëkoytyëty ma mteetyën, ko yë mtaak xymyëëtko'knääpyëty, mtaak'ajtyp yë'ë ets ka'ap y'oyëty, ko jëtu'un m'ëtë'ëtsëty.

⁸ Këtii yë wintsë'kën xyajtëkoyëty ma nteetyën ets ja kyutëjk xymyëëtko'knaayëty.

⁹ Këtii xymyëëtko'knëty yë mtsë'ë, ëkë m'uty to'oxytyëjkpë, mëti'ipë mteety nyëëxajtypyën, ëkë mtaak nyëëxajtypyën. Oy ënäty jyapëty të myiny naaxwiiny ma mtëjkën, ëkë oy ka'ap, ka'ap mëpaat xymyëëtko'knë.

¹⁰ Këtii yë wintsë'kën xyajtëkoyëty ma mijtsën kë'ëm, ko xymyëëtko'knääpyëty yë m'oknëëx, mëti'ipë yë mmaank nyëëxajtypyën, ëkë mëti'ipë yë mnëëx nyëëx'ajtypyën, këtii mëpaat jëtu'un m'ëtë'ëtsy.

¹¹ Këtii xymyëëtko'knëty yë mteety yë tyo'oxytyëjk yë nyëëx, jä'ä ko mteety yë'ë mëët tnëëx'aty, e paaty mëkä'äxën yë'ë, këtii mëpaat jëtu'un m'ëtë'ëtsy.

¹² Këtii xymyëëtko'knëty yë mteety yë myëkä'äx to'oxytyëjkpë, jä'ä ko yë jyot nye'pny tu'ukyë mëët yë mteety yë jyä'ä.

¹³ Këtii xymyëëtko'knëty yë mtaak yë myëkä'äx to'oxytyëjkpë, jä'ä ko tu'ukyë jot ne'pny tmëët'atë.

¹⁴ Këtii yë wintsë'kën xyajtëkoyëty ma mjämyën ets xymyëëtko'knääpyëty yë tyo'oxytyëjk, jä'ä ko tu'ukyë jot ne'pny tmëët'atë.

¹⁵ Këtii xymyëëtko'knääpyëty yë mmaank yë tyo'oxytyëjk, yë mxäkxy këtii mëpaat xymyëëtko'knë.

¹⁶ Këtii yë wintsë'kën xyajtëkoyëty ma m'ajtyën, ko yë tyo'oxytyëjk xymyëëtko'knääpyëty.

¹⁷ Këtii xymyëëtko'knëty yë to'oxytyëjk mëët yë nyëëx ets näjyëtu'un yë y'oknëëx mëti'ipë nyëëx'ajtypyën yë myaank, tääpë jëtu'unpë mëj këjää yë kyupoky, jä'ä ko yë'ëjëty tu'kja'ay yë'ëjëty.

¹⁸ Këtii xymyëëtsëënëty ja mto'oxytyëjk ja myëkä'äx mëti'ipë to'oxytyëjkën ets ijxkëm xymyëëtko'knääpyë, pën juuky'ajtpnën yë mto'oxytyëjk, këtiipë nyämyëtsiptsoonëtëty.

¹⁹ Këtii yë to'oxytyëjk xymyëëtko'knëty, pën yë'ë tukjënajkëp yë jyot myëjaaw ma u'unk maay tyajja'tyën naaxwiiny.

²⁰ Këtii xymyëëtko'knëty yë mëku'uk yë tyo'oxytyëjk, mëti'ipë oy mëët mnäjyawëtyën, këtii yë tyo'oxytyëjk xymyëëtko'knaayëty, jä'ä ko ëxëëk nëjkx mwë'ëmy ko jëtu'un m'ëtë'ëtsëty.

²¹ Këtii nijëna'a yë m'u'unk xykyë'ëyakëty ma ja wiink tiosën, mëti'ipë xyëëwajtypyën Moloc, këtii yë mTios jëtu'un'äämpy xyajjotma'atëty. Ëjts jëtu'un Wintsën.

²² Këtii xymyëëtko'knëty yë mëye'etyëjk, jëtu'un tä jeexyë xymyëëtko'knën yë to'oxytyëjk, tääpë jëtu'unpë ninu'un yë kya'oyëty.

²³ Këtii tii jëyujk tiitsajpkaa xymyëët'atëty, jëtu'un tä jeexyë xymyëët'atyën yë mto'oxytyëjk. Këtii kë'ëm mnäyaj'ëxëëkëtëty. Näyjyëtu'un yë to'oxytyëjk ka'ap mëpaat tii jëyujk tiitsajpkaa jëtu'un tmëët'aty tä jeexyë ye'etyëjkëtyën, jä'ä ko tääpë jëtu'unpë ninu'un yë kya'oyëty.

²⁴ Nitii mëpaat mëët mkanätyukyaj'ëxëëkëty, mëti'ipë të yajnikäjpxyën, jä'ä ko yë'ë jëtu'un mëët nyätyuk'ëxëëktunëtë yë naax kajpn mëti'ipës n'ëxkaxantëpën ma miitsëtyën.

²⁵ Näyjyëtu'un yë nyaax kyajpnëty ojts y'ëxëëkë, e kajtsës ojts jëtu'unyë nyajninaxy, ojtsës ntukukëpety ja y'ëxëëk'ajtënëty ets ojts ja kajpn tukwa'ats wyi'imy. Ja mëti'ipë ënäty jap tsënaaytyëpën ojts y'o'kta'atë.

²⁶ E miitsëty Israel ja'ayëty ets jaaypyaat jaaypyo'kxyëty mëti'ipë tsënaaytyëpën ma miitsëtyën, patuntë jëtu'un yë n'aaw n'ayukës ets n'ënä'ämënës ntëyajtënës, këtiipë xytyuntëty mëti'ipë ka'ap y'oyëtyën.

²⁷ Jëtu'un ojts wiinkjaty winë tuntë yë ja'ayëty, mëti'ipë tsënaaytyën ma tääpë naax kajpnëtyën, ma ënäty miitsëty ka'ap jam mja'tënëm.

²⁸ Ka'ap mëpaat ëxëëk mjatë mkëpätë, jëtu'un tä tääpë ja'ayëty jyajtën kyëpäjtën, ma ënäty miitsëty ka'ap jam mja'tënëm.

²⁹ Pën ja ëxëëkpë tyuunpy, kopkpëky ko nëjkx yajjo'otsy ma ja myëkunaax myëkukajpnën.

³⁰ Paaty yë'ë jëtu'un patuntë yë n'aaw n'ayukës, këtiipë näjyëtu'un m'ëtëtstëpëty tä tääpë ja'ayëty y'ëtëtstën, mëti'ipë jam tsënaaytyën ma ënäty miitsëty ka'ap mja'tënëm. Këtii yë'ë mnätyukyaj'ëxëëkëtëty. Ëjts jëtu'un Wintsën, mëti'ipë miitsëty mTiosajtëpën.