Levitico 16 - Biblia Mixe de Quetzaltepec

Ja nyixëëw ma ja pokymyä'kxën y'ityën

¹ Ok ma ënäty ja Aarón nimäjtsk ja y'u'unk të y'ooktën, mëët ko kë'ëmwinma'any të tninëjkxtë ja Tios, ojts ja Tios tmëkäjpxy ja Moisés,

² ets t'ënëmaay: Ënëëmë yë m'ajty Aarón ets këtii oy jëna'a tyëkëty jap ma tsajptëjkën, jëxkë'p ma wit atëëytyuk yajpaatyën, ma jap y'ityën yë Tios yë kyaaxë, këtiipë y'ookëty; jä'ä ko ëjts näynyikëxë'ëkanëpës yootsjoty ma ja kaaxë yajpaatyën.

³ Yë Aarón ko jap tyëkëja'anëty tsajptëkoty, yë'ë mëpaat tmëtëkë tu'uk yë tsajpkaayä'äy ayääkë, mëti'ipë yë pyoky tyuknikëpäjtu'utëpën ets tu'uk yë kupixyny yä'äy mëti'ipë nyino'okëpën.

⁴ Yë'ë myëtëkëp jap ja oywyit mëti'ipë kënu'kxyën, mëët ja pya'tk'ëxmots mëti'ipë oywyitën, mëët ja wyëën ets ja kupit aak oywyitpë. Ya'atë wit aakyë'ë mëti'ipë kënu'kxyën, paaty ko tuktëkëja'anëty, jëyëjp mëpaat yajxon tsyi'iy xyitsy.

⁵ Mäjtsk tmënëjkxëty ja tsajppax yä'äy, mëti'ipë ja Israel ja'ayëty tyuknikëpäjtu'utëpën ma ja nëë poky të tuntën ets tu'uk yë kupixyny yä'äy mëti'ipë nyino'okëpën.

⁶ Ets ënät tukwintsë'ëkëty ja Tios ja tsajpkaa, mëti'ipë ja kyë'ëmpoky tyuknikëpäjtu'utëpën ets näjyëtu'un ja y'u'unk y'ëna'k ets ja y'u'unk tyo'oxytyëjk.

⁷ Okts näjyëtu'un tukwintsë'ëkëty ja Tios mäjtskpë ja tsajppax, jam ma yajnitëkën ja wit tëjk ma näpyaatë y'ityën.

⁸ Ets t'ijxpëtsëmëty ja mäjtskpë ja tsajppax ets yaj'ixëty pën mëti'ipë ja Tios tuka'ajëpën ets mëti'ipë tuka'ajëpën ja Azazel.

⁹ Ja tsajppax mëti'ipë ënäty ja Tios tuka'ajëpën yë'ë ja Aarón tyukwintsë'ëkëp ja Tios mëëtkyëjxm ja nëë poky.

¹⁰ Ja tsajppax mëti'ipë tuka'ajëpën ja Azazel, jëtu'unyë juuky tmo'ojëty ja Tios ets tpaatëty ja pokymyä'kxën, ok tnajtsmatsëty ets nyëjkxëty jam wintë'ëtstum ma ja Azazel yajpaatyën.

¹¹ Mëëtkyëjxm ja Aarón ja kyë'ëmpoky, yë'ë ja Tios tyukwintsë'ëkëp ja tsajpkaa ets ja pokymyä'kxën tpaatëty, näjyëtu'un ja y'u'unk y'ëna'k ets y'u'unk tyo'oxytyëjk.

¹² Tääts tyaj'utsëty jyëëntsijtkëty mëët yë jëënpajk mëti'ipë nyëpëkëpën ma wintsë'këntyaknën mëti'ipë yajpatpën Wintsën wyintum ets mäjtsk wookyën yë poom mëti'ipë oy pa'akxu'kpën ets ënät tmënëjkxëty jap ma ja wit'atëëytyukën jëxkë'ptsow ma ja kaaxë yajpaatyën.

¹³ Jap t'apëkëty ja poom ma ja jëënpajkën jam Tios wintum, ja jok mëti'ipë jap pëtsëëmpën yë'ë nyijok nyiwiixëp ja kaaxë akë'ë, këtiipë ja Aarón y'ookëty.

¹⁴ Tääts näjyëtu'un wäänë ja tsajpkaa ne'pny tpëjkë'ëkëty, mëti'ipë ënäty të wyintsë'kën'atyën ets jam txijkxjëtitëty ma ja Wintsën ja kyaaxë akë'ë ja pya'ajën, mëti'ipë najts'ijxëpën matsow ja xëëw pyëtsimyën. Ënät näjyëtu'un wëxtujk'ok jam txijkxjëtitëty ma ja potsyën ma ja wintsë'kën yajyäkyën.

¹⁵ E ko jëtu'un t'ëktuunta'ajëty, ënät ja tsajppax ok tyaj'ookëty, mëti'ipë ja naax kajpn jyä'ä'ajtypyën, mëët ma ja poky këtyey tuuntëkoy tkajpxtëkoytyën. Ënät ja nye'pny jap tmënëjkxëty jap wit'atëëytyuk jëxkë'p, jap ma kaaxë yajpaatyën ets tuknixijkxëty ja kaaxë akë'ë ets ja jyëjp, jëtu'un tä ënäty të tunyën mëët ja tsajpkaa ne'pny,

¹⁶ jëtu'un tyajwa'atsëty ja Tios ja jyëën tyëjk mëëtkyëjxm ja Israel ja'ay ja y'ëxëëk'ajtënëty, kyäjpxykyumëtoownajxënëty ets ja nyëë pyokyëty. Näyjyëtu'un mëpaat tuny ja wit tëjk ma ja näpyaatë y'ityën mëti'ipë kajpn itkujky yajpatpën ma yë'ëjëty tsyëënëtën mëët ja y'ëxëëk'ajtënëty.

¹⁷ Pën jap yë Aarón yajpaaty ma Tios yë jyëën tyëjkën ets ja pokymyä'kxën tpaata'any, ni pën mëpaat jap kyayajpaaty ma ja wit tëjkën ma ja näpyaatë y'ityën, koonëm pyëtsëmëty. Ko ënäty tëë t'ëxajë ja pokymyä'kxën, jëtu'un yë'ë, y'u'unk y'ëna'k ets tëkokyë yë Israel ja'ayëty,

¹⁸ tääts pyëtsëmëty ets nëjkx ja näypyuj näjyä'ätsë tpaaty jam ma wintsë'këntyaknën mëti'ipë jam ijtpën Tios wintum. Tääts tpëjkë'ëkëty wäänë ja ne'pny ets tukuutsëty ja wintsë'këntyakn ja wyaj ets txijkxjëtitëty näjyëtu'un ma ja pya'ajën;

¹⁹ ets mëët yë kyë'ëwa'axy wëxtujk'ok tuknixijkxëty yë ne'pny ja potsy ma ja wintsë'këntyaknën. Jëtu'un'äämpy ënäty wyä'ätsy ja wintsë'këntyakn ma ja Israel ja'ayëty ja nëë poky tmëët'atën ets ënät tkënu'kxëty.

²⁰ Ko ënäty ja Aarón tëë wa'ats tyajwë'ëmta'ay winë ets ja wit tëjk ma ja näpyaatë y'ityën ets ja wintsë'këntyakn. Ënät tni'ënä'ämëty ets tyajmintëty ja tsajppax mëti'ipë juukyën,

²¹ ets tpëjkta'akëty jam ja kyë'ë ma ja tsajppax ja kyëpajkën ets tmaaywyajtsta'ajëty tëkokyë ja Israel ja'ayëty ja y'ëxëëktu'un y'ëxëëk kajpxënëty, kyäjpxykyumëto'ownajxënëty ets nyëë pyokyëty. Jëtu'un'äämpy ja nëë poky jam tpëjktakta'ajëty ma ja tsajppax ja kyëpajkën ets tu'uk ja ja'ay tuknipëkëty mëti'ipë nëjkx tnajtsmatsën jam të'ëts itjotm.

²² E ko ja tsajppax tyëkooynyëty jam të'ëts itjotm, yë'ë myënëjkxtaaynyëp ja nyëë pyokyëty ma ka'ap pën tsyëënë jyuuky'ätyën.

²³ Ënät jap tyëkëty ma ja wit tëjkën ma näpyaatë y'ityën ets tjänëty ja linë wit mëti'ipë oywyitën mëti'ipë ënäty të tuktëkën, ko të tyëkëja'any jap ma ja Tios ja jyëën tyëjkën ets jap tëkoty tyajwë'ëmëty.

²⁴ Jap ma tsajptëjkën jap nëjkx nyäpyujy nyäjye'etsyë wa'ats ets ënät tnino'okëty ja jëyujk mëti'ipë ja Tios yajtukwintsë'këpën. Jëtu'un ja Aarón ja pokymyä'kxën tpaatëty ets näjyëtu'un ja naax kajpn.

²⁵ Ja wintsë'kën ja nyi'on jam tnino'kta'ajëty ma wintsë'këntyaknën.

²⁶ E ja ja'ay mëti'ipë ënäty ojts të tnajtsmatsën ja tsajppax jam të'ëts itjotm, mëti'ipë ja Azazel jyä'ä'ajtypyën, yajxon ja wyit tpujëty wa'ats ets näjyëtu'un kë'ëm nyäpyuj nyäjyä'ätsëtëty wa'ats, täänëm tyëkëty ma ja naax kajpnën.

²⁷ Ja tsajpkaa ets ja tsajppax mëti'ipë ënäty të wyintsë'kën'atën mëët ma ja poky yajtuny yajkäjpxyën, mëti'ipë ja nye'pny të yajmënëjkxtën jap ma tsajptëjkën ets ja pokymyä'kxën yajpaatëty, jam nëjkx yajmënëjkxtë kajpnpë'am, ja pyo'o, ja nyitsu'utsyëty ets ja tyi'iny jëtu'unyë nëjkx yajnino'kta'ay.

²⁸ Ja ja'ay mëti'ipë ënäty të tnino'okyën, kopkpëky ko nëjkx ja wyit tpujy tje'etsy ets wa'ats tsyi'iwëty xyëtsëty, täänëm tyëkëty ma ja naax kajpnën.

²⁹ Ya'atë ënä'ämën itëp jëtu'un xëmë ma miitsëtyën. Ma myajk'anyën ja mëwëxtujkpo'opë nitii jää xykyajë'kxtëty, ayuu jä'ä mxëëwnaxtëty ets nitii jää xykyatontëty, wä'än timpyënëty, oy yë'ëjëty yë Israel ja'ayëty ets oy yë'ëjëty yë jaaypyaat jaaypyo'kxyëty, mëti'ipë ijtëpën ma miitsëtyën.

³⁰ Jä'ä ko jä'ä xëëw jëtu'un xypyata'antë miitsëty ja pokymyä'kxën ma Tiosën ets wa'ats mwë'ëmtëty ma ja nëë poky xymyëët'atën.

³¹ Ya'atë ënä'ämën tëyajtën xëmëkyëjxm y'itëty, ya'atë po'kxënxëëw mëj'äämpy mëpaat nyäxy, ni pën jää tii tkajë'kxëty, ayuu jää mxëëwnaxtëty.

³² Ja teety mëti'ipë ënäty të yajwin'ixyën, mëti'ipë ja kutujkën myëët'ajtypyën ets ja tyeety tkutëkëty, yë'ë winë tyunëp ma ënäty ja pokymyä'kxën yajpaata'anyën. Nëjkxëp ja oywyit tuktëkë mëti'ipë kënu'kxyën.

³³ Ets ja näypyuj näjyä'ätsë tunëty jap ma ja it naaxwiinyëtën wa'atspë, ma ja wit tëjkën ma ja näpyaatë y'ityën mëët ja Tios ets ma ja wintsë'këntyaknën. Jëtu'un tpaatëty ja näpyokymyä'kxë mëët ma ja naax kajpn ja nëë poky tmëët'atën ets näjyëtu'un ja teetyëjk ja jyä'äjëty.

³⁴ Ya'atë ënä'ämën tëyajtën xëmëkyëjxm y'itëty ma miitsëtyën, ma tu'kjëmëjtpë nyäxyën yë xëëw jëmëjt, tu'k'okjaty mëpaat miitsëty xymyëjjawëtë ja xëëw ma ja pokymyä'kxën y'itëtyën mëët ma tyuuntëkoy kyajpxtëkoytyën yë Israel ja'ayëty. Ets jëtu'un ojts winë tuntë, tä ja Tios ja Moisés ojts tuk'ëne'emyën.