Levitico 15 - Biblia Mixe de Quetzaltepec

Ja nyimëtyä'äky ko tu'uk ja naaxwiinyëtë ja'ay ëxëëk yajpaatëty

¹ Ënät yë Tios ojts tmëkäjpxy yë Moisés ets Aarón ets t'ënëmaay:

² Tukmëmëtya'ak yë Israel ja'ayëty: ko tu'uk yë naaxwiinyëtë ja'ay jyotjënakëtëty, ëxëëk ënäty yajpaaty.

³ Ëxëëk wyë'ëmëty oy jyääjëty ma ënäty ja myëjaaw të pyëtsimyën ma ye'etyëjk'ajtënën ets oy jyääjëty ma ënäty të y'ëtukyën, yë'ë ëxëëkëm jëtu'un wyë'ëmëty.

⁴ Ma tääpë ye'etyëjk ja'ay nyäkyo'okyën, ëxëëk jam y'awinpitëty, ma ënäty tyukjënäkyë ja myëjaaw ëxëëk jam y'awinpitëty. Ma näjyëtu'un kyëxweetsyë, nän ëxëëk jam y'awinpitëty.

⁵ Pën tyoompy ja it naaxwiinyëtë ma tääpë ja'ay të myä'äyën, nëjkxëp tpujy yë wyit ets tsyi'iwëty ets jä'ä nëjkx yajtijy ëxëëk.

⁶ Pën jam këxwä'tsp ma tääpë ja'ay të y'u'unyën, kopkpëky ko yë wyit tpujëty ets tsyi'iwëty yajxon wa'ats ets jä'ä nëjkx yajtijy ëxëëk, tu'kxëëw jëtu'un y'itëty koonëm kyootsëty.

⁷ Pën tyoompy ja ja'ay mëti'ipë ja myëjaaw tukjënajkëpën ma ye'etyëjk'ajtënën, kopkpëky ko wyit tpujëty ets tsyi'iwëty wa'ats ets jä'ä nëjkx yajtijy ëxëëk tyimtsu'ujëty jëtu'un.

⁸ Mëti'ipë ënäty tukjënajkëpën ja myëjaaw ma ye'etyëjk'ajtënën ets myëku'uk tnitsujëty mëti'ipë wa'ats yajpatpën; tääpë ja'ay yajxon mëpaat yë wyit wa'ats tpujy ets näjyëtu'un tsyi'iwëty ets ëxëëk yajtijëty tyimtsu'ujëty jëtu'un.

⁹ Oy tyimmëti'ipë ënyääypyäjnëty ma ënäty tääpë ja'ay kyëxweetsy, mëti'ipë tukjënajkëpën yë myëjaaw, ëxëëk jëtu'un wyë'ëmëty.

¹⁰ Pën tyoompy ma ënäty tääpë ja'ay të y'u'unyën, mëti'ipë tukjënajkëpën yë myëjaaw ma ye'etyëjk'ajtënën, ëxëëk wyë'ëmëty tsuupaat. Pën myënëjkxypyën ya'atë jëtu'unpë, nëjkxëp ja wyit twinpujy ets näjyëtu'un kë'ëm nyäpyujëtëty mëët yë nëë wa'ats ets ëxëëk nëjkx yajtijy tyimkutsu'ujëty jëtu'un.

¹¹ Pën tyoompy jaaykyë'ëpujy ja mëti'ipë ja myëjaaw tukjënajkëpën ma ye'etyëjk'ajtënën, ëxëëk jëtu'un wyë'ëmëty tsuupaat ets kopkpëky ko tpujëty ja wyit ets tsyi'iwëty.

¹² Pën tääpë ja'ay mëti'ipë pa'ammëëtën tyoompy yë tu'ts, ja tu'ts timyajpu'ujëp, ëkë pën yë'ëts yë kepypyok ëkë apëjk atu'unën mëti'ipë kepyën, je'eyë yajpujëty.

¹³ Pën tääpë ja'ay tsoknëp, wëxtujk xëëw tmëtsyowëty ets jëtu'un nyäpyuj nyäjyä'ätsëtëty; nëjkxëp näjyëtu'un tpujy ja wyit ets tsyi'iwëty, tääts wyë'ëmëty wa'ats.

¹⁴ Kom tëtujk xëëw yë'ë myënëjkxëp jam ma ja teetyën mäjtsk yë muuxy, mäjtsk yë pak ets jëtu'un jam tyakëty ma ja wit tëjkën ma ja näpyaatë y'ityën.

¹⁵ Tu'uk ja teety tyakëty mëti'ipë ja nëë poky tyukunaxëpën ets tu'uk mëti'ipë yajno'okëpën. Jëtu'un ënäty yajtuny, ma ja ja'ay ja näypyuj näjyä'ätsë tpaatyën Wintsën wintum, mëti'ipë ja myëjaaw tukjënajkëpën ma ja ye'etyëjk'ajtënën.

¹⁶ Ko tu'uk yë ye'etyëjk tyukjënakëtëty yë myëjaaw ma ye'etyëjk'ajtënën, yajxon nyäpyuj nyäjyä'ätsëtëty ets tpujta'ajëty tëkokyë yë jyot nyini'kx ets ëxëëk yajtijëty tyimkutsu'ujëty.

¹⁷ Pën witkëjxy kyä'äy, ëkë jam muum ma po'ojën mëti'ipë ja naaxwiinyëtë ja'ay myëjaawajtypyën, koonëm ko yajpujëty ets ëxëëk wyë'ëmëty jëtu'un kyukootsëty.

¹⁸ Pën yë ye'etyëjk ets to'oxytyëjk näymyëët'ajtëtëp, nimäjtskëty kopkpëky ko nyäpyuj nyäjyä'ätsëtëty ets ëxëëk wyë'ëmtëty tyimkutsu'ujëtëty jëtu'un.

Ma yajnimëtyä'äkyën ko tu'uk yë to'oxytyëjk tyukjënakëtëty yë jyot myëjaaw

¹⁹ Ko tu'uk yë to'oxytyëjk jyënakëty yë jyot myëjaaw ma u'unk maay tyajja'tyën naaxwiiny, ëxëëk jëtu'un wyë'ëmëty ets wëxtujk xëëw jëtu'un y'itëty. Pën tääpë to'oxytyëjk kyë'ënixäjpy, ëxëëk nëjkx wyi'imy tyimkutsu'ujëty jëtu'un.

²⁰ Pën maa yë'ë nyaaxweetsy ma ënäty tyukjënäkyën ja jyot myëjaaw, ëxëëk y'awinpitëty; näjyëtu'un ma myä'äy pyo'kxyën ëxëëk jam y'awinpitëty.

²¹ Pën jam najxp ma ënäty yë'ë të myä'äy të pyo'kxyën, kopkpëky ko wyit tpujëty ets kë'ëm nyäpyujëtëty wa'ats mëët yë nëë ets ëxëëk wyë'ëmëty tyimkutsu'ujëty jëtu'un.

²² Pën tyoompy ja ënyääypyäjn, ma ënäty yë'ë të y'u'unyën, kopkpëky ko wyit tpujëty ets kë'ëm nyäpyuj nyäjyä'ätsëtëty wa'ats mëët yë nëë ets ëxëëk wyë'ëmëty tyimkutsu'ujëty jëtu'un.

²³ Pën tyoompy ma ënäty ja to'oxytyëjk të myä'äy të pyo'kxyën, ëkë ma ënäty të y'u'unyën, kopkpëky ko ëxëëk yajpaatëty ets jëtu'un tyimkutsu'ujëty.

²⁴ Pën tu'uk yë ye'etyëjk myëëtko'knääpy jëtu'unpë to'oxytyëjk, nëjkxëp ja ëxëëkpë tyukpaatyë ets näjyëtu'un wëxtujk xëëw y'itëty, näjyëtu'un y'ëxëëkëja'any ma ënäty të kyo'knën.

²⁵ E pën tu'uk ja to'oxytyëjk ajotkumonë tyukjënäkyë ja myëjaaw, ma ka'ap tnixëëw tnijëmëjtëtyën ets jëtu'un jeky y'ijnëty, ëkë pyoxnëty jëna'a jeexyë mëpaat y'ëtukyën; ëxëëk yajtijëty mapaat ënät tyukjënäkyën ja myëjaaw, jëtu'un tä ko tyukjënäkyën ma tnixëëw tnijëmëjtëtyën.

²⁶ Pën ma yë'ë myä'äy ëkë pën ma kyëxweetsy, ëxëëk nëjkx y'awinpity; jä'ä ko jëtu'un ja myëjaaw tyukjënäkyë tä jeexyë tnixëëw tnijëmëjtëtyën.

²⁷ Pën ya'atë tyoompy, ëxëëk nëjkx wyi'imy, kopkpëky ko yë wyit tpujëty ets kë'ëm nyäpyujëtëty mëët yë nëë ets ëxëëk nëjkx yajtijy tyimkutsu'ujëty jëtu'un.

²⁸ Ko y'ëtukëty ma tyukjënäkyën ja jyot myëjaaw, kom wëxtujk xëëw ënät nëjkx ja näypyuj näjyä'ätsë tpaaty.

²⁹ Kom tëtujk xëëw mäjtsk t'ixëty yë muuxy ëkë yë pak, tääts nëjkx ja teety tmo'oy jam ma yajnitëkën ja wit tëjk ma näpyaatë y'ityën.

³⁰ Ja teety tu'uk tyakëty mëti'ipë ja nëë poky kyunaxëpën ets tu'uk tyakëty mëti'ipë yajno'okëpën. Ya'atë jëtu'un ja teety tyunëp Wintsën wintum ets ja to'oxytyëjk tpaatëty ja näypyuj näjyä'ätsë, mëët ko ënäty të tyukjënäkyë ja jyot myëjaaw, ma u'unk maay tyajja'tyën naaxwiiny.

³¹ Jëtu'un'äämpy jëtu'un ja ëxëëkajtën jëkäm yajpaatëty ma Israel ja'ayëtyën, këtiipë y'ooktëty, mëët ko ënäty tyaj'ëxëëkëtë ja it naaxwiinyëtë maas ëjts n'ityën.

³² Yaa jëtu'un të yajnimëtyä'äky, ko yë naaxwiinyëtë ja'ay tyukjënakëtëty yë jyot myëjaaw ma ye'etyëjk'ajtënën. Ko jëtu'un xëmë jyatëty kyëpätëty ets jëtu'un ëxëëk wyë'ëmëty.

³³ Näyjyëtu'un ko ja to'oxytyëjk tyukjënakëtëty ja jyot myëjaaw ma ja u'unk maay tyajja'tën naaxwiiny. Wä'än yë'ëjëty yë ye'etyëjk ëkë to'oxytyëjk ya'atë jëtu'un tyunëp, ko jëtu'unpë ja jotmay tmëët'atëty ets näjyëtu'un ko ja ye'etyëjk tmëëtko'knëty tu'uk ja to'oxytyëjk mëti'ipë tukjënajkëpën ja jyot myëjaaw ma ja u'unk maay tyajminy tyajja'tyën.