Levitico 14 - Biblia Mixe de Quetzaltepec

Wi'ix mëpaat jatëkok wyä'ätsyën yë ja'ay mëti'ipë yë pu'uts pa'am të pyikyën

¹ Ënät ja Tios ojts tmëkäjpxy yë Moisés ets t'ënëmaay:

² Yaa yajnimëtyä'äky wi'ix mëpaat jatëkok yë ja'ay wyä'ätsyën mëti'ipë yë pu'uts pa'am të pyikyën, ja pa'amja'ay jam yajmënëjkxëty ma ja teetyën,

³ ets jam kajpnpë'am yaj'ixëty. Ko ja teety t'ixëty ko ja pu'uts pa'am tëë tsyo'oky.

⁴ Ënät tuk'ënä'ämëty yë ja'ay, mëti'ipë ënäty wa'atsaanpën ets tmëminëty mäjtsk yë joon, mëti'ipë juukyën ets wa'atsën ets tmëminëty näjyëtu'un yë ajë kepy, witëty mëti'ipë tsapts yë y'ujkën ets hisopo ujts.

⁵ Ënät tni'ënä'ämëty ets y'ookëty tu'uk ja joon tu'tsnëkëjxy mëti'ipë myëëtën yë nëë.

⁶ Ënät tmatsëty ja joon mëti'ipë juukyën ets tkajpë'ëkëty ja ajë kepy ets tpëjkë'ëkëty ja tsaptswit ets ja hisopo ujts ets nëjkx tukpatijta'ay ja nye'pny ja joon mëti'ipë ënäty të y'ookyën.

⁷ Wëxtujk'ok tuknixijkxëty ja ja'ay mëti'ipë ënäty tso'okaanpën ma ja pu'uts pa'am pyikyën y'ixyën ets nikajpxëty, ko wa'ats yajpatnë, ja joon mëti'ipë juukyën nëjkxëp t'ëxmatsy.

⁸ Pën ënäty wa'ats wë'ëmaanpën, pyujëp jyä'ätsëp yë wyit ets tsi'iwëp xëtsëp näjyëtu'un. Näy'awaayjyäpëtëp näjyëtu'un, ënätnëm nëjkx tyëkë ma ja naax kajpnën, je'eyëp ko ka'ap tyëkëty tyëkoty.

⁹ Ko wëxtujk xëëw nëjkx yë wyääy tnëkä'pta'ay, nëjkxëp nyäy'awaayjyepyë, nëjkxëp yë wyiinxëwaay tjepy ets tëkokyë yë nyi'u'kxy. Nëjkxëp yë wyit tpujy ets näjyëtu'un tsyi'iwëty xyëtsëty, täänëm wyë'ëmëty wa'ats.

¹⁰ Kom tëtujk xëëw mäjtsk tyakëty yë tsajppax ets tëtujk tsim yë tsajpmokway, mëti'ipë nëjkx yaj'oytyunyën mëët yë on ets jëtu'un yë Tios yajmo'ojëty, tä tu'uk yë ayajk ako'onën ets tu'k a'ukën ja on.

¹¹ Ja teety mëti'ipë ënäty tunaanpën ma ja ja'ay wya'atsa'anyën, jam ja ja'ay twoownëjkxëty ma yajnitëkën ja wit tëjk ma näpyaatë y'ityën, mëët tëkokyë mëti'ipë myëët'ajtypyën. Jëtu'un jam nyäpyuj nyäjyä'ätsëtëty Tios wintum;

¹² Ënät tyaj'ookëty tu'uk ja kupixyny ets tukwintsë'ëkëty ja Tios mëët tu'k'a'ukën ja on, yë'ë nätyuknikëpäjtu'utëtëp mëëtkyëjxm ja pyoky ets jëtu'un tkë'ëmo'ojëty ja Tios ja wintsë'kën tä tyuny'ätyën.

¹³ Jam mëpaat tyaj'ooky yë kupixyny ayääkë ma tu'uk yë itën wa'atspë, ma jam y'ooktën yë jëyujkëty mëti'ipë wintsë'kën'ajtëpën, ma ja poky yajtuknikëpäjtu'utyën ets mëti'ipë yajnino'kpën. E ja wintsë'kën mëti'ipë yajyajkpën, ko ënäty tii tëkatsy të yajtuny, yë'ë yë teety jyä'ä'atëp, näjyëtu'un ja wintsë'kën mëti'ipë yajyajkpën, ko ënäty ja poky yajmëëtëty. Jä'ä ko tääpë wintsë'kën wa'ats yë oy.

¹⁴ Ënät ja teety wäänë tpëjkë'ëkëty yë wintsë'kën ja nye'pyny, mëti'ipë ënäty të yajyäkyën, mëët ko tii tëkatsy të yajtuny ets tuktatskuutsëty ja ja'ay mëti'ipë ja näypyuj näjyä'ätsë tyuunpyën, ma a'oy'äämpyë yë tyatskën ets ma ja tyekykyaajën ja a'oy'äämpyë näjyëtu'un.

¹⁵ Ënät wäänë tpëjkë'ëkëty yë on ets tuk'onëty yë y'anajnykyë'ë.

¹⁶ Ja kyë'ë ja a'oypyë mëët tpaxajë'ëkëty ja on mëti'ipë jam myëët'ajtypyën ma ja y'anajnykyë'ëjën ets wëxtujk'ok txijkxjëtitëty jam Tiosën wyintum.

¹⁷ Ja on mëti'ipë ënäty natëjkëpën ma ja kyë'ëjën, yë'ë ja teety pyaxajë'ëkëp ets tuktatskuutsëty ja ja'ay, mëti'ipë ënäty ja näypyuj näjyä'ätsë tyuunpyën. Jam tukuutsëty ma ja a'oypyë ja tyatskpa'ajën, näjyëtu'un ma ja a'oypyë ja kyë'ëkaajën ets ma ja a'oypyë ja tyekykyaajën. Nëkëjxy tkëxkuutsy ma ja ne'pny të t'ëkkëxku'tspën, ja nye'pny ja wintsë'kën ko pën tii tëkatsy tuny.

¹⁸ Ja on mëti'ipë natëjkëpën, jä'ä tyukujaaxëp ma kyëpajkën, mëti'ipë ënäty ja näypyuj näjyä'ätsë tyuunpyën. Jëtu'un ja teety tpaatëty ja pokymyä'kxën Wintsën wintum ma tääpë ja'ay ja nyëë pyokyën.

¹⁹ Täänëm ja teety tyakëty ja nyiwintsë'kën ja nëë poky, jëtu'un'äämpy ënäty ja näypyuj näjyä'ätsë tyajnaxy ma ja ja'ayën mëti'ipë ëxëëkën. Ënät tyaj'ookëty ja jëyujk mëti'ipë wintsë'kën'ataanpën nino'oky.

²⁰ Jam tyakëty ma ja potsyën ma ja wintsë'kën yajyäkyën, tu'ukyë mëët ja aaypyajk ujtspajk, jëtu'un ja teety tpaatëty ja näpyokymyä'kxë mëët tääpë ja'ay ja nyëë pyoky ets ja ja'ay wyë'ëmnëty wa'ats.

²¹ Pën ja ja'ay mëti'ipë pëjkëpën ka'ap nëkooyë ja wit meeny tmëëtëty, oy yë'ë'ajty tyakëty tu'uk yë kupixyny mëti'ipë tyukwintsë'ëkëpën yë Tios, mëët ko ënäty tii tëkatsy të tuny ets tpaatëty ja pokymyä'kxën, näjyëtu'un tyakëty mäjtsk tsim yë tsajpmokway mëti'ipë xëpinyën mëët yë on. Tääts yë'ë tyakëty ets ëpëky tu'k'a'ukën yë on,

²² mäjtsk yë pak ëkë mäjtsk yë muuxy, yë'ë nyija'ap jënu'un naje'eyë myëtä'äky yë myeeny. Tu'uk mëti'ipë wintsë'kën'atëpën ma ja nëë pokyën ets tu'uk mëti'ipë yajnino'okëpën.

²³ Kom tëtujk xëëw tmënëjkxëty tëkokyë ya'atë ma ja teetyën, ma ja näypyuj näjyä'ätsë tpaata'anyën, jam tmo'ojëty ja teety, ma yajnitëkën ja wit tëjk ma ja näpyaatë y'ityën.

²⁴ Ënät ja teety t'ëxajëty ja kupixyny mëti'ipë ja ja'ay yäjkpyën ets ja poky jä'ä tkunaxëty, ma ënäty tii winë oy të tkatunyën ets tu'k'a'ukën ëpëky tyakëty ja on ets ja Tios tmo'ojëty ya'atë ayajk ako'onën.

²⁵ Tääts tyo'kumëty ja kupixyny ets wäänë ja ne'pyny tpëjkëty, yë'ë tyukuutsëp ja ja'ay mëti'ipë ja näypyuj näjyä'ätsë pyätypyën, jam ma a'oy'äämpyë tyatskën, ma a'oy'äämpyë kyë'ëkaajën ets ma a'oy'äämpyë tyekykaajën.

²⁶ Ënät nëjkx wäänë nyätyukë'ëjaaxyë yë on ma y'anajnykyë'ëjën.

²⁷ Ets mëët ja kyë'ëwa'axy ja a'oypyë nëjkx txijkxjëtity ja on jam Tios wintum.

²⁸ Tääts tukuutsëty wäänë ja mëti'ipë ja näypyuj näjyä'ätsë pyätypyën, jam ma tyatskpa'ajën a'oypyë, ma kyë'ëkaajën yë a'oypyë ets ma tyekykyaajën yë a'oypyë, jam ma ënäty ja jëyujk ne'pny të yajpëjktä'äkyën mëti'ipë wintsë'kën'ajtpën mëëtkyëjxm ko ja pokymyä'kxën yaj'amëtoy, ma ja nëë poky ënäty të yajtunyën.

²⁹ E ja on mëti'ipë natëjkëpën yë'ë ja teety tyukujaaxëp ja ja'ay mëti'ipë ënäty ja näypyuj näjyä'ätsë pyätypyën ets jëtu'un tpaatëty ja ja'ay ja pokymyä'kxën ma Tiosën.

³⁰ Tääts ja teety tyakëty tu'uk ja pak ëkë ja muuxy, ëkë tii ënäty pën yakäämpyë mëti'ipë ja näypyuj näjyä'ätsë pyätypyën.

³¹ Tu'uk ja muuxy ëkë ja pak nëjkx yajyäky, mëti'ipë nyiwintsë'kën'atëpën ja nëë poky ets tu'uk mëti'ipë yajnino'okëpën, ëpëky yajyajkpëty ja aaypyajk ujtspajk tä yë ayajk ako'onën. Jëtu'un ja teety tpaatëty ja pokymyä'kxën ma Tiosën, mëti'ipë jyä'ä'ajtypyën ja ja'ay mëti'ipë ja näypyuj näjyä'ätsë pyätypyën.

³² Yaa jëtu'un yajnimëtyä'äky yë ja'ayëty, mëti'ipë yë pu'uts pa'am pëjkëtëpën ets mëti'ipë ka'ap ja wit meeny mëj këjää tmëët'atën. Wi'ix mëpaat tyäkyën ja wintsë'kën, ko ënäty ja näypyuj näjyä'ätsë tuny ets wa'ats wyë'ëmnë.

Ja nyimëtyä'äky, ko ja jëën tëjk pyaatëtëty yë pu'uts pa'am ets wi'ix mëpaat wyä'ätsyën

³³ Ënät ja Tios ojts tmëkäjpxy ja Moisés ets ja Aarón ets t'ënëmaay:

³⁴ Ko ënäty miitsëty jam myajpatnëtë Canaán, ma ja it naaxwiinyëtën mëti'ipë nmooytyëpën etsës ajotkumonë nkäxëty yë pa'am mëti'ipë xyëëwajtypyën pu'uts pa'am, ma mjëën mtëjkëtyën oymyëti'ipë naax myëti'ipë kajpnëty.

³⁵ Ënät ja kutëjk nëjkx t'ixy ja teety ets t'ënëëmëty: Jëtu'unës n'ixy tam yowë yë pa'am kyëxë'ëky mëti'ipë xyëëwajtypyën pu'uts pa'am maas yë ntëjkën.

³⁶ Ënät ja teety tni'ënä'ämëty, ma ënäty ka'ap tyëkënëm jap tëkoty ets tyajtukwa'atstëty, këtiipë ëxëëk wyë'ëmëty, tiijaty jap yajpatpën. Ko ënäty të tyukwatsta'ay, täänëm ja teety tyëkëty ets t'ixëty pën jä'ä ja pu'uts pa'am.

³⁷ E ko ja teety t'ixëty ja potsy, jam ma ja pa'am yaj'ixyën, natsuxk y'akëxë'ëkë ets natsapts ets këk yaj'ixy.

³⁸ Ënät jap tëkoty pyëtsëmëty ets tni'ënä'ämëty wä'än ja tëjk tyaj'ëtuktë, wëxtujk xëëw y'itëty.

³⁹ Kom wëxtujk xëëw jatëkok ja teety t'ixëty, ko t'ixëty tëë ja pa'am kyëjääjë ma ja potsyën.

⁴⁰ Ënät tni'ënä'ämëty ets ja tsaa nëtajtëty ets nëjkx jëkäm t'ixko'owtë, jam muum kajpnpë'am, ma ka'ap wya'atsëtyën.

⁴¹ Ënät näjyëtu'un tni'ënä'ämëty ets yajxon twinjäjptuta'atëty ja potsy tëkotytsyowpë, ma jëtu'unpë ja ëxëëkpë yajpaatyën ets ja naaxway mëti'ipë jam të yajnëtajyën ma potsyën jëkäm nëjkx yaj'ixko'oy, jam muum kajpnpë'am, ma ka'ap wya'atsëtyën.

⁴² Ënät ja tsaa nëjkx jemypyë yajpëjktä'äky mëti'ipë wa'atsën, ma ënäty jam të jyënäkyën, ja mëti'ipë ka'ap wya'atsëtyën. Ets nëjkx jemypyë ja naax yajpëjktä'äky ma ënäty jam të yajnëtajyën ja ëxëëkpë.

⁴³ E ko ja pa'am jam jatëkok kyëxë'ëkëty ma ja tëjkpotsyën, oy ënäty tëë ja tsaa jyayajnëtajta'ay ets naax näjyëtu'un ma jam ja ëxëëkpë të y'ityën ets tëë jyayaj'apojtsëtyä'äy mëët yë wiinkpë tsaa ets mo'onts.

⁴⁴ Tä nëjkx ja teety jap tyëkë tëkoty ets t'ixëty pën tii jä'ä, ko t'ixëty, ko ja ëxëëkpë tëë kyëjääjë tääts tnikajpxëty, ko jä'ä ënäty ja pu'uts pa'am mëti'ipë mëk pa'amën ets ëxëëkën, paaty ja tëjk ëxëëk yajpaaty.

⁴⁵ Tääpë tëjk timyajjitëp ets nëjkxëp tëkokyë yaj'ixpëjkta'ay yaj'ixtuunta'ay jam kajpnpë'am, ëpëky ma ka'ap wya'atsëtyën.

⁴⁶ Ets jëtu'un jap tëkoty ma ënäty ja teety të tnikäjpxyën ets ëtuky y'itëty. Ëxëëk ja ja'ay wyë'ëmëty tu'kxëëw ets jëtu'un tyimkutsu'ujëty.

⁴⁷ Pën jap kääpy ëkë maap ma ja tëjkën, kopkpëky ko ja wyit twinpujëty ets näjyëtu'un yë'ë kë'ëm nëjkx nyäpyujy nyäjye'etsyë.

⁴⁸ E ko ja teety jap tyëkëty tëkoty ets t'ixa'any pën wi'ix ja pa'am jap yajpaaty ets t'ixëty ko ja ëxëëkpë ka'ap nëkooyë të kyëjääjë, ma ënäty ja tsaa ja wiinkpë të yajpëjktä'äkyën, mëët näjyëtu'un ja wa'ats ja mo'onts. Ënät nëjkx tnikäjpxy, ko tääpë ja tëjk wa'ats jä'ä. Jä'ä ko ja pa'am tëë ja kyutëkoy.

⁴⁹ Ko ja tëjk wya'atsa'anëty, mäjtsk nëjkx yë muuxy t'ixta'atë ets ajë kepy yë tsaptswit ets tu'k'apity yë hisopo ujts.

⁵⁰ Ënät tyaj'ookëty tu'uk ja muuxy tu'tsnëkëjxy, mëti'ipë myëët'ajtypyën yë nëë.

⁵¹ Tääts tkajpë'ëkëty ja ajë kepy, ja hisopo ujts, ja tsaptswit ets ja muuxy mëti'ipë juukyën. Ënät ne'pnykyutijta'ajëty ets näjyëtu'un mëët ja nëë ets txijkxëty jap tëkoty wëxtujk'ok.

⁵² Jëtu'un ënäty ja tëjk ja näypyuj näjyä'ätsë tpaaty, mëët ja nye'pny ja muuxy mëti'ipë ënäty të y'ookyën, ja nëë mëët ja muuxy mëti'ipë juukyën, mëët ja ajë kepy, mëët ja tsaptswit ets mëët ja hisopo ujts apity.

⁵³ Tääts ok t'ëxmatsëty ja muuxy mëti'ipë juukyën jam kajpnpë'am. Jëtu'un ënäty ja tu'unën kajpxën të yajtuny ma ja tëjk yajpujy yaje'etsyën ets jëtu'un të wyä'ätsy.

⁵⁴ Yaa jëtu'un të yajnimëtyä'äky wi'ix ja pu'ts pa'am ets ja pa'ayë mëpaat yaj'ixyën.

⁵⁵ Ko pyätëty muum witkëjxy, ëkë ko kyëxë'ëkëty muum ma jëën tëjkën,

⁵⁶ ko muum ma nini'kxën kyëxë'ëkëty, ko muum pyu'utsëty ëkë ko muum tiipa'ayë pyëtsëmëty.

⁵⁷ Jëtu'un'äämpy tjëkyäpëty yajnijawëty mëti'ipë ëxëëkën ets mëti'ipë wa'atsën. Yaapaat jëtu'un yajmëtyakta'ay ja pa'am mëti'ipë xyëëwajtypyën pu'uts pa'am.