Levitico 12 - Biblia Mixe de Quetzaltepec

Ma ja to'oxytyëjk tsyi'iyën xyityën ko ënäty ja u'unk maay të tyajminy naaxwiiny

¹ Ënät ja Tios ojts tmëkäjpxy ja Moisés ets t'ënëmaay:

² Jëtu'un xy'ënëëmëty yë Israel ja'ayëty: Ko tu'uk yë to'oxytyëjk wyë'ëmëty u'unk mëët ets tyajmëxu'unk'atëty yë y'u'unk myääy, wëxtujk xëëw wyë'ëmëty ëxëëk.

³ Pën ye'etyëjk ënäty të myiny të jyä'ty naaxwiiny, kom tuktujk xëëw nëjkx yajtsuky ja ye'etyëjkajtën.

⁴ E ja tyaak winjëpom nyäpyuj nyäjyä'ätsëtëty ets jëtu'un y'itëty tu'kpo'o ja tëkëëk xëëw ja taxkxëëwën. Nitii mëpaat tkatony mëti'ipë wa'atsën ets ka'ap mëpaat tyëkë ma ja tsajptëjkën, koonëm ënäty të tuunta'ay mëti'ipë jëtu'un mëpaat tunyën.

⁵ E pën yë'ëts tu'uk ja to'oxytyëjk të tyajminy naaxwiiny. Jä'ä nëjkx ja u'unktaak y'ëxëëk'ity mäjtsk sëmaan ets nyäyajwa'atsëtëty tëkë'px tëtujk xëëw.

⁶ Ko ënäty të kyä'pxy ja xëëw po'o mapaat nyäyajwa'atsëtëtyën, pën yë'ë të tyajmëxu'unk'aty yë ye'etyëjk, ëkë pën to'oxytyëjk, yë'ë myënëjkxëp jam ma wit tëjkën tu'uk yë kupixyny tëëpë jyëmëjtën ets tmo'ojëty yë Tios no'oky xämy ets tu'uk yë pak ets tu'uk yë muuxy mëti'ipë tyukwintsë'ëkëpën ja Tios mëët pyokykyëjxm. Tëkokyë ya'atë yë'ë tyukë'ëtëjkëtya'ajëp yë teety,

⁷ e ja teety yë'ë myo'ojëp ya'atë wintsë'kën ja Tios, mëëtkyëjxm ja to'oxytyëjk ja pyoky ets yajpokymyä'kxëty. Jëtu'un ënäty wa'ats wyi'imy ya'atë to'oxytyëjk, mëët ja ëxëëkajtën mëti'ipë të tmënaxy të tyajnaxyën. Ya'atë mëtyä'äky yë jëtu'un nyikäjpxyp, wi'ix mëpaat yajtunyën, ko tu'uk yë u'unk maay myëxu'unk'atëty ye'etyëjkpë ëkë to'oxytyëjkpë.

⁸ Pën yë u'unktaak ka'ap nyäy'a'ixëty tjuyëty tu'uk yë kupixyny, jyëkyäpëp je'eyë mäjtsk tyakëty yë muuxy ets mäjtsk yë pak, tu'uk mëti'ipë nyino'okëpën ets tu'uk mëti'ipë yakëpën, tääts ja pokymyä'kxën tpaatëty. E ja teety yë'ë y'amëtowëp ja pokymyä'kxën mëët ja to'oxytyëjk ets ja to'oxytyëjk wyë'ëmëty wa'ats.