Levitico 11 - Biblia Mixe de Quetzaltepec

Mëti'ipë wa'atsëtyën ja jëyujk ets mëti'ipë ka'ap wya'atsëtyën

¹ Ënät yë Tios ojts tmëkäjpxy yë Moisés ets Aarón ets t'ënëmaay:

² Ënëëmëtë yë Israel ja'ayëty, ko tëkokyë yë jëyujk tsajpkaa mëti'ipë tsënaaytyëpën naaxkëjxy jyëkyäpëp xytsyu'utstëty,

³ mëti'ipë yë aay ujts jyë'kxtëpën, apu'uyëtëp ets xeeny yë tyekyxyookyëty.

⁴ E yë'ëts ka'ap xytsyu'utstëty, mëti'ipë ja aay ujts tjajë'kxtëpë ets tyekyxyooky jyaxeeny'atën. Tä yë jëyujk jëku'uxën, ujts jyajë'kxyp, ja apu'uyëp ets ka'ap tmëëtëty axeeny yë tyekyxyooky. Yë tääpë jëyujk ëxëëk yë mëpaat xytyijtë.

⁵ Yë tsik, ujts jyajë'kxyp ets ja apu'uyëp ets ka'ap yë tyekyxyooky xyeenyëty, ëxëëk näjyëtu'un tääpë jëyujk nyäxy.

⁶ Ja kam tsuk, ja ujts'ojkp ijty ets ja apu'uyëp, je'eyëp ko ka'ap yë tyekyxyooky xyeenyëty, näjyëtu'un xytyijtëty ëxëëkjëyujk.

⁷ Yë ëtsëm jyamëët yë tyekyxyooky axeeny, je'eyëp ko ka'ap y'apu'uyë, ëxëëkjëyujk yë näjyëtu'un xytyijtëty.

⁸ Ya'atë jëyujkëty ka'ap mëpaat yë nyitsu'uty xytsyu'tsëtë, nijä'ä xykyatontëty ma ënäty të y'ookyën. Ëxëëkjëyujk jëtu'un xytyimtijtëty.

⁹ E ja nëë jëyujkëty yi'iyë mëpaat xytsyu'utstë mëti'ipë jam yë nyimeenyën ets mëti'ipë jam yë y'äjkën.

¹⁰ E mëti'ipë ka'ap yë y'äjky tmëëtëtyën ets mëti'ipë ka'ap yë nyimeenyën, ëxëëk yë xytyijtëty, oy ënäty nëëjoty jyatsëënääpyë, wä'än yë'ëjëty yë mëjpë mutskpë.

¹¹ Këtii mëpaat xytsyu'utstë, ëxëëk xytyijtëty ets oy jyääjëty ma ënäty të y'o'knën ninu'un mëpaat xykyatontë.

¹² Tëkokyë yë nëë jëyujk mëti'ipë ka'ap yë nyimeenyën ets ka'ap yë y'äjkën, ëxëëkjëyujk xytyijtëty.

¹³ Ma joonëtyën yë'ë mëpaat ka'ap xytsyu'utstë ets ëxëëk xytyijtëty, tä yë witsnën, tä yë pajkjëpipën ets tä yë kuwajwitsnën,

¹⁴ yë lut ets me'ty,

¹⁵ näjyëtu'un yë jooky, yë yu'uk,

¹⁶ yë yutyk, yë ju'k, yë nëë'awojny, yë majkwejkxy,

¹⁷ näjyëtu'un yë wääk'oo, nëë'apatë, yë wojny,

¹⁸ mëjwojny, yë pajk jëpip, yë mëjwojny,

¹⁹ yë poop wojny, yë yëkwojny, yë nëëkëtsey ets tëëxy.

²⁰ Näyjyëtu'un mutskjatyëtypë jëyujk, mëti'ipë kääkëtijtëpën ets mëti'ipë ye'eytyëpën, ëxëëk mëpaat xytyijtë.

²¹ E mëti'ipë kääkëtijtëpën ëkë ye'eytyëpën ets muky yë tyeky tmëët'atë, näjyëtu'un yë kyë'ëjëty ets jëtu'unyë pyujtë'ëktë, jyëkyäpëp xytsyu'utstëty.

²² E ya'atës mëpaat xytsyu'utstë: oymyëti'ipë mu'ujëty, pujtpëty, tsuxk pujtpëty.

²³ E mëti'ipë yaa ka'ap yajnikäjpxyën, oy kyääkjëtitë ets jyaye'eytyë, ëxëëkjëyujk xytyijtëty.

²⁴ E miitsëty ëxëëk nëjkx mwë'ëmtë: Ko pën tonëty yë jëyujk'ooky, ets jëtu'un tyimkutsu'ujëty.

²⁵ Pën tääpë jëyujk'ooky tyoompy, ëxëëk wyë'ëmëty, kopkpëky ko yë wyit tpujëty yajxon ets ëxëëk wyë'ëmëty jëtu'un kootspaat.

²⁶ Tëkokyë yë jëyujk mëti'ipë myëët'ajtypyën yë tyekyxyooky ka'apë xyeenyëtyën, oy ënäty y'ujtsëty tja'oky ets ja apu'uyëp, ëxëëkjëyujk xyajnaxtëty, pën jëtu'unpë ja jëyujk tyoompy ëxëëk wyë'ëmëty.

²⁷ Oymyëti'ipë jëyujkëty mëti'ipë taxk yë tyekyën, ko tyänë, yë'ë tyuktënääpy yë tyeky, jä'ä xytyijtëty ko ëxëëkjëyujk yë'ë. Pën jëtu'unpë ja jëjuyjk'ooky tyoompy ëxëëk wyë'ëmëty tu'kxëëwpaaty.

²⁸ Näyjyëtu'un pën muum yajpëtë'kpyën jëtu'unpë jëyujk'ooky, kopkpëky ko yë wyit tpujëty ets jëtu'un wyë'ëmëty ëxëëk koonëm kyootsëty, jä'ä ko miitsëty ëxëëk mëpaat tääpë jëyujk xytyijtë.

²⁹ Ja jëyujk mëti'ipë naaxwin'a'tstëpën, yë'ë mëpaat xytyijtë ëxëëk, tyaapë yajnikäjpxyën: tä yë nootyën, tsukën ets tëkokyë mëti'ipë naaxwin'a'tspën.

³⁰ Tä mëti'ipë yajtijpën kujoy, nëtoky, mëjnëë jëyujk, të'ënytyik ets tsuxk kujoy.

³¹ Ma ja jëyujkëtyën, tyaapë ëxëëk xytyijtëty. Pën tyoompy jëtu'unpë jëyujk'ooky, kopkpëky ko ëxëëk wyë'ëmëty tu'kxëëwpaaty.

³² Ja it naaxwiinyëtë ma ënäty jëtu'unpë ja jëyujk'ooky yajpaatyën, ëxëëk wyë'ëmëty: wä'än kyepykyijxyëty, wyitkëjxyëty, pyo'okëjxyëty, xya'këjxëty, ëkë oy tyuunpäjnkëjxmëty, jap mëpaat yaj'apëkë nëëjoty ets jëtu'un ëxëëk wyë'ëmëty koonëm kyootsëty, ko jëtu'un y'itëty, tääts jatëkok wa'ats wyë'ëmëty.

³³ Pën ya'atë jëtu'unpë jëyujk'ooky ka'ap muum naaxtu'tskëjxy, tëkokyë jënu'un ënäty jap winë y'ityën tu'tsjoty, ëxëëk wyë'ëmta'ajëty ets kopkpëky ko yajpu'uta'akëty.

³⁴ Oymyëti'ipë jë'kxyëty, pën këxka'ap tu'ktsuny yë nëë ma yë'ëjën mëti'ipë ënäty jap tu'tsjoty të y'ityën, ëxëëk nëjkx wyi'imy ja jë'kxy ets ja nyinëë.

³⁵ Oy tyimtiijëty, ma ënäty tyaapë jëtu'unpë jëyujk'ooky kyä'äyën ëxëëk yajtijëty. Pën jam kyä'äy ma tsijtkën ëkë ma tsijtk u'unkën, nëjkxëp xyajma'ta'atë, jä'ä ko ëxëëk yë'ënë ets jëtu'un mëpaat xyajnaxtë.

³⁶ E jam ma ja nëë jam myuutyën, ëkë ma nëëjutën, je'eyëm yë wa'ats y'ita'any. Yë'ë tëy pën tyimtoonpyën tääpë jëyujk'ooky, ëxëëk nëjkx wyi'imy.

³⁷ Pën këxka'ap tääpë jëtu'unpë jëyujk'ooky, ma tëëmptën mëti'ipë yajni'ipaanpën, ja tëëmt je'eyëm wa'ats y'ita'any.

³⁸ Jää tëy ëxëëk wyë'ëmëty, pën ja tëëmt tëë xyooky ets pën jam ja jëyujk tsajpkaa të kyëx'ooky.

³⁹ Ko tu'uk yë mjëyujkëty y'ooktëty, mëti'ipë ënäty miitsëty mtsu'utsantëpën ets pën tonëty ja jëyujk'ooky, ëxëëk nëjkx wyi'imy ets tyimkootsëty jëtu'un.

⁴⁰ Pën ja nyitsu'uty tsyu'tsëp ja jëyujk, mëti'ipë kë'ëm të y'ookyën, nëjkxëp tpujy ja wyit ets wyë'ëmëty ëxëëk tyimkootsëty jëtu'un. E pën näjyëtu'un jyu'tpëtsëëmpyën jutjoty ja jëyujk'ooky, ëxëëk näjyëtu'un nëjkx wyi'imy ets nëjkxëp tpujy ja wyit.

⁴¹ Nimëti'ipë tsa'any mëpaat xykyatsu'utstë, mëti'ipë jëtu'unyë naaxwin'a'tspën, jä'ä ko yë'ë ëxëëkjëyujk yë'ë.

⁴² Oy tyimmëti'ipë jëyujkëty mëti'ipë jëtu'unyë naaxwin'a'tspën ka'ap mëpaat xytsyu'utstë, tä mëti'ipë yë myox tyukye'epyën, tääpë jëtu'unpë ëxëëkjëyujk yë'ëjëty.

⁴³ Këtii mëpaat miitsëty kë'ëm mnäyaj'ëxëëkëtë mëët yë ëxëëkjëyujk mëti'ipë naaxwin'a'tstëpën.

⁴⁴ Ëjts jëtu'un mWintsën Tiosëty, miitsëty wa'ats mëpaat mnäyaj'itëtë, jä'ä ko ëjts wa'atsës n'ity. Këtii mnätyukyaj'ëxëëkëtëty nimëti'ipë jëyujk mëti'ipë naaxwin'a'tspën.

⁴⁵ Ëjts jëtu'un Wintsën, mëti'ipë ojts myajpëtsëmëtën jap Egiptë etsës xyTios'atëty. E paaty jëtu'un mëpaat wa'ats mnäyaj'itëtë, jä'ä ko ëjts wa'atsës yë'ë.

⁴⁶ Yaa jëtu'un të yajnikäjpxy mëti'ipë ja jëyujkëty ëxëëkëtyën ets wa'atsëtyën, tä yë joonën ets mëti'ipë nëëjoty juukyajtëpën ets tëkokyë mëti'ipë jëtu'unyë naaxwin'a'tstëpën.

⁴⁷ Ets jëtu'un yajnijawëty mëti'ipë wa'atsën ets mëti'ipë ka'ap wya'atsëtyën, mëti'ipë jëyujk jyëkyejpy yajtsu'utsëtyën ets mëti'ipë ka'ap tjëkyepyën yajtsu'utstsëtyën.