Levitico 10 - Biblia Mixe de Quetzaltepec

Ja poky mëti'ipë tyuuntën Nadab ets Abihú

¹ Ënät yë Nadab ets Abihú, Aarón yë myaank ojts tjëjpkonëtë yë jyëëntsijtkëty ets tjëënmooytyë yë poom jam ma wintsë'këntyaknën mëti'ipë ka'ap yë Tios të tni'ënä'ämën. Ajotkumonë ojts jëtu'un wyinma'anypyaatë.

² Ënät ojts tsyoony ma Tiosën tu'uk yë mëj jëën ets jä'ä yaj'o'këtë. Jëtu'un ojts y'ooktë nimäjtskëty jam ma Tiosën.

³ Ënät ja Moisés t'ënëmaay ja Aarón: Ya'atë jëtu'un yë Tios të tjatijy ko të y'ënä'äny: Pën nëkoo kë'ëmwinma'any xymyëwinkoonpës ntuk'ixëpës yë nwa'atsajtën, ets jëtu'un yë Israel ja'ayëty t'ixtëty, ëjts yë nmëj'ajt n'oyajtën. Yë Aarón amonyë ojts tyimwë'ëmy.

⁴ Tä ja Moisés ojts tmëkäjpxy yë Misael ets Elsafan, yë myaank yë Uziel nimäjtskëty, yë jyämy yë Aarón ets t'ënëmaay: Mintë miitsëty ets xyjyuutëty yam yë mëku'ukëty, mënëjkxtë jam kajpnpë'am.

⁵ Ënät ojts myintë ets twinpijtë ja o'kpë mëët yë wyitëty, jam ojts tmënëjkxtë kajpnpë'am, jëtu'un tä ënäty ja Moisés të y'ënë'ëmxëtën.

Mëti'ipë ja teetytyëjkëty mëpaat tuntën

⁶ Ënät ja Moisés t'ënëmaay ja Aarón ets ja myaankëty nimäjtskpë, mëti'ipë xyëëwajtëpën Eleazar ets Itamar: Këtii yë mwaayëty xynyajtsmatsëtëty ets ni mkanänyikëëts mkanäy'ixkëëtsëtëty ko pën y'ookëty tyëkoyëty, këtiipë yë'ë mtukjoot'anpëkëtëty ets m'ëk o'knëtëty. Mëti'ipë tëy mëpaat yë naax kajpn mëk tjawëtë yë'ë ko yë Tios të jyoot'anpëky ets të tyajkëtä'äky ya'atë jëën.

⁷ Këtii jam mjëwa'aktëty ma tëjkëtyaknën ma wit tëjkën ma näpyaatë y'ityën, këtiipë m'ooktëty, jä'ä ko miitsëty kënu'kxy yë m'ijnëtë mëët ja on mëti'ipë winë yajtukkënu'kxpën. E jëtu'un ojts tjantytyuntë, tä ënäty ja Moisés të tni'ënä'ämën.

⁸ Ojts yë Tios näjyëtu'un tmëkäjpxy yë Aarón ets t'ënëmaay:

⁹ Ko mtëkëja'anëty jap tsajptëkoty ma ja wit tëjkën ma näpyaatë y'ityën, ëkë ko ja m'u'unk m'ëna'k jap tyëkëja'antëty; ka'ap mëpaat xy'uuktë oy tii nëë mëti'ipë mukpën, këtiipë m'ooktëty, tyaapë jëtu'unpë ënä'ämën kë'ëyxyëëw kë'ëyjyëmëjt y'itëty, tä tu'uk yë ënä'ämën tëyajtënën mëti'ipë itëpën u'unk ok.

¹⁰ Jëtu'un wyinkëxë'ëkëty ko miitsëty mkënu'kxy'atë, mëët ja mëti'ipë ka'ap kyënu'kxëtyën ets ko mwa'ats'atë mëët ja mëti'ipë ka'ap wya'atsëtyën.

¹¹ Ets tjëkyäpëty wi'ix tnimëtya'aktëty yë ënä'ämën tëyajtën ma Israel ja'ayëtyën, mëti'ipë të yajmo'otën mëët yë Moisés.

¹² Ënät yë Moisés t'ënëmaay yë Aarón mëët ja myaank nimäjtsk mëti'ipë xyëëwajtëpën Eleazar ets Itamar: Mijts jë'kxtë yë aaypyajk ujtspajk, mëti'ipë të nyatëkën ma ayajk ako'onën yë Israel ja'ayëty tmo'otën yë Wintsën, mëti'ipë ka'ap tsyooymyëëtëtyën jam xyjyë'kxtëty ma wintsë'këntyaknën jä'ä ko wa'ats yë'ë yajpatnë.

¹³ Jam xyjyë'kxtëty ma tu'uk yë it naaxwiinyëtën wa'atspë. Tyaapë ayajk ako'onën mëti'ipë yë Tios yajtukwinno'kpën, mijts yë mpatëp mëët yë m'u'unk m'ëna'k. Yë'ëjës yë Tios të xytyuk'ëne'emy xytyuntëty.

¹⁴ E yë katsy ets puuy mëti'ipë jëtu'unyë nayajyajkpën, jam mëpaat xytsyu'utstë ëwaatsëtuuy ma wya'atsëtyën, mëët ja m'u'unk m'ëna'këty, m'u'unk mto'oxytyëjk; jä'ä ko miits yë mpatëtëp ma ja Israel ja'ayëty tyaktën ja ayajk ako'onën, ko ja nay'ëëw'oy näykyajpx'oyë tuntë.

¹⁵ Ja kyejky mëti'ipë ëpëky yajyajkpën, ja kyäty mëti'ipë ja Tios yajmoopyën, jam yajmënëjkxëty ma ja Tiosën ets yajtukwintsë'ëkëty ets yajtukwintsë'ëkëty tu'ukyë mëët ja nyi'on mëti'ipën yajtukwintsë'ëkëjaanpën, tyaapë yajnikäjpxyën yë'ë mjä'ä'atëp ets näjyëtu'un ja m'u'unk m'ëna'këty.

¹⁶ Ënät ja Moisés ojts tyajtëy pën maa ënäty yajpaaty ja tsajppax, mëti'ipë yakantëpën mëëtkyëjxm ja poky ets ojts yaj'ëtsoy ko tëë nanino'knëtë, ënät ojts tukjoot'anpëky ja Eleazar ets ja Itamar, ja nimäjtskpë të jyaakwë'ëmtën ja Aarón ja myaank ets t'ënëmaay:

¹⁷ ¿Wi'ix ko jam të xykyatsu'utstë ya'atë wintsë'kën mëti'ipë nëë poky yajtuknikëpäjtutpën, ma tu'uk yë naawiinyën wa'atspë? Ya'atë wa'ats yë'ë ets Tios tëë miits mo'ojëtë ets xymyënëjkxtëty yë nyëë pyokyëty yë naax kajpn jam Tios wintum ets ja pokymyä'kxën tpaatëty.

¹⁸ E jä'ä ko ka'ap ja ne'pny të yajmënëjkxy jap tsajptëkoty, tëëyëp miitsëty xytsyu'utstë ja tsu'utsy jap ma ja tsajptëjkën. Tääpë jëyujk jap jeexyë të xytsyu'utstë ma jap wya'atsëtyën, jëtu'un tä të ntuk'ënä'ämtën.

¹⁹ Tä ja Aarón ojts y'ëtsoyë: Ëk'ix yë'ëjëty tëë yë wyintsë'kën tyaktë mëti'ipë poky kyunajxypyën ets tëë näjyëtu'un ja jëyujk tyajnitoytyë Wintsën wintum, ëjts tëëjës näjyëtu'un njaty nkëpety tä yë'ëjëty tyam të jyatën. Kooxyëp jeexyë y'ëjtsëty yë tsu'utsy të n'ëktsu'utsy mëti'ipë të wyintsë'kën'atyën ma ja poky yajtukkunaxyën ¿wä'änxyëp jeexyë yë Tios oy të tjawë?

²⁰ Ko yë Moisés jëtu'un tmëtooy, ënät ojts jatëkok jyotkujkë.