Jueces 6 - Biblia Mixe de Quetzaltepec

Tios tmëkäjpxy yë Gedeón

¹ E ja Israel ja'ayëty ëxëëk ja jyot wyinma'any ojts tyajkëxë'ëktë Tios wintum, paatykyëjxm ojts kyë'ëyakëtë ma ja Madián ja'ayëtyën wëxtujk jëmëjt ets ëxëëk tyuunëtë.

² E jä'ä ko yë Madián ja'ayëty ëxëëk ënäty tuntë yë Israel ja'ayëty, paaty yë Israel ja'ayëty ojts yë naaxwiinyëtë t'ixta'atë ma twinkuyu'utstëtyën yë Madián ja'ayëty, ojts tajtë yë jut jam kopkëjxm ets aank ma ka'ap pën pyaatëtëtyën.

³ Xëmë winjëmëjt ko ënäty yë Israel ja'ayëty muum yë pyëjktä'äky tyaj'itë ënätyë ijty myintë yë Madián ja'ayëty ets Amalec ja'ayëty jëtu'un ja pëjktä'äky yë'ë tyajnëkxta'atë.

⁴ Jam ijty nyäpyëjkta'akëtë ma ja Israel ja'ayëty ja nyaax kyajpnëtyën ets tyajkutëkooytya'atë ja pëjktä'äky mëti'ipë jam yajpatpën Gaza; nitii tkayajwë'ëmtë mëti'ipë ja Israel ja'ayëty jyë'kxtëpën; wa'ats tmënëjkxta'atë, wä'än yë'ëjëty ja pëjktä'äky ets jëyujk tsajpkaa, tsajppax, kupixynyëty.

⁵ E komë nimay ijty yajxon myintë ets ko ja wyittëjk tpëjktakta'atë yajxon tyajwintujkta'atë ja it naaxwiinyëtë ets mëët ja jyëyujk tsyajpkaajëty, näjyëtu'un ets ja may jëyujk jëku'ux.

⁶ Mëëtkyëjxm ko ënäty yë Madián ja'ayëty ëxëëk y'ëtë'ëtstë ma ja Israel ja'ayëtyën, yë Israel ja'ayëty mëk ojts y'ëyowtë ets tyajnajxtë yë amay jotmay, koonëm ojts tmëkajpxtë ja Wintsën ets pyutëkëtëty.

⁷ Ko ja Israel ja'ayëty t'amëtoowtë ja Wintsën ets yajtso'okëtëty ma ja Madián ja'ayëtyën,

⁸ ojts tyuknikäxëtë tu'uk yë tyuunpë mëti'ipë winë y'akäjpxypën ets y'ënëmaayëtë: Ëjts miits tu njuutë jap Egiptë ma ënäty jap je'eyë mëtun m'ëyowtën

⁹ Ka'ap jyäpyëty nyajtsoktë Egiptë, näjyëtu'un ojts nyajtso'oktë ma ja naax kajpnën mëti'ipë ënäty o'ktëy mtunanëtëpën ets n'ëxwojptaayës ja ja'ayëty ja jampë yajpaatën ets ja nyaax kyajpn ojts miits nmo'otë mëti'ipë yë nyikäktën.

¹⁰ Ets n'ënëmaaytyë koos ëjts jëtu'un Wintsën, mëti'ipë miits mTiosajtëpën ets ko këtii ninu'un xytyimtsë'ëkëtëty ja Amor ja'ayëty ja tyiosëty, mëti'ipë tsënaaytyëpën ma ja it naaxwiinyëtën ma miits tyam mtsëënëtën: E miitsëty ka'ap ojts ninu'un xytyimtuntë këwentë ijxtëm nja'ënëmaaytyën.

¹¹ Paaty yë Wintsën yaa ja kyukäjpxy myiiny ets nyaaxwe'tsy jam xojpa'tkë'ëm ma txëëwatyën Ofrá ma ja Joás ja nyaaxjotën, yë Abiézer yë jyä'äy. Yë Gedeón yë myaank, yë Joás yë'ë ënäty jam yë tsajpmok yajpajk'ajtyp ayu'utsy, ma ja ja'ay ja tsatym ijty twintääntën ets tyajkojtë ja tsatym nyëë, jä'äkyëjxm ënäty jam ayu'utsy yajpaaty këtiipë ja Madián ja'ay y'ixëtëty.

¹² Ënät ja Wintsën ja kyukäjpxy nyipëtsëëmë jam ets y'ënëmaayë: Yë Wintsën yë'ë tyam yajpatp ma mijtsën, jotmëkja'ay.

¹³ Ets ja Gedeón y'ëtsooy: Ëknamä'kx Wintsën, pën mijts myajpatp mëët ëëtsëty ¿wi'ix koos o'ktëy njatë nkëpätë? ¿Maajëtën ja mëj'ajtën të nyëjkxta'ay mëti'ipës ja n'ap n'ok nyikajpxtën ko mijts ojts jap winë xytyuny Egiptë? Yë Wintsën tëëjës xy'ëxmajtsnëtë ets tëëjës xykyë'ëyajknëtë ma Madián ja'ayëtyën.

¹⁴ Ënät ja Tios ja kyukäjpxy je'eyë wyintë'kxë ets y'ënëmaayë: Yajtun ja mjot mëjaaw mëti'ipë mëët'ajtypyën ets nëjkx yajtso'ok Israel ja'ayëty ma Madián ja'ayëtyën. Ëjts jëtu'un yam mijts nkejxyp.

¹⁵ Ënät ja Gedeón y'ëtsowkojnëpë: Wintsën mëpaat xy'ëknamä'kxëty, oy yam winë nyajtëwa'any. ¿Wi'ixës n'ëknijawëty ko ëjts nyajtso'okäämpy yë Israel ja'ayëty? Ma yë Manasés yë jyä'äyën, ëjts ni'ik yajpatp ëyoopëja'ay ets niwäänë ëëts ntu'kjëën'at ntu'ktëjk'atë ets maas yë njëën ntëjkën ëjts ni'ik timmutsk.

¹⁶ Ënät yë Wintsën y'ënëmaayë: Mijts mjëkyäpëp xytyunëty jä'ä ko ëjts yajpaataanp ma mijtsën. Mijts ka'ap nëjkx xyajmëtä'äky yë Madián ja'ayëty jä'ä ko jëtu'un yë'ëjëty tä jeexyë tu'ukyë ja'ay je'eyë mëët mtsiptunyën.

¹⁷ Ënät ja Gedeón y'ëtsooy: Pën xy'oyjya'apës, tuk'ijxkës wi'ixës mëpaat nijawën pën mëët nmëtyä'äkyës.

¹⁸ Tun yë mëyajtën yaa ëwxit nëjkxës n'ukyajtsoony tu'uk yë ayajk ako'onën mëti'ipë yam mijts nmo'ojäämpyën. Tääts ja Wintsën ja kyukäjpxy y'ëtsoowë: Oy tyaas n'ëwxity.

¹⁹ Ënät ja Gedeón ojts nyijkxy pëyi'ikyë ma tyëjkën ets ja tojkx tyaj'o'oyëy, yaj'o'k tu'uk yë tsajppax ets ja tsajpkääky tyaj'o'oyëy mëët i'px tsim yë tsajpmokway ka'apë tsyooymyëëtëty, ko tyaj'o'oyëtyääy jap ja tsu'utsy t'apëjkëy katyjoty, ja tojkxnëë jap t'apëjkëy tu'tsjoty ets ojts jam tmënëjkxy kopkëjxm.

²⁰ Tä ja Tios ja kyukäjpxy y'ënëmaayë ko jam tsaakëjxm tkupëkëty ja tsu'utsy ets ja tsajpkääky ka'apë tsyooymyëëtëtyën ets tuknatääm'ëwtitëty ja tojkxnëë. Ko ja Gedeón jëtu'un tuuntaay mëti'ipë ënäty të yajtuk'ëne'emyën.

²¹ Ënät ja Wintsën ja kyukäjpxy ojts ja tyajk tukpaaty ja tsu'utsy ets ja tsajpkääky ets mëj jëën jap pyëtsiimy tsaajoty. Wa'ats tyooytyääy ja tsu'utsy ets ja tsajpkääky; ko tyooynyajxtaay, ja Wintsën ja kyukäjpxy jëtu'unyë ojts t'ijxtëkoy.

²² Tää ja Gedeón tnija'awëy ets t'ijxy ko jä'ätëm ja Wintsën të myëkäjpxyë, ënät y'ënäny: Wintsën, Wintsën. Tëës yam kë'ëm wiinxë jëjpxë ntimy'ixy ja Wintsën ja kyukäjpxy.

²³ Ënät ja Wintsën ja kyukäjpxy y'ënëmaayë: Këtii mtsë'ëkë, mijts ka'ap m'ooka'any, jotkujk yajpaat.

²⁴ Tä yë Gedeón tu'uk yë wintsë'këntyakn jam t'oytyuuny mëti'ipë ja Wintsën tyukmëjja'awëyënën ets txëëwmooy: Yë Wintsën yë'ë jotkuj'ajtën'ajtp. Ya'atë wintsë'këntyakn yajpatp tyampaat jam Ofrá ma ja kajpnën mëti'ipë yë Eliézer yë jyä'äy nyitënaaytyëpën.

²⁵ Jä'ä tsu'um ojts yë Wintsën t'ënëëmë yë Gedeón: Amëtow yë mteety tu'uk yë tsajpkaa ets xyaj'ookëty, ja mëmäjtskpë mëti'ipë wëxtujk yë jyëmëjtën ets xyjyijtë'ëkëty yë Baal yë wyintsë'këntyakn mëti'ipë yë mteety myëët'ajtypyën. Pujxë'ëk näjyëtu'un ja jampë ja kepy tyänën winkon ma Baal yë wyintsë'këntyaknën, mëti'ipë tyijtëpën ko kyënu'kxyëty.

²⁶ E ma ënäty jam tääpë Baal yë wyintsë'këntyakn xyjyityën, yë'ë jam mkojëp tu'uk yë mWintsën yë wyintsë'këntyakn. Ënät ja tsajpkaa xyaj'ookëty ja mëmäjtskpë etsës ëjts xytyukwintsë'ëkëty nino'oky nixämy. Yë'ë nëjkx xytyukjëënapëkë ja ja'axy jampë xypyujxpëtsëmyën ma ja kepyën mëti'ipë të xypyujxkëtayën jam Baal wyintuuy mëti'ipë tyijtëpën wa'ats.

²⁷ Ënät ja Gedeón ojts ja tyuunpë tpawoy nimajk ets tpatuuny tä ënäty ja Wintsën të tyuk'ëne'emyën; je'eyëp ko koots ojts winë tuny këtiipë ja tyeety tyaak y'ixëtëty ets ja ja'ayëty ja jampë tsyëënëtën.

²⁸ Komjëpom jopyëp ko ja kunaax kukajpnëty myä'äypyëtë'ktë, ënät tuk'ijxpäjtë ko tëëtëm ja Baal ja wyintsë'këntyakn yajijtë'ëky ets tëë yajpujxë'ëky ja mëj kepy mëti'ipë jam winkon tënääpyën ma ja Baal ja wyintsë'këntyaknën ets ko tëë yajkojy ja jemypyë ja wintsë'këntyakn ma ja tsajpkaa jam të wyintsë'kën'atyën.

²⁹ Xim yam ja ja'ayëty nyäyajtëëwëtë ets nyäy'ëna'anëtë: ¿Pën jëtää jëtu'un të y'ëti'itsy? Ko yajxon t'ixtaaytyääytyë ets nyäyajtëëwëtë xim yam, ënät ojts ok tnijawëtë ko yë'ë Gedeón ënäty të y'ëti'itsy, yë Joás yë myaank. Ënät ojts nyëjkxtë jam ma ja Joás ja tyëjkën ets t'ënëmaaytyë:

³⁰ Yajpëtsëm mmaank wä'änës nyaj'ooktë. Jä'ä ko tëë yë Baal yë wyintsë'këntyakn tjijtë'kë ets näjyëtu'un ja kënu'kxykyepy mëti'ipë pa'atënaayëpën winkon ma wyintsë'këntyaknën.

³¹ E ja Joás ënät t'ëtsooy ja ja'ayëty mëti'ipë të myintën: ¿Miits mkuwa'anantëp yë Baal ets yë'ë mnitsiptunantëpë? Jëyëjp mëpaat y'ooky yë ja'ay mëti'ipë kyuwa'anäämpyën yë Baal naamka'anëm xyiinyë. Pën Baal yë'ë Tios'ajtp, ëxmatstë, wä'än kë'ëm näkyuwa'anyë, jä'ä ko yë'ë ja wyintsë'këntyakn të yajijtë'ëky.

³² Jä'ä xëëw ojts ja Gedeón tyajxëëwpätë Jerubaal, jä'ä ko tyaa y'ënantë: Wä'än kë'ëm yë Baal näkyuwa'anyë. E paatykyëjxm jëtu'un tyajxëëwpäjtë jä'ä ko yë Gedeón yë'ë ënäty ja Baal ja wyintsë'këntyakn të tjijtë'ëky.

³³ Ënät ja Madián ja'ayëty ets ja Amalec ja'ayëty tëkokyë mëti'ipë ënäty jam tsënaaytyëpën awinmtsow tyu'ukmujktaaytyë ets tuknajxtë ja nëë mëti'ipë yajtijpën Jordán ets jam nyäpyëjktakëtë ma txëëwatyën ja joyjyot Jezreel.

³⁴ Tä ja Tios ja myëk'ajtën y'oyajtën tyuktëjkëyë yë Gedeón ets tukxuxmujky yë ja'ay tu'uk yë tsajpkaawaj ets myintëty ja Ebiézer ja jyä'äy.

³⁵ Ojts näjyëtu'un tkäjpxynyikäxë yë Manasés yë jyä'äyëty ets myintëty. Näy kyäjpxynyikäjx yë Aser yë jyä'äy, yë Zabulón yë jyä'äy ets Neftalí yë jyä'äy mëti'ipë poj'am miintën ko ja aaw ayuk pyatëtë ets myujktaaytyë nimay mëët ja Gedeón.

³⁶ E ja Gedeón jëtu'un ja Tios t'ënëmaay: Pën janty tëy koos tëë xywyin'ixy koos nnitsiptunëty yë Israel kajpn etsës nyajtso'okëty tä mijts kë'ëm të xynyikäjpxyën.

³⁷ Yë'ëjës yam npëjkta'akäämpy tu'kye'epy yë kupixyny'ak ma tsajpmokpajk yajwinteenyën. Pën komjopy, tääpë pixyny tëë xyo'kta'ay ets ja naax të'ëts jap pa'tkë'p, ënätnëmës tëy njantynyijawëty ko ëjtsës mijts xyajtunaanp ets ja Israel kajpn tsyo'oktëty, tä mijts kë'ëm të xynyikäjpxyën.

³⁸ E jëtu'un ojts jyänty tyuny jyänty jyätyë tä ënäty të tpëjktsoyën. Ko ja Gedeón komjëpom myä'äypyëti'ky ënät ojts tninëjkxy ja kupixyny'ak ets twinma'tsy, tu'k'a'ukën tyajpëtsëëmy ja maanik nëë.

³⁹ Ënät ja Gedeón ojts y'ënaankojnëpë: Wintsën këtii m'ëk joot'anpëkëty oy yam ya'atë xi'itë n'ëkyajtëy: Tu'kjëjpyës yam je'eyë ja nija'awën njaaktsoky. Tyam yë'ë mtunëp, ja naax jä'ä myajxookëp ets ja kupixyny'ak ka'ap xyajxookëty.

⁴⁰ Jä'ä tsu'um yë Wintsën ojts tjantytyuny tä ënäty yë Gedeón të tpëjktsoyën. Komjëpom ko ja Gedeón ojts tninëjkxy ja kupixyny'ak, ja kupixyny'ak të'ëts ënäty yajpaaty, e ja naax xook mëët ja maanik.