Job 18 - Biblia Mixe de Quetzaltepec

Ma Bildad kyäjpxyën

^1-2 ¿Jëna'a tëy tyaapë ja'ay kyajpxta'ajanë? ¿Ko jeexyë jap wyinma'any jyëkyejpy jeexyë nmëtyakëmë?

³ ¿Wi'ix ko jëyujkën nyajpëjktakëmë ets jëtu'un nyajtijëmë ko ka'ap nja'akyujkëmë?

⁴ ¿Jä'äjëtën mijts xy'antijyë ko xynyëkëëtsëty yë mjot mnini'kxë tääts ënät ja naaxwiinyëtë wyë'ëmta'ajëty aanë'ëk tëëtsë'ëkën ëkë ets ënät ja tsaatun wya'ktëkajtsta'atëtyë?

⁵ Yë ëxëëk ja'ay kupi'itsëjaanp yë'ë ets jyëën ka'ap y'ëkmëjëjanë.

⁶ Yë kyutë'kxn pi'itsaanp yë'ë; ma tyëjkën ka'ap jap y'ëktë'kxan y'ëkjajanë.

⁷ Jëtu'unyë myëjaawkëxa'any ko ënäty muum nyijkxy ets kë'ëm jam nyäyajka'aja'anyë o'këntum ma ënäty ja o'ktakn të tnipëjktaakën yu'utsypë.

⁸ Kë'ëm nyätyu'u'akäämtuka'anyë ets jam kë'ëm nyäyajtu'u'ëtuka'anyë.

⁹ Kë'ëm nyätyekytsyuma'anyë ets pyi'kxa'any yë tejpxy ma tyeky yo'knën.

¹⁰ Yu'utsy jam ja o'ktakn yajpaata'any tu'u'am ko ënäty nyäxy.

¹¹ Oy maatsow jyanëjkxy je'eyëm ëyo'on pyaata'anyë; jëtu'un xëmë nyäjyawëty yaj'ixjëtijtp yajpaajëtijtp yowë.

¹² Jëtu'unyë jyot myëjaaw kyëjxnë mëët ja yuu; tim ëwxijtp ja ëyo'on mëti'ipë tukëta'akanëpën.

¹³ Ja yuu pa'am, mëti'ipë ja o'kën nyëëx'ajtypyën, wäänjaty tyajpuwa'atsy ja xyixy.

¹⁴ Yajjuutaanp jam näjyëtu'un tyëkotm ma jyotkujk'atyën ets yajmënëjkxa'any ma y'ëne'emy yajkutukyën yë tsë'kën ja'awën.

¹⁵ Mëjjëjaanp yë jëën ma tyëjkën; mëti'ipë myëët'ajtypyën yë'ë nëjkx yë azufre yajtuknitemy.

¹⁶ Jëtu'un jyata'any tä tu'uk yë kepyën mëti'ipë tëë yë tyikts tyëtstaaynyën ets tëë yë y'ääy nyëka'ataaynyë ets xyo'tstaaynyë.

¹⁷ Nëjkxëp y'atëkooytyä'äy mëti'ipë jeexyë yajtukja'amyäjtspën naaxwiiny naaxkëjxy ets ka'ap nëjkx ni pën tkajpxpaaty yë xyëëw.

¹⁸ Jam nëjkx yajjëpijpëtsëmy ma xyiiny'ätyën ets nëjkx yajkujëpipë akootstuuy; nëjkxëp yaj'ëxwojpnë naaxwiiny naaxkëjxy.

¹⁹ Ma nëjkx tmëët'atyën yë y'u'unk y'ok ma naax kajpnën; nitu'uk nëjkx pën kyawë'ëmy juuky ma tyëjkën.

²⁰ Ko nëjkx tnijawëtë yë ja'ay ma xëëw pyëtsimyën ets ma kyëtä'äkyën wi'ix të jyätyën, nëjkxëp je'eyë tsyë'ëkëtë.

²¹ Jëtu'un jyëjpkëxy ja jyuukyajtën ja ëxëëk ja'ay, mëti'ipë y'ixtijpyën ja Tios.