Isaías 4 - Biblia Mixe de Quetzaltepec

¹ Jä'ä xëëw nëjkx ja ye'etyëjktëjk y'ëmaaytya'aktë, niwëxtujk ja to'oxytyëjk nëjkx tyajtsipta'aktë tu'ukpë ja ye'etyëjk, ets y'ëna'antëty: Kë'ëm ëëtsëty nnäy'ixëtëty ets kë'ëmës nnäyajjuuky'atëtëty, je'eyëp ko mxëëw xytyuk'ënu'kxtës, këtiipë tsëtyu'unmëët nwë'ëmtëtyës.

² Jä'ä xëëw ma ënäty ja Wintsën jatëkok tyajyoonpëkyën ja juukyajtën yë'ë nëjkx tyaj'oy'ijxëntëkë ets tpaatëty ja mëj'ajt oyajtën ja ja'ayëty mëti'ipë jam Israel jaakjuuky'ajtëpën; ja pëjktä'äky mëti'ipë ënäty ijtp wintëëpën kamwinm tu'uwinm, yë'ë nëjkx akujk jotkujk tjë'kxtë tpëktë.

³ Ja ja'ayëty mëti'ipë ënäty juuky të jyaakwë'ëmtën jam Sión, mëti'ipë ka'ap të y'ooktën ma Jerusalén kajpnën, ets mëti'ipë ënäty jam jaaktsuxk'ajtëpën, jä'ä nëjkx yajtijtë Wintsën të yajtuknipëjktaakë.

⁴ Ko ënäty ja Wintsën tpaye'ey ja nëë poky, tyiytyunäämpy ja tuuntëkoopyë ets tyajjëwa'kta'aja'any mëti'ipë yajja'ay'o'kpën ets tnimä'kxa'any ja Sión ja'ayëty.

⁵ Ma ja Sión kopkën, ets ma ja ja'ay tu'ukmukyë yajpaatën, nëjkxëp ja Wintsën jam ja kyënu'kxën tyajkëtä'äky tä tu'uk yë yoots nëma'ajën, jëënën nëjkx tyajkëtä'äky ko kyoots'atëty. Jam anëkëjxmtsow yë Wintsën yë myëj'ajt y'oyajtën nëjkx yajpaaty,

⁶ mëti'ipë këwent'atëpën ets kuwa'anëpën; oy tyu'ujëty pyojëty ets oy y'anëty.