Hechos 3 - Biblia Mixe de Quetzaltepec

Ma ja Pedro tyajtso'okyën tu'uk ja ja'ay mëti'ipë ka'ap ye'eyën

¹ Tëkok ja Pedro ojts nyijkxy mëët ja Juan ma ja mëjtsajptëjkën, jënäkyxyëëw ënäty, jää ma ja ja'ay ijty nyiye'eypyätën Tios mëkajpxpë.

² Jamts ënäty tu'uk ja ja'ay tekymya'atpë, mëti'ipë ënäty jëtu'un të myëxu'unk'atyën. Xëmë ijty yajwijtsnëjkxy jam tsajptëjk'ëkë'ëm ma ja tëjk'aawën mëti'ipë xyëëwajtypyën Tsujpë. Jamts ja näypyutëkë t'amëtoy ma tu'uktu'uk ja ja'ay tyëkëtën jap mëjtsajptëkoty.

³ Ko ja tekymya'at t'ijxpaty ja Pedro ets ja Juan ko jap nyaxa'antë, tää ja meeny t'amëtooy.

⁴ Ënät ja Pedro ets ja Juan twin'ijxë'ktë ja tekymya'at, ja Pedro jä'ä ënan: Win'të'kxtëkës.

⁵ Tääts ja tekymya'at jyänty ijxë'ky, jam tjëjp'ixy tii yajmo'oja'any.

⁶ Ënät ja Pedro t'ënëmaay: Ka'apës tii meeny nmëëtëty, yë'ë tëy nmo'ojëp mëti'ipës nmëët'ajtypyën: Jesukristë xyëëwkyëjxm, mëti'ipë Nazarenë ja'ayën yam mijts t'ënëëmë ets mye'eyëty.

⁷ Tääts ja Pedro tmajtsy ma ja y'a'oykyë'ëjën ets twijtsë'ky, ënätyë wya'k'o'oyëy ets ja tyeky myëkpëjky.

⁸ Tääts ja tekymya'at pyujtë'ky ets ye'eypyijky; ënät mëët tyëjkëtyë jap mëjtsajp tëkoty ye'epy ets tmëjja'aw tkënu'kxyja'awëy ja Tios jëtu'un pyujtnë y'äjtsnë.

⁹ Ko ja ja'ay jëtu'un t'ijxtë ja tekymya'at ye'eynyë ets ko ja Tios tmëjja'aw tkënu'kxyjya'awënë,

¹⁰ mëj'ixy t'ijxtë ets tmëmoon tmëtujktë ko jëtu'un të tyuny të jyätyë, jä'ä ko y'ixy'ajtëp ënäty ja ja'ay mëti'ipë tekymya'at të y'ityën ets ko jä'ä mëti'ipë ijty y'amëtoopyën ja näypyutëkë ma ja mëjtsajptëjkën, ma ja tëjk'aawën ja Tsujpë.

Ko ja Pedro tnimëtyä'äky wi'ix ja tekymya'at të tsyo'okyën

¹¹ Ja tekymya'at mëti'ipë ënäty të tsyo'okyën, ka'ap ja Pedro ets ja Juan t'ëk'ëxmajtsnë. Ënät ja ja'ayëty pëyi'ikyë nyimiinëtë ma txëëwatyën Salomón Tyëjkwiin ma ënäty jap yajpaatën.

¹² Ko ja Pedro jëtu'un t'ijxy, ënät t'ënëmaay: Miits, Israel ja'ayëty, ¿tii ko mëj'ixy xyjyawëtë, tii ko ëëts janty mëj'ixy xy'ixtë jëtu'un tä jeexyë ëëts yë nkë'ëm mëk'ajtën të ntukyajtso'oktën, ëkë ijxtëm jeexyë ëëts të npa'ëyowtën mëët ja mëk'ajtën ëkë ja kutujkën?

¹³ Ja Tios mëti'ipë ja Abraham, Isaac ets ja Jacob y'ëwtajtën, ëëts ja n'ap'ajt n'ok'ajtëmë; yë'ë të tmëjjaw të tjaantyjyawë ja Tyuumpë Jesús, mëti'ipë miits mkë'ëyajtën ets y'ookëty; mëti'ipë ja Pilato jya'ëxmatsanën.

¹⁴ Miitsëty yë'ë ojts xyajnitukëtë ja wa'ats ja'ay mëti'ipë ka'ap tii poky tmëëtëtyën ets xyaj'ëwaatsëpëtsëëmtë ja yaja'ay'o'kpë.

¹⁵ Jëtu'un xyaj'o'ktë mëti'ipë ja juukyajtën xymyo'oyëmën. E ja Tios tëë yajjuukpyikyë ets ëëtsëty tëëjës kë'ëm ntimy ixtë.

¹⁶ Mëti'ipë miits m'ijxtëpën ets mnija'awëtëpën tyam, ets mëj'äämpy tyajnaxy ja Jesús, yë'ë ko yajmëpëky ja xyëëw. Ja mëpëjkën mëti'ipë yajmëët'ajtpën jam ma ja Jesús ja xyëëwën, yë'ë ja tekymya'at të yajtso'okyë, ijxtëm tyam ni'ëmukë xy'ixtën.

¹⁷ Mëku'uktëjkëty, ëjts nnija'apës ko miitsëty ets ja mwintsëntëjkëty xyaj'o'ktë ja Jesús, ka'ap ojts xyjyä'äkyukëtë tii mtuuntëpën.

¹⁸ E jëtu'un ja Tios të tkuuytyuny mëti'ipë y'akajpxtën ja kyäjpxynyajxpëtëjkëty ko yë Kristë y'ooka'any.

¹⁹ Paaty xy'ëxmatstëty ja m'ëxëëk winma'anyëty ets mwinpitëty ma Tiosën, jëtu'unts ja mpoky yajmä'kxtëty,

²⁰ ets ja Wintsën të mtuknikäxëtëty ja jotkujk'ajtën ko ja Kristë të myiny, mëti'ipë tëëyëp tyuknipëjktakëpën ko tkäxa'any.

²¹ Yë Jesús tëë nyijkxy jam tsajpjotm ets jam tyam yajpaata'any koonëm ja Tios tyaj'o'oyëtya'ajëty winë, ijxtëm y'ënantën ja kyäjpxynyajxpëtëjk mëti'ipë tëëyëp juuky'ajtëpën.

²² Jëtu'un ja n'ap'ajt nteety'ajtëm ja Moisés y'ënëmaayëtë: Mtuknikäxanëtëp tu'uk ja Wintsën ja kyäjpxynyajxpë ijxtëm ëjtsën. Mëmëtowtë tëkokyë mëti'ipë yë'ë nyikäjpxypën.

²³ Pën ka'ap tmëmëtoy tääpë Tios yë kyäjpxynyajxpë, ka'ap yajpaata'any ma ja Tios ja nyaax kyajpnën.

²⁴ Tëkokyë yë käjpxynyajxpëtëjkëty, tsyo'ontä'äky ma Samuel jyuuky'äjtyën, ojts nimëtya'aktë ko ënäty jëtu'un jyata'any kyëpäta'any tä tyam yaj'ixyën.

²⁵ Miitsëty tëë myajtukumaytyë ja Tios ja wyaantakën mëti'ipë ja käjpxynyajxpë ojts nimëtya'aktën, ets tëë näjyëtu'un myajtukumaytyë mëti'ipë ja Tios kyäjpxytyuunën mëët ja m'ap m'okëty: Ni'ëmukë ja naaxwiinyëtë ja'ay nëjkx yajkënu'kxtë ko ënäty yajkënu'kxtë ja m'u'unk m'okëty.

²⁶ Ko ja Tios tyajjuukpyijky ja y'u'unk, jëyëjp ojts miits mtuknikäxëtë ets mkënu'kxëtëty ets xy'ëxmatstëty ja m'ëxëëktu'un m'ëxëëk kajpxënëty.