Hechos 22 - Biblia Mixe de Quetzaltepec

¹ Miits, mëku'uktëjkëty, mëtowtë ja aaw ayuk wi'ixës tyam nnäkyukajpxa'anyën.

² Ko ja ja'ay tmëtoowtë ko ja Pablo hebreo ayuk kyäjpxyp, tää y'ëmoontaaytyë wäänëni'ik ets ja Pablo y'ënëmaayëtë:

³ Jutiis ja'ayës ëjts, Tarsis nmëxu'unk'ajty, Cilicia y'itjotm. Yaas Jerusalén të nyeeky, Gamalielës xyaj'ijxpëjk; wa'atsës xytyuk'ijxpëjky ja aptëjk ja y'ënä'ämën, etsës ja Tios ja jyä'ä npatuunëty ijxtëm miits xytyuunk'atën.

⁴ Ëjts ijty mëk npajëtijtyp ja mëpëjkpëtëjk ets nyaj'ookäämpyës mëti'ipë ja Jesús ja jyä'ä pyanëjkxëpën. Ntsuumës nmajtsës ja ye'etyëjk to'oxytyëjk.

⁵ Ets teety wintsën, mëët ni'ëmukë ja tsajptëkotyëtë yajuntë'ajtpë, yë'ë y'ijxtëp nyija'awëtëp koos nnëjkxy Damaskë. Yë'ës ja noky ijty xymooytyëp ets ja'ay nyajmintëtyës yaa Jerusalén ets yajtëytyuntëty.

Ko ja Pablo tnimëtyä'äky wi'ix ja Jesús tmëpëjktso'onyën

⁶ Ets ko ënäty jam ntu'uye'eyës, tamës ënäty nja'tanë Damaskë, kujkyxyëëwën; ënätës ojts ajotkumonë n'ijxpaaty ja ajajk atë'kxk na'ëwtityë mëti'ipë janty mëk ajajpën. N'ixyës ko tsajpjotm tsyoony.

⁷ Ënätës jämyë nkëtaay ets ojts nmëtoyës ja ayuk ko y'ënä'äny: Saulo, Saulo, ¿tiijës ko xy'ixjëtity xypyajëtiy?

⁸ Täätsës nyajtëëy: Wintsën, ¿mpën mijts? ets yë'ë, y'ëtsooy: Jesús, Nazaretëtë ja'ayës, mëti'ipë mijts m'ixjëtijtyp mpajëtitypyën.

⁹ Y'ijxtë ja nmëku'uktëjkës ja ajajk atë'kxk, je'eyëp ko kä'äp tja'akyujkëtyë wi'ixës nyajnëmaayën.

¹⁰ Täätsës nyajtëëy: ¿Tiijës ntunëp, Wintsën? Tääts ja Wintsën y'ëtsooy: Pëtë'ëk, ye'ey yë mtu'u, nëjkx jam Damaskë. Jam tu'kë'ëyë myajtuk'ëwaanëja'any mëti'ipë mtunëpën.

¹¹ Jä'ä ko tëëjës ënäty ja mëk ajajk xyajwiintsë, tääts ja nmëku'uktëjkës ojts xywyijtsnëjkxtë jam Damaskë.

¹² Jam ënäty tu'uk ja ja'ay mëti'ipë xyëëwajtypyën Ananías, yë'ë ja Moisés ja y'ënä'ämën pyatuunëp ets ni'ëmukë ja jutiis ja'ay mëti'ipë tsënaaytyëpën jam Damaskë oy nyimëtyä'äkyë.

¹³ Tääts ojts yë'ë xynyiminyës, ets xynyëmaayës: Mëku'uk Saulo, ijxpëk jatëkok. Tääts ojts ënätyë ja Ananías n'ijxpaatyës.

¹⁴ Ets xyjyaak'ënëmaayës: Ja Tios, mëti'ipë ja nteety'ajt n'ap'ajtëm ijty Tyios'ajtëpën, yë'ë të mwin'ixyë ets xynyijawëty mëti'ipë yë'ë tsyojkpyën, ets xy'ixëty mëti'ipë mëtëyën ets xymyëtowëty ko mmëkajpxëtëty.

¹⁵ Mijts ja naaxwiinyëtë ja'ay ni'ëmukë mtuk'ëwaanëp mëti'ipë të xy'ixy të xymyëtoyën.

¹⁶ E tyam, ka'ap jeky m'ëwxitëty. Pëtë'ëk ets mnëëpätëty, ja'amyäts ja Wintsën ets myajpokywya'atsëtëty. Jëtu'unës xynyëmaay.

Ko ja Pablo tmëtyä'äky wi'ix yajkexyën ma ja ja'ay ka'apë jyutiis'atën

¹⁷ Ko nwinpijtyës jam Jerusalén, jamës ojts nëjkxy ma ja mëjtsajptëjkën Tios mëkajpxpë, ënät ja Tios ojts xytyuk'a'ijxnaxyës,

¹⁸ N'ijxyës ja Wintsën ets xynyëmaayës: Jotëkoy ets mpëtsëmëty yaa Jerusalén. Ka'ap yë ja'ay tmëpëka'antë koos mijts xyjyanikäjpxy xyjyanimëtya'akëty.

¹⁹ Täätsës n'ënëmaay: Wintsën, nyija'awëtëp yë'ëjëty koos ijty ëjts nnëjkxy ma ja tsajptëjkën etsës nyajnëjkxy pujxn tëkoty mëti'ipëjaty mijts mmëpëjkëpën etsës nyajwopy nyajka'atsyë.

²⁰ Nyija'awëtëp näjyëtu'un koos jam nyajpaty ma ja Esteban y'o'kyën, mëti'ipë ijty mnimëtyakëpën. Tamës ënäty ëjts nyajpaaty ets n'oy'ijxës ko tyaj'o'ktë; ëjts ojts ja yaja'ay'o'kpë ja wyit nkëwent'ajtëtë.

²¹ Täätsës ja Wintsën xynyëmaay: Nëjkx, jam mijts nkäxa'any jëkäm ma ja ja'ay ka'apë jyutiis'atën.

Ko ja Pablo ja mëj tsiptuunpë wintsën yë'ë kyëwent'atyë

²² Ko ja Pablo kyajpxtaay, ënät ja ja'ay tyëjkëtyë yaxpë jojkpë: Tääpë ja'ay ka'ap nyitëkëty jyuuky'atëty. Jo'tsë xyëëw yaa naaxwiiny.

²³ Tyam tukyaax tukjokëtë ets tyam ja nyijän t'ajëpiptë ets ja pu'uxm twëjë'ëktë.

²⁴ Paaty ja mëj tsiptuunpë wintsën ojts tni'ënä'ämë ets ja Pablo yajpëjkta'akëty ma tsiptuunpë y'itën. Tääts tni'ënä'ämëy ets ja Pablo je'eyë yajwopëty ets atsip tuknikajpxa'antë tii ko ja ja'ay tyukyä'äxy tyukjokyë.

²⁵ Ko ënäty ja Pablo të yajkutsuumnë ets yajwopa'any, ënät ja Pablo t'ënëmaay ja tsiptuunpë wintsën mëti'ipë ënäty jam wopanëpën: ¿Yajkutujkpy ja ënä'ämën ko tu'uk yë Romë ja'ay yajwopëtyë ets ka'anëm yajpaye'eyë?

²⁶ Ko tmëtooy ja tsiptuunpë wintsën, tää ojts tuk'ëwaanë ja mëj tsiptuunpë wintsën ets t'ënëmaay: ¿Tii mijts mtunäämpy?, Romë ja'ayts tääpë ja'ay.

²⁷ Tääts ja mëj tsiptuunpë wintsën twinkuwa'këy ja Pablo, ets tyajtëëy: ¿Mjanty Romë ja'ay mijtsë? Tääts ja Pablo y'ëtsooy: Jëtu'un, Romë ja'ayës ëjts.

²⁸ Tääts ja mëj tsiptuunpë wintsën t'ënëmaay ja Pablo: Tëës ja nmeeny ni'ik nyajtuny koos Romë ja'ay të n'awinpity. Tääts ja Pablo y'ëtsooy: Ëjts ka'apës ninu'un të nkujuy, Romë ja'ayës ëjts jä'ä ko jëtu'unës nmëxu'unk'ajty.

²⁹ Ko jëtu'un jyäjty kyëpejty, ënät ja tsiptuunpë ye'eywya'kxtaaytyë mëti'ipëty ënäty ja Pablo wyopantëpën. Ja mëj tsiptuunpë wintsënpaat ojts tsyë'ëkë ko ja Pablo Romë ja'ay, jä'ä ko tëë ënäty tkë'ëtsumy mëët ja pujxntejpxy.

Ko ja Pablo yajmënëjkxy ma ja tsajptëjk yajjuntë'ajtpë wyintuuy

³⁰ Komjëpom, yë'ë ënäty ja mëj tsiptuunpë wintsën, oy tnijawëja'any tii ko ja Pablo ja jutiis ja'ay nyi''ëënëty. Tääts ojts tkë'ëkejy ets ja teety wintsëntëjk twoowmujky mëët ni'ëmukë ja tsajptëkotyëtë yajuntë'ajtpë. Tääts ja Pablo tyajpëtsëëmy ets twoowmiiny may ja'aywyintum.