Hechos 11 - Biblia Mixe de Quetzaltepec

Ko Pedro tnimëtyä'äky mëti'ipë ënäty të tyuny të jyätyën

¹ Ja ijxpëjkpëtëjkëty ets ja mëpëjkpëtëjkëty mëti'ipë jamëtyën Judea y'itjotm ojts nijawëtë ko ja ka'apë jyutiis'atën tëë ënäty tmëpëktë ja Tios ja y'aaw y'ayuk.

² Ko ja Pedro wyimpijty jam Jerusalén, ënät ojts y'ojëtë ja mëpëjkpëtëjkëty mëti'ipë myëpëjktëpën ja Judaísmo ijxpëjkën.

³ Ets y'ënëmaayëtë: ¿Tii ko ojts të xykyu'ixë mëti'ipë ka'ap jyutiis'atën? ¿Tii ko mëët të mkay të m'uuky?

⁴ Tääts ja Pedro tnimëtyäky mëti'ipë ënäty të tyuny të jyätyën:

⁵ Jam ënäty ëjts Jope kajpnjotm, Tiosës jam nja'amyejtsyp ets n'a'ijxnajxyës ko xynyikëtä'äkyës tsajpwinm ijxtëm mëj witën taxk täk tsyumyëty.

⁶ Ko ojts n'ijxwa'atyës, ënätës n'ijxpaty ko tap ja jëyujk mëti'ipë taxk ja tyekyën ets ëwa'anëtypë, nän tap ja tsa'anyëty ets ja jëyujk mëti'ipë kääkëtijtëpën.

⁷ Ets nmëtooyës tu'uk ja ayuk mëti'ipë ënaanpën: Pëtë'ëk, Pedro, yaj'ook ets xytsyu'utsëty.

⁸ Etsës n'ëtsooy: ka'ap, Wintsën, nijëna'ajës nkatsu'utsy mëti'ipë ëxëëkën ets mëti'ipë ka'ap pyaat'atyën ets yajtsu'utsëty.

⁹ Ënät ojts jatëkok xymyëkäjpxyës: Ka'ap xytyijëty ëxëëk mëti'ipë Tios të tyajwa'atsyën.

¹⁰ Tëkëëk ok jëtu'un nmëtooyës, ënät ja wit pyatëjkënë tsajpjotm jatëkok.

¹¹ Näy jää ja ja'ayëty ojts nitëkëëk jya'të ma ja tëjkën ma ënäty ëëts jamëtyën, ëjts xy'ixtaaytyëp, Cesarea tsyoontë.

¹² Ënät ja Kënu'kxymyëkajtën xynyëmaayës etsës ja kukäjpxy mpanëjkxëty ets ka'apës n'amäjtsk njotmäjtskëty. Ojts näjyëtu'un xypyanëjkxtës ya'atë nitëtujkpë mëpëjkpëtëjk. Ets ni'ëmukë ntëjkëtyës ma ja Cornelio ja tyëjkën,

¹³ ets xytyukwinkumëtyakëtyës wi'ix ënäty të t'ixyën ja tsajpjotmëtë kukäjpxy ets wi'ix y'ënëmaayën: Käx tu'uk yë mkukäjpxy ets nyëjkxëty jam Jope. Wä'än ja Simón nëjkx twoy mëti'ipë yajtijpën Pedro.

¹⁴ Yë'ëts mtuk'ëwaanëtëp wi'ix mnitso'okëtyën mijts ets mëët ni'ëmukë mëti'ipë tsënaaytyëpën ma mjëën mtëjkën.

¹⁵ Koos ojts nmëmëtyaktsoontë, ënät ja Tios ja Kyënu'kxymyëk'ajtën myiiny ma yë'ëjëtyën, ijxtëm ëëts ojts xytyukkëtakëmën mëjëyëjp.

¹⁶ Ënätës nja'amyejtsy ja Wintsën ja y'ayuk, ko y'ënäny: Tëy ko ja Juan yajnëëpejty nëë mëët, miitsëty Kënu'kxymyëkajtën nëjkx mëët mnëëpätë.

¹⁷ E jëtu'unës n'ëna'any, pën Tios të myo'ojëtë ja mëti'ipë ojts näjyëtu'un ëëtsajtëm nyajmo'oyëmën ko të nmëpëjkëmë ja Wintsën Jesukristë, ¿ëjts tiis natuunta'akëp etsës n'akajpxtukëty mëti'ipë Tios tëë tuknipëjktaakën?

¹⁸ Ko jëtu'un tmëtoowtë ja Jerusalenkëtë mëpëjkpëtëjkëty, tää amonyë wyë'ëmtaaytyë ets ja Tios tmëjja'awëtyë: Tyam yajja'akyukë ko tëë jëtu'un ja Tios tuknipëjktaakë ets näjyëtu'un tpaatëty ja juukyajtën xëmëkyëjxmëpë mëti'ipë ka'ap jyutiis'atën, ko ja y'ëxëëk winma'any të t'ëxmatstë.

Ko ja'ay tmëpëktë ja Jesús jam Antioquía

¹⁹ Ko ja Esteban tyaj'o'ktë, tääts ja mëpëjkpëtëjk yajpajëtijtaktë may ojts kyukääkëtë jam Fenicia, Chipre ets Antioquía. Jamts ojts tkajpxwa'kxtë ja Tios ja y'aaw y'ayuk ma ja jutiis ja'ayëtyën.

²⁰ E tam ja mëpëjkpëtëjkëty mëti'ipë kukajpn'ajtëp jam Chipre ets Cirenë, jä'ä ojts nyëjkxtë Antioquía ets tkajpxwa'kxtë ja oy aaw oy ayuk ma ja ja'ayëtyën mëti'ipë ka'ap jyutiis'atën.

²¹ Mooyëtë ja Wintsën ja myëk'ajtën ets may ja ja'ay ja y'ëxëëk winma'any t'ëxmajtstë ets tmëpëjktë ja Wintsën.

²² Ko tnija'awëtyë ja mëpëjkpëtëjkëty ko jëtu'un jam Jerusalén tyunyë jyätyë, ënät ojts tkäxtë ja Bernabé jam Antioquía.

²³ Ko jam jyä'äjty ja Bernabé ets t'ijxy wi'ix ja antioquiiëtë ja'ay ënäty tëë ja Tios kyënu'kxëtën, ënät ojts jotkujk nyäjyawëty ets tjotmëkwinkajpxëy ets ëmuumtu'ukjot ja Wintsën tmëpëktëty.

²⁴ Jä'ä ko oyjyä'äy ijty ja Bernabé, mooyëp ja Kënu'kxymyëkajtën ja mëk'ajtën ets ja winma'any ets tunëty mëti'ipë ja Tios tsyojkpyën. Amuumtu'ukjot ja Jesús tmëpëky. Jëtu'un ojts nyimayëtë ja ja'ay mëti'ipë myëpëjktën ja Wintsën.

²⁵ Ënät ja Bernabé ojts nyijkx Tarso ets ojts t'ixta'ay ja Saulo.

²⁶ Ko tpaty, tää ojts twoy jam Antioquía. Jam ojts y'itë kä'pxy tu'kjëmëjt mëët ja mëpëjkpëtëjkëty ets ja ja'ay may tyaj'ijxpëjktë. Jam Antioquía ojts ja mëpëjkpëtëjk ëka'any yajtijtë Cristianë.

²⁷ Näy jää jëmëjt ojts jënaakën ja Tios ja kyäjpxynyajxpë kyëta'aktë mëti'ipë tso'ontëpën jam Jerusalén ets ojts jya'të jam Antioquía.

²⁸ Tu'uk txëëwaty Agabo, jä'ä ojts wya'kukë mayjyä'äyjotm ets ojts Kënu'kxymyëkajtën yajkäjpxyë ko ënäty y'ita'any ja mëk yuu ma tu'kë'ëyë ja Roma ja y'itjotmën. Jajt jëtu'un ko ja Claudio yajkutujky.

²⁹ Ënät ja mëpëjkpëtëjk tkäjpxy'ajtë ko ja myëku'uktëjk tuknikäxa'antë ja putëjkën mëti'ipë tsënaaytyëpën jam Judea; jëtu'un tyajktë winë ijxtëm pën myëtä'äkyën.

³⁰ Ojts tyajmuktë ja näypyutëkë ets ja Bernabé tmënëjkxëty ja putëjkën mëët ja Saulo ets tmo'otëty ja mëjja'aytyëjk jam Judea.