Hebreos 8 - Biblia Mixe de Quetzaltepec

Jesús kutënääpyë ma Tiosën

¹ Yë'ë kopkpëky mëti'ipës tyam nnikajpxtëpën: Ko ja nTeety'ajtëm mëti'ipë nyiwintsën'ajtypyën ja teetytyëjk, tëë jam tsajpjotm nyaaxweetsy, a'oytsyow ma ja Tios ja kyutujktaknën.

² Jap ja tyuny ma ja mëtëypyën ets wa'atspë ja tsajptëjkën mëti'ipë ja Wintsën të tkojyën, ka'apë jyä'äyëtyën.

³ Ni'ëmukë ja Teety wintsën tëë yajtuknipëjktë ets tyakëty ja wintsë'kën, paaty ja nteety wintsën'ajtëmë näjyëtu'un ja wyintsë'kën të tmo'oy ja Tios.

⁴ Ko jeexyë yaa naaxwiiny tsyëënë, ka'ap jeexyë tyeety'äty, jä'ä ko tää teety yaa mëti'ipë tuuntëpën ijxtëm ja Moisés ja y'ënä'ämën y'ënä'änyën.

⁵ E ya'atë teetyëty jap tyuntë ma tu'uk ja tëjkën ma ja tsajpjotmëpë të nyikojtu'utyën. Ets yajnija'ap ko je'eyë të nyikojtu'uty, jä'ä ko ja Moisés ënäty jam tkoja'any ja tsajptëjk, jëtu'un ojts ja Tios nyë'ëmxëty: Mëtoowkukë yajxon ets näjyëtu'un xykyojëty ijxtëm të ntuk'ixyën jam kopkëjxm.

⁶ E ja nteety'ajtëmë mëti'ipë nyikopk'ajtypyën ja teetytyëjkëty, mëti'ipë të t'ëxajën ja tuunk ets tyeety'atëty mëj'äämpy, yë'ë kyutënääpy ja jempyë ja käjpxytyu'unën ja ni'ik oypyë, ets ja waantakën wäänë oypyë.

⁷ Ko jeexyë oy të wyimpëtsëmy ja mëjëyëjpë ja käjpxytyu'unën, ka'ap jeexyë kopkpëky wiinkpë käjpxytyu'unën të y'apaatë.

⁸ E ja Tios ojts tpaaty ja poky ma tääpë ja'ayëtyën, ets y'ënäny: Jëtu'un y'ënä'äny ja Wintsën: Minaanp ja xëëw jëmëjt koos ja jempyë käjpxytyu'unën nyaj'apaatëja'any mëët ja Israel ja'ayëty ets ja Judá ja'ayëty.

⁹ Ka'ap y'ëkjëtu'un'ajnë ijxtëm ja y'aptëjk ojts mëët nkäjpxy'ätyësën ko ojts nyajpëtsëmtës jap Egiptë y'itjotm; jä'ä ko ka'ap tpatuuntë mëti'ipës ojts mëët nkäjpxy'atën, paatyës ojts n'ëxmatstë.

¹⁰ Jëtu'un y'ënä'äny ja Wintsën: Ja käjpxytyu'unën mëti'ipës nyaj'apaatëjäämpyën mëët ja Israel ja'ayëty, jä'ä xëëw, yë'ë ya'atë, jëtu'un y'ënä'äny ja Wintsën: Wyinma'anyjotyës npëjkta'aka'any ja n'ënä'ämënës ets njaaywyë'ëma'anyës ma y'aaw jyotëtyën, ëjts xyWintsën'atantëp, ets yë'ëjës nja'ay'atäämpy.

¹¹ Ka'ap nëjkx y'ëkkopkpëky'ajnë pën ja myëku'uktëjk tuk'ixpëkëty pën ëjts, jä'ä ko tëëjës ënäty ni'ëmukë ja'ay xy'ixy'atë, mëjpë mutskpë.

¹² Nnimäkxta'ajäämpyës ja y'ëxëëktu'unënëty, ets nijëna'ajës ja pyoky nka'ëkja'amyäjtsënëtëty.

¹³ Ko ja Tios ya'atë käjpxytyu'unën jemypyë tnimëtyä'äky, yë'ë tyijpy ko ka'ap y'ëktuunnë ja jëwyiinpë; ets mëti'ipë ka'ap y'ëktuunën, tim jawäänë jyaak ijty ets tyëkoyä'äny.